Read Mmen 2 Kolìŋ 10 Bible Online

2 Kolìŋ 10 - Mmen bible

2 Kolìŋ 10

¹Ə̀ chyatə̂ kə nâʼà mi Pɔ̂l ghàyn zôyn tɔynə̂ ətəm ə chûŋghè è pɔ̂ynè ə̀ Klâys, ə nyi mi vɛ ə ghɨ mɔ̀ʼɔ pìə nə shîŋə̀ kɛ ə m va ə ghàyn əfètəyn mə nyàʼà èghɛ è təm ə tɛ, pîza shîŋə̀ kɛ ə m nyi ə ghàyn ə fètəyn, me wâmnə̀ è fâynzè!

²M chyatə̂ ghàyn nə kə ghàyn nəyn, ə m nə pəyn, ə mə pɨa ə ghàyn ətu. M ke ndô nə m kaʼa m pɨa nâʼà sə ŋaŋ sê ghɨ ghɛ ə ghe pìə za nə ghàs ndamə kə ghɨ mbiə.

³E nyi ke nâʼà səmɔʼ nə ghàs ndamə ə mbi pîza nô va endom vɛ ə ghɨ ə mbighe nô ətəyn.

⁴Fɨa eghɔ̀ŋ vasve nyi mə ə̀ paʼà fɛtê wùə. Pîza ə̀ nyi efɨa eghɔ̀ŋ ə Fezhə̀ vɛ ə è fo nə ghâsènì fɨ̂aʼ ətəyn se pofsê ə te luʼtə atyaʼte.

⁵Ghàs pofsə̂ èsaʼnê, è wâmnè tə eghaŋsə nə ewìyn tɛ ə te nə̂ nə kə ghɨə ke Zhə̀fè. Ghàs chisə tèkwâʼtè tə ghɨ̀tè, nə̂ nə ghənə ə nə̂ ə̀ghɛ endom vɛ ə Klâys kyiŋə.

⁶Ə ghàyn tyə̂yn sê ghàs nə ghàyn sè zɨə ndò ghɛ, ə ghàs ke fo ètsôs sê ghɨ ghɛ ə ghe zɨə va ghɛghe ə ghàyn əfètəyn.

⁷Ghàyn nji shîŋə̀kè ə ghàyn fɛte naynê ə̀ghɛ. Ə wùə pìə nə e nyi wùə ə̀ Klâys, ə è tɔʼ kwàʼtè èghɛ zɛ ə è pìə kûmə̀ nə̀ ghàs pɔŋ nyi kepî ə̀ghɨ Klâysə̀ kə vəyn.

⁸Pɛ̂pɛ ə fo tyaʼa sê ghàs ə ghàyn ətu, mə ghàs sè pfɨ̂nə̀ tsɛsə̀ ngàŋtèkè kûmə̀ àtyaʼ ətəynke, ə ghàs ə ghomə̂ va kûmə̀ nə È fo nə m fɛte ghàyn è kəynke, è pâʼà fo nə ghàs pofse ghàyn è kəynke.

⁹Nâʼàpî zâ m kɔ̂ŋɔ̀ va nə ze ə kyaʼà kə m tsɨŋsə̂ ndò ghàyn è ŋwàʼlè sɨmse.

¹⁰Piə ghɨ mɔʼɔ pìə nə, “Shɨ̂ŋə̀ kɛ ə è nyàʼà, ŋwàʼlè sə vəynse se kyi ezhiyn, è kɨsè m̀kɔʼnè, pîza è və nə̀ pɨlə pə̂ əghɨghe əshi è fanə̀ se wàmnè əghɨghe əfètəyn.”

¹¹M kɔ̂ŋɔ̀ nə kyì ə ghɨ̀ nə ghɨ̂nə̀ ə ke nə ghɛ zɛ ə ghàs tsɨsə nyâʼ ə tomə nyi ke zɛ ə ghàs pə̀yn pî ə ghàyn əfètəyn, ə ghàs nəyn.

¹²Ghàs pìə va nə ghàs nyi anɔ̀yn ə ghɨ ghɛ ə ghe wàmnə̀ ghɛ ə chûŋghè kûmə̀ sèngɨŋ sə ghənə̂sè. Ghàs pìə nə, ghənə ə ndə̀m fɨ̀aʼnèkè sə̂ fɨaʼnə̀ sengɨŋ sə ghənə̂sè ətəyn. Ghənə nə̂ ə̀ghɛ ghe kyi va tɔfze.

¹³Pîza ghàs nə pfɨnə̀ va ngàŋtèkè kûmə̀ èghɛ mə Zhə̀fè paʼà fo nə ghàs nəyn. Ghàs nə pfɨ̀nə̀ kə àngàŋtè kûmə̀ ə̀ghɛ ghɛ ə Zhə̀fè fo nə ghàs ə nə̂, fɨ̂aʼ kɛ ə ghàs nə̀ ə ghàyn ə fètəyn nyi eghɛ èmɔ̀ʼ əfètə̂ ghɛ ghɛ ə Zhə̀fè fo nə ghàs ə nə̂.

¹⁴Ghàs pâʼà pfɨ̀yn ngàŋtèkè kûmə̀ àfɨaʼ mə ghàs paʼà nə̀yn kəynke, ze fə kàʼa ə zə nyi zamə ezhoghɛ ə ghàs fə nyi mə ə paʼà pə̀yn se ghàyn, pîza ə nyi ghàs ghɛ ə ghàs tè tsafte pəyn se ghàyn è tom èchùŋ kûmə̀ Klâys.

¹⁵Ghàs pâʼà nə̀yn pofsê ghɛze kə epfɨ̂yn angàŋtèzè kûmə̀ èfɨaʼ mə ghàs paʼà nə̀yn. Ghɛ zɛ ə ghàs lotə kyiŋə nyi nə ghàyn ə ndəmə̂ ə ghàyn epomə̂, kə fɨ̂aʼ zɛ ə ghàs nə̂ ə ghàyn əfètəyn pɔŋ zham nâʼà sə ŋaŋ.

¹⁶Ə ze se nyi nyî, ə ghàs fɨ ndaʼa ndu tom èchùŋ ə te ndaʼ tə mɔ̀ʼɔte ə tyà, kə ə tə pəyn ə kyi va se pfɨ̀yn angàŋtè kûmə̀ èfɨaʼ mə ə kàynè nəyn ə ghɨə ndôghè endaʼ.

¹⁷Pîza ə nyàʼ ə Ŋwàʼlè Fèzhə̀ nə, “Ə pfɨ̀nə̀ pîndè ngàŋtèkè, ə è və pfɨnə̀ kə kûmə̀ èghɛ zɛ ə Pɛ̂pɛ nə̂yn.”

¹⁸Ə Pɛ̂pɛ kwàʼtè achûŋ kûmə̀ ghâsènì, ə nji ghâsènì kə ghɨ ə chûŋghè, pîza ə vachi ghâsènì sə̂ kwaʼtə̀ chùŋ kûmə̀ sèngɨŋ sə ghasènìse kə njîə ghâsènì sə ə̀ghɨ̀ ə chûŋghè.