Read Mmen 1 Kɔlìŋ 6 Bible Online

1 Kɔlìŋ 6 - Mmen bible

1 Kɔlìŋ 6

¹Ə wùə ə ghàyn ə fètəyn kyi saʼ yî ànyìə vəyn ve pomə, è pâʼà njì ndu è zə̂yn sê ghɨ Fezhə̀ nə ghənə fɛte, è və pɨlə njîə ndûə è zə̂yn sê ghɨ, ə va ə̀ghɨ chichighe nə ghənə saʼ kûmə̀ ghè?

²Pîə e za nyi nə ghàyn keva nə ə̀ tə saʼa əghɨ Fezhə̀ mbi mə? Ə za se nyi mə ə̀ tə saʼa ghàyn mbi, ə ghàyn nə fɨmə zàyn se saʼa m saʼtə̀ me pɔ mə?

³Pîə e za nyi nə ghàyn keva nə ə̀ tə ndò ghâsènì ə saʼ tsìsè mə? Ə ze nyi zamə ə ze ə pɔynə̂ va zayn sê ghâsènì se saʼa əghɛ ə mbi gha ghə?

⁴Ə ghàyn kyi kyì ə sesaʼ nə sɛ mə, ghàyn ə njìə ndûə è səynse sê ghɨghe mə ghɨ ə ndɛ ə̀ Fèzhə̀ghè njìə va ghənə sə eghɛ nə saʼ səynse kûmə̀ ghè ə?

⁵Ghàyn ghomə̂ va? Pîə e za nyi nə wùə vîvè va ə è tɔfə kwəynə ə ghàyn ə fètəyn vɛ ə è kàʼa è saʼ saʼ saynse mə?

⁶Pîza ànyì pɨlə njîə ndûə è ànyì ə̀ mɔʼɔ ə ndɛ ə̀ saʼ, mə ghɨ ghɛ ə saʼa va əghɨ ə pomə.

⁷Sə̂ kyîə kə nâʼà sèsaʼ ə ghàyn ə fètəyn, ze tyə̂nə̀ nə ghàyn laynse nyi mə ə pfɨ̀. E tsɔ̂fə̀ nə ghɨghə pɨlə nə̂ pi sê ghàyn. E tsɔ̂fə̀ nə ə pɨlə ndô ə̀ghɨ ndô, fiə èfɨa vaynve.

⁸Ə pɨlə ndô ghàyn nə̂ ə̀ghɛ əpi, chɔŋtə̂ ə̀ghɨ, pa nə̂ kəpî sê ghɔnyì ghaynghe.

⁹Pîə e za nyi nə ghàyn keva nə ghɨ ghɛ ə ghe va chichi tə kyiə va luʼve elùʼ efɔ̀yn ə Fezhə̀vè mə? Kə wùə tə lesê ngɨŋə̂ vəyn. Ghɨ ghɛ ə ghe nyîŋə̀ è zənə kɨ̀sə ə ndômnə̀, è ghɨ ghɛ ə ghe ngɨmnə fɨ̂aʼsèvè kɨ̀sə əghɛ ə ghe kimə saʼ ə malə̂zè è ndômnè ghɛ ə ghe nyîŋə̀ è ndômnè əmɔ̀ʼɔ,

¹⁰è ghɨ chɔŋə, è ghɨ shiə fɨə, è ghɛ ə ghe mɨə lɨ̀m, m̀ ko, è ghɨ ghɛ ə ghe pofsə zə ə ghɨ̀ghè, è ghɨə chɔŋəghe tə kyi va luʼve elùʼ efɔ̀yn ə Fezhə̀vè.

¹¹Yîghe ə ghàyn ə fètəyn tè nyì kepî za, pîza zôyn e sè nyi mə ə shù tsɨ̂sè pi saynse ə nə̀ nə ghàyn ə nyi èŋwaʼze, ə fɨnə nə̂ nə ghàyn ə nyi chichi ə Zhə̀fè əshi tɔynə̂ ə Pɛ̂pɛ Njisə̀s Klâys, tɔynə̂ kɨ̀sə ə Sezuʼ sə Fezhə̀ fə ghasènìfe.

¹²Wùə vîvè kaʼa è pi nə, “Ə zà nə m kaʼa ə m nəyn nâʼàpî èghɛ èkè.” E nyi ke nâʼà səmɔʼ pîza ə̀ va ə̀ghɛ ə̀kɨ̂m ə ghe kaʼa ə ghe tsamte wùə. Ə zà mi nə m kaʼa ə m nəyn nâʼàpî èghɛ èkè, pîza m vayn pomə sə nyi àkɔ̂s sê ghɛ zhîze.

¹³Wùə kaʼa è pi kepî nə, “Ə zhiə nâʼà pî ghɛ̀, ke ndûə kə endwɔ̀, ndwɔ̂vè nyi ke sə̂ fiə èfɨa ezhiəve.” E nyi ke nâʼà səmɔʼ pîza Zhə̀fè e nyi se tə pofsê èndwɔ̂ə ətəyn pâʼsə̂ kə efɨazhiəve. Wiynə wûəvè vachi nə è və nyɨ̂ŋə̀ è zəynghe, kɨ̀sə ə ndômnè, ve pɨl nyi sə̂ nə̂ efɨaʼ ətəyn sê Pɛ̂pɛ, ə̀ nyi Pɛ̂pɛ vɛ ə è tɔ̂ʼnə̀ ewiyn ətəynve.

¹⁴Zhə̀fè tè zòmsè Pɛ̂pɛ, nyi se tə zômsə̀ kəpî ghâsènì ə vəyn ə atyaʼ.

¹⁵Pîə e za nyi nə ghàyn keva nə wiyn vaynve nyi èpɨ̂as ewìyn ə Klaysvè mə? Ə nyiə pi nə m kaʼa ə m nji pâs awìyn ə Klayskè se nə̀yn nə ə nyi apâs ewìyn ə akwàlə̀kè ə? Ze vayn kaʼa ə zə nyi zâ!

¹⁶Ə̂ nyɨ̀ŋə̀ pîndè yî kwàlə̀kè, ə yî kəynke ə nyi ke sə afɨa àmɔ̀ʼ ə njà èwiyn! Ə tsàyn paynsê ə ŋwàʼlè ə̀ Fezhə̀ nə, “Ghənə ə pɛ̀ tə kɛsə̂ ə nyi ke sə afɨa àmɔ̀ʼ ə njà èwìyn.”

¹⁷Ə̀ nyi wùə vɛ ə è tsɨ̀yntə̀ yî Pɛ̂pɛ, è tə nə̂ ə è və nyi sə afɨa àmɔ̀ʼ yî vəyn ə Sezuʼ.

¹⁸Ghàyn tə kɛsê epàmə̂ ènyɨŋə̀ ə zəyn è ndômnèghè. Nâʼàpî èghɛ èkè zɛ ə wùə m̀sɔ̀ŋ nə̀, è vayn pofsê ewiyn ə vəyn, pîza wùə vɛ ə è nyɨ̀ŋə yî wùzhɔyn kɨ̀sə yî wùndômə̀, nə̀ pi è pofsə̂ èwiyn ə vəyn.

¹⁹Pîə e za nyi nə ghàyn keva nə wiyn vaynve nyi kə ndɛ̂ ə̀ Sèzuʼ se Ŋwaʼa sɛ ə Zhə̀fè fo nə sə ndamə ə ghàyn əfètəyn mə? Ə̀ kyi chiva ghàyn ngɨŋ saynse, ə kyi Fezhə̀.

²⁰Zhə̀fè se nyi mə Fə zhɔyn ghàyn ə ndàʼà. Ghàyn nji wiyn vaynve ə ghàyn ə kɔʼsə̂ Fèzhə̀ ətəyn nə̂ ə̀ghɛ ətəyn, ghe fo èpomsê sê Zhə̀fè.