Read Mmen Lûm 5 Bible Online

Lûm 5 - Mmen bible

Lûm 5

¹Nyiəmə kə pomə ghasènìze nyi mə zə nə̀yn ghâsènì è nyi chichi ə Zhə̀fè əshi, ghasènìə ghə̀ Zhə̀fè nyi èpɔynè. Ə̀ nyi Pɛ̂pɛ ə ghâsènì Njisə̀s Klâys ə È nə̀yn nə ghâsènì ə nyi è pɔ̂ynè ghasènìə ghə̀ Zhə̀fè.

²Ə̀ chwi vəyn èndomve sê ghâsènì ətə epomə̂ zɛ ə ghâsènì kyi, ze nə̂ nə ghâsènì ə ke àfùʼ ə Fezhə̀kè. Nyiəmə ghâsènì saŋnə̂ nâʼà sə ŋaŋ kûmə̀ nə ghâsènì kyi ndô kwâʼtèzè nə ə tə kyîə èpomsê ə Fezhə̀zè.

³Ghâsènì fɨnə saŋnə̂ kûmə̀ ètsôs vɛ ə zɨə, ke nə kwâʼtèzè pə̀ ndò ekol ətəmze.

⁴Kol ətəmze nə̂ ndò ghâsènì e kyi ètsɨsə̂ zɛ ə Zhə̀fè kyiŋə. Tsɨsə̂ nə zɨnə mə ə Zhə̀fè kyiŋə, ə̀ nyi zəynze ə ze nə̂yn ghâsènì e kyi èkwaʼtè nə Zhə̀fè tə nə̂ ndò ghɛ zɛ ə È pì nə È nə̀ nə̂ ndò se ghâsènì.

⁵Ə ghâsènì kyi kwâʼtèzè, ə ghâsènì tə tàʼa fɨ è gho zomghe kûmə̀ nə Zhə̀fè ə tyə̀yn se ghâsènì kə Fe tɔ̂ʼɔ̀ kɔŋə̀ ghâsènì, kə È nə̀yn kɔ̂ŋ ə Vəyn zɛ ze nji ə ghâsènì əfètə̂ təm. È nəyn zɨnə mə kə È fo Zuʼse Ŋwaʼa vəynse sê ghâsènì.

⁶Shîŋə̀ kɛ ghâsènì tè kyi pîva tyaʼâ femɔ̀ʼ se tsàmtə sengɨŋ sə ghasènìse, Klâys tè kwu ə ghâsènì ghɨ pighe elùʼ ashìŋə̀ kɛ ə Zhə̀fè tè ndəm.

⁷E nyiə tɛ se wùə se kwu ə wùə chichi elùʼ. Shîŋə̀ kyîke, wùə kaʼa è pomə se kwu ə wùə chichi elùʼ.

⁸Ə̀ vachi zamə kə Zhə̀fè nə̀, kûmə̀ nə ndom vɛ ə è chwìtə̀ ətəyn nə è nyîə kɔ̂ŋə̀ ghâsènì nyi nə Klâys ə kwu ə ghâsènì elùʼ mə ghâsènì pa nyi ə̀ghɨ pighe.

⁹Ghâsènì nyi achûŋ ghasènìə ghə̀ Zhə̀fè kûmə̀ m̀ndəm mə Njisə̀s mɛ ə m̀ tè sɨ̀sə ə ghâsènì elùʼ. Ə ndəm mɛ ə m̀ tè sɨ̀sə ə ghâsènì elùʼ ndəm ghâsènì achûŋ ə Zhə̀fè əshi, piə zɨnə mə chwîtə̀ sê ghâsènì nə Klâys tə sɔzâ ndò ghâsènì ə Zhə̀fè enyɔ̀ʼsè etɔŋve ə È tsɨ tsɛ piə?

¹⁰Pi kə ghâsènì tè nyi se pàyn sə Fezhə̀sè, È və pa nə̂ kə ndò nə ghâsènì ə nyi choze emɔ̀ʼ è vəyn, kûmə̀ èkwu ə Vâ vəynze. Kə ghâsènì se nyi choze mɔ̀ʼ ghasènyìə ghə̀ Zhə̀fè, kə Vâ Vəyn nyi etwɔ, ə̀ tə nə ə nyi ə mɨ̀se ə È sɔza ghâsènì.

¹¹Pîza ze paʼà mì kendò zâ, ghâsènì nyîə saŋnə̂ kûmə̀ nə Zhə̀fè ə nə̀yn nə ghâsènì ə nyi ə̀ghɨ Vəynghe, tɔynə̂ se Pɛ̂pɛ Njisə̀s Klâys vɛ ə È nə̀yn nə ghâsènì ə nyi choze emɔ̀ʼ ghasènyìə ghə̀ Zhə̀fè.

¹²Ə̀ tè nəyn wùə èmɔ̀ʼ kə pi pəyn əfètə̂ mbi, ə̀ nyi pi zɛ ə è tè pəyn èkwuze. Nyiəmə, kwuze ə pə̀ sê ghɨghe əkɨ̂m kûmə̀ nə ghɨ msɔ̀ŋghe əkɨ̂m nyi mə ə nə̀yn pi.

¹³Ghɨghe ə mbi ə tə nə̀yn pi tsɔ̀fə kə Zhə̀fè fo lwɔ̂ŋ ə Vəynve sê ghənə. Pîza nâʼàpî ghayn ə lâŋkè va, wùə vîvè vayn kàʼa è pi nə wùə ə kəm lâŋkè.

¹⁴Pîza, se zhə̀tə pə̀yn ashìŋə̀ kɛ ə Andàm kè se pə fɨ ə Mosîs ashìŋə̀ kə Zhə̀fè tè fo lâŋkè, kwuze tè nyîə kyi àtyaʼ ə ghɨghe ətu ə̀kɨ̂m. Ghɨghe tè nyîə kwuə, pi kə ghənə tè nyi mə ə paʼà kəm lâŋ ə Fezhə̀kè eghɨ. Andàm tè nyi afusè ə vɛ ə È tè nyì se pə̀yn mə nyi Klâys.

¹⁵Ghɨ nə ghɛ ə̀ pɛ̀ vachi èghɨ kûmə̀ nə mâʼtè vɛ ə Zhə̀fè fo sê ghɨghe səndô, mə ə̀ pəyn Njisə̀s Klâys è Vəyn, ve va eghɨ kə afɨa kɛ ə kwu ə Andàmzè tè pəyn è kəynke. E nyi səmɔʼ nə ghɨ se tsɨ̀ nyi mə ə kwu kûmə̀ pi zɛ ə wùə èmɔ̀ʼ tè nəyn. Pîza fùʼ ə Fezhə̀kè tsɨ̀ə tsɛ̂ ndò pi nə zɛ mə. Ghɨə tsɨə nyi mə ə fi mâʼtè ə Fezhə̀ etsɨəve kè sə ndô tɔynə̂ se wùə èmɔ̀ʼ Njisə̀s Klâys.

¹⁶Maʼte ə Fezhə̀vè tè va kepî èghɨ kə eghɛ epi zɛ ə Andàm tè nəyn, eghɛ zɛ ə pi zɛ ə Andàm tè nəyn tè pəyn è zə̂ynzè. Pi ə̀ Andàm nə vɛ mə emɔ̀ʼ ə nə̀yn, ghɨghe əkɨ̂m ghɛ ə pfɨ̂ saʼ ə Zhə̀fè əshi. Pîza maʼte nə vɨnə mə ə nə̀yn Zhə̀fè fɛ fe njî ghɨə kə ghɨ ghɛ ə nyi choze emɔ̀ʼ yî Zhə̀fè, pi kə ghɨ pa nə̂ ndûə kə ndô pi.

¹⁷E nyi nə pi zɛ wùə èmɔ̀ʼ tè nəyn, ə nə̀yn ghɨghe əkɨ̂m e nyi etyə̂ àtyaʼ ekwuke. Pîza ghɛ zɛ ə wùə mɔʼɔ èmɔ̀ʼ nə̀yn nyiə ngəs kyi àtyaʼ. Zɨnə mə tə nə̂ əghɨghe əkɨ̂m ghɛ ə ghe nyi mə fi fùʼ ə Fezhə̀ ə tsɨəghe, tə pə̂ ə nyi choze emɔ̀ʼ yîghə̀ Zhə̀fè, ə kyi ndam zɛ ə ze tə mîə va, ə fɨave ekɨ̂m ə nyi ə ghənə etyə̀.

¹⁸Nyiəmə, pi nə zɛmə èmɔ̀ʼ ə Andàm tè nəyn, ə tə nə̀yn Zhə̀fè ə nə̀ ghɨghe əkɨ̂m ə pfɨə saʼ. Kèpî famə endom, ə̀ nyi nyiəmə kə ghɛ echûŋzè emɔ̀ʼ kə Klâys nə̀yn, ə tə nə̀yn nə ghɨghe əkɨ̂m ə nyi chichi ə Zhə̀fè əshi, se kyî endam.

¹⁹Kè kə wùə Andàm tè tàʼa zɨ se Zhə̀fè, ze ə tə nə̀yn wùə m̀sɔ̀ŋ e nyi wùə èpi. Kèpi famə endom kə wùə èmɔ̀ʼ, Klâys tè zɨ se Zhə̀fè, ze ə nə̀yn ghɨ tsɨəghe nyi chichi ə Zhə̀fè əshi.

²⁰Zhə̀fè tè pəyn è lâŋkè kə pi ndu ke èshike. Pîza nâʼàpî ghayn ə pi ndûə kə shi, fùʼ ə Fezhə̀kè tsɨ̀ə tsɛ ndò zamə.

²¹Nyiəmə, kə pi kyi tyaʼke se pə̀yn kwuze, ə̀ nyi kepî zamə kə fùʼ Fezhə̀kè kyi kepî àtyaʼ se nə̀yn əghɨ nə ghə nyi chichi ə Zhə̀fè əshi, se kyî endam zɛ ə ze tə mîə va tɔynə̂ se Njisə̀s Klâys Pɛ̂pɛ ə̀ ghâsènì.