Read Mmen 2 Kolìŋ 1 Bible Online

2 Kolìŋ 1 - Mmen bible

2 Kolìŋ 1

¹Ə̀ ŋwàʼlè zìnə nyaʼ mi Pɔ̂l, wùətom ə̀ Klâys Njisə̀s kè kə Zhə̀fè kyiŋə, ghasè ànyì ə̀ ghâsènì Timotì, sê ghɨə ndɛ ə̀ Fèzhə̀ ə Kolìnghè è se ghɨə Fezhə̀ghè nâʼà endaʼ ə Àkayàzè ekɨ̂m.

²Ə Zhə̀fè, ə Pɨ̀a sê ghâsènì yî Pɛ̂pɛ Njisə̀s Klâys fo fùʼ ə Vəynke sê ghàyn è pɔ̂ynè.

³Ə ghâsènì fo zɔ̀ŋnèkè sê Zhə̀fè ə Pɨ̀a Pɛ̂pɛ ə̀ ghâsènì Njisə̀s Klâys, ə Pɨ̀a è kosə nə èsəyn, ə Fezhə̀ fɛ ə tsâmtè tekɨ̂m fɨə pə̀ sê Vəyn.

⁴È tsàmtə̀ ghâsènì ə ghâsènì ə tetsòs tèkɨ̂m, kə ghâsènì ə nyi kaʼa tsamte kepî ə̀ghɨ ə mɔ̀ʼɔ ghɛ ə kyi kyì tə tetsòs tekɨ̂m, kèpî endom vɛ ə Zhə̀fè tè tsàmte ghâsènì.

⁵Kè kə ze nyi səmɔʼ nə ghâsènì nyi mə ə chàtè ə Klâys ə se ngəʼ se tsɨəse, ə̀ nyì kepî zamə kə tɔynə̂ ə Klâys, ghâsènì ə chàtè ə Zhə̀fè etsàmtè eghâʼazè.

⁶Ə ghàs fe ngəʼ, ə nyi sə ghàyn ə chùŋ è sɔza zaynze; ghàs ə kyîə ètsâmtè, ə nyi mə ghàyn ə kyi kepî tsâmtèzè, kə ze fo ghàyn è tyaʼke se wəynsê ewiyn ə sengəʼ sɛ ə ghàs kyi kepî.

⁷Kwaʼtè zasze se ghàyn nə ghàyn nə̀ pfɨ̂ va ə ghàyn epomə̂ tɛ kə nyi, ghàs ke ndô nə kè kə ghàyn chyàtə̀ ə ghàs ezə ngəʼze, ghàyn chyàtə̀ kəpi ndò etsàmtè zɛ ə ghàs tè fi.

⁸Ghàs kyiŋə se pɨ̀əytè ə ghàyn ə soyn sasse ə tetsòs tɛ ə ghàs tè kyi apàs endaʼa Esiyàkè. Kyə̀yn kɛ ə ke tè nyì ə ghàs ə tu tè ghaʼa kə nyi fɨnə tɨ̂lə̀ endom mə ghàs ə njìsè pi kwâʼtèzè sə̂ fɨnə ndamə.

⁹E tè nyì sê ghàs kəpî ə pì ə ndɛ ə̀ sèsaʼ nə ghàs nə̀ kwuə. Pîza zɨnə mə tè kyayn kə ghàs tàʼa nyìŋə zaʼnê ə ghàs atyaʼ, pîza ə pɨl nyɨ̂ŋə̀ zaʼnê ə Fezhə̀ Fɛ ə Fe zômsə̀ ghɨghe.

¹⁰È və tè sɔ̀zâ ghàs ə kwuze cho, nyi se tə fɨnə sɔza ghàs, ghàs e nyi mə ə ndə̀m kwaʼtè zas zekɨ̂m ə Vəyn ewìyn nə È tə pa sɔza kəndò ghàs

¹¹kə ghàyn tè tsàmte ghàs tɔynə̂ ə ghàyn etsə̀m se ghàs. E za nyi nə tsə̂m te tsɨə tɛ ə ghàyn tsə̀mə̀ se ghàs tə pə̂ ə tə nyi mə Zhə̀fè ə zɨ ə pə̀ynsə̀, ə Zhə̀fè pɔse ghàs, ə tsɨ̀tsɨ̂ kɔʼse kyə̀ sə ghənə̂sè se fo àzɔ̀ŋnè sê Zhə̀fè sê ghâsènì.

¹²Ghàs nyîə nyi èghaŋse ewìynze kə təm ghasə nə̂ kə ghàs ə ke nə ndam zasze fa mbi, è paynpayn ndom vɛ ə ghâsènì ndamə ətəyn nyi mə ə̀ tè chisê səmɔʼ è təm ə chûŋghè, è kɨsè tyaʼ kɛ ə ke ndô pə̂ afùʼ ə Fezhə̀kè, ə̀ vachi ètɔf eghaʼâ ə mbize.

¹³Ghɛ ə ghàs nyàʼà sê ghàyn nyì ke zɛ ə ghàyn kaʼa tɔŋɔ ə zɨ kê. Pîza kə ghàyn zɨə ke ghàs kè sə apɨaʼ m pomə nə ghàyn tə lotə̂ zɨə kê mɨ̂sə̀ ndò ghàs, kə Pɛ̂pɛ Njisə̀s ə̀ ghâsènì ə fetuʼ, ə ghàyn tə nəyn ə kyi èghaŋsê ewìynze sê ghàs kèpi kə ghàs kàʼa kyi se ghàyn.

¹⁵M tè nyîə fɛtê ke ə̀ghɛ ghɨ̀yn ə̀kɨ̂m, ə ke nə̀yn epɨaʼte se mòtə ghàyn, endom kə ghàyn kyi pɔsêzè shîŋə̀ tepɛ̀.

¹⁶Kûmə̀ nə mə pɨaʼtê se mòtə ghàyn ezhoghɛ m tsɛ̂ ndûə ə Màsèndonyà è kɨsè ezhoghɛ m pə̂, endom kə ghàyn tsamte mi m fɛte kwi ndu ə Njòndyâ.

¹⁷E za nyi nə m tè pɨaʼtə zɨnə mə mə m tyəm va ə mì ekwâʼtè mə? E za nyi nə m nə̂ epɨaʼtê zɨme kè sə mì ə chùŋ sə nyi èpɨaʼtêzè se pì nə, “Èyn, èyn” è “Ngaŋ” kè sə eshìŋə̀ èmɔ̀ʼ mə?

¹⁸Kè kə Zhə̀fè nyi mə Fe wâmnə̀ tsɛ kə səmɔʼ, wâmnè zɨme sê ghàyn tè vachi zə “Eyn” è “Ngaŋze.”

¹⁹Kûmə̀ nə Njisə̀s Klâys, Va Fèzhə̀ vɛ ə Silàs tè ndàʼa tom kûmə̀ vəyn ə ghàyn ə fètəyn, è Timotì è ngɨŋ zɨ̂mè, vachi vɛ ə È pìə “Eyn” fɨnə pîə “Ngaŋ.” Səmɔʼ ətəyn nyi nə è pîə tsɛ̂ kə nə, Èyn.

²⁰Ə̀ nyi vəyn vɛ ə è nyi “Èyn” sê tsɨnè tə Fezhə̀ tekɨ̂m. Ə̀ za nyi eghɛ zɛ tɔynə̂ ə Njisə̀s Klâys, ghâsènì pìə nə “Zə nyi ke zamə”, kə pomsê ətəynve ə ndûə se Zhə̀fè.

²¹Ə̀ nyì ke nâʼà Fezhə̀ è ngɨŋə̂ Vəyn ə fe nə̂ nə ghàs è ghàyn ə nyi sèchùmtè èpàm setɛ sə Njisə̀s sè, ə̀ ndo Fəynfe ə kɨmnə̂ ndə̂mə̀ ghàs.

²²È və ndə̀m chwìə ə̀ Vəyn ə ghâsènì ewìyn, ə fo Sèzuʼ se Ŋwaʼase ə ghâsènì ətəm se tyə̀yn nə Fe tə fo mɨ̂sə̀ èfɨa vɛ ə Fe tsɨ̂nè.

²³M tɔŋɔ̂ Fèzhə̀ kə tsɛ̀ èsaʼ vɨ̂mvè, Fe ke ndô təm ghɨmə. Ə̀ tè nyi endom se zhɔyn atu kaynke kə m tè chɔʼne se tàʼa ndù ə Kolìŋ.

²⁴Ghàs mɔ̀msə̀ chîəva se ŋamnê ə ghàyn nə ghàyn pomə ghɛ zɛ ə ghàyn kɔ̀ŋə̀ va, ghàs nyîə ke nə ghàyn fɛte tyəm ndò ə ghàyn epomə̂. Ghàs pɨlə fɨaʼà è ghàyn sə ghàyn ə chùŋ.