Read Mmen 1 Kɔlìŋ 8 Bible Online

1 Kɔlìŋ 8 - Mmen bible

1 Kɔlìŋ 8

¹M kyiŋə se pì eghɛ zôyn kûmə̀ efɨazhiə vɛ ə màʼtə̀ sə eshyə̀ sê fɨ̂aʼsèvè. Ghâsènì ke ndô nə, ‘Ghâsènì əkɨ̂m nyîə kyi ètɔf.’ Tɔfze e pə̂ kə è ghaŋsə̂ ewiyn pîza kɔ̂ŋzè e nə̂ nə ghɨghe ə ndəmə̂.

²Ghɨ ghɛ ə kwàʼtə nə ə ke ndô ghɛ fɛte keva kə ghənə fə kyi sə̂ ke.

³Pîza mə wùə kɔ̂ŋɔ̀ Zhə̀fè, ə Zhə̀fè ə ke vəyn.

⁴E za nyi nə se pì eghɛ kûmə̀ èfɨazhiə vɛ ə màʼtə̀ kə eshyə̂ sê fɨ̂aʼsèvè, ghâsènì ke ndô nə fɨ̂aʼsèvè vachi ndɨŋndɨŋ àfɨa kyîke fa mbi. Ghâsènì ke kepî ndô nə Zhə̀fè nyì ke fèmɔ̀ʼ.

⁵Ə ze nyi pî nə ghɛ zɛ əghɨ mɔ̀ʼɔ tɔŋtə nə ə̀ nyi mzhə̀m kɨ̀sə nyi ekwùtwəyn kɨ̀sə ə̀ nyi ə chi, (ze nyi ndô səmɔʼ nə kyì “mzhə̀m” nə mɛmə è kɨsè kyì ə “sepɛpɛ” nə sɛmə nyîə nyi.)

⁶Pîza ghâsènì, e ke nə, Zhə̀fè nyì ke fèmɔ̀ʼ, mə za nyi Pɨ̀a. Ə̀ fɛte Vəyn fɨave ekɨ̂m, ghâsènì e ndamə mə ə zaʼnə̂ kə se vəyn. Ə̀ fɨyn nyi ke Pɛ̂pɛ emɔ̀ʼ, mə ə̀ za nyi Njisə̀s Klâys, mə ə tè fɛte efɨa ekɨ̂m toynə̂ ə Vəyn, ghâsènì nə ndamə kə kûmə̀ vəyn.

⁷Nâʼàpî zâ, ə̀ vachi ə̀ghɨ əkɨ̂m ə ghe ke ghɛ nə zɨnə̀. Ghɨ yîghe nyi mə ə ketê fɨaʼsè nə vɨ̂yn kə ezhoghɛ ə ghənə zhi fɨazhiə vɛ ə mâʼtè sə eshyə̀ se fɨ̂aʼsèvè, ghənə e kwaʼtə̀ nə fɨazhiə ətəyn nyi mə ə maʼte se shyə̀ se zhə̀ fîfe, zamə ghənə e va eŋwaʼze ə Zhə̀fè əshi kûmə̀ nə ghənə keva se njì echɔʼnê eghɛ zɛ ə̀ nyi eghɛ echûŋzè è ghɛ zɛ ə̀ va eghɛ echûŋzè.

⁸Fɨa e zhiəve vayn nə̀yn nə Zhə̀fè fi ghâsènì ə fe tsɛ kə fe tè nyi mə fə fi. Ghâsènì njìsə̀ va fɨake ashìŋə̀ kɛ ghâsènì tàʼa zhi, kwəynsə̂ va fɨa kyîke ezhoghɛ ghâsènì zhi.

⁹Ghàyn tɔʼne, kə ndom vɛ ə ghàyn nə̀ ghɛ ə chûŋghè ətəyn kə ghɨ ə pomə nəyn ə ghɨ ghɛ ə pɔylə ə ghənə epomə̂ pfɨ ə pi.

¹⁰Ò ke nə ə wùə mə è vayn kaʼa è nji chɔʼnêzè eghɛ zɛ ə nyi eghɛ echûŋzè è ghɛ zɛ ə va eghɛ echûŋzè fe ghò è tɔf zɛ ò kyi, ò tsɨs ə ndɛ àfɨ̂aʼsè zhiə, ə ze chiynte vəyn nə è zhi fɨazhiə vɛ ə nyi mə ə màʼtè sə eshyə̀ se fɨ̂aʼsèvè.

¹¹Ə ze nyi nyî, ə nyi mə o tɔynê ə ghò etɔf ə pofsə̂ ànyì ve vɛ ə è pɔ mə Klâys tè kwu kûmə̀ vəyn.

¹²Ə ghàyn nə̀yn nyi, ə̀ zə nyi mə ghàyn nəyn pi sê Klâys tɔynə̂ ə pi zɛ ə ghàyn nə̀yn sê ghɨə pomə əmɔ̀ʼɔghe kûmə̀ nə ghàyn ə pofsê təm ə ghənə̂ghè, ghənə e pîə va ghɛ zɛ ə nyi eghɛ echûŋzè, è ghɛ zɛ ə̀ nyi eghɛ epize.

¹³E za nyi nə ə fɨazhiəve nyi se nə̀yn nə ànyìə vɨmve nəyn pi, m tə tàʼa fɨnə kwɨlə njà, kə ndɔ̀ʼɔ m nəyn ə è pfɨ ə pi.