Read Mmen Lûm 11 Bible Online

Lûm 11 - Mmen bible

Lûm 11

¹Pfɨf zɨme zôyn nyi nə: Zhə̀fè tè tə ndô ghə vəynghe nə əghɨ mə? E vachi za! Ə mi èngɨŋ zɨ̂mè nyi wùə Isìlây, ə feghâŋ fə Aplàghâmfè, ə wùə ètàŋ ə Penjamə̀ynzè.

²Zhə̀fè tè pâʼà tə ghɨ ə vəyn ghɛ ə è tè chitê ə zhə̀te. Ghàyn keva ghɛ zɛ ə ŋwàʼlè ə̀ Fèzhə̀ pì kûmə̀ Èlanjà kə è tè chyatə Zhə̀fè, tsâ ə̀ghɛ ghɛ ə ghɨ Isìlâyghè tè nə̂ sê vəyn.

³È tè tsàyn sê Zhə̀fè nə, “Pɛ̂pɛ, ghɨ ghɨ̀nə tə zhwitə̂ mɨ̂sê fɨ̀aʼtè sɛse, ə saʼte elwɔŋ vɛve ə tefove. Ə̀ faŋ ke mi mi nɨŋ, ghənə e pa kyiŋə kəpî se zhwiə mi”

⁴Ə̀ nyi apə̂ynse àkè ə Zhə̀fè tè fo sê vəyn ə? È tè pə̀ynse vəyn nə, “Mə ndə̀m ghɨ kamse esɛ̀mbɛ nə ə̂ nyi ə̀ghɨ ghɨmghe. Ghənə nyi əghɨ ghɛ ə ngɨmnə va Pâl, ə̀ nyi Fèzhə̀ fə akaŋfe.”

⁵Ə̀ nyi zamə kə ze nyi zôyn. Shitə̀ mə ghɨ̀mè nyì ndô ə Isìlây mə Zhə̀fè ə chitê è fùʼ ə vəynke.

⁶Chitê ə vəyn nə zɨ̂yn nyi kûmə̀ àfùʼ ə Vəynke, ə̀ vachi kûmə̀ èghɛ zhîze kə ghənə nyi mə ə nə̀yn. Ə ze fə nyi nə Zhə̀fè chitə̂ ə̀ghɨ kûmə̀ eghɛ zhîze kə ghənə nyi mə ə nə̀yn, mə fùʼ ə Vəynke ə fɨyn kiva zhɨynze.

⁷Zɨnə mə tyə̂nə̀ nə ghɛ? Ghɨ ə Isìlâyghè tè pâʼà paynsê kyî fɨa kɛ ə ghənə tè kyiŋə se kyî. Ghɨ ghɛ ə Zhə̀fè tè chitê, ə tə kyî fɨa kɛ ə ghənə tè kyiŋə, pîza ghəmɔ̀ʼɔ ghɛ ə tè tàʼa chitê ə tɛsə̂ ə̀təm ə ghənə̂ghè.

⁸Ə nyi mə ə nyàʼ ə ŋwàʼlè ə̀ Fèzhə̀ nə, “Zhə̀fè ə nə̀yn nə ghənə ə nyi èngo. Se zaʼâ ndàyn, ghənə vayn kàʼa ə fe, vayn kàʼa zɨ.”

⁹Ndàfît ə tè pì nə, “Zhi tsə̂mə̀ nə, ò nəyn ə fɨa vɛ ə ve nə̂ nə ghənə ə saŋnə̂, ə nyi kə atam, ə zhiə ghənə̂vè kɛse sə atam sê ghənə. M tsə̂mə̀ nə ghənə pfɨ, ə Zhə̀fè pɔynse ghənə ətə̂ ə̀ghɛ ghɛ ə ghənə nə̂.

¹⁰M tsə̂mə̀ nə ə Zhə̀fè nəyn ə ghənə fof kə ghənə ə vayn kàʼa fe. M tsə̂mə̀ nə è nəyn ə ghənə pɨaʼa pɨ̀aʼà kɛ ə ke tɨlə̀ kə ke kàʼa ə ke nəyn ə tsɨmsə ghənə̂sè ndɨmə faŋ.”

¹¹M pfɨfə kəpî nə, shîŋə̀ kɛ ə ghɨə Njûsghè tè tɨm ghol ə ghənə̂ghè ə pfɨ̀ə, ghənə tè pfɨ̀ faŋ ke ndò mə? E va za nâʼà səkɔs! Ə̀ tè nyi kə ghənə nə̂yn pi, Zhə̀fè ə kwàʼtə̀ ə̀ghɨ ghɛ ə̀ vachi ə̀ghɨ Njûsghè ə fo esɔzaze sê ghənə. Fe tè nəyn nyî kə ghɨ Njûsə̀ kɛse ə ghəʼə̀ ə̀ghɨ ghɛ ə̀ va əghɨ ə Njûsə̀.

¹²Ghɛ ə piə ə ghɨ̀ ə Njûsghè tè pəyn èpɔsê etsɨəze sê ghɨə mɔ̀ʼɔghe əkɨ̂m ə mbi. Fɨf əghɨ̀ ə Njûskè ətə̂ ghɛ ə sezuʼghe, ə tə pə̀yn è pɔsê ə Fezhə̀zè sê ghɨ ghɛ ə̀ vachi ə̀ghɨ ə Njûsghè. Ə Zhə̀fè nyì se pɔsê əghɨ ghɛ ə̀ vachi ə̀ghɨ ə Njûsə̀ nyi, ezhoghɛ ə ghɨə Njûsghè nə̀yn pi, nyiəmə ə pɔsê zɛ ə è tə fo sê ghɨə Njûsə̀ tə tsɨ tayn zàyn ezhoghɛ ə ghənə kyi sɔzaze ə?

¹³Ghɛ zɛ m kyiŋə se pì zôyn nyì se ghàyn ghɨ ghɛ ə̀ vachi ə̀ghɨ ə Njûsghè. M nyi wùətom se ghɨ ghɛ ə̀ vachi ə̀ghɨ Njûsghè, nyiəmə ndə̂mə̀ àtu ə mì efɨaʼ nâʼà sə ŋaŋ.

¹⁴Zho fîfe, m kaʼa m nəyn ə ghɨ ghɨm ghe ndaʼa, mə nyi əghɨ ə Njûsghè, ə ghənə kyi ghə̀ʼkè, kə yîghe ə ghənə ə fètəyn kyi sɔzaze.

¹⁵Ə̀ tè nyi kə Zhə̀fè tə ghɨ ə Njûsghè, ze ə nə̀ nə è ko soynve yighə̀ ghɨghe əkɨ̂m ə mbi. E nə̀ nə̂ ə ze ə fɨyn nyi zàyn zôyn ezhoghɛ ə Zhə̀fè kɛse njî ghɨə Njûsghè kə ghɨ ə vəynghe ə? E tə nə̂ ə ze ə nyi kə ghɨ ghɛ ə nyi mə ə kwu ə fɨnə zômə̀.

¹⁶Ə pɨaʼ luʼ apayn ə kwaŋ ə shike ə fo se Zhə̀fè kə efo, ə ze ə tyə̂nə̀ nə ə̀ kyi Fezhə̀ è payn ətəynke akɨ̂m. Ə fo ghaŋtə fekàʼtè se Zhə̀fè, ə ze ə tyə̂nə̀ nə ə̀ kyi kepî vəyn è ngɔynse ətəynse.

¹⁷Ə fɨaftə̂ sèngɔyn sə fekàʼ fə olìf fɛ ə nyi mə ə zho ndô, ndûə pasə̂ ewìyn ə fekàʼ fə olìf fɛ ə fe nyi ə mbvɨyn mə fe tsɨ̂yn ndəmə ke sə fəynfe ə ngɨŋ. Ghàyn ghɨ ghɛ ə̀ vachi ə̀ghɨ ə Njûsghè nyi kə sengɔyn sə fekàʼ fɛ ə fe ndəmə ə mbvɨyn mə fe kyîə kəpi m̀mo mə m̀ ndò pə̂yn ətə̂ tèghàŋ tə fekàʼ fechûŋfè.

¹⁸E za tyə̀nə̀ nə ghàyn kyi va sə̂ ghaŋsə̂ èwiyn sê ghɨ ghɛ ə ghənə nyi kə sengɔyn sɛ ə tè fɨayte mâʼà. Ə ghàyn ghaŋsə wiynve, kə nə lɛsè se kê nə, ghàyn tsɨ̀yn nyi ke sèngɔyn, ə̀ vachi ghàyn ghɛ ə ghàyn kyi ghaŋte, ə̀ nyi teghaŋ ə te kyi ghàyn.

¹⁹Ghàyn kàʼa ə ghàyn ə pfɨnə̀ àngàŋtè nə, ə nyi mə ə fɨaftê ngɔyn sɛ se paʼsə mi fumə ewìyn ə fekàʼ.

²⁰E nyi səmɔʼ. Ə tè fɨafte tsɨsè fu kûmə̀ nə ghənə tè paʼà pomə, ə fɨnə pasə̂ ghàyn fu ewìyn ə fekàʼ kûmə̀ nə ghàyn tè nyi mə ghàyn ə pomə̂, pîza, ghàyn kyi va sə̂ pfɨnə̀ àngàŋtè. Ghàyn e pɨlə fânə̀.

²¹Kə Zhə̀fè tè tàʼa faŋ se pɔynsê ə ghɨ ə Njûsghè, ghənə ghɛ ə tè nyi kə sengɔyn sɛ ə se tè nyì chi sə shi, ghàyn kwàʼtə̀ nə fe nə̀ faŋə ndò se pɔynsê ə ghàyn ə?

²²Ghàyn ə fe nə, ə apàs àmɔ̀ʼ, Zhə̀fè nyiə pɔynə̂ nâʼà àchûŋ, ətə kəmɔ̀ʼɔke fe tɛ nâʼà sə ŋaŋ. È nyiə tɛ se ghɨ ghɛ ə nyi mə ə njìsè ndomve, kyi ə̀təm ə chûŋghè ezhoghɛ ə ghàyn pa chûmtə̀ ndom ə vəynve. Pîza ə ghàyn chùmtə̀ va ndom ə vəynve, ə è tə fɨaftê tsɨ̂sè kepî ghàyn.

²³Ə ghɨ Njûsə̀ zà kepî tɛ ə ghənə̂ zə atuze, ə kə̀mnə̀ ndûə se Zhə̀fè, ə fe fɨyn nji ghənə. Fe kyi ndô tyaʼke se nə̀yn nyiəmə.

²⁴Zhə̀fè ə njì ghàyn ghɨ ghɛ ə ghàyn vachi ə̀ghɨ ə Njûsghè, mə ghàyn nyi kə sengɔyn sə fekàʼ fɛ ə fe ndəmə ə mbvɨyn, ə Zhə̀fè nyì se fɨaftə ə ghàyn ə fekàʼ fɛ ə fe ndəmə ə mbvɨyn, se pasə ghàyn ə fekàʼ fɛ ə zho ndô, ghàyn kwàʼtə̀ nə è vayn njì əghɨ ə Njûsə̀ se fɨnə pasê fumə ewìyn ə fekàʼ ə? Ghɨ Njûsə̀ nyi kə se ngɔyn sɛ ə se tè nyì chi fumə ə fekàʼ.

²⁵Ghɛze endətə zhîze nyi m kyiŋə nə ghàyn ə ke ə ghɔnyìə ghɨmə kə ghàyn ə kwaʼtə̀ va nə ə nyiə kyi tsɛsè ètɔf. M kyiŋə nə ghàyn ke nə ghɨ ə Isìlây yîghe tə nə̂ ə ghə tɛ kə ndò e tuke se zaʼâ ashìŋə̀ kɛ ə ghɨ ghɛ ə̀ vachi ə̀ghɨ ə Njûsghè əkɨ̂m mə ghe kyi se pomə̂ tə pomə.

²⁶Zɨnə mə tə kyânə̀ kə nâʼà əghɨ ə Isìlâyghè əkɨ̂m kyi sɔzaze. Ə nyàʼ ə ŋwàʼlè ə̀ Fə̀zhə̀ nə, “Sɔ̀zà tə fɨə ə Zayɔ̀n. È tə shûə tsɨ̂sə̀ sèpi sə ghɨ̀sè esas ə ndɛ Njàkɔ̂pzè.

²⁷Shîŋə̀ kɛ ə m tə shûə tsɨsə̀ pi sə ghənə̂sè nyi ashîŋə̀ kɛ ə m tə nə̂ m mə nyi choze emɔ̀ʼ ghasè ghənə.”

²⁸Ghɨ Njûsghè ə kwiynsə̂ se zɨə tom èchùŋ nə zɨ̂nə̀, zɨnə mə ə nə̀ ghənə e nyi sèpàyn sə Fezhə̀sè. Ghɛ nə zɨ̂nə ə nə̀yn Zhə̀fè fɛ Fe sɔ̂zâ ghàyn ghɨ ghɛ ə ghàyn vachi ə̀ghɨ ə Njûsghè, pi kə ze nyi za, Zhə̀fè ə chitê ghɨə Njûsghè ə pa kɔŋə̀ ghənə kûmə̀ m̀kâyn mɛ ə è tè zhi yîghə̀ pɨ̀a pɨ̀a ə ghənə̂ghè.

²⁹Zɨnə mə nyi nyî kûmə̀ nə ə Zhə̀fè chite wùə ə pɔsə̂ vəyn, fe vayn fɨnə kwiynê ətəm ə vəynghe.

³⁰Sê ghàyn ghɨ ghɛ ə̀ vachi ə̀ghɨ ə Njûsghè, ghàyn tè zɨə tsɛ̂ va Zhə̀fè, pîza zôyn e nyi mə Fə kose səyn sê ghàyn kûmə̀ nə ghɨ Njûsə̀ ə tè tə se zɨ sê Vəyn.

³¹Nyiəmə, ghɨə Njûsghè setsɨ̀ zɨə va se Zhə̀fè. Zhə̀fè tə kosə̂ èsəyn se ghənə, ə è tsamte ghənə nə ə fɨnə zɨə sê vəyn. È tə nə̂ nyiəmə se kosê esəyn se ghənə eghɨ kə è tè kose se ghayn ghɛ ə ghàyn va əghɨ ə Njûsghè.

³²Zhə̀fè ə nə̀yn tɛ atu əghɨzè e nyi kə piə ndəm ghənə ə ndɛ̂ ə̀chaʼ, kə è və kyi èsəyn ekoze se ghənə nâʼà ə̀kɨ̂m.

³³Ghàyn fe kə Zhə̀fè kyi ghaʼze ə! Ghàyn fe kə è ke ghɛghe əkɨ̂m, kyi ètɔf eghaʼâzè ə. Wùə vîvè vayn kàʼa è ke kə Zhə̀fè nə̀ ghɛghe. Wùə vîvè vayn kàʼa è ke ndom vɛ ə Zhə̀fè nə̀ ghɛghe ətəyn.

³⁴Ə nyàʼ ə ŋwàʼlè ə̀ Fèzhə̀ nə, “Ə̀ ke nde ghɛ zɛ ə Zhə̀fè kwâʼtə̀? Ə̀ kàʼa ə̀ təfte nde Zhə̀fè ə?

³⁵Ə̀ tyəm fo ndè fɨake sê Zhə̀fè kə è kàʼa è kɛse ndaʼa.”

³⁶Ə̀ fɛtə̂ Fèzhə̀ fɨave e kɨ̂m, fɨa ətəyn ve nyi kûmə̀ nə Fe kɔ̂ŋɔ̀ nə ve ə nyi, ə̀ kyi vəyn è fɨa ətəynve ekɨ̂m. Pomsêzè nyì se Zhə̀fè sə teshìŋə̀ tèkɨ̂m. Ə ze ə nyi ke zamə.