Read Mmen 1 Kɔlìŋ 3 Bible Online

1 Kɔlìŋ 3 - Mmen bible

1 Kɔlìŋ 3

¹M tè vayn kaʼa mə wàmnə̀ sê ghàyn ə ghɔnyì ghɨmə kə̂ m wàmnə̀ sê ghɨ ghɛ ə ghe kyi Zuʼse ə Fezhə̀sè. Pîza m tè pɨl wâmnè sê ghàyn kəpiə ghàyn nyi əghɨ ə mbighe, kə ghɨ ghɛ ə ghe pa nyi m̀mîətə̀ ə ghənə epomə̂ sê Klâys.

²M tè pfɨte ghàyn è yîynə̀m, ə̀ vachi èfɨazhiə e tɛve kûmə̀ nə ghàyn tè nyìəm va èpɨaʼtêzè se zhiə vəynve, pî zôyn, ghàyn pa va èpɨaʼtêzè se zhiə vəynve.

³Ghàyn pa ndamə kə kə̂ ghɨ mbiə. Ghə̀ʼkè nyîə nyi ə ghàyn əfètəyn, ghàyn e zɔ̂ə sèngɨŋ saynse, zɨnə mə e tyə̂nə̀ nə ghàyn nyi əghɨ ə mbighe, ndamə kə kə mbi kyiŋə.

⁴Mə wùə èmɔ̀ʼ ə ghàyn əfètəyn piə nə, “M nyi wùə ə̀ Pɔ̂l,” və mɔʼɔ e pìə nə, “M nyi wùə Àpolòs,” ə zə tyə̀nə̀ nə ghàyn pa nə̂ kə ə̀ghɛ kə ghɨ ə mbighe.

⁵Nâʼà pîza, Àpolòs nyi nde, Pɔ̂l e nyi ndè? Pîə ghàs nyì ke ə̀ghɨ ə fɨaʼa ə Fèzhə̀ kə fe fo se tsàmtè ə ghàyn nə ghàyn pomə zə, nâʼàpî ndè e nə̂ kə èfɨaʼ zɛ ə Pɛ̂pɛ fo nə è və nə̂ ə?

⁶M zho ngwàʼ, Àpolòs e sɨsə̀ m̀mo esas ətəyn, pîza ə̀ nə̂ Fezhə̀ kə ngwàʼ ə̀təyn ndəmə.

⁷E za nyi nə wùə vɛ è zho, è wùə vɛ ə è sɨ̀s môm, va sə eghɛ zhîze, ə̀ nyì ke Fèzhə̀ ə fe nə̂ ghɛghe əkɨ̂m kûmə̀ nə ə̀ nə̀ vəyn nə ngwàʼ ə̀təyn ndəmə.

⁸Wùə vɛ è zho è wùə vɛ e sɨ̀s môm nyi ke èghɨ, nâʼàpî ndè e nyi se tə kyiə emaʼtə vəynve kè kə̂ è tè fɨ̀aʼa.

⁹Ghàs tsɨ̀yntə̀ fɨaʼà kə sê Zhə̀fè əkɨ̂m. Ghàyn nyì ke kə afûʼ ə Fezhə̀kè fɨyn nyi ke kə ndɛ̂ zɛ ə Zhə̀fè pɛ.

¹⁰Mə tè njì fo zɛ ə Zhə̀fè tè fo sê mi ə ndə̀mə̀ àchi ə ndɛke kə̂ wùə vɛ ə è fɛte ke èpɛ, wùə mɔʼɔ̂ e sè pɛ etûə təyn. Nâʼàpî ndè e tɔ̂ʼnə̀ e ndom vɛ è pɛ ətəyn.

¹¹Ə piə pə̂ ndò Zhə̀fè nyi mə fə ndə̀m Njisə̀s Klâys nə ə̀ nyì ke àchi andɛ kɛ ke nyi, wùə e va vɛ ə è kàʼa è fɨyn ndəm àchi ndɛ əmɔ̀ʼɔke.

¹²Ghɨə mɔ̀ʼɔghe tə njîə ngôl, è silvà, è chîə chûŋghè, è kàʼm̀, è kɨsè wiyna se pɛ famə achi ə ndɛke.

¹³Ə tə tyə̀nə̀ paynsə̂ nâʼàpî èkyî efɨaʼ èkè zɛ ə nâʼàpî ndè tè fɨ̀aʼa. Ə̀ nyi epayn zɛ ə ze tə pə̂ ə ze ə nyi ə fetuʼ fɛ ə Klâys tə kɛsə pə̂, ə ze tə tyə̂ynə̀ paynsə̂ fɨ̂aʼ ə nâʼàpî ndèze. Ə tə mɔ̂mə̀ nâʼàpî èfɨaʼ ə ndɛze, ə ze tyən kyì efɨ̀aʼ zɛ ə wùə tè fɨaʼa nə ze tsɔ̂fə̀ ndò mə ze pofə ndô.

¹⁴Zhə̀fè tə maʼtə̀ nâʼàpî ndè ezhoghɛ ə nyɔ̂ʼ fɨa vɛ ə njì se pɛ fumə achi ə ndɛke, ve ə tàʼa fu.

¹⁵Ə̂ nyɔ̂ʼ nâʼàpî efɨaʼ ə nde, zə fuə, ə è njise fɨ̂aʼ ə vəynze, pîza ə wùə ətəyn è ngɨŋə̂ vəyn kyi sɔzaze kè kə wùə vɛ ə è tə fɨ ewùs.

¹⁶Ghàyn keva nə ghàyn nyì ke kə ndɛ ètsə̀mə mə ə̀ kyi Fezhə̀ ə, Zuʼse ə Fezhə̀sè e ndamə ə ghàyn ewìyn ə?

¹⁷Ə pofse pîndè ndɛ̂ ètsə̀mə Fezhə̀, ə Zhə̀fè pɔŋ pofsê vəyn, kûmə̀ nə ndɛ ètsə̀mə ə̀ Fèzhə̀ nyi è ŋwâʼzè, ghàyn è ngɨŋ saynse e nyi ndɛ ètsə̀mə ə̀ Fèzhə̀ nə zɛ.

¹⁸Kə wùə tə lesê ngɨŋə̂ vəyn. Ə wùə nyi ə ghàyn əfètəyn kwaʼtə̀ nə zhi nə tɔfə endom vɛ ghɨ mbiə fâ njîə ətəyn, ə è pɨl kə̂mnè sə ango kə̂ è kyi kàyntè ètɔf.

¹⁹È kyi se nə̀yn nyî kûmə̀ nə tɔf zɛ ə ghɨ mbiə ghɨnə kyi nyi ango sê Zhə̀fè, kè kə nyi mə ə nyàʼ ə ŋwàʼlè ə̀ Fèzhə̀ nə, “Zhə̀fè njìə ètɔf eghaʼâ ə ghɨ̀ ə tɔfəghe kè se ko ghənə ətəyn.”

²⁰Ə fɨyn nyaʼ kepî ə ŋwàʼlè ə Fèzhə̀ nə, “Pɛ̂pɛ ke ndô nə kwâʼtè tə ghɨ tɔfəte fɨaʼà va ghɛ.”

²¹E za nyi nə kə wùə nə ghaŋsê èwiyn kûmə̀ wùə m̀sɔ̀ŋ, kûmə̀ nə Zhə̀fè ə fo ke fɨave ekɨ̂m sê ghàyn,

²²kɨ̀sə ə̀ nyi Pɔ̂l kɨ̀sə ə̀ nyi Àpolòs kɨ̀sə ə̀ nyi Sefàs kɨ̀sə ə̀ nyi mbi zɨ̀yn, kɨ̀sə ə̀ nyi endam, kɨ̀sə ə̀ nyi ekwu, kɨ̀sə ə̀ nyi ashîŋə̀ kɨ̂nə zôyn, kɨ̀sə ashìŋə̀ kɛ ə ke tə wə̂ pə̂, fɨa nə vɨnə nâʼà èkɨ̂m tsɨ̂ynte kyi ke ghàyn,

²³ə̀ kyi Klâys ghàyn, Zhə̀fè e kyi Klâys.