Read Mmen Lûm 8 Bible Online

Lûm 8 - Mmen bible

Lûm 8

¹Zhə̀fè nə̀ va nə wùə pfɨ saʼ ezhoghɛ ə è nyì sə afɨa àmɔ̀ʼ yî ghə̀ Njisə̀s Klâys.

²Kûmə̀ nə lâŋ ə se zuʼ kɛ ə ke pə̂ ghâsènì èndamze kə ghâsènì nyì sə afɨa àmɔ̀ʼ è Njisə̀s Klâys, ə fɨsê mi ə alàŋ ə ghɛ pighe è kwuze.

³Ghɛ zɛ lâŋkè tè vayn kàʼa ə ke nəyn, kûmə̀ nə wiyn ə wûə m̀sɔ̀ŋve tè kiva tyaʼke se njiə tsɨ̀sè ə pi. Nyiəmə Zhə̀fè ə tə nə̀yn ghɛze mə lâŋkè tè vayn kàʼa ə ke nəyn. È və tə tom Vâ vəyn ewìyn ə wûə m̀sɔ̀ŋ vɛ ə ve nə̂ pi nə È mɨse tyaʼa ghɛ pike. Kə Zhə̀fè tè nəyn nyiəmə, È və mɨ̀sə̀ àtyaʼ əghɛ ə pighe ə wùə m̀sɔ̀ŋ ewìyn.

⁴Zhə̀fè tè nəyn zɨnə mə kə ghɨ ghɛ ə ghe chûmtə̀ va tyaʼa ghɛ ewìynke, pîza pɨlə chumtə̀ ə̀ghɛ atyaʼ ə sezuʼ sə Fezhə̀sè, ghənə tə nə̂ ə nə̂ ə̀ghɛ chichi eghɨ kə lâŋkè kyiŋə nə ghənə nəyn.

⁵Ghɨ ghɛ ghe ndamə kə njà se ewìynse kyiŋə, ndə̂mə̀ ə̀təm ə ghənə̂ghè əghɛ ghɛ ə njà se ewìynse kyiŋə nə ghənə ə nə̂. Pîza ghɨ ghɛ ə ghe ndamə kə Zuʼsə Fezhə̀sè kyiŋə, ndə̂mə̀ ə̀təm ə ghənə̂ghè ə zuʼsə Fezhə̀sè.

⁶Ə wùə ndə̀m təm ə vəynghe əghɛ ə senjà se wìynse, ə è tə kwu. Pîza ə wùə ndə̀m təm ə vəynghe ətə ə̀ghɛ ə sezuʼ sə Fezhə̀sè, ə è tə kyî èndam zɛ ə ze tə mîə va è kɨsè pɔ̂ynè.

⁷Ghɨ ghɛ ə ghe ndamə kə njà sewìynse kyiŋə nyi sèpàyn sə Fezhə̀sè, kûmə̀ nə ghənə ndə̂mə̀ va lâŋ ə Fezhə̀kè, mə ə vayn kaʼa ndəʼ ndəm kəynke.

⁸Ghɨ ghɛ ə nə̂ kə njà sewìyn sə ghənə̂sè kyiŋə vayn kàʼa nəyn nə Zhə̀fè ə saŋnə̂.

⁹Pîza ghàyn ndamə va kə njà saynse wìynse kyiŋə. Ghàyn pɨlə ndamə kə zuʼse kyiŋə, ezhoghɛ ə zuʼsə Fezhə̀sè ndɨŋ nyi ə ghàyn ətəm. Nâʼàpî ndè vɛ ə è kiva zuʼsə Klaysè, va yî vəyn.

¹⁰Pîza, ə Klâys nyi ə ghàyn ə fètəyn, ə ghàyn ə kyi èndam kûmə̀ nə Klâys ə nə̀yn ghàyn e nyi chichi ə Zhə̀fè əshi, pî kə wîyn mâynm̀ tə kwuə kûmə̀ ə̀ghɛ əpi ghɛ ə ghàyn nə̀yn.

¹¹Ə zuʼsə Fezhə̀ sɛ ə se tè zòmse Njisə̀s ekwu nyi ə ghàyn ə fètəyn, nyiəmə, nâʼàpî m̀wiyn mâynm̀ mɛ m̀ nyi mə m̀ mə kàynè kwu, Zhə̀ fɛ ə fe tè zòmse Klâys tə zômsə̀ kəpi m̀wiyn nə mɛ. È tə nə̂ zɨnə mə è tyaʼa sezuʼ kɛ ə ke kayne nyi ə ghàyn ə fètəyn.

¹²E za tyə̀nə̀ ə ghɔnyìə ghɨmə nə, ghɛze nyîə nyi mə ghâsènì kyi se nə̀yn, ə̀ vachi se ndam kə njà ewìyn ə ghâsènì kyiŋə.

¹³Kûmə̀ nə ə ghàyn ndam kə njà saynse wìynse kyiŋə, ə ghàyn tə kwu, pîza ə ghàyn zhwi ghɛ ə pi ghaynghe è tyaʼa sezuʼ sə Fezhə̀sè, ə ghàyn tə kyî èndam.

¹⁴Ghɨ ghɛ ə ghe chûmtə̀ ndom vɛ ə zuʼsə Fezhə̀sè tyə̀nə̀ nyi əghɔ Fezhə̀ghè.

¹⁵Kûmə̀ nə zuʼ sɛ ə Zhə̀fè nyi mə fə fo se ghàyn nə̀ chîəva nə ghàyn ə nyi èkɔ̂s, pi se nə̀yn nə ghàyn ə fânə̀. Se pɨlə nə̂ nə ghàyn ə nyi ə̀ghɔ Fezhə̀ghè, famə atyaʼ ə sezuʼke, ghâsènì chìə fɨsə̂ ndûə se Zhə̀fè nə, “Pɨ̀a! Pɨ̀a Vɨ̂mvè”

¹⁶Zuʼsə Fezhə̀sè tsɨ̂yntə̀ ngɨŋə̂ vəyn è zuʼsə ghasènìse, se tsàyn nə ghâsènì nyi ə ghɔ Fezhə̀ghè.

¹⁷Kə ghâsènì se nyi ə̀ ghɔyn ə vəynghe, ghâsènì tə kyîə ndò pɔsê tɛ ə È ndə̀m sê ghɔ vəynghe, ə kyi kepî ghasènyìə ghə̀ Klâys fɨa vɛ ə Zhə̀fè nyi mə fə ndə̀m se Vəyn, kûmə̀ nə ə ghâsènì zɨ tsôsvè ghasènyìə ghə̀ Klâys, ə ghâsènì tə kyî kepî èpomsê ə vəynze.

¹⁸M njîə va nə tsôs vɨ̀yn ə ghâsènì fe zôyn fa ashìŋə̀ nyì nâʼà eghɛ zhîze, ə ghâsènì fɨ̀aʼnè vəynve è pomsê zɛ ə tə tyə̂nə̀ paynsə̂ sê ghâsènì ashìŋə̀ kɛ ə ke nyi se tə pə̀yn.

¹⁹Nâʼà efɨa èkɨ̂m vɛ ə Zhə̀fè Pom nyîə lɨmtə̂ se shîŋə̀ nə kɛ ə Zhə̀fè tə tyə̂nə̀ paynsə̂ ghɔ Vəynghe.

²⁰Ze tè nyi nə fɨa vɛ ə pom, nyi ke èfɨa sə ndô. Ə̀ vachi èfɨa nə vɨ̂yn sə vəyn və ngɨŋ ə ve tè nə̀yn sə nyi zamə, pîza ə̀ tè nəyn Fezhə̀ nə və nyi zamə. È tè nəyn nyiəmə è kwâʼtèzè nə,

²¹zhi nə̀ fɨsə̂ èfɨa nə vɨnə mə etyə̂ àtyaʼ kɛ ə ke nə̂ nə fɨave ə fîə, ə ghənə ə kyi kepî èndom se fiə kəpì epomsê zɛ ə Zhə̀fè nyi mə Fe ə fo sê ghɔ Vəynghe.

²²Ghâsènì ke ndô nə se kɔʼɔ fɨ zôyn, nâʼà èfɨa èkɨ̂m kə Zhə̀fè tè pom, nyiə tsɔ̂ynə̀, zɨə ètɨm kə zɛ ə wùzhɔyn zɨə shîŋə̀ kɛ ə è kyiŋə se pîə.

²³Pîza, ə va ke èfɨa nə vɨ̂yn ə ve tsɔ̂ynə̀, ghâsènì ghɛ ə kyi zuʼ sɛ ə Zhə̀fè nyi mə fə fo se ghâsènì kə emaʼte ə shive, ghâsènì tsɔ̂ynə̀ kəpi ndò ə ghâsènì ətəm. Ghâsènì ə ndə̀m təm ə ghasènìghe əkɨ̂m se lɨmtê ashîŋə̀ kɛ ə Zhə̀fè tə paynsə̂ nə̂ nə ghâsènì ə nyi ə̀ghɔ vəynghe, se fiə zà mwiyn mə ghasènimè, se fɨnə fo ghâsènì è wiyn mə èfemè.

²⁴Kə ghâsènì kyi sɔzaze, ghâsènì ə ndə̀m təm ə ghasènìghe nə ghâsènì tə kyîə ndò ghɛ zɛ ə Zhə̀fè pì nə zhi tə nə̂ ndò. Pîza ə fe fɨa kɛ ə ghâsènì nyi mə ə ndə̀m təmghe nə ə tə kyîə ndò, ə zɛ mə ə pâynsê va èkwaʼtè zhîze. Ə̀ kàʼa kyi ndè kwâʼtèzè se kyî àfɨa kɛ ə è nyi mə è və kàynè kyî ə?

²⁵Pîza ə ghâsènì kyi kwâʼtèzè se fɨa kɛ ə ghâsènì fe va, ghâsènì ə kolə ə̀təm ə lɨmtə̂ kəynke.

²⁶Kèpî èghɨ, zuʼsə Fezhə̀sè pə̂ kəpi ndò se tsàmtə ghâsènì pî kə ghâsènì tɛ va tyaʼke. Ghâsènì keva kə kyi se tsə̀m, pîza ə̀ nyi sezuʼ sə səynsə ngɨŋ ə se tsə̂mə̀ sê è tsɔ̂yn zɛ ə ze tsɨ̂ə tsɛ pîzè.

²⁷Zhə̀fè fe ndzɨsə ndò təm ə ghasènìghe, ke èghɛ zɛ ə zuʼse kwaʼtə̀ kûmə̀ nə zuʼse tsə̂mə̀ ndò ə ghɨə Fezhə̀ghè elùʼ endom vɛ ə Zhə̀fè kyiŋə.

²⁸Ghâsènì kendô nə nâʼà pi èghɛ èkè zɛ ə ze kyâynə̀, Zhə̀fè nə̀ zəynze sə chùŋ ə̀ghɨ̀ ghɛ ə kɔ̂ŋə̀ Fəynfe. Ə ghənə ghɛ è nyi mə È və tɔŋɔ nə ə nəyn kə È kyiŋə.

²⁹Ghɨ ghɛ ə Zhə̀fè tè nyi mə fe ə kàynè chitê nə tsɨnè ə̀ ghənə ə nyi kə zə Vâ Vəyn, kə vayn nə vɨnə mə tə pəyn ə è və nyi Vâ ə̀shi se ghɔnyì ə vəynghe.

³⁰Nyiəmə, ghɨ ghɛ Zhə̀fè tè nyi mə fe ə kàynè chitê ndəm, È və tə tɔŋɔ ghənə nə ə nyi ə̀ghɨ ə vəynghe. Ghɛ ə È nyi mə È və tɔŋɔ, È pi nə ə̀ nyi ghɛ ə ghe nyi chichi ə zhi shi. È və fo pomsê ə vəynze sê ghɛ ə ghe nyi chichi ə və shi.

³¹Ghâsènì nyiə kàʼa pi nə ghe kûmə̀ ə̀ghɛ nə ghɨnə̀ ə? Ə Zhə̀fè nyì ghasènyìə ghə̀ ghənə, ə̀ nyi ndè vɛ ə è kàʼa è və tɔʼə̀ va ghâsènì ə?

³²Ə̀ vayn kàʼa ndəʼ nyi Fèzhə̀, ə fɛ ə fe tè tàʼa ghə̀ʼtè se fo Vâ vəyn se ghâsènì əkɨ̂m. È tè nji vəyn ə fo nə È kwu ə ghâsènì ətu ə̀kɨ̂m, nyiəmə, È tə fo va zayn fɨave ekɨ̂m vɛ ə ghâsènì pfɨfə sê vəyn ə?

³³Ə̀ tə pîə ndè nə ghɨ ghɛ ə Zhə̀fè chitê nyi mə ə pfɨ̀ saʼa? Ə̀ pi Fezhə̀ è ngɨŋə̂ vəyn nə ghâsènì nyi əghɨ ghɛ ə ghe nyi chichi ə və shi.

³⁴Ə̀ tə pîə ndè nə ghâsènì ə pfɨ̀ saʼa? Njisə̀s Klâys tè kwu, ə zòmə̀, ə tsɨsə̂ ə Zhə̀fè ekɔyn twɔve, ə̀ nyi fumə ə è tə nə̂ ə è və chyatə̂ Fèzhə̀ ə ghâsènì elùʼ.

³⁵Ə̀ kàʼa ə̀ chyase nâʼà ndè ghâsènì ə Klâys e kɔ̀ŋ ə? Ə̀ kàʼa ə̀ chyase tsôsvè mə, əghɛ kə ghe tɛ mə, ə̀ nyi etsə̂fsè mə, ə chɨ̀ŋ kə è zafə ghâsènì mə, afɨf mə, əghɛ ə kwəmnəghe kə ghe tsɨŋsə̂ ghâsènì mə, nâʼà èkwu zɛ ə ze nyi se tə pə̀yn sê ghâsènì mə?

³⁶Ŋwàʼlè ə̀ Fèzhə̀ pi nə, “Ghàs tyəm ke əkwuze cho tuʼmè m̀kɨ̂m kûmə̀ ghò. Ə naynə̂ ghàs kə pfɨ ə̀ ndzè ə ndûə se se.”

³⁷Ngaŋngaŋ, ghɛ nə ghɨnə mə əkɨ̂m kyànə̀ ndò pîza, ghâsènì ə tɨm zhi tɔynə̂ sê Klâys vɛ ə È kɔ̀ŋə̀, tsâmtə̀, ghâsènì.

³⁸M kendô səmɔʼ nə fɨa kyîke vayn chyàsə ghâsènì ekɔ̀ŋ zɛ ə Klâys kyi sê ghâsènì, kɨ̀sə ə nyì pî èkwu kɨ̀sə ə̀ nyi endam, kɨ̀sə ə̀ nyi sètsì kɨ̀sə ə̀ nyi etu ə tendâʼàvè, kɨ̀se ə̀ nyi etwɔʼ ekwùtwəyn. Kɨ̀sə ə̀ nyi ashîŋə̂ kɨ̂ynə̀ ə ghâsènì nyi ətəyn, kɨ̀sə ə̀ nyi kɛ ə ke tə pə̂.

³⁹Kɨ̀sə ə̀ nyi atyaʼ ə mbi kɛ ə ke nyi ekwùtwəyn, kɨ̀sə ə̀ nyi kɛ ə ke nyi ə chi, fɨa kyîke va əfètə̂ èfɨa vɛ ə Zhə̀fè nyi mə Fe ə pom kɛ ə ke kaʼa ə ke chyase ghâsènì ətê èkɔ̀ŋ zɛ ə Zhə̀fè kyi sê ghâsènì tɔynə̂ sê Njisə̀s Klâys Pɛ̂pɛ ə̀ ghâsènì.