Read Mmen Lûm 9 Bible Online

Lûm 9 - Mmen bible

Lûm 9

¹M pîə səmɔʼ kə wùə vɛ ə È pomə sê Klâys mə m wamə chîəva ndô. Təm ghɨm ghɛ ə ghe nyi etyə̂ àtyaʼ ə Sezuʼ Eŋwaʼake tsâ kəpî ndò se mi nə m wamə va kaŋke.

²Təm ghɨmə tɨ̂lə̀ kə nyî, ghɛ ghe fo ngəʼ sê mi nâʼà sə ŋaŋ

³kûmə̀ ə̀ghɨ ghɨmə, ghɛ ə ghasè ghə̀ ghənə fɨ ndaʼze emɔ̀ʼ. Kûmə̀ ghənə, m fə nyiə kyiŋə nə Zhə̀fè lɔʼ mi, ə È nəyn m mə va ghasè Klâys.

⁴Ghɨ ghɨm nə ghɨ̂yn nyi əghɨə Isìlây ghɛ ə Zhə̀fè tè njì sə Vəyn ə ghɔyn se tyə̀ynə paynsê epomsê ə Vəyn sê ghənə. Ə zhiə mkâyn yî ghənə ə fɨnə fo alàŋ ə Vəynke sê ghənə. È və tə chwìtè se ghənə kə ghənə kyi sə̂ ngɨmnə̂ Vəyn, ə̀ nyi se ghənə ə È tè pi nə zhi tə nə̂ èghɛ se ghənə, mə È tə nə̂.

⁵Ghənə nyi əghɔ ghɔynə pɨa pɨa ghasènìghe. Kə tè piə Klâys kə wùə m̀sɔ̀ŋ, È tè fɨ pə̂yn ə ghənə etàŋ. Tsîtèzè nyì sê Zhə̀fè sə teshìŋə̀ tèkɨ̂m, ə Vəyn vɛ fɨave ekɨ̂m nyi ə vəyn etyə̂ àtyaʼ. Ə ze ə nyi ke zamə.

⁶M pìə chiva nə Zhə̀fè paʼà nə̀yn ghɛ zɛ ə Fe tè tsɨ̀ne; kûmə̀ nə ə̀ vachi ə ghɨ ə Isìlâyghè əkɨ̂m ə nyi ə ghɨ ə Fezhə̀ghè.

⁷Ə̀ va pî əghɔ Aplàghâm ghə kɨ̂m ə ghe nyi əghɔ Fezhə̀. Zhə̀fè tè pì sê Aplàghâm nə, “Ə̀ nyì tɔynê ə feghàŋ fə Azɨ̀kfè ə ò tə kyiə ghɔ ghɔyn ghɛ ə m tè tsɨ̀ne sê gho.”

⁸Zɨnə mə tyə̂nə̀ nə, ghɔyn ghɛ ə piə endom ə wûə m̀sɔ̀ŋve, vachi ə̀ghɔ Fezhə̀ghè Pîza ghɔyn ghɛ ə piə endom vɛ ə Zhə̀fè tè tsàyn sê Aplàghâm nə zhi nə̀ nə̂, ə̀ nyi ghənə ghɛ ə paynsə̂ taŋtə nə ə̀ nyi feghâŋ fə Aplàghâmfè.

⁹Kə Zhə̀fè tè nəyn tsɨ̂nèzè yî Aplàghâm, Fe tè pi nə, “M tə fɨnə pə̂ ashìŋə̀ kɛ m ndə̂m. Sèla tə nə̂ ə è və kyi vâyn endômə̀ əgho.”

¹⁰Ə̀ va ke zɛ mə. Ghɔyn endômnè ə Lèpekà ə pɛ̀ tè kyi ke pɨa emɔ̀ʼ, pɨa nə vɨnə mə tè nyi pɨ̀a pɨ̀a ghâsènì Azɨ̀k.

¹¹Ə̀ tè nyi tsɔ̀fə kə ə piə ghɔyn nə ghɨ̂yn, mə ghənə paʼà nyìəm kê se nə chùŋ kɨ̀sə pi, Zhə̀fè ə tsà se Lèpekà nə, “Vayn èndumə tə nə̂ ə è və nyi wùə àfɨ̀aʼ sê vayn etətə̂” Zhə̀fè tè nəyn zɨnə mə kə ze ə nyi nə ə̀ nəyn zhi nə vayn emɔ̀ʼ ə nyi ə və mɔ̀ʼɔ etyə̀. Ə̀ tè nyi ə vəyn ekɔ̀ŋ se chitê ə wùə vɛ ə è kɔ̀ŋə̀, ə̀ vachi kûmə̀ ə̀ghɛ ghɛ ə wùə təyn tè nəyn.

¹³Ə nyàʼ ə Ŋwàʼlè ə̀ Fèzhə̀ nə Zhə̀fè pì nə, “Mə tə kɔ̀ŋ Njàkɔ̂p ə pànə̀ Esò.”

¹⁴Ghâsènì nə̀ pìə nə ghe zôyn ə? E za nyi nə Zhə̀fè tɔ̀ʼə̀ ndò ghɨə mɔ̀ʼɔghe mə? E va za nâʼà səkɔs!

¹⁵Zhə̀fè tè wàmne sê Mosîs ə pìə nə, “M nə̀ kosə̂ èsəyn sê ghɨ ghɛ m kɔ̂ŋɔ̀ se kosê esəyn sê ghənə, m tɔʼne è ghɨ ghɛ M kɔ̂ŋɔ̀ se tɔ̀ʼnə̀ è ghənə.”

¹⁶Nyiəmə, fɨa kɛ ə Zhə̀fè chitê kiva ghɛ zhîze se nə̀yn. Ghɛ ghe əkɨ̂m vachi kè kə ghâsènì ghɨ msɔ̀ŋghe kyiŋə, nə̂. Pîza ə̀ nyi ke kûmə̀ èkosê esəyn ə Fezhə̀zè ə È nə̀ nâʼà pi èghɛ èkè zɛ ə è kɔ̀ŋə̀ se nə̀yn.

¹⁷Ə nyàʼ ə ŋwàʼlè ə̀ Fèzhə̀ nə Zhə̀fè tè pì sê fɔ̀yn Felò nə, “M tè ndəm ghô sə fɔ̀yn, kə m kaʼa m nji ghô ə m tyəyn tyaʼ kɨmke ətəyn è kɨsè nə zə zɨme kwi nga mbi èkɨ̂m.”

¹⁸E za tyə̀nə̀ nə Zhə̀fè nyîə kosə̂ èsəyn nâʼàpî se ndè kə Fe chitê se kose esəyn sê vəyn. Fɨnə nə̂ nə tɛ atu zə nyi sê wùə kè kə Vəyn Zhə̀fè kɔ̀ŋɔ.

¹⁹Pîza wùə èmɔ̀ʼ ə ghàyn ə fètəyn nə̀ pîə se mi nə, “Ə ze nyi nyiəmə, Zhə̀fè kàʼa ə fe ə ghamə̀ zàyn wùə vîvè ə? Ə̀ kàʼa ə tə nde se nə̀yn eghɛ zɛ ə Zhə̀fè pì nə è nəyn ə?”

²⁰Pîza, Ò nyi nâʼà ndè, ə gho wùə m̀sɔ̀ŋ sə̂ pfɨfə èghɛ ə Zhə̀fè echo ə? Tɔ̀yn èchaʼ vayn kàʼa è pfɨf sê wùə vɛ ə è tè pom zə̂ynzè nə “Ò tè pom zayn mi nyiə?”

²¹Piə wùə vɛ ə è pomə tɔ̀ynsè kɔ̀ŋ ə è nji toʼ èchaʼ ə è momte, ə è chyase ə è pom tɔ̀yn sepɛ̀ ətəyn, ə emɔ̀ʼ ə nyi mə ə kwə̂ynə̂ ətəyn shîŋə̀ kɛ ə ghɛ eghaʼè nyi, zə mɔ̀ʼɔ e nyi mə ə kwəynə̂ ətəyn nâʼàpî ashìŋə̀ àkè.

²²E nyi kepî eghɨ səmɔʼ kə Zhə̀fè nə̀yn. Fe tè kɔ̀ŋ se tyə̀yn nə Fe nyɔʼsə̀ etɔŋ ə fɨnə kɔ̂ŋɔ̀ se nə̀yn nə ghɨ fe tyaʼa Vəynke. Ə̀ za nyi eghɛ zɛ ə Fe tè ngəse kol ə̀təm è ghɨ vəyn ghɛ ə ghe tè nəyn nə è və nyɔʼsə̀ ètɔŋ. Ghɨ nə ghɨnə mə tè kyi ndô sə kyi èpɔynsê.

²³Zhə̀fè tè kyiŋə kəpîə se tyə̀ynə paynsê epomsê èghaʼâ vəynze etûə ə̀ghɨ̀ ghɛ ə è tè kyi kosê esəyn sê ghənə. È və kàynè pɨaʼtê ghɨ nə ghɛ mə kə ghe fi pomsê ə Vəynze.

²⁴Ghâsènì e nyi paʼsê anɔ̀yn əghɨ̀ kɛ ə è nyi mə È və tɔŋə fɨsê. Ə̀ vachi ke anɔ̀yn əghɨ̀ ə Isìlâykè ə È tɔŋə fɨse ghâsènì. È və tɔŋə fɨse ghâsènì yîghe əfètə̂ ə̀ghɨ̀ ghɛ ə̀ vachi ə̀ghɨ ə Njûsghè.

²⁵Zhə̀fè pì ə ŋwàʼlè ə̀ Ghòzayà nə, “Ghɨ ghɛ ə̀ tè va əghɨ ghɨmə, M tə tɔŋə ghənə nə, ‘Ghɨ ghɨmə’ Ə ndaʼ zɛ ə M tè tàʼa kɔ̀ŋ, M tə tɔŋtə zəynze nə, ‘Ndaʼ zɨmze kɔ̀ŋzè

²⁶Kèpi elùʼ nə vɛ mə ə m tè tsàyn sê ghənə ətəyn nə, ‘Ghàyn vachi ə̀ghɨ ghɨmə’, ə̀ nyì fumə m tə tɔŋtə ghənə nə ghənə nyi əghɔyn ghɨmə, əghɔ Fezhə̀ fɛ ə Fe fo ndamze.”

²⁷Fɨ̀aʼtè Èsayà ə tə pì ə ndayn kûmə̀ ə̀ghɨ ə Isìlâyghè nə, “Naʼapi kə ghɨə Isìlây tsɨ̀ə nyiə kə ashəshə etipìə ènjwì ə fengwaŋve, ə̀ tə nə̂ ə nyi ke ə̀shi ə ghɨ̀ghè ə ghənə ə fètəyn kə tə sɔ̂ fɨə.

²⁸Kûmə̀ nə Pɛ̂pɛ tə pfɨ̂ŋə̀ saʼa mbi, ə È piə è saʼ ndò ə È saʼ mɨ̂sè ke ndò.”

²⁹E nyi ke kə Èsayà tè pì sə mɨ nə, “Ə tè nyi kə Zhə̀fè fɛ ə Fe ngaŋtə kwəynə tàʼa zà ə ghàs è ghɔ ghɔyn yîghe, mə ghàs ə pə̀yn sə nyi kə endaʼ ə Sondòmzè, è Ngòmolàzè.”

³⁰Ghâsènì kàʼa pi nə ghe zo ə? Ghɨ ghɛ ə ghənə tè vachi ə̀ghɨ Njûsghè pɨle nyi chichi ə Zhə̀fè əshi tɔynə̂ epomə̂ zɛ ə ghənə kyi sê Klâys pi kə ghənə tè so va ndyànə̀m sə nyi chichi ə Zhə̀fè əshi.

³¹Pîza ghɨə Isìlâyghè tè nyiə so m̀ndyàyn sə̂ chùmtə̀ alâŋ kə ghənə kaʼa nyi chichi ə Zhə̀fè əshi, pîza vayn kàʼa chumte kəynke.

³²Ghənə tè vayn kàʼa chumte kûmə̀ ghè? Ghənə tè vayn kàʼa chumte kûmə̀ nə ghənə tè so m̀ndyàyn sə̂ nyi chichi ə Zhə̀fè əshi kûmə̀ èfɨaʼ zɛ ə ghənə tè nə̂, ə̀ vachi kûmə̀ epomə̂ zɛ ə ghənə tè kyi sê Zhə̀fè. Ghənə tè tɨm aghol ə ghənə̂kè ətə̂ èchi zɛ ə ghɨ tè tɨmə gholghe ətəyn, ə pfɨ̀ə əchi.

³³Ə̀ nyàʼ ə ŋwàʼlè ə̀ Fèzhə̀ kûmə̀ èghɛ nə zɛ mə nə, “Ghàyn fe kə, mə ndə̀m chize ə Zayɔ̀n ə zɛ ə ze tə nə̂ ə ghɨ ə tɨmnə̂ ə̀ghol, echi zɛ ə ze tə nə̂ nə ghɨghe ə pfɨ̀lə̀. Pîza nâʼàpî ndè vɛ ə è pomə sê Vəyn tə kwɨlə̂ va è gho ezomghe.”