Read Mmen 1 Kɔlìŋ 2 Bible Online

1 Kɔlìŋ 2 - Mmen bible

1 Kɔlìŋ 2

¹Ə tè nyi kə̂ m pə̂yn se fe ghàyn ə ghɔnyì ghɨmə se tsa eghɛ zɛ ə ze nyi səmɔʼ kûmə̀ Fezhə̀, m tè paʼà wàmnè m̀kalè mə ètɛm kə wùə vɛ ə è ngəse kyi ètɔf.

²Kûmə̀ nə m tè nyi mə mə ndə̀m nə m nə keva ghɛ zhîze kə m tè nyi ə ghàyn əfètəyn, ə̀ tsɛ̂ kə va sə̂ wâmnə̀ kûmə̀ Njisə̀s Klâys, nâʼà èkwu ə vəynze awâmnè.

³Shîŋə̀ kɛ ə m tè pəyn ə ghàyn əfètəyn, wiyn vɨmve pɔylə̂, m tsɨŋtə̂ fâynə̀ nâʼà sə ŋaŋ.

⁴M tè zaʼlə chîəva fɨnə ndaʼà tom è chùŋ è tɔf eghaʼâzè, e kɨsè wâmnè echûŋzè mə ze ndo sê wùə m̀sɔ̀ŋ, pîza m ndaʼà tom, tyə̂nə̀ mə m məʼnə̂ chîə va ndô nə Zuʼsə Fezhə̀sè nyîə fɨaʼà è tyaʼke.

⁵M tè wàmnə̀ se nə̀yn nə kə pomə zayn zə zaʼnə̂ ə wùə m̀sɔ̀ŋ etɔf eghaʼâzè pîza nə ze ə zaʼnə̂ kə ə Zhə̀fè àtyaʼ.

⁶Pî kə ze nyi nyiə mə, ghàs ndàʼà tomə̀ ètɔf eghaʼâzè sê ghɨ ghɛ ə ghənə nyi mə ghəʼnê ə ghənə epomə̂, pîza ə̀ vachi ètɔf eghaʼâ ə mbi zɨnə ze kɨ̀se etɔf engaŋtə əghɨ̀ ghɛ ə ghe saʼa mbi zɨ̀nə̀, ə ghɨ mə tyaʼa ghənə̂kè sè mîə ndò.

⁷Tɔf eghaʼâ zɛ ə ghàs ndàʼà kûmə̀ zəyn nyi etɔf eghaʼâ ə Fezhə̀ zɛ ə wùə vîvè tè keva mə ə ndə̀tè se ghɨ msɔ̀ŋghe, pîza Zhə̀fè ə tə ndə̀m tsɔ̀fə kə Fe fɛte mbi zɨ̀nə nə, tɔf engaŋtə ətəynze tə nə̂ ə ghâsènì ə nyi èpomsêzè.

⁸Nâʼà wùə e saʼa emɔ̀ʼ fa mbi tè keva tɔf eghaʼâ nə zɨ̂nə̀. Ə tè nyi nə ghənə ke, mə ghənə tè paʼà paynte Pɛ̂pɛ vɛ ə è kyi pomsê ə Fezhə̀zè.

⁹Pîza kè kə nyâʼ ə ŋwàʼlè ə Fezhə̀ nə: “Ghɛ zɛ wùə tàʼa tyəmə fe, Pî se tyəmə zɨ, Ghɛ zɛ ə wùə tàʼa tyəmə kwàʼtè nə ze kaʼa ə ze kyayn ə̀ nyi zəynze ə Zhə̀fè nyi mə fə pɨaʼtê sê ghɨ ghɛ ə ghe kɔ̂ŋɔ̀ Vəyn.”

¹⁰Pîza ə̀ nyì sê ghâsènì ghɛ ə Zhə̀fè nyi mə fə nə̀yn Zuʼse ə Vəynse sɛ se tyə̂yn paynse ghɛ ə ndətə ə vəynghe sê ghâsènì. Ghɛ zhîze va ə Zuʼse ə Fezhə̀sè vayn kaʼa se faŋ se kê. Zuʼsə Fezhə̀sè ke kepî ndò ghɛ ghəkɨ̂m ghɛ ə Zhə̀fè tè pɨaʼte sê ghɨ ghɛ ə ghe kɔ̂ŋə̀ vəyn.

¹¹Ə̀ nyì ke sèzuʼ sɛ ə se nyi ə wùə ewìyn ə se ke mɨsè wùə ətəyn. E za nyì kepî èghɨ kə̂ wùə vayn kàʼa è ke ghɛ zɛ ə ze nyi ə Zhə̀fè e kwàʼtè, ə̀ tsɛ̂ kə va Zuʼsə sə Vəynse.

¹²Ghâsènì pâʼà fi zuʼse mə se ndo ə mbi, ghâsènì pɨl fi sèzuʼ sɛ ə se ndô sê Zhə̀fè kə̂ ghâsènì ə ke èfɨa vɛ ə Fe fo sê ghâsènì.

¹³E za nyi nə ghàs nə piə zaʼlə ndò, ghàs e zaʼlə̂ va ghɛ etɔf eghaʼazè mə ze ndo sê ghɨ, pîza zaʼlə̂ ètɔf eghaʼâzè mə ze ndo sê Zuʼse. Ghàs tsà paynsə̂ səmɔʼ ghɛ kûmə̀ Sèzuʼ se ghɨ ghɛ ə ghənə kyi Zuʼ sə təynse.

¹⁴Nâʼàpî ndè vɛ ə è kyi va Zuʼse vayn fi èfɨa vɛ ə Zuʼse fo kûmə̀ nə fɨa ətəynve nyi engô se vəyn. È vayn kàʼa è zɨ kê kûmə̀ nə ə̀ kàʼa ə nəyn ke Sèzuʼ nə è zɨ kê.

¹⁵Nâʼàpî ndè vɛ ə è kyi Zuʼse zɨ kê kə ə̀ghɛ ə̀kɨ̂m, pîza mə wùə vîvè vayn kaʼa è zɨ kê èghɛ kûmə̀ vəyn,

¹⁶kè kə nyi mə ə nyàʼ ə ŋwàʼlè ə Fèzhə̀ nə, “Ə̀ ke nde kwaʼtè ə Fezhə̀ zə? Ə̀ kàʼa ə̀ fo nde təftêzè sê Zhə̀fè?” Pîza ghâsènì kwàʼtə̀ endom vɛ ə Klâys kwàʼtə̀ ətəyn.