Read Mmen 2 Kolìŋ 7 Bible Online

2 Kolìŋ 7 - Mmen bible

2 Kolìŋ 7

¹Zôyn kə Zhə̀fè tsɨ̂nè ghɛ nə ghɨ̂yn sê ghâsènì ə soyn sɨm sechûŋsè, e tsɔ̂fə̀ nə ghâsènì mɔmse se kɛse epàm əghɛ ghɛ ə ghe pə̂ è lɨŋze ə senjyà se ewìynse, fɨnə pə̀ è lɨŋze ə sezuʼ. Ghâsènì nyì sə̂ lotê nyi èŋwaʼze mə za nyi endom sə̂ ngɨmnə̂ Fèzhə̀.

²Ghàyn tyəyn kɔ̂ŋ zayn sê ghàs. Ghàs pâʼà nə̀yn tsas ghɛze sê wùə; ghàs pâʼà nə̀yn wùə ve njìse ndom; ghàs pâʼà lesê fi fɨa əwûəkè.

³M pìə va ghɛ nə ghɨ̂yn se pì nə ghàyn ə nə̀yn pofsê ghɛze. M se nyi mə mə pì nə ghàs nyîə kɔ̂ŋɔ̀ ghàyn nâʼà sə ŋaŋ, nyi sə̂ pa kɔ̂ŋɔ̀ kə ndò ghàyn, kə kyàyn pî ghè.

⁴M fɛte ke ndò ghàyn, pfɨnə̀ àngàŋtè nâʼà sə ŋaŋ kûmə̀ ghàyn, ə ghàs ə tetsòs tèkɨ̂m, m pa kyi kendò təmə ghaʼâghè, nyi mə mə lwiyn èsaŋnêzè.

⁵Ə̀ tè nyì pî kə ghàs ndù fɨ ə Màsèndonyà, ghàs tè paʼà kyî zɨ̀tèkè. Tsôstè tè nyiə nyi luʼte kɨ̂m, ghɨə mɔ̀ʼɔ ghe zɔ̂, fâynze nyi kepî ə ghàs ətəm.

⁶Pîza Zhə̀ fɛ ə fe fo təmə ə nə̀, pə̂ Taytùs zè ə fo ghàs è təmə.

⁷Ə̀ tè vachi ke èpə̂yn ə vəynze ə ze tè nəyn nə ghàs ə saŋnə̂, pîza è kɨsè èndom vɛ ə è tè tsàyn sê ghàs nə ghàyn ə fo vəyn è təmə ə zɨtəghe. Ghàs tè nyiə saŋnə̂ kəpi kûmə̀ nə è və tə tsàyn kə ghàyn tè lotə kɔ̂ŋə̀ se fe mi, è ndom vɛ ə ghàyn kosə kyaʼà ətəyn, è ndom vɛ ə ghàyn nyi èpɨaʼtêzè ətəyn se tɔ̀ʼɔ̀ mi, kûmə̀ ə̀ghɛ nə ghɨ̂yn kə m zɨ, m lotə̂ ngɛsə̂ saŋnə̂ ndò zôyn.

⁸Ŋwàʼlè zɛ ə m tè nyàʼ sê ghàyn kàʼa è zə nyi mə è zə fo ngəʼ sê ghàyn, pîza m komə̂ va èwiynve nə mə tə nyàʼ zə̂ynzè. M tè saŋnə va kûmə̀ nə ŋwàʼlè ə̀təyn ə tə nə̀yn ghàyn e saŋnə̂ va sə fendîŋə̀ fə ashìŋə̀fè.

⁹M pɨlə saŋnə̂ ndò zôyn, saŋnə̂ va nə mə nyàʼ ŋwàʼlè, è ze nə̀yn ghàyn e komə̂ èwiyn, kûmə̀ nə komə̂ èwiyn nə zɛ tè nəyn ghàyn ə kwiynə̂ èndam epi zaynze. Ghàyn tè kyi etsôs kè nâʼà endom vɛ ə Zhə̀fè kyiŋə ətəyn. Ze tè tyə̀nə nə ghàs tè pâʼà nə̀yn tsas ghɛze sê ghàyn nâʼà səkɔs.

¹⁰Ə wùə fe ngəʼ endom vɛ ə Zhə̀fè kyiŋə ətəyn, ə è kwiyne ndam ə vəynze pize, ə è kyi sɔzaze. Ə ze nyi nyî, ə ghɛze ə va kə è və komə̂ èwiynve ətəyn. Pîza ə wùə fe tsôsvè mə ə̀ nəyn mbi, ə ve nəyn nə è pɨl kwu ndô.

¹¹Ghàyn fe ghɛ zɛ ə tsôs tɨnə̀ ə te ndô pə̂yn sê Zhə̀fè nə̀yn ə ghàyn endam: tə nə̀yn ghàyn e kyiŋə nâʼà sə̂ nə̂ chùŋ, ə nə̀ ghàyn e kyiŋə nâʼà è tyaʼa se tyə̀yn nə ghàyn nə̀ tsasə va. Ndom vɛ ə ghàyn nyɔ̀ʼsə̀, choze ə zomə ghàyn ashìŋə̀ kɛ ə wùə nə̀yn pofse ghɛze nə̀ nə ghàyn ə kɔ̂ŋə̀ se pɔynsê ə wùə è təm ghaynghe əkɨ̂m. Ghɛ ətəynze ə tə nə̀yn, ghàyn e fànə̀ nâʼà sə ŋaŋ. Ghàyn tè nyiə kɔ̂ŋɔ̀ se fe mi nâʼà sə ŋaŋ. Ghàyn ə tyə̀yn ke ndom tekɨ̂m nə ghàyn paʼà nə̀yn pofse ghɛ zhize kûmə̀ èghɛ nə zɨ̂yn.

¹²Mə tə nyàʼ ke nâʼà ŋwàʼlè sê ghàyn, pîza ə̀ va chi kûmə̀ wùə nə vɛ ə è nə̀yn pofse ghɛ nə zɛ, kɨ̀sə kûmə̀ wùə vɛ ə nə̂yn pofse ghɛ ətəyn sê vəyn. M tè nyàʼ se paynsê se ghàyn ə Zhə̀fè əshi kə kɔ̂ŋ zayn ndɨŋ nyi se ghàs.

¹³Ghɛ nə ghɨnə ə nə̀yn ghàs e kyi èfɨəmtê. Ghàs tè nyîə saŋnə̂ nâʼà sə ŋaŋ se fe kə Taytùs saŋnə̂ kûmə̀ èndom vɛ ə ghàyn tè tɔ̀ʼnə è vəyn.

¹⁴M tè nyîə pfɨnə̀ àngàŋtè kûmə̀ ghàyn sê vəyn, ghànə tàʼa ghomsə̂ mi. Ghàs ndamə wàmnə̀ kə səmɔʼ sê ghàyn. Naʼapi ghè vɛ ə ghàs tè pfɨyn ngàŋtèkè sê Taytùs kûmə̀ ghàyn tè fɨyn fɨ ke səmɔʼ.

¹⁵Shîŋə̀ kɛ ə è kwâʼtə̀ kə ghàyn tè zàŋsə zɨə sê vəyn, fɨnə kwàʼtə̀ kə ghàyn tè fiə vəyn è ngɨmnê eghaʼâzè, kɔ̂ŋ ə vəynze sê ghàyn e ndəmə̂ nduə kə ndò.

¹⁶M saŋnə̂ nâʼà sə ŋaŋ kûmə̀ nə m ke ndô nə m kaʼa ə mə zaʼnə̂ ə ghàyn ewìyn, ndom tekɨ̂m.