Read Mmen 1 Kɔlìŋ 10 Bible Online

1 Kɔlìŋ 10 - Mmen bible

1 Kɔlìŋ 10

¹Ghɔnyì ghɨmə m kyiŋə nə ghàyn fɨyn pyə̂ytè èghɛ zɛ ə ze tè kyàyn sê pɨ̀a ə ghâsènì ghɛ ə ghe tè chùmtə Mosîs. Ghənə əkɨ̂m tè nyi mə ə̀ tsɨ̀ŋnə̀ sèmbàʼ ghənə, ghənə əkɨ̂m ə tsɛ̀ tɔynə̂ àchûŋ ə enjwì ə fengwaŋve.

²Shîŋə̀ kɛ ə ghənə tè nyì fumə əfètə̂ sèmbàʼ è kɨsè ə enjwì ə fengwaŋve, ə tə fo môm se ghənə kə se chùmtè èpàm sə Mosîsè.

³Ghənə əkɨ̂m ə zhiə kə efɨazhiəve emɔ̀ʼ mə ve ndo awulə

⁴ə mɨə kəpî m̀mo mə Sèzuʼ mè m̀mɔ̀ʼ mə m̀ ndò awulə. Ghənə tè mɨ mmo mə təynmè mə m̀ fɨ anayn mə ke ndo awulə, nayn ətəynke ə ndùə yî ghə̀ ghənə mə nayn ətəynke tè nyî Klâys è ngɨŋə̂ Vəyn.

⁵Pi kə ze tè nyi nyiə mə, Zhə̀fè tè va èsaŋnêzè sê ghɨ tsɨəghe ə ghənə əfètəyn, nyiəmə, Zhə̀fè ə zhwitə̂ ghənə ə màʼlə̀ tèpfɨyn tə ghənə̂tè, luʼ tekɨ̂m elùʼ ashəshəve.

⁶Zôyn ghɛ nə ghɨnə mə nâʼà ə̀kɨ̂m nyi fɨ̀as sê ghâsènì, nə kə ghâsènì ə kɔ̂ŋɔ̀ ghɛ ə piə kèpi kə ghənə tè kɔ̀ŋə,

⁷pî se ngɨmnê efɨaʼsè kə ghənə yîghe tè ngɨmnə, kè kə nyi mə ə nyàʼ ə ŋwàʼlè ə̀ Fèzhə̀ nə, “Ghɨghe ə tə tsɨsə̂ ə zhiə ə fɨnə mɨə, epàm ətəyn ghənə ə ndwìə sè pɨnə.”

⁸Təm ə ghasènìghe kiva sə saʼə ghâsènì nə ghâsènì fə nyɨ̀ŋə è zənə kɨ̀sə ə ndômnè mə ə̀ kiva ghâsènì, kè kə ghənə yîghe tè nə̂, kûmə̀ zɨnə mə, ghənə ə kwuə kamse m̀ghɨm pɛ̀ njò seta ə fetuʼ femɔ̀ʼ.

⁹Ghâsènì kiva sə̂ ndə̂mə̀ Pɛ̂pɛ[1] emɔ̀m kə ghənə yîghe tè nə̂, kûmə̀ zɨnə mə mbamse ə ndômnə̀ zhwiə ghənə.

¹⁰Ghâsènì kiva pî sə̂ shwinə̂ kə ghənə yîghe tè shwinə̂, ghɛ ətəynze ə nə̀, tsì ə̀ Fezhə̀ zɛ ə è pə̀ èkwuze ə zhwitə̂ ghənə.

¹¹Ghɛ nə ghɨnə̀ ə̀kɨ̂m tè kyayn sê ghənə sə fɨ̀as kə ghɨə mɔ̀ʼɔghe fe, ə fɨnə nyâʼà ndəmə̀ ghəynghe kə fɨ̀as se ghâsènì kûmə̀ nə ghâsènì ndamə ashìŋə̀ mə mɨ̀se se nyi ke se pə̀yn.

¹²Ə ò kwàʼtə̀ nə ò fɛtê tyəm ndò ə ghò epomə̂, ò tɔ̂ʼnə̀ kə ò nə pfɨ ə pi.

¹³Nâʼàpi èmɔ̂m èkè zɛ ə ghàyn nyi mə fe, nyi ekyì zɛ ə ze pə̂ sê nâʼà pî wùə m̀sɔ̀ŋ èkè. Pîza Zhə̀fè nə̀ èghɛ zɛ ə fe tsɨ̂nè, mə è vayn kaʼa ə è za nə ò tsɛ tɔynê emɔ̀m mə ze kaʼa ə ze nəyn ə ò pfɨ ə pi; ə shîŋə̀ kɛ ə mɔ̂mè pə̀yn se ghò, ə è fo ghô tyaʼa nə ò kol təmghe ə ò tsɛ tɔynê ətəyn.

¹⁴Kûmə̀ zɨnə mə ə soyn sɨmse, ghàyn zàmaʼà èfɨaʼsè engɨmnəve.

¹⁵M wâmnə̀ sê ghàyn kə ghɨ ghɛ ə ghe kyi tɔfe. Ghàyn kwaʼte kê nâʼà è ngɨŋ saynse nə ghɛ zɛ ə m nyâʼ nyì səmɔʼ mə ze va səmɔʼə.

¹⁶Wà zɛ ə ghâsènì nə̂ mɨə ezhoghɛ ə zhiə wiynə Pɛ̂pɛve, mə ə̀ nyi zə̂ynzè ə ghâsènì fo zɔ̀ŋnèkè ətəyn se Zhə̀fè, ashìŋə̀ kɛ ə ghâsènì mɨə ətəyn, ze nyi nə ghâsènì chyàtə̀ eghɛ zɛ ə Klâys tè nəyn sê ghâsènì ə sɨ̀sə̀ m̀ndəm mə Və̂ynmè. Mə payn ə kwaŋ kɛ ə ghâsènì zhiə, shîŋə̀ kɛ ə ghâsènì zhiə kəynke, ze nyi nə ghâsènì chyàtə̀ ezə ə ngəʼ zɛ ə Klâys tè zɨ awâmnè.

¹⁷Kûmə̀ nə payn ə kwaŋke nyi ke àmɔ̀ʼ, mə ghâsènì əkɨ̂m pî kə tsɨ̂ə, nyì ke èwiyn emɔ̀ʼ kûmə̀ nə nâʼà ghâsènì əkɨ̂m chyàtə̀ kə àpayn ə kwaŋke amɔ̀ʼ.

¹⁸Ghàyn fe ghɨ Isìlâyghə; ghənə chyâtə̀ afɨa kɛ ə fo etuə àlaŋ efoke ə zhiə, e tyə̀nə̀ nə ghənə ə chyàtè kepî efɨ̀aʼ ə Fezhə̀ zɛ ə ze nyi alaŋ.

¹⁹E za tyə̀nə̀ nə ghɛ zɛ m piə nyi nə fɨ̂aʼsèkè kɨ̀sə ə̀ nyi efɨazhiə vɛ ə fo sê kəynke kwəynə̂ pi ndò eghɛ zhize mə?

²⁰Ngaŋngaŋ. M pîə nə, fɨa kɛ ə pəkàynsè fo kə efo, ə fo kəynke se pamə̂ tə satàyntè, ə̀ vachi se Zhə̀fè. Mə m kɔ̂ŋɔ̀ va nə ghàyn ə kyi èghɛ zhîze se nə̀yn è pamə̂ tə satàyntè.

²¹Ghàyn vayn kàʼa ə mɨə ə Pɛ̂pɛ ə wà fɨnə mɨə kəpî ə pamə̂ tə satàyntə wà. Ghàyn vayn kaʼa ə zhiə ə Pɛ̂pɛ etuə alaŋ fɨnə zhiə kəpî etûə àlaŋ ə tepamə̂ tə satàyntè.

²²Mə ghâsènì kyiŋə se nə̀yn nə Zhə̀fè ə nyɔʼsə̀ ètɔŋ sê ghâsènì ə? Ghâsènì kwàʼtə̀ nə ə tɛ tsɛ ndò Və ə?

²³Ghənə pîə nə, “Ghâsènì kàʼa ə ghayn nâʼà pîghè” kè kə ghənə nyi mə pì. Zɨnə mə nyi səmɔʼ pîza ə̀ va nâʼàpî àkè ə ke tsɔ̂fə̀. “Ghâsènì kàʼa ghayn nâʼà pîghè” Pîza ə̀ va nâʼàpî èghɛ èkè ə ze tsâmtə̀.

²⁴Kə wùə vîvè se ghàyn ə fɨaʼà sê ngɨŋə̂ vəyn, pîza ghàyn e pɨlə fɨaʼà sə̂ tsâmtə̀ ə̀ghɨ mɔʼɔghe.

²⁵Ghàyn kàʼa ə ghàyn kwɨl nâʼàpî nyàm èkè zɛ ə pəʼlə apàʼ ə nyâmkè mə ə paʼà pfɨf pfɨfze se chwìtè nə təm ghaynghe nyîə saʼa ghàyn,

²⁶kûmə̀ nə ŋwàʼlè ə Fezhə̀ pi nə, “Chi kɨnə̀ è nâʼà pi àkè kɛ ə ke nyi ətəyn, ə̀ kyi Pɛ̂pɛ.”

²⁷Ə wùə vɛ ə è nyi ndɔʼɔ è pomə Klâys ndàmnè ghò nə ò pəyn zhi ə zhì ə ndɛ, ò ndûə, zhiə nâʼàpî ghè vɛ ə tsɛ̂sè nə ò zhi, mə ò pfɨfə va pfɨfze se chwìtè nə təm ghɛ nyîə saʼa ghò.

²⁸Pîza ə ò piə o zhiə ndò, wùə ə pìə se ghò nə, “Fɨazhiə vɨnə nyi mə ə fo sə efo se zuʼse pise,” kə ò zhi fɨazhiə ətəynve kûmə̀ wùə vɛ ə è tsàyn se ghò è kɨsè kûmə̀ ə̀təm ə saʼaghe,

²⁹m pîə chîəva ghɛ nə ətəm ə saʼaghe, pîza kûmə̀ ə̀təm ə saʼa ə wûə vɛ ə è tsàyn sê ghò ə ghe nə̀ fɨmsə̂ vəyn. Pîza wùə vîvè nə̀ pîə nə, “Kûmə̀ ghè ə ze nyi nə m vayn kàʼa ə m nəyn ghɛ zɛ ə m kyiŋə se nə̀yn kûmə̀ nə m fânə̀ nə təm ə wûəghè nə̀ saʼa vəyn ə?

³⁰Ə m nji fɨazhiə vɨmve ə fo àzɔ̀ŋnè sê Zhə̀fè tsɔ̀fə kə m zhi, pɔ̀m ghè ə wùə nə̀ ghamə̀ mi kûmə̀ efɨazhiəve mə mə fo zɔ̀ŋnèkè ətəyn ə?”

³¹Nyiəmə, nâʼàpî èghɛ èkè zɛ ə ghàyn nə̀, kɨ̀sə ghàyn zhiə ndò kɨ̀sə ghàyn mɨə ndò, ghàyn e nə̂ zamə kè se pomsê ezə Fezhə̀zè.

³²Ghàyn e ndamə endom kə ve vayn pə̀yn è tsôsvè sê wùə vîvè kɨ̀sə ə̀ nyi əghɨ Njûsə̀, kɨ̀sə ə ghɨ ghɛ ə̀ va əghɨ ə Njûsghè kɨ̀sə əghɨ ə poməghe.

³³Ghàyn e nə̂ kə kə m nə̂, m mɔmsə̀ se nə̀yn nə nâʼàpî ndè ə saŋnə̂ əghɛ ə̀kɨ̂m ghɛ m nə̂, kwaʼtə̀ va sê chùŋ zɨ̂mè, pîza kwaʼtə̀ se chùŋ ə̀ nâʼàpî ndè, kə Zhə̀fè kàʼa ə fe sɔza ghənə.