Read Mmen Lûm 15 Bible Online

Lûm 15 - Mmen bible

Lûm 15

¹Ghâsènì ghɛ ə pomə̂ ə ghasènìze tɛ kyi sə̂ tsâmtə̀ ghɛ ə pomə̂ ə ghənə̂zè tɛ va. Kə ghâsènì ə nə̂ kə ghɛ ghɛ ə ghe tsɔ̂fə̀ kə sê ghâsènì.

²Ghâsènì kyi sə̂ nə̂ ə̀ghɛ endom vɛ ə ve nə̀ nə̂ nə ghɔnyì ə ghasènìghe nə pomə̂ ə ghənə̂zè ə tɛ.

³Nâʼà Klâys paʼà tîəm nəyn ghɛze sə̂ saŋnə̂ kə è ngɨŋ Vəyn. Pîza è nə̂ kə nyi mə ə nyàʼ ə Ŋwàʼlè ə Fèzhə̀ nə, “Nâʼà tèsoylè tèkɨ̂m tɛ ə ghɨ tè sòylə ghàyn ə pfɨ̀ ə mì ə tu.”

⁴Naʼapi èghɛ èkè zɛ ə tè nyaʼ ə Ŋwàʼlè Fèzhə̀ sə mɨ tè nyì se zaʼlə ghâsènì. Ze tè nyi kə ghâsènì ə kyi èkwaʼtè zɛ ə ze ndô pə̂ ewàmnè ə Fezhə̀zè, nə̂ nə ghâsènì ə kyi èkol ətəmze, fɨnə fo ghâsènì è temghe.

⁵Ə m tsə̂mə̀ nə Zhə̀ fɛ ə fe nə̂ nə ghâsènì ə kolə ə̀təm, fɨnə fo ghâsènì è təmghe, nə fe nəyn nə ghàyn ə nyi choze emɔ̀ʼ è ngɨŋ saynse kə ghàyn chùmtə̀ Njisə̀s Klâys.

⁶Zɨnə tə kyânə̀ kə ghàyn əkɨ̂m tsɨynte choze emɔ̀ʼ se tsìtə Fezhə̀, ə Pɨ̀a ə̀ Pɛ̂pɛ ə̀ ghâsènì Njisə̀s Klâys.

⁷Ghàyn e fiə ə̀ ghɔnyì ghanə kèpî eghɨ kə Klâys fi ghàyn, wùə èmɔ̀ʼ èmɔ̀ʼ, kə pomsê zə nyi sê Zhə̀fè.

⁸M tsâ se ghàyn nə Klâys tè pəyn sə wûə èfɨ̀aʼa sê ghɨ Njûsə̀ se tyə̀yn sê ghənə nə tsɨ̂nè ə Fezhə̀zè pfɨ̀ə tsɛ̂ va. È tè nəyn nyi se lwiynse etsɨnè zɛ ə Zhə̀fè tè nə̀yn sê pɨ̀a ə pɨ̀a ə ghənə̂ghè.

⁹È tè pə̀yn se nə̀yn nə ghɨə ghɛ ə̀ va əghɨ ə Njûsghè ə pɔmsə̂ Fèzhə̀ ə Fəynfe ekosê esəynze. E nyi kə nyâʼ ə ŋwàʼlè ə̀ Fèzhə̀ nə, “Nyiəmə m tə tsîtə̀ ghò ə fètə̂ ə̀ghɨ ghɛ ə vachi ə̀ghɨ ə Njûsghè. M nə zhəmə sènjàŋ tsitə̀ èzə zɛze.”

¹⁰Ə nyàʼ kepî nə, “Ghɨ ghɛ ə̀ vachi ə̀ghɨ ə Fezhə̀ghè, ghàyn e saŋnə̂ ghâyn ghə̀ ghɨ Fezhə̀ghè.”

¹¹Ə fɨyn nyâʼ kepî nə, “Ghàyn ghɨ ghɛ ə̀ va əghɨ ə Njûsghè nâʼà ə̀kɨ̂m tsite Zhə̀fè, ə ghɨghe əkɨ̂m ə mbi tsite vəyn.”

¹²Fɨ̀aʼtè Èsayà ə tə pì kepî kə nyi mə ə nyàʼ nə, “Wùə tə fɨə etɔ̀ŋ ə ndɛ ə Njesì mə è tə pə̂ ə è və kyi àtyaʼ etûə ə̀ghɨ ghɛ ə̀ vachi ə̀ghɨ ə Njûsə̀, ə nyì se vəyn ə ghɨ ghɛ ə vachi ə̀ghɨ ə Njûsghè tə ndə̂mə̀ təm ə ghənə̂ghè əkɨ̂m.”

¹³Ə Zhə̀fè mə za nyi eluʼ vɛ ə kwâʼtèzè ndò pə̂ ətəyn, lwiynse ghàyn è saŋnêzè ekɨ̂m, ə ghàyn ə nyi è pɔ̂ynè kûmə̀ èpomə̂ zaynze sê vəyn. Zɨnə mə tə nə̂ ə pomə̂ zaynze ə ndəmə̂ ndûə kə èshike atyaʼ ə Sezuʼ se Ŋwaʼake.

¹⁴Ghɔnyì ghɨmə, nâʼà mi è ngɨŋ zɨ̂mè ke ndô nə ghàyn kyi ndô təm ə chûŋghè se nə̀yn efɨaʼ zɛ ə Zhə̀fè kyiŋə nə ghàyn nəyn, ke ə̀ghɛ ə̀kɨ̂m, nyi kàʼa zaʼle ngɨŋ saynse.

¹⁵Pîza fa ŋwàʼlè, mə nyàʼ ghɛ ghɛ mə m ndəʼə̀ fânə̀ va. Ə̀ nyi kûmə̀ àfùʼ kɛ ə Zhə̀fè fo sê mi ə m nyâʼà ghɛ nə ghɨ̂yn.

¹⁶Zhə̀fè ə fo mi fùʼ nə kɛ mə nə mə nyi wùə èfɨ̀aʼa ə̀ Njisə̀s Klâys, nə mə ndaʼà tom èchùŋ sê ghɨ ghɛ ə̀ va əghɨ ə Njûsghè. M fɨaʼà kə wùə èkɔʼsə nə̂ èshyə̀ sə̂ ndaʼà tom èchùŋ zɛ ə è ndò sê Zhə̀fè, kə ghɨ ghɛ ə va əghɨ ə Njûsghè ə nyi kə efo zɛ ə Zhə̀fè nyi mə fe ə pomə. Zhə̀fè tə pomə ghənə kûmə̀ nə Zuʼse Ŋwaʼase ə nə̀yn ghənə e nyi è ŋwaʼze ə fəynfe əshi.

¹⁷Nyiəmə kə m nyi sə afɨa àmɔ̀ʼ ghasè Njisə̀s Klâys, M kyi ndô ghɛ zɛ ə ze nə̂ nə mə pfɨnə̀ àngàŋtè kûmə̀ èfɨaʼ zɨme sê Zhə̀fè.

¹⁸M vayn kaʼa m wamne ghɛ zhize ə̀ tsɛ̂ kə va se wàmnè kûmə̀ èfɨaʼ zɛ ə Klâys nə̀yn, m nyi kàʼa m nəyn nə ghɨ ghɛ ə̀ vachi ə̀ghɨ ə Njûsghè ə nə̂ kə Zhə̀fè kyiŋə. Ghɛ ghɛ m wâmnè, è ghɛ ə m nə̂yn nyi əghɛ ghɛ ə ghənə kyi se wàmnè, è kɨsè se nə̀yn.

¹⁹M tè nəyn əghɛ nə ghɛ mə, atyaʼ ə sechwîəke, è ghɛ əkayntəghe, è kɨsè atyaʼ ə sezuʼ sə Fezhə̀sè. Zɨnə mə ə tə nə̀yn me ndaʼà tom e chùŋ ə̀ Klâys àchûŋ, kə m tè ndò ə Njèlusalɛ̀m se ndùə tàyn apàs endaʼ ə Ìlilikùmkè. Mə ndàʼà tom èchùŋ èkɨ̂m kûmə̀ Klâys.

²⁰Kɔ̂ŋ zɨme shîŋə̀ tekɨ̂m nyi nə m ndaʼa tom èchùŋ elùʼ vɛ ə nyi mə ə paʼà zɨ kûmə̀ Klâys. M tè nəyn nyiəmə kə m tàʼa ndù elùʼ vɛ ə wùə mɔ̀ʼɔ nyi mə è və kàynè zhə̂tè fɨ̂aʼzè.

²¹Zɨnə mə nyi kè kə nyi mə ə nyàʼ ə ŋwàʼlè ə̀ Fèzhə̀ nə, “Ghɨ ghɛ ə tàʼa tyəmə tsàyn eghɛ sê ghənə kûmə̀ vəyn, tə fe vəyn, ə ghɛ ə ghe tàʼa tyəmə zɨ eghɛ kûmə̀ vəyn, ə zɨ kê.”

²²Ə̀ nyi ekwî zɛ ə m kwîə tsɛsə̀ ə ze nə̂yn nə mə va se pə mòtə ghàyn.

²³Pîza, zôyn kə m mɨ̂sè fɨ̂aʼ zɨme fâyn apàs endaʼa, wiyn nyiə nyûŋnə̀ mi se pə fe ghàyn, kə ve tè nyùŋnə epàm ə sèpìŋ se tsɨəse.

²⁴M kwaʼtə̀ se nə̂ zɛ mə zôyn. M nə̀ nə̂ m mə kɔ̂ŋə̀ se fe ghàyn ezhoghɛ ə m ndûə endaʼ ə Sɨ̀pênzè, ə ghàyn tsamte mi kə m ndu fu. Pîza m tə môtə̀ ghâsènì sə fendîŋə̀ fə ashìŋə̀fè kə ghâsènì zɨne təm ə ghasènìghe.

²⁵Zôyn nyi, m ndùə ə Njèlusalɛ̀m se tsàmtè əghɨ ə Fezhə̀ fu.

²⁶Kûmə̀ nə ghɨ poməghe apàs endaʼ ə Màsèndonyà è kə Àkayàkè ə tə saynê sə ghənə ə ngɨŋ se fo emâʼte se tsàmtè ə ghɨ afɨfə ə ghɨə Fezhə̀ghè ə fètəyn ghɛ ghe nyi ə Njèlusalɛ̀m.

²⁷Ghənə ə tə fe nə ze tsɔ̂fə̀ ndò se nə̀yn nyiəmə, nə ə nyi eluʼ ə ghənə̂vè se tsàmtə ghənə. Kə ghɨ ə Njûsə̀ tè chyàtə pɔsê tə ghənə̂tè yighə̀ ghɨə ghɛ ə tè vachi ə̀ghɨə Njûsghè, e tè nyîə tsɔ̂fə̀ nə ghɨ ghɛ ə tè vachi ə̀ghɨ ə Njûsghè tsamte kepî ə̀ghɨ ə Njûsghè, è fɨave kə, efɨazhiəve, è kɛve, è ndzɨse.

²⁸Shîŋə̀ kɛ m mɨsè fɨ̂aʼ nə kɨ̂ynə̀ ə Njèlusalɛ̀m, ə fo èkɛ ə ghənə̂ vɛ ə tsɨte sê ghənə, m ndo fɨ se ndù endaʼ ə Sɨ̀pênzè. Ə̀ nyì fumə ashìŋə̀ ə m tə tyəmə se fe ghàyn.

²⁹Shîŋə̀ kɛ ə m pə̂yn sê ghàyn, m ke ndô nə m tə pə̂ è kàyntè èpɔsê ə Klâyszè.

³⁰M chyatə̂ ghàyn ə ghɔnyìə ghɨmə, ezə ə Pɛ̂pɛ Njisə̀s Klâyszè, e kɔ̂ŋ zɛ ə ze pə̂ ə sezuʼ, nə ghâsènì tsɨynte se tsə̀m sə ŋaŋ nə Zhə̀fè tsamte mi.

³¹Ghàyn e tsə̂mə̀ nə Zhə̀fè ə tɔ̂ʼnə̀ è mi kə ghɨ Njòndyâ ghɛ ə ghe ke va Zhə̀fè nə tàʼa fo ètsôs sê mi. Ghàyn tsəm kepî nə Zhə̀fè nəyn, ə ghɨ afɨfə ə fètə̂ ə̀ghɨ̀ ə Fezhə̀ghè ə Njèlusalɛ̀m fi tsâmtè zɛ m ndûə è zəyn sê ghənə.

³²Kə nyi ekɔ̂ŋ ə Fezhə̀zè, m tə kɛsê pəyn se ghàyn è saŋnêzè, se mòtè ə ghàyn kə m kaʼa m zɨte kə ghâsènì nyi əmɔʼ.

³³Ə Zhə̀fè ə pɔ̂ynèfè ə nyi ghâyn ghə̀ ghənə əkɨ̂m. Ə zə nyi ke zamə.