Read Mmen Lûm 16 Bible Online

Lûm 16 - Mmen bible

Lûm 16

¹M kɔ̂ŋə̀ nə ghàyn ke nə ànyì ə ghâsènì ve zəyn, Fipè vɛ ə è tsàmtə̀ se fɨ̂aʼ ə ndɛ ə̀ Fèzhə̀ endaʼ ə Senklyà, è nyîə fɨaʼà àchûŋ.

²Ə è pə̀yn sê ghàyn, ghàyn ə fi vəyn ə Zhə̀fè ezə, kə ghɨ ə Fezhə̀ghè, ə fo nâʼàpî ètsâmtè èkè zɛ ə è kyiŋə sê ghàyn. Ghàyn e ke nə è və tsàmtè ghɨghe setsɨ̀, ə tsàmtə̀ kəpi mi.

³Ghàyn tɔŋte Pliskà è ndom ə̀ vəyn Àkwilà sê mi. Ghâsè ghənə fɨ̂aʼà sê Njisə̀s Klâys əmɔʼ.

⁴M fo àzɔ̀ŋnè se ghənə kə ghənə tè pomə se kwu ə mì ətu, ə va ke mi ə m fo zɔ̀ŋnèkè sê ghənə, pîza ndɛ sə Fezhə̀ sə ghɨ̀ ghɛ ə̀ va əghɨ ə Njûsghè fo kəpî ndò zɔ̀ŋnèkè sê ghənə.

⁵Ghàyn tɔŋte kepî ə̀ghɨ pomə ghɛ ə ghe tsɨ̂yntə̀ ə ghənə ndɛ. Ghàyn tɔŋte Epaènetùs, ə soyn vɨ̂mve chùŋ vɛ, ə è tè nyi wùə shi se pomə̂ ə Klâys ə apàs endaʼ ə Esiyàkè.

⁶Ghàyn tɔŋte Mèli vɛ ə è tè fɨ̂aʼ nâʼà è tyaʼke ə ghàyn ə fètəyn.

⁷Ghàyn tɔŋte Àndɨ̀lonikùs è Njoniyàs, ə ghɔnyì ghɨm ghə Njûs ghɛ ə ghasè ghənə tè nyi ə ndɛ chaʼ əmɔʼ. Ə nyîə fɛte ke ghənə əfètə̂ ə̀ghɨ̀tomə, mə ghənə tè pomə Klâys sê mi sə shi.

⁸Ghàyn tɔŋte Àmbìlatùs sê mi, ə soyn vɨmve chùŋ əfètə̂ ghɨ̀ ə Pɛ̂pɛghe.

⁹Ghàyn tɔŋte Òpanùs, vɛ ə ghasènyìə ghə̀ ghənə fɨ̂aʼà sê Klâys. Ghàyn tɔŋte kepî soyn vɨ̂mve chùŋ Sɨ̀takìs.

¹⁰Ghàyn tɔŋte Apelàs, ə vɛ ə tsɨnè ə̀ vəyn ze chùŋ tyə̀ nə è nyi chichi sê Klâys. Ghàyn tɔŋte kepî ə̀ghɨ esas ə ndɛ Alistopùlùsghè sê mi.

¹¹Ghàyn tɔŋte Ɛ̀londiyòn, ə wùə èndaʼ vâsvè ndaʼ ə Njûszè, è ghɨ esas ə ndɛ Nàsisùs ghɛ ə ghənə nyi mə pomə̂ se Klâys. Ghàyn tɔŋte ghənə sê mi ə Pɛ̂pɛ ezə.

¹²Ghàyn tɔŋte Tìlifenà yî Tìlifosà ə zəyn ghɛ ə ghe fɨaʼà sê Pɛ̂pɛ. Ghàyn tɔŋte soyn vɨ̂mve chùŋ Pesìs, ə wùzhɔynə̂ mɔ̀ʼɔ vɛ ə è nyi mə è və nə̀yn kàyntè èfɨ̀aʼ ezə ə Pɛ̂pɛze.

¹³Ghàyn tɔŋte Lufùs, ə vɛ ə Pɛ̂pɛ nyi mə è və chitê nə è fɨ̂aʼ sê zhi. Ghàyn tɔŋte kepî nyìə vəyn sê mi, e və njì mi kə vâ vəyn.

¹⁴Ghàyn tɔŋte sê Àsinkìlitùs, è Fìlengòn, è Ɛlmìs, è Pàtɨ̀lombàs, è Ɛmàs, è ghɨə pomə əmɔ̀ʼɔ ghəkɨ̂m ghɛ ə yighə̀ ghənə nyi əmɔʼ.

¹⁵Ghàyn tɔŋte sê Fìlolongùs, è Njolyà. Ghàyn ghɔnyì ghɨmghe ə Klâys, ə Nelùs, è Òlimpàs, è ànyì ə̀ ghənə̂ ve èzhɔyn è ghɨ Fezhə̀ ghəkɨ̂m ghɛ ə yî ghə̀ ghənə nyi əmɔʼ.

¹⁶Ghàyn maŋne ngɨŋ saynse è kɔ̂ŋ ə Klâyszè. Ndɛ sə Fezhə̀ sə Klâys sekɨ̂m tomə ètɔŋtê ə ghənə̂zè sê ghàyn.

¹⁷M chyatə̂ nâʼà sə ŋaŋ ə ghɔnyìə ghɨmə nə ghàyn ə tɔ̂ʼnə̀ è ghɨ ghɛ ə ghe pə̀ è chyâsèzè ə ghàyn əfètəyn, nəʼsə̀ èpomə zayn. Ghənə fo èzaʼlê ə vachi zɛ ə tè zaʼle ghàyn ətəyn. Kə ghàyn ə zɨtə sê ghənə.

¹⁸Kûmə̀ nə ghɨ ghɛ ə ghənə nə̂ kyì əghɛ nə ghɨ̂yn fɨaʼà chîəva sê Pɛ̂pɛ ə̀ ghâsènì Klâys, pîza ghənə nə̂ kə ə̀ghɛ ghɛ ə ghe tsɔ̂fə̀ sê ghənə. Ghənə njîə èwâmnè echùŋè, è wâmnè efɔməze se lɛsə əghɨ ghɛ ə tɔʼ keva ghɛze.

¹⁹Ghɨ ghəkɨ̂m ə zɨ ndom vɛ ə ghàyn nyiəmə ə tyə̂m ətəyn se zɨ eghɛ ə Fezhə̀zè, zɨnə mə e nə̂ nə mə saŋnə̂. M kyiŋə nə ghàyn ə tɔfə sə nə̂ ə̀ghɛ ə chûŋghè, kiva ghɛze se nə̀yn è pi.

²⁰Zhə̀fè mə za nyi pɔ̂ynè ə̀ ghâsènì môtə̀ kə nyi ə fe kəʼse satàyn è gholə. Ə fùʼ ə Pɛ̂pɛ ə̀ ghasènìke Njisə̀s Klâys ə nyi ghâyn ghə̀ ghənə.

²¹Timotì, vɛ ə ghasè vəyn fɨ̂aʼà əmɔʼ tomə ètɔŋtê ə vəynze sê ghàyn. Lusiyùs, Njasɨ̀yn è Sòsìpatà, ə ghɔnyì ghɨm ghə Njûsə̀ tomə kəpi ètɔŋtê se ghàyn.

²²Nâʼàpî mi Tesùs vɛ ə m nyaʼ zə̂ynzè ə Pɔ̂l ezə, m tomə kəpì ètɔŋtê se ghàyn kə ànyì vâynvè ə Klâys.

²³Ngayùs vɛ ə m ndamə ə və ndɛ, ndɛ ə̀ Fezhə̀ e njiə kəpi fu, pi nə m tɔŋtê kəpi ghàyn. Èlasɨtùs vɛ ə è ndə̀mə̀ kɛ endaʼve, è ànyì ə̀ ghâsènì Katùs tomə ètɔŋtê ə ghənə̂zè sê ghàyn.[1]

²⁵Ə ghâsènì fo pomsêzè sê Zhə̀fè! È kwəynə̂ ndò se nə̀yn nə ghàyn ə tɛ ə ghàyn epomə̂. Ə̀ nyi nyiəmə kə m tè tsàyn se ghàyn ashîŋə̀ kɛ ə m tè ndàʼa tom èchùŋ ə̀ Njisə̀s Klâys. Tom èchùŋ nə zɛ mə nyi səmɔʼ zɛ ə Zhə̀fè tè nyi mə fe ə ndə̀m nâʼà sə mɨ mə è paʼà tyə̀yn sê ghɨghe.

²⁶Pîza, zôyn kə səmɔʼ nyi mə è zə fɨ pəyn ə ndayn tɔynə̂ əghɛ ghɛ ə fɨ̀aʼtèsè tè nyaʼ ə ŋwàʼlè ə Fèzhə̀. È tè nəyn nyiəmə kə ghɨə ndaʼà tekɨ̂m tə zɨ se vəyn. Zɨnə mə kyayn kə Zhə̀fè tè pi nə ze tə kyanə̀. Ə̀ nyi vəyn vɛ ə è nyì sə teshîŋə̀ tèkɨ̂m.

²⁷Ə̀ nyì ke Fèzhə̀ fəynfe nɨŋ ə fe kyi tɔf tekɨ̂m. Ə ghâsènì pomse fəynfe kûmə̀ èghɛ zɛ ə Njisə̀s Klâys nə̀yn, sə te shîŋə̀ tèkɨ̂m. Ə zə nyi ke zamə.