Read Mmen 1 Kɔlìŋ 16 Bible Online

1 Kɔlìŋ 16 - Mmen bible

1 Kɔlìŋ 16

¹Zôyn, tɔynə̂ eghɛ zɛ ə ghàyn tè nyaʼ kûmə̀ èkɛ vɛ ə tè nyì se fo se tsàmtə əghɨ epoməghe ətəyn ə Njòndyâ, ghàyn kyi se nyəʼlə nə kə eghɛ zɛ m tè pi nə ndɛ sə Fezhə̀sè nəyn ə Ngàleshyà.

²Nâʼàpî ə fetuʼ fe kɔʼsə fèkè, nâʼàpî ndè ə ghàyn ə fè təyn kyi se ndə̀m ekɛ vîve, ə fètə̂ àfɨa kɛ ə è nyi mə è və kyî se fɛtə ndə ndə̀m kə ə nə nəyn ə ndəʼə̀ kwîə fitə̂ chîəva kɛve ashìŋə̀ kɛ m pə̂yn.

³Ə̀ tə nə̂ nyi ezhoghɛ m pə̂yn, m tə fo ŋwàʼlè sê ghɨ ghɛ ə ghàyn chɔʼte, ə m tom nə ghənə nji ndu è fɨa vɛ ə ghàyn tsɨte ə Njèlusalɛ̀m.

⁴Ezhoghɛ ze nyi achûŋ nə m ndu fu, ə ghasè ghənə ndu əmɔʼ.

⁵M tə tsɛ̂ èndom ə Màsèndonyà tsɔ̀fə m se pə̂ mòtə ghàyn.

⁶M tə pə̂ ə m mote ghâsènì sə fendiŋə̀ ashìŋə̀ kɛ ə fofke nyi tsɛ̂sè ətəyn, epàm ətəyn, ə ghàyn ke tsàmtə mi nə m ndu è kwî zɨmze əshi, ə sè nyi nâʼàpî ghayn zôyn, m ndu.

⁷M kɔŋə̀ va se pə̂yn se fe ghàyn kè nyî kûmə̀ kə m tsɛ̂ tyaŋsə ndô. M kwaʼtə̀ se lotə mòtè ghâsènì sə fendiŋə̀ fə ashìŋə̀fè, ezhoghɛ ə Pɛ̂pɛ zâmaʼà.

⁸M tə ndamtə̂ kɔʼɔ kə nâʼà ndò ə Efesùs fàyn se zaʼâ etuʼ ə Pentikɔ̀s.

⁹Zhəm achûŋkè nyiə nyi se mi fâyn kə m nəyn fɨ̂aʼkè, nâʼàpî kə ghɨ nô mi, tsɨ̂ə kə nyî.

¹⁰Ə Timotì pə̀yn sê ghàyn, ghàyn ə nə̀ èndom se lotə fiə vəyn àchuŋ kûmə̀ nə è fɨ̀aʼà se Pɛ̂pɛ kè kə m fɨaʼà.

¹¹Kə wùə vîvè tə chɨ̂ynè vəyn pîza ghàyn kyi se pɨlə tsàmtə vəyn nə è ndu è fɨaʼa vəynke əshi è pɔ̂ynè ə è kɛse pəyn se mi kûmə̀ nə m lɨmtə̂ vəyn ghasè ghɨə poməghe.

¹²Sê ànyìə ghâsènì Àpolòs, mə chatê vəyn nâʼà sə ŋaŋ kə teshìŋə̀ teshìŋə̀ nə, yî ghɔnyiə mɔʼɔ pəyn môtè ghàyn pîza è nyîəmə̀ kɔ̂ŋɔ̀ va se pə̀yn zôyn. Pi zɨ̂yn ə è tə kyiə zhəmke, ə è pəyn.

¹³Ghàyn e pfɨ̂tə̀. Ghàyn fɛte kyî èpomə̂ zaynze. Kə ghàyn ə fânə̀, ghàyn e tɛ.

¹⁴Ghàyn e nə̂ èfɨaʼ zaynze ekɨ̂m è kɔ̂ŋzè.

¹⁵Ghàyn nyiə ke Sɨ̀tefanàs è sas ə ndɛ vəynze, ə̀ nyi ghənə è ghɨə shiə se pomə̂ ə Àkayà, se fo ngɨŋ ə ghənə se ghɨə fɨaʼa Fezhə̀ghè. M chatə ndò ghàyn ə soyn sɨmse nə,

¹⁶ghàyn chumte ndom vɛ ə ghɨə chisə ə təyn nyiə kə ghɨnə mə, è nâʼàpî ndè vɛ ə è fɨaʼà yighə̀ ghənə.

¹⁷M nyîə saŋnə̂ kûmə̀ è pə̂ Sɨ̀tefanàszè è Fòtùnatùs è Achayikùs, kûmə̀ nə ghənə tè pə̀yn se njì eluʼ vaynve.

¹⁸Ghənə ə tɨ̀msè təm ghɨmə kèpî èghɨ kə ghənə tɨ̂msè ghanə. Ghàyn e ngɨmnê ə̀ghɨ nyi kə ghɨnə mə.

¹⁹Ndɛsə Fezhə̀ sɛ ə se nyi apàs ə Esiyà fâyn pi nə m tɔŋte sê ghàyn. Àkwilà yî Pliskà è tsɨ̀yntə əghɨ pomə kɛ ə ke tsɨ̂yntə̀ ə ghənə ə ndɛ tɔŋtə̂ ə̀ghɨ poməghe nâʼà àchuŋ.

²⁰Nâʼà ə̀ghɨ ə poməghe əkɨ̂m fàyn tomə ètɔŋtê. Ghàyn tɔŋte ngɨŋ saynse se tyə̀yn ekɔ̂ŋ əghɨ̀ epoməze.

²¹Ə̀ nyâʼà kə nâʼà mi Pɔ̂l è gho kɨmke nə, tɔŋtêzè mə ze ndo sê Pɔ̂l.

²²Ə̂ nyì nâʼàpî ndè kɔ̂ŋɔ̀ va Zhə̀fè, ndi ə və tu!

²³Ə kosê esəyn ə Pɛ̂pɛ Njisə̀s faŋ ghâyn ghə̀ ghənə.

²⁴Ə kɔ̂ŋ zɨmze faŋ se ghàyn əkɨ̂m ə Klâys Njisə̀s.