Read Mmen 1 Kɔlìŋ 4 Bible Online

1 Kɔlìŋ 4 - Mmen bible

1 Kɔlìŋ 4

¹Ghɨ kyi sə̂ njîə ghàs kə̂ ghɨ fɨaʼa ə Klâys ghɛ ə Zhə̀fè nyi mə fe ə fo fɨ̂aʼzè nə ghàs ə ndaʼà ə̀ghɛ ə ndətə səmɔʼɔ kûmə̀ vəyn.

²Nâʼà eghɛ e tɛ zɛ ə kyiŋə se ghɨə fɨaʼa ə təynghe nyi nə, ghənə fɨaʼà sê pɛ̀ èfɨaʼ ə̀ ghənə è təm ə ghənə̂ghè əkɨ̂m.

³Pîza sè mi, m kɔ̂ŋɔ̀ va se ke nə ghàyn saʼa mi kɨ̀sə ə saʼa ndò mi ə ndɛ ə̀ saʼ zhizè fa mbi, Nâʼà pî mi saʼa va ngɨŋ zɨ̂mè.

⁴Təm ghɨmghe saʼa va mi, pîza ze tyə̂nə̀ va nə m paʼà nə̀yn pofsê. Ə̀ nyì ke Pɛ̂pɛ vɛ è kàʼa è saʼ mi.

⁵Kûmə̀ nyî, kə ghàyn ka saʼ ndɔ̀ʼɔ shîŋə̀ təynke kwəyn. Ghàyn lɨmte ə Pɛ̂pɛ pəyn. È tə pə̂ ə è tyəyn paynsê ə̀ghɛ ə ndətə ghɛ ə nyâʼtə nə̂ alɨm, ə è tsayn kwaʼtè tɛ ə ghɨ ndətə̀ ə ghənə ətəm, ə Zhə̀fè ke tsîtè ə nâʼàpî ndè ə vəyn efɨ̀aʼ.

⁶M wàmnə̀ əghɛ nə ghɨnə̀ ə ghɔnyì ghɨmə kûmə̀ ngɨŋ zə̀m ghasè Àpolòs kə̂ ze tsamte ghàyn, kə ghàyn zaʼle se ghàs sə nə̂ kə èghɛ zɛ ə nyaʼ ə ŋwàʼlè ə̀ Fezhə̀. Famə endom kə wùə sê ghàyn tə ghaŋsê èwiyn nə wùə vîvè ə ghàs ə fètəyn tsɛ̂ ndò və mɔ̀ʼɔ.

⁷Ə̀ pi nde sê ghò nə ò tsɛ̀ ndò ghɨ mɔ̀ʼɔ ghə? Ò kyi nâʼà ghè mə ə paʼà fo Zhə̀fè se ghò ə? Ò nyiə kàʼa o kyi àfɨa mə ə fo ndô, ghaŋsə̂ èwiyn ətəyn kəpiə ə pâʼà fo ndô kûmə̀ ghè?

⁸Ghàyn nyi mə ghàyn ə kyî nâʼàpî àkè kɛ ə ghàyn kyiŋə! Ghàyn nyi mə ghànə ghaʼ kwəyn! Ghàyn kàyne nyi tèfɔ̂yn pi kə ghàs va tefɔ̂yn! M fe kàʼa m mə kɔŋə̀ nə ghàyn ə nyi tèfɔ̂yn səmɔʼ kə̂ ghâsènì ə saʼa əmɔ̀ʼɔ

⁹E kyaʼà sê mi nə Zhə̀fè ə ndə̀m luʼe kwuŋsəve sê ghàs ghɨətomə, kə ghɨ ghɛ ə nyi mə ə saʼ ghənə ə chɔʼnə̂ nə ghənə kyi se kwu ə ghɨghe əshi. Ə nyi mə ə njì ghàs sə ghɨ̀ ə laŋsəghe ə mbi èkɨ̂m, è kɨsè tsìsè è ghɨ ə msɔ̀ŋghe.

¹⁰Ghàs nyi ekɔyn kûmə̀ Klâys, pîza ghàyn e nyi əghɨ tɔfə əghɛ Klâysə̀! Ghàs nyîə zɔlə̂ pîza ghàyn e tɛ! Ghɨ kɔʼsə̂ ghàyn pîza njîə va ghàs sə eghɛ!

¹¹Se tàyn zôyn, chɨ̀ŋ zafə ghàs, pfɨ̀ŋə̀ m̀mò e fɨnə zafə ghàs. Ghàs màʼà kə êshɔʼ ə sendzɨsve, e pusə ghàs, ghàs e kyîŋə̀, kiva luʼe ndaməve.

¹²Ghàs fɨaʼà è tyaʼa, kè nâʼà è gho ghasə. Ə ghɨ sôylə̀ ghàs, ghàs e pɨlə tsə̂mə̀ nə Zhə̀fè pɔse ghənə, e tsə̀fsə̀ ghàs, ghàs e wəynə kə ndò.

¹³Ghɨ pofsə̂ èzə zasze pîza ghàse wamnə̀ kə è kyə̀ è pɔynə̂. Se zaʼâ zôyn, ghɨə njîə ghàs se efɨa e maʼave ə mbi fɨnə njîə kə nâʼà ghàs sə eliŋ.

¹⁴M nyâʼà va ghɛ ghɨnə̀ nyî se ghomsê ə ghàyn, m pɨlə nyâʼà se zaʼlə ghàyn kə̂ ghɔyn ekɔ̀ŋ ghɨmə.

¹⁵Ə nyì pî nə ghàyn kyi əghɨ ghe tsɨ̂ə nâʼà pi zàyn se chwìtè əghɛ kûmə̀ Klâys se ghàyn, ghàyn e ke tso nə ghàyn kyi ke pɨ̀a emɔ̀ʼ. Ə ghàyn endam kə əghɨ ə poməghe se Klâys Njisə̀s, m nyi pɨ̀a sê ghàyn tɔynə̂ ə tom èchùŋ zɛ ə m tè zaʼle ghàyn ətəyn.

¹⁶M chyatə̂ ghàyn nə ghàyn ə səynə̂ ə̀ghɛ ghɨmghe nəghe.

¹⁷Ə̀ za nyi eghɛ zɛ m tom Timotì sê ghàyn. È nyi vayn ekɔ̀ŋ vɨ̂mè, m samsə̂ vəyn kûmə̀ nə è chùmtə̀ Pɛ̂pɛ è təm ə vəynghe əkɨ̂m. È nə̀ nə̂ ə ghàyn ə pyə̂ytə̀ èndam zɛ m ndamə kə̂ wùə Klâys Njisə̀s. Ə̀ zɨnə nyi eghɛ zɛ ə m zaʼlə luʼ tekɨ̂m, è kɨsè ndɛ sə Fèzhə̀ sekɨ̂m.

¹⁸Ghɨ mɔ̀ʼɔghe ə ghayn ə fètəyn ghaŋsə̂ èwiyn, kəpiə m tə fɨnə pə̂ fe va ghàyn.

¹⁹Pîza mə ə Pɛ̂pɛ kɔ̂ŋə̀, m mote ke nyî m pəyn fe ghàyn, ə m fe è ngɨŋ zɨ̂mè ghɛ zɛ ə ghɨə ghaŋsə nə ewìyn ghɨnə̀ pìə è kɨsè kyì atyaʼ kɛ ə ghənə kyi.

²⁰Kûmə̀ nə Fɔ̂yn ə Fezhə̀vè vachi ècho ekoməze, ə fe àtyaʼ ətəynke əghɛ ghɛ ə ghɨ nə̂.

²¹Ghàyn kɔ̂ŋə̀ nə ə m nyi se pə̀yn sê ghàyn, ə m pəyn èghɛ? Ghàyn kɔ̂ŋə̀ nə m pəyn è wàyn mə, mə m pəyn è kɔ̂ŋè, mə è zuʼsə pɔ̂ynèsè ə?