Read Mmen Lûm 2 Bible Online

Lûm 2 - Mmen bible

Lûm 2

¹E za tyə̀ nə nâʼàpî ndè vɛ ə è saʼa ghɨghe kɔ̀ŋə è və nyi pi ndè kiva ghɛ zhize se pì kə kaʼa lɛse fo ghənə, kûmə̀ nə shîŋə̀ kɛ ə ò saʼa ghɨghe mə ò nə̀ kəpi èghɛ zɛ ə ò saʼa ghənə sə təyn, ze tyə̂ nə nâʼà ghò ə nə̀yn ngɨŋ zɛ̂zè nə è pfɨ saʼ.

²Ghâsènì tənə ndò saʼ àchuŋ sê kyì əghɨ̀ ghɛ ə nə̂ ghɛ nə ghɨ̂yn.

³Ə wùə se ghàyn tənə saʼ sê ghɨə mɔ̀ʼɔghe, pa nə̂ kəpi ə̀kyì əghɛ nə ghɛ mə, è kwàʼtə̀ nə è kàʼa è tə tə fɨ èsaʼ ə Fezhə̀zè ə?

⁴Kə ghàyn nə nji nə təm ə əchûŋ ə Fezhə̀ èghaʼâ ghè, è wəynsê ewìynze va eghɛ zhîze. Shîŋə̀ etyâ kɛ ə Zhə̀fè nyi mə fə fo sê ghàyn nyì se nə̀yn nə ghàyn maʼa pi saynse.

⁵Pîza, ghàyn nyi mə tɛsê təm ghaynghe, ə tə nə ghàyn maʼà va ghɛ ghaynghe pighe, E tyə̂ nə ghàyn zɔmtə̂ kə epɔynsê ə Fezhə̀zè ə ghàyn ətu, mə È tə pɔynsə ghàyn ə Fetuʼ fə saʼfe. Fumə ə fetuʼ Zhə̀fè tə tyə̂nə̀ paynsə̂ ètɔŋ enyɔʼsə ə vəynve, ə è tyəyn paynsê kepî nə ndom vɛ ə è saʼa ətəyn nyi chichi.

⁶Kûmə̀ nə Zhə̀fè tə maʼtə̀ nâʼàpî ndè kè kə è nyi mə è və fɨ̂aʼ zaʼâ.

⁷Ghɨə mɔ̀ʼɔ ghə kol təmə ə faŋə nə̂ ndûə kə əghɛ əchûŋghè, kyiŋə epomsê, è kɔʼsêzè. Ghənə tə kyîə èndam zɛ ə ze tə mìə va. Zhə̀fè tə fo èndam zɛ ə ze tə mîə va se kyì əghɨ̀ nə ghɨ̂yn.

⁸Pîza ghɨə mɔ̀ʼɔ kwaʼtə̀ kə se ngɨŋ sə ghənə̂sè, tə se pomə̂ nə ghɛ zɛ ə Zhə̀fè pìə nyì səmɔʼ, ghənə e nə̂ ə̀ghɛ ghɛ ə Zhə̀fè pìə nə ghe tsɔ̂fə̀ va. Zhə̀fè tə tyə̂nə̀ ènyɔ̂ʼsè etɔŋ ə vəyn sê kyì əghɨ̀ nə ghɨ̂yn, ə È pɔynse ghənə.

⁹Pîza se ghɨ ghɛ ə ghe nə̂ chùŋ, Zhə̀fè tə fo ghənə è pɔmsêzè, è kɔʼsêzè, è pɔ̂ynè mə È zhə̀te pə̂yn eghɨ Njûsghè sə shi se nduə fɨ sê ghɨ ghɛ ə̀ va əghɨ ə Njûsghè.

¹⁰Pîza ghàyn e ke nə Zhə̀fè tə tɔʼə̀ va wùə vîvè, maʼtə̀ nâʼàpî ndè endom əghɛ Sezuʼ se Ŋwaʼase vɛ ə è nə̀ ghɛ ə chûŋghè. È tə nə̂ zɨnə mə sê ghɨ Njûsghè kûmə̀ nə Zhə̀fè ə tə chɔʼ ghənə nə ə nyi kàyntè ə̀ghɨ ə Vəynghe, pîza ə È nəyn kepî se ghɨ ghɛ ə va əghɨ ə Njûsghè.

¹¹Zhə̀fè tə nə̂ zɨnə kûmə̀ nə Zhə̀fè saʼa nâʼàpî ndè kè eghɨ.

¹²Ghɨ ghɛ ə kiva lâŋ ə Mosîskè nyiə nə̂ ə̀ghɛ ə piə. Zhə̀fè tə saʼa ghənə mə È tsɛ tɔynə̂ va alàŋ, ə ghənə njise. Ghɨ ə Njûsghè nyîə kyi àlâŋ ə Mosîskè, pa nə̂ pi, mə Zhə̀fè tə tsɛ̂ tɔynə̂ alâŋ se saʼa ghənə.

¹³Ə̀ vachi èzə zɛ ə wùə zɨ lâŋkè ə ze nə̂ nə wùə ə nyi chichi ə Zhə̀fè əshi, pîza sə nyi chichi ə Zhə̀fè əshi, wùə kyi sə nə̂ èghɛ zɛ ə lâŋkè kyiŋə.

¹⁴Ghɨ ghɛ ə va əghɨ Njûsghè kiva lâŋkè, pîza nâʼà ashìŋə̀ àkè kɛ ə ghənə nə̂ ghɛ zɛ ə lâŋkè pìə tɔynə̂ ə ghənə ekwâʼtè, zɨnə mə e tyə̂ nə pî kə ghənə keva lâŋkè, ə ghənə əfètə̂ ə̀təm, ghənə nyîə ke sənɨŋ eghɛ echûŋzè è kɨsè èghɛ epize.

¹⁵Nə̀ynè ə ghənə̂kè tyə̀ nə ghɛ zɛ ə lâŋkè kyiŋə nyi mə ə nyàʼ ə ghənə əfètə̂ ə̀təm, ghənə e ke nə təm ə ghənə̂ghè tyə̀ ndò nə ə̀ nyi nyiə kə ze kyi sə̂ nyi. Ghənə e ke nə təm ə ghənə̂ghè tsà ndò se ghənə nə ze nyi səmɔʼ. Təm ə saʼa ghənə̂ghè tyə̀ ndò nə ghɛ zɛ ə ghənə nə̂ nyi eghɛ echûŋzè kɨ̀sə ze pize.

¹⁶E za tyə̀nə̀ nə ə Fetuʼ fə saʼfe, Zhə̀fè tə saʼa ə̀ghɨ ə̀kɨ̂m ətə̂ ə̀ghɛ ghɛ ə ghənə kwaʼtə̀, è ghɛ ə ghənə ndə̂tə̀ nə̂ ndô. È tə fo Njisə̀s è tyaʼ nə kɛmə nə È saʼ ghɨghe. Ə̀ ghɨnə nyi əghɛ ghɛ ə m tsâ sê ghɨghe ezhoghɛ ə m ndaʼà tom èchùŋ.

¹⁷Zôyn ghàyn ghɛ ə ghàyn tɔŋtə ngɨŋ saynse nə əghɨ ə Njûsə̀, ghàyn ə ndə̀m təm ghaynghe ətə àlâŋ ə Mosîskè, tsɔsə̀ angàŋtè nə Zhə̀fè nyi Fezhə̀ faynfe.

¹⁸Ghàyn nyîə ke èghɛ zɛ ə Zhə̀fè kyiŋə nə ghàyn nəyn, ghàyn e ke nə ghàyn kyi se nə̀yn eghɛ zɛ ə ze nyi chichi kè kə lâŋkè nyi mə kə zaʼlê ghàyn.

¹⁹Ghàyn nyîə ke nə ghàyn nyi əghɨ ghɛ ə tyə̂nə̀ ndom sê ghɨə fofəghe kə ghənə keva Zhə̀fè, ke kepî nə ghàyn nyi epayn sê ghɨ ghɛ ə ghe nyi əfètə̂ àlɨm.

²⁰Ghàyn e njîə sèngɨŋ saynse kə əghɨ ghɛ ə fo chwîtè sê ngôve. Fɨnə njîə sèngɨŋ saynse kə əghɨ ghɛ ə ghe zaʼlə ghɨ ghɛ ə keva ghɛ zhîze. Ghàyn njìə sengɨŋ saynse nyiəmə kûmə̀ nə ghàyn kwaʼtə̀ nə kə ghàyn tɔ̀ʼ ke chi èlwɔ̂ŋ ə Fezhə̀vè achûŋ, ghàyn ke ndô ghɛghe əkɨ̂m, ke ghɛ ə ghe nyi səmɔʼ.

²¹Ghàyn zaʼlə̂ ə̀ghɨ əmɔ̀ʼɔ, kûmə̀ ghè ə ghàyn vayn kàʼa zaʼle ngɨŋ saynsə? Ghàyn zaʼlə̂ nə kə chɔŋə, pîza ghàyn ghe chɔŋə ə?

²²Ghàyn zaʼlə nə kə wùə nyiŋə è zhwîə wùə kɨ̀sə yî ndom ə̀ wùə, nâʼà ghàyn e nyîŋə̀ mə ə̀ ngaŋ ə? Ghàyn pìə nə kə ghɨ kɔʼse fɨ̂aʼsèvè pîza ghàyn ghɛ chɔŋə mndɛtə̀ mɛ ə naŋsə ghɛghe ətəyn se zhə̀mə èndaʼmè ə?

²³Ghàyn ghaŋsə̂ èwiyn nə ghàyn kyi alâŋ ə Mosîskè, pîza ghàyn ghɛ ə pə̂yn èghomə̂zè sê Zhə̀fè mə ghàyn kəmə àlâŋ ə Vəynke ə?

²⁴Ə nyàʼ ə Ŋwàʼlè ə̀ Fèzhə̀ nə, “Kûmə̀ ə̀ghɛ ghɛ ə ghàyn nə̀ ə ghɨə Njûsə̀, ghɨ ghɛ ə̀ va əghɨ ə Njûsghè wàmnə̀ ə̀ghɛ ə pighe kûmə̀ Fèzhə̀.”

²⁵Ə ghàyn ndə̀mə̀ lâŋkè, ə se zɛ ə ghàyn se nam əghɨghè ə kyi m̀kɔʼnè ə Zhə̀fè əshi. Pîza mə ghàyn chùmtə̀ va lâŋkè, ə se ə nam zɛ ə ghàyn se ə kiva tɔf zhîze.

²⁶Ə ghɨ ghɛ ə̀ va əghɨ ə Njûsghè, nyi ndɔ̀ʼɔ se nam ə ghənə̂ghè, kɔʼsə̂ èghɛ zɛ ə lâŋkè pìə, ə Zhə̀fè faŋ zayn se njì ə ghənə kə ghɨ ghɛ ə nyi mə ə se nam ə ghənə̂ghè ə?

²⁷Nyiəmə, ghɨ ghɛ ə ghe chûmtə̀ lâŋkè, pi kə ə̀ nyi mə ə paʼà se nam ə ghənə̂ghè, ghənə tyə̂nə̀ se ghàyn ghɨə Njûsghè nə ghɛ ghɛ ə ghàyn nə̀, ghe va chichi. Ə nyi mə ə se nam ghaynghe, ghàyn e kyi èlwɔ̂ŋ vɛ ə nyi mə ə nyàʼ ə ŋwàʼlè pîza nə̂ va kə lwɔ̂ŋ ətəynve kyiŋə

²⁸Ə̀ vachi è se ənam ə wûəzè ə vəyn wìyn zɛ ə fe ndûə ə ze chwîtə̀ nə è nyi wùə Njûs.

²⁹Pîza wùə vɛ ə̀ lote nyi wùə Njûs, ə̀ nyi wùə vɛ ə è nyi wùə Njûs ə vəyn əfètə̂ ə̀təm, e za tyə̀ nə ə̀ nyi wùə vɛ ə nyi mə ə se nam ə vəynghe ə vəyn ə fètəyn. Ə̀ nyi Sezuʼ sə Fezhə̀sè ə se nə̂ fɨ̂aʼ nə zɨ̂yn, ə̀ vachi nə wùə chùmtə̀ àlaŋ kɛ ə nyi mə ə nyàʼ. Ə̀ tsîtə̀ Fèzhə̀ è wùə nə vɛ mə, ə̀ vachi wùə m̀sɔ̀ŋ.