Read Mmen 1 Kɔlìŋ 14 Bible Online

1 Kɔlìŋ 14 - Mmen bible

1 Kɔlìŋ 14

¹E za tyə̀nə̀ nə ə̀ nyi ekɔ̂ŋ kə ghàyn kyi sə̂ nô sê zəynze. Ghàyn ndəm təm ghaynghe se kyi ətefo tɛ Zuʼse fo, paynpayn zɛ ə ze nyi sə̂ tsâ tom ə̀ Fèzhə̀.

²Ghɨ ghɛ ə wamnə̀ ə te wàmnè tə ndôtè ndɔ̀ʼɔ zaʼle wàmnə̀ chîəva sê ghɨghe pîza se Zhə̀fè, kûmə̀ nə wùə vîvè zɨə kê va ghɛ zɛ ə ghənə pîə. Ghənə wâmnə̀ ə̀ghɛ ə ndətə ə səmɔʼghe tɔynə̂ atyaʼ ə Sezuʼ se Ŋwaʼake.

³Pîza ghɨ ghɛ ə ghe tsâ tom ə̀ Fèzhə̀ wàmnə̀ se ghɨə, è ze tsâmtə̀ ghənə, fo ghənə è təm ə tɛ, è zɨ̀tèkè.

⁴Ghɨ ghɛ ə wâmnə̀ wâmnè tə ndôtè ndɔ̀ʼɔ zaʼle tsàmtə̀ kə sèngɨŋ sə ghənə̂sè, pîza ghɨ ghɛ ə tsâ tom Fèzhə̀ tsàmtə̀ ndɛ ə̀ Fèzhə̀ èkɨ̂m.

⁵M nə̀ nə m mə kɔŋə̀ nə ghàyn əkɨ̂m ə wâmnə̀ tèwâmnè tə ndôtè ndɔ̀ʼɔ zaʼle, pîza m nə̀ nə m mə pɨlə kɔ̂ŋə̀ nə ghàyn ə kyi èfo sə tsâ tom ə̀ Fèzhə̀. Ze nyi nyî kûmə̀ nə wùə vɛ ə è tsà tom ə̀ Fezhə̀ tsɨ̀ə tsɛ̂ ndò wùə vɛ ə è wàmnə̀ wâmnè tə ndôtè ndɔ̀ʼɔ ə è zaʼle, ə̀ tsɛ kə va mə wùə nyì ndo se wàmnè eghɛ ətəynze endom vɛ ə nâʼàpî ndè nə̀ zɨə ke, kə ze tsamte ndɛ ə̀ Fèzhə̀ èkɨ̂m.

⁶Nyiəmə ə soyn sɨmse, pə̂yn zɨmze se ghàyn nə̀ tsâmtə̀ ghàyn ə ghɛ ezhoghɛ m pəyn se ghàyn wàmnə̀ tè wâmnè tə ndôtè mə ghàyn zɨə kê va? Ze nə̀ tsâmtə̀ va ghàyn ə̀ tsɛ kə va mə m pəyn èghɛ efe zhîze kə Zhə̀fè pìə, pî ètɔf zhîze mə ghâsènì fə kê va, pî tom zhîzè mə è ndò sê Zhə̀fè, pî èzaʼlê zhîze.

⁷Ò kaʼa ò nji zayn fɨa epuʼəve mə ve kyi va ndamze kə ndɔŋ, è nduŋve, se kê njàŋ zɛ ə ve zhəmə, ezhoghɛ ə ò tàʼa fɛtə puʼə sekyə̀ sə təynse ə?

⁸Ə wùə vɛ è tɔŋə sɔŋze se tsàyn nə ghɔŋe zɛ ze pə̂ tàʼa fɛtə tɔŋ, ə wùə vîvè tàʼa pɨaʼtê se ghɔŋze.

⁹Kèpi famə endom, ə̀ tsɛ̂ kə va mə ghàyn əkɨ̂m ə wàmnè endom vɛ ə nâʼàpî ndè nə̀ zɨə, ə wùə vîvè tàʼa kê eghɛ zɛ ə ghàyn pìə. Ə zə tyə̂ nə wâmnè zayn nyi ke sə ndô.

¹⁰Wâmnètè tsɨ̂ə kə nyî ə mbi, pîza zhîze va ətəyn ə ze tsâ va ghɛze.

¹¹Pîza ə m zɨə ke va wâmnè zɛ ə wamnə̀, ə ghɨ ghɛ ə wamnə̀ zəynze ə nyi ə̀ghɨ ətumə sê mi, m pɔŋ nyi kepî wùə àtum se ghənə.

¹²Zôyn kə ghàyn kɔ̀ŋə̀ tsɛ̂sə̀ se kyî ə tefo tə se Zuʼse, ghàyn momse sə atyaʼ sə̂ njîə tɛ ə te nə̂ nə ndɛ ə̀ Fèzhə̀ ə ndəmə̂, fɨaʼà ətəyn sə ŋaŋ.

¹³Nyiəmə, wùə vɛ ə è wàmnə̀ wâmnè tə ndôtè ndɔ̀ʼɔ è zaʼle kyi se tsə̀m nə Zhə̀fè fo vəyn èfoze kə è və ke se tsâyn əghɛ ghɛ ə wâmnè tə təynte pîə.

¹⁴Kûmə̀ nə ə m tsə̂mə̀ famə endom, ə nyi mə zuʼ sɨmse nyiə tsə̂mə̀, pîza tɔf zɨmze kyi va ghɛ zhîze ətəyn.

¹⁵M kaʼa m ghayn nâʼà ghè zo? Ghɛ zɛ ə m kyi se nə̀yn nyi nə m nə̀ nə̂ m mə tsə̂mə̀ ə mìə sezuʼ, pîza tsə̂mə̀ kəpî è tɔf zɨmze, m nə zhəmə ə mì ə sezuʼ, pîza m mə zhəmə kəpi è tɔf zɨmze.

¹⁶Shîŋə̀ kɛ ə ò fo zɔ̀ŋnèkè sê Zhə̀fè mə ò fo kə ə sezuʼ, ə ghɨ ghɛ ə ghe nyi fumə atsɨ̀ynte mə ghe zɨə kêva kwi zayn se pì nə, “Ə zə nyi ke zamə” sê zɔ̀ŋnè kɛ ə ò fo etsə̀m ə? Ghənə kiva ndom se kê eghɛ zɛ ə ò pìə.

¹⁷Ə nyì pî nə zɔ̀ŋnè kɛke foke etsə̀m sê Zhə̀fè tsɔ̂fə̀ nâʼàpi zàyn, ə kə tsâmtə̀ va ghɨə mɔ̀ʼɔ nâʼà səkɔs.

¹⁸M fo àzɔ̀ŋnè sê Zhə̀fè kə m ke se wamnə̀ ə tewâmnè tə ndôtè ndɔ̀ʼɔ zaʼle tsɛ ghàyn nâʼà ə̀kɨ̂m.

¹⁹Pîza mə m nyi se wâmnè ə ndɛ ə̀ Fèzhə̀, ə mə kɔ̂ŋɔ̀ se piə kə əghɛ ə̀ tâyn kə ghɨ mɔ̀ʼɔghe kaʼa zɨ kê ə zaʼle ghɛze tsɛ̂ kə m pi ghɛ kamse eghɨm ə tewàmnè tə ndôtè ndɔ̀ʼɔ zaʼle.

²⁰Ghɔnyì ghɨmə, kə ghàyn fɨyn kwâʼtè kə mmɨ̂ətə̀. Ghàyn nyi mmɨ̂ətə̀ apàs se nə̀yn ə pi, pîza nyi ə̀ghɨ mə ndəmə̂ endom vɛ ə ghàyn kwàʼtə̀ ghɛghe ətəyn.

²¹Ə nyàʼ ə ŋwàʼlè Èsaʼ nə: “Pɛ̂pɛ pi nə, tɔynə̂ əghɨ̀ ghɛ ə wamnə̀ wâmnè tə ndôtè ndɔ̀ʼɔ zaʼle, tɔynə̂ kəpi echo əghɨ̀ atumze, M tə wamnə̀ se ghɨ ghɨ̀nə̀, pîza ə ghənə tàʼa pa zɨtê se Mi.”

²²Nyiəmə, wâmnè tə ndôtè tyə̀nə̀ àtyaʼ ə Fezhə̀kè sê ghɨ ghɛ ə ghe pa nyi ndɔ̀ʼɔ pomə, ə̀ va sê ghɨ ghɛ ə nyi mə pomə̂. Fo zɛ ə ze nyi sə̂ tsâ tom ə̀ Fèzhə̀ nyì sê ghɨ epoməghe ə̀ vachi se ghɛ ə nyi ndɔ̀ʼɔ pomə.

²³E za nyi nə, ə ndɛ ə̀ Fèzhə̀ èkɨ̂m pə̀yn sə afɨa àmɔ̀ʼ, ghənə əkɨ̂m e wamnə̀ kə ewàmnè ə ndôzè ndɔ̀ʼɔ zaʼle, ə ghɨ ghɛ ə ghe zɨə keva, è ghɛ ə ghe nyi ndɔ̀ʼɔ pomə, ə ghənə tàʼa pì nə tɔf taynte nyi mə tə fɨ səʼə?

²⁴Pîza mə ghàyn əkɨ̂m tsà tom ə̀ Fèzhə̀, wùə mə è paʼà pomə Zhə̀fè, kɨ̀sə wùə vɛ ə è zɨə keva ə njiə pə̂, ə ghɛ zɛ ə ghàyn pìə, ə ze nəyn ə ghənə ke nə ə nyi əghɨ ghɛ ə nə̂ ghɛ ə pighe è kɨsè nə ə ghənə faŋ sə̂ nə̂ kə pi, ə Zhə̀fè tə pɔynsê ghənə,

²⁵kûmə̀ nə tom ə Fezhə̀ ə nə̀yn ghɨghe ə kê ə̀ghɛ ghɛ ə ghənə tè nyi mə ə ndə̀tè ə ghənə ə fèteyn ə̀təm. Nyiəmə, ghənə tə tɨmə ə̀ ndzɨs ə ngɨmnə̂ Fèzhə̀ pîə nə, “Zhə̀fè nyîə ndɨŋ nyi ə ghàyn ə fètəyn.”

²⁶Ghɛ zɛ ə m pîə ə soyn sɨmse nyi nə, shîŋə̀ kɛ ə ghàyn pə̀yn elùʼ engɨmnəve, wùə èmɔ̀ʼ e kyi njàŋ, və mɔ̀ʼɔ e kyi èzaʼlê, və mɔ̀ʼɔ e kyi èghɛ kə Zhə̀fè tyə̀yn sê vəyn, və mɔ̀ʼɔ e kyi tom ə tewàmnè tə ndôtè ndɔ̀ʼɔ zaʼle, və mɔ̀ʼɔ e tsâ ə̀ghɛ ghɛ ə wâmnètè ndɔ̀ʼɔ zaʼle pìə. Nâʼàpî èghɛ èkè zɛ ə nə̂, ə zə nyi ke se nə̀yn nə ndɛ ə̀ Fèzhə̀ ə ndəmə̂

²⁷Ə ghɨə kyiŋə se wàmnè ə tewàmnè tə ndôtè ndɔ̀ʼɔ zaʼle, ə ghɨghe əpɛ̀ ə kyi se wamnè, mə ə ghənə tsɨ̂ə, ə nyi ke ə̀ta se wàmnè, mə wùə wàmnə̀ kə èmɔ̀ʼ emɔ̀ʼ, mə shîŋə̀ kɛ ə è wàmnə̀, və mɔʼɔ kyi sə tsâ se ghɨə ewàmnè zɛ ə ghənə zɨə ke.

²⁸Pîza mə wùə vîvè va se tsàyn ewàmnè zɛ ə ghɨghe nə̀ zɨə ke, ə wùə vɛ ə è wàmnə̀ ə tewàmnè tə ndôtè ndɔ̀ʼɔ zaʼle ə kyi se kɨ̂m mɔŋ ə ndɛ ə̀ Fèzhə̀, se wàmnə̀ kə elùʼ vɛ ə̀ nyì ke vəyn è Zhə̀fè.

²⁹Ə fɨ̀aʼtèsè nyì se wàmnè, sə wamnə̀ kə sè pɛ̀ kɨ̀sə sè ta, mə ghənə wâmnə̀, fɨ̀aʼtè sə mɔ̀ʼɔse e fɛtə̂ kyàʼsə̀ naynə̂ eghɛ zɛ ə ghənə pîə.

³⁰Pîza ə wùə tsɨs ə chi, Zhə̀fè ə tyə̀nə̀ èghɛ se vəyn, vɛ ə è wàmnə̀ kyi se kɨ̂m mɔŋ.

³¹Ghàyn əkɨ̂m kàʼa tsayn tom ə̀ Fèzhə̀ wùə èmɔ̀ʼ emɔ̀ʼ kə nâʼàpî ndè kàʼa è zaʼle ə è pɔŋ kyi ə̀təm ə tɛghe.

³²Wùə vɛ ə è kyi foze sə̂ tsâ tom ə̀ Fèzhə̀ kyi sə̂ tɔ̂ʼnə̀ endom vɛ ə è tsà tom ə̀təyn,

³³kûmə̀ nə Zhə̀fè kɔ̂ŋɔ̀ va nə ghâsènì ə saylə̀ nə̂ ndò ghɛghe, pîza nə ghâsènì ə nə̂ ə̀ghɛ èchoze emɔ̀ʼ è pɔ̂ynè. Kè kə ze nyi ə se ndɛ sə Fezhə̀ sɛ ə ghɨ ə Fezhə̀ghè nyi ətəyn,

³⁴zənə kyi sə̂ kyi mɔŋ ə ndɛ ə̀ Fèzhə̀. Ə paʼà zàmaʼà nə ghənə wamne; kè kə lâŋ ə ghɨə Njûskè pìə nə ghənə kyi va sə̂ nyi etu.

³⁵Ə ghənə kyiŋə se pfɨf se kê eghɛ zhîze, ghənə ə pfɨfə se ndom ə ghənə̂ghè ə ndɛ. Ə̀ nyi eghɛ eghoməze sê wùzhɔyn se wàmnè atsɨ̀ynte ə ndɛ ə̀ Fèzhə̀kè.

³⁶Mə ze laynse nyi nə ghàyn kyiŋə se pì nə tom ə̀ Fezhə̀zè tè fɨ pə̂yn sê ghàyn mə? Mə ghàyn kyiŋə se pì nə tom ə̀ Fèzhə̀ tè pə̀yn kê se ghàyn mə?

³⁷Ə wùə ke nə è nyi fɨ̀aʼtè ə̀ Fèzhə̀, pî nə è kyi èfo mə ə̀ fo se Zuʼ, ə è və kyi se pomə̂ nə ghɛ zɛ m nyâʼà sê ghàyn ndò sê Pɛ̂pɛ.

³⁸Pîza mə è kɔ̀ŋə̀ va se zɨtê əghɛ ghɨ̀nə̀, kə ò ndəm kepî àtu se zɨ eghɛ zɛ ə è pìə.

³⁹Nyiəmə ə soyn sɨmse, ghàyn ndəm təm ghaynghe sə̂ tsâ tom ə̀ Fèzhə̀, tə va nə kə wùə wamne ə tewàmnè tə ndôtè ndɔ̀ʼɔ zaʼle;

⁴⁰pîza ə kyi sə̂ nə̂ ə̀ghɛ ə̀kɨ̂m endom echûŋvè è kɨsè ə mbaŋə ə mbaŋə.