Read Mmen Ətefɨ̂aʼ 9 Bible Online

Ətefɨ̂aʼ 9 - Mmen bible

Ətefɨ̂aʼ 9

¹Sɔ̂l tè pa kâyntə̀ kə ètyaʼa nə zhi nə̀ zhwitə̂ sèchùmtè sə Pɛ̂pɛse. È və ndò ndûə sê wùə èkɔʼsə nə èshyə̀ engaŋtə kwəynə,

²ə pìə sê vəyn nə è fo ŋwàʼlè ə zhi ndu tyəyn se ghɨ ghaʼâ ə səndɛ sə atsɨ̀ynte sə ghɨ Njûsghè ə Ndàmaskùs ə zhi kyite chùmtè sə Njisə̀sè nâʼà sèkɨ̂m ə zhi kɛse pəyn è səynse ə Njèlusalɛ̀m, kɨ̀sə ə̀ nyi pî ə̀ ndômnè, kɨ̀sə ə̀ nyi pi ə̀ zəyn.

³Ə pə̀ kə Sɔ̂l pə̀yn paʼse ə Ndàmaskùs, ghol emɨanəze ə pfɨ̀ŋə̀ mɨ̂anə̀ ekwùtwəyn ə panə wiynə vəyn vekɨ̂m.

⁴È və pfɨə ə chi ə zɨə kə kyə̀ pì sê vəyn nə, “Sɔ̂l, Sɔ̂l, ò tsə̀fsə̀ mi nyi kûmə̀ghè?”

⁵Sɔ̂l ə pfɨfə nə, “Pɛ̂pɛ, Ə̀ nyì ghô ndè?” Kyə̀ ə̀təyn ə pə̀ynsə̀ nə, “Ə̀ nyi mi Njisə̀s, vɛ ə ò tsə̀fsə̀ vəyn za.

⁶Pîza, ndwi ə njiə ndûə əfètəyn èndaʼ, kə ə tsayn ghɛ zɛ ə ò kyi se nə̀yn.”

⁷Ndômnè ghɛ ə ghe tè kwiə yî Sɔ̂l ə tyəmə̂, ə kɨmə̂ kə nyi mɔŋ kûmə̀ nə ghənə tè zɨ kyə̀ ə̀təyn pîza ə tàʼa fe wùə vɛ ə è wàmnè.

⁸Sɔ̂l ə ndwìə ə chi ə zàynsə̀ ə̀shi ə vəynghe pîza ndomve va kə è fe nâʼà àfɨa kyîke. Ə ke kyi vəyn ekɔyn ə shìyntə̀ njiə ndûə è vəyn endaʼ ə Ndàmaskùs.

⁹È və nə̀ mtuʼ mta vayn kàʼa è fe. Fumə ashìŋə̀, è tè paʼà zhi ə tàʼa mɨ afɨa kyîke.

¹⁰Wùə vîvè mə è və pomə̂ se Njisə̀s tè nyiə nyi ə Ndàmaskùs, zə vəynze e nyi Ànàniyàs. È və fe ə̀ghɛ ətelaynəlayn. Fumə əfètə̂ ghɛ ghɛ ə è tè fe əte laynəlayn, Pɛ̂pɛ ə tɔŋɔ̂ vəyn nə, “Ànàniyàs!” È və pomə ə pìə nə, “Pɛ̂pɛ m vɨ̀nə.”

¹¹Pɛ̂pɛ ə pìə sê Ànàniyàs nə, “Ndwi ə ndùə endom vɛ ə tɔŋtə nə Endom e Nanəve ə pfɨfə ndɛ̂ wùə vîvè fu, e tɔŋtə̂ vəyn nə Njondàs. Ə ò ndù zaʼâ fu, o pfɨfə wùə vîvè mə è ndo endaʼ ə Tasùszè, e tɔŋtə̂ nə Sɔ̂l. Nâʼà zôyn nyi, è nyi fu tsə̂mə̀,

¹²mə è və fe ghɛghe ə telaynəlayn. Fumə ə telaynəlayn, e və fe wùə e tɔŋtə̂ nə Ànàniyàs è ve pə̀yn ndə̂m gho ə vəynghe ə vəyn atu, nə è və fɨnə fe tèluʼ.”

¹³Ànàniyàs ə pə̀ynsə̀ piə nə, “Pɛ̂pɛ, ghɨ ə tsɨəghe ə tsàyn sê mi kûmə̀ wùə vɨ̂yn, è ghɛ ə tɛ ghɛ ə è tè nə sê ghɨ ghɛghe ə Njèlusalɛ̀m.

¹⁴È ve pə̀yn zôyn ə Ndàmaskùs è tyaʼa mə ke ndo sê wùə kɔʼsə nə̂ èshyə̀ è ngaŋtə nə è kyite nâʼà ə̀ghɨ ə̀kɨ̂m ghɛ ə ngɨmnə zə zɛze.”

¹⁵Pîza Pɛ̂pɛ ə pìə sê Ànàniyàs nə, “Nduə, kûmə̀ nə mə chɔʼ wùə nə vɨ̂yn nə è fɨ̂aʼ sê mi. È nə nə̂ ə ghɨ atumə è fɔ̂yntə ghənə̂tè, è ghɨə Isìlâyghè, ke Mi.

¹⁶Mə nâʼà Mi è ngɨŋ zɨ̂m nə̀ tyə̂nə̀ se vəyn kyì ə ngəʼ zɛ ə è kyi se zɨ kûmə̀ Mi.”

¹⁷Ànàniyàs ə ndò ə ndùə njiə ndɛ zɛ ə Sɔ̂l tè nyi ətəyn ə ndə̀mə̀ ə̀gho ə vəyn atu ə pìə nə, “Ànyì vɨ̂mè Sɔ̂l, Pɛ̂pɛ è ngɨŋə̂ vəyn ə tom mi sê ghò, ə Njisə̀s è ngɨŋə̂ Vəyn vɛ ə È fə pfɨ̀ŋə̀ fɨ ə ghò əshi endom kə ò fe pə fâyn. È tom mi sê ghò nə ò kɛse fe tèluʼ ə ò lwiyn è Zuʼse Ŋwaʼase.”

¹⁸Kè sə ashìŋə̀, fɨake ə fɨə kə ewû ambɔ̀vè ə Sɔ̂l əshi ə tàyntə̀ ə chi, è və zhə̀tə̀ se kɛsə fe teluʼ. È və ndwìə ə fiə m̀mo,

¹⁹Ə pə̀ kə è zhi fɨake, tyaʼa vəynke ə kɛsə̂ pə̂. Sɔ̂l ə fɨnə ndamtə̂ kɔʼɔ pə̂ mtuʼlə̂ yighə̀ ghɛ ə tè nyi mə ə pomə̂ Njisə̀s ə Ndàmaskùs,

²⁰È və ndò ə chəmə ndùə kə ə sendɛ sə atsɨ̀yntese ə shɨŋ nə zɛ ə zhə̀tə̀ sè ndàʼà tom èchùŋ nə Njisə̀s nyi Vâ ə̀ Fèzhə̀.

²¹Nâʼà ə̀ghɨ əkɨ̂m ghɛ ə ghe tè zɨ kə Sɔ̂l ndàʼà tom ə̀ Fèzhə̀ tè nyi èkaynze. Ghənə e pfɨfə nə, “Ə̀ vɨ̂nə va wùə vɛ ə è tè zhwitə ghɨghə Njèlusalɛ̀m kûmə̀ nə ghənə tɔŋtə̂ èzə ə Njisə̀s zə? Piə è pə̀yn kepî fayn kûmə̀ eghɛ nə zɨ̂yn se kyitə̂ əghɨ pomə se kɛse ndùə fo sê ghɨ ngɨmnə nə eshyə̀ ngaŋtə ghə?”

²²Pîza Sɔ̂l ə pɨlə ndaʼà nduə kə tom èchùŋ ə̀ Njisə̀s eshike è tyaʼke. Ghɛ zɛ ə è tè nə̂ se tyə̀yn nə Njisə̀s nyi vɛ ə chɔʼ ndə̂m tè panə kə ndayn, zə nə̀ ghɨə Njûs ghɛ ə ghe tè ndamə ə Ndàmaskùs e fɨyn kyi va nâʼà èghɛ zhîze se pì.

²³Ə pə̀ kə tuʼm̀ tsɛ̀ setsɨ̀, ghɨə Njûsghè ə tsɨ̀yntə̀ kaʼke amɔ̀ʼ sè fɨasə se zhwiə Sɔ̂l.

²⁴Pîza ghɨghe ə pə̀ tsâ se Sɔ̂l nə ə nyîə fɨasə vəyn. Ə tè nyi èchwì, pî ètuʼve ghənə e chîynə̀ kə vəyn echô mbàyn èndaʼ nə zɛ se zhwi.

²⁵Ə tè nyi etuʼve tuʼ fîfe, chùmtè èpàm sə Sɔ̂lsè ə njìə vəyn ə ndə̀mə̀ ə àkɛ̀ ə fɨsə̂ vəyn apùʼ ewìyn ə mbàyn zɛ ə è tè nyi mə è zə kyɨ̀ŋ ka ndaʼ ətəynze ə tsosə̂ tɔmə ə pyɨəyn, è və tə ndô.

²⁶Sɔ̂l ə ndùə ə Njèlusalɛ̀m. Kə è ndù zaʼâ fumə, è və mɔ̀msə̀ se tsɨ̀yntè yîghə̀ ghɨ ghɛ ghe pomə se Njisə̀s, pîza ghənə əkɨ̂m e fânə̀ vəyn kûmə̀ nə ghənə tè pomə va nə è nyi mə è və pomə sê Njisə̀s.

²⁷Pànapàs ə pə̀ kyîə ekɔyn ə vəyn ə njìə ndùə è vəyn sê ghɨətom. È və tsà paynsə̂ sê ghənə nə Sɔ̂l ə tə fe Pɛ̂pɛ ə telaynəlayn endom kə è ndùə ə Ndàmaskùs, è ghɛ zɛ ə Pɛ̂pɛ tè tsàyn se vəyn. Pànapàs ə fɨnə pîə nə Sɔ̂l ə tsàyn tom èchùŋ ə Ndàmaskùs kûmə̀ Njisə̀s mə è fànə̀ va.

²⁸Sɔ̂l ə faŋa sè ndamə kɔʼɔ kə yî ghɨətomə, kwiə ka kə Njèlusalɛ̀m èkɨ̂m, ndàʼà tom èchùŋ ezə Pɛ̂pɛze, fanə̀ va.

²⁹È tè wàmnə̀ fɨnə saʼnə̂ ə̀ghɛ yî ghɨ Njûs ghɛ ə ghe tè wàmnə̀ wâmnè ə Nglêkzè. Ghənə zhə̀tə̀ sè fɨasə se zhwiə vəyn.

³⁰Ə pə̀ kə ghɨ pomə zɨ paynse nə ə kyiŋə se zhwiə Sɔ̂l, ghənə ə təsə̂ tsosə̂ vəyn endaʼa kàysalyàzè ə tiynsə̂ vəyn endaʼa Tasùszè.

³¹Ə̀ nyì se zhə̀tè fumə ashìŋə̀ kə ghɨ ghɛ ə tè pomə Njisə̀s epɨ̀as endaʼ vekɨ̂m ə Njòndyâ è Ngalìlî è Sàmalyà tè kyi pɔ̂ynè. Ghənə tè nyiə kyi èfâyn ə Fezhə̀zè ə ghənə ə fètəyn, Zuʼse Ŋwaʼase nə̂ nə ghənə tɛ, kɔ̂yn ə ghənə̂kè e ndəmə̂.

³²Kə Pità tè kwiə ka tsɛ̂ ə telùʼ ə telùʼ ə fètəyn èndaʼ, è və ndùə se mòtè əghɨ ə Fezhə̀ ghɛ ə ghe tè ndamə endaʼ ə Lindàzè.

³³Ə pə̀ kə è ndù zaʼâ fu, ə kotə̂ wùə fumə zɨə vəynze nyi Èneyàs, mə pâs ə wìynke ə kwu è və nyìŋə̀ faŋə ekwì sə se pìŋ sèfamə.

³⁴Pità ə pìə sê vəyn nə, “Èneyàs, Njisə̀s Klâys nə̀ tsuʼə gho zôyn. Ndwi ə fɛtə̂ èkwî vɛve.” Èneyàs ə ndwìə kə sə ashìŋə̀.

³⁵Nâʼà ə̀ghɨ əkɨ̂m ghɛ ə ghe tè ndamə ə Lindà è Shalɔ̀yn, ə fe kə wùə ə̀təyn tè nyi mə è və tɛ, ghaynə̂ ka, ghənə ə pə̀ynsə̀ ətəm ə ghənə̂ghè ə zhə̀tə̀ se pomə sê Pɛ̂pɛ.

³⁶Ə̀ tè nyi ə Njopà, wùzhɔyn e pomə vîvè e nyi fu, zə vəynze e nyi Tàpità. (Tàpità ewàmnè ə Nglêkzè nyi nə Ndokàs mə ze za tyə̀nə̀ nə fechwi) È tè ndamə nə̂ kə ə̀ghɛ əchûŋə̀ shîŋə̀ tekɨ̂m fɨnə fo ètsâmtè sê ghɨ afɨfə.

³⁷Ə tè nyì fumə ashìŋə̀, è və pfɨ̀ə è zafze ə kwuə. Ə shùə èpfɨyn ə vəynze ə kɔʼɔ nyɨ̂ŋsə̀ vəyn ə lûmə̀ ndɛ èkwùtwəyn.

³⁸Ə̀ tè tyàfə va se ndò ə Njopà se ndù ə Lindà. Ə pə̀ kə ghɨ poməghe zɨ nə Pità nyi ə Lindà, ghənə ə tomə ə̀ghɨ ə̀pɛ̀ sê vəyn è chatêzè nə “È zaŋse pəyn sê ghənə.”

³⁹Pità ə pɨaʼtə̂ ə ndùə yighə̀ ghənə, ə pə̀ kə è ndù tâyn fumə, ghənə ə njìə kɔʼɔ è vəyn ə lûm ə̀ ndɛ èkwùtwəyn. Zhwiə kwuə nâʼà ə̀kɨ̂m fu ə zùŋtə̀ ka ə və ngwùŋ, chîə tyə̂yntə̀ sendzɨs sə ghənə̂sè, è laf əmɔ̀ʼɔ vɛ ə Ndokàs tè tàsə sê ghənə kə è tè pa nyi ètwɔ.

⁴⁰Pità ə pìə nə ghənə ə̀kɨ̂m fɨ ndu əpɨəyn. È və tɨmə ə̀ndzɨs ə vəynghe ə chi ə tsə̀mə̀ sê Zhə̀fè. È və kə̀mnə̀ ndûə èwiyn ə pìə sê pfɨyn ətəynze nə, “Tàpità, ndwi.” È və zàynsə̀ əshi ə vəynghe ə fe Pità, kè sə ashìŋə̀ ə ndwìə tsɨsə̂.

⁴¹Pità ə kyîə ndwisə̀ vəyn ə tɔŋnə̂ ə̀ghɨ poməghe è zhwiə kwu ghɛ ə ghe tè nyì fumə, ə tyə̀ynə̀ sê ghənə nə Tàpità nyi ètwɔ.

⁴²Saʼghe kûmə̀ èghɛ nə zɨ̂nə̀ ə waŋə kə tə̀ʼ ə Njopà èkɨ̂m, ghɨ tsɨəghe ə pomə sê Pɛ̂pɛ Njisə̀s.

⁴³Pità ə ndamtə̂ ə Njopà sə mtuʼlə̂ ə wùə vîvè ə ndɛ zə vəynze e nyi Shimùyn mə è tè nə̂ efɨaʼ è pfɨ̀ sə nyâmsè.