Read Mmen 2 Kolìŋ 8 Bible Online

2 Kolìŋ 8 - Mmen bible

2 Kolìŋ 8

¹Ghàs kyiŋə ə ghɔnyì ghasə nə ghàyn ke fùʼ kɛ ə Zhə̀fè tè tyə̀yn ə sendɛ sə Fezhə̀sè ə Màsèndonyà.

²Ghənə tə kyi mɔ̂m te tsɨəte kûmə̀ tètsôs tɛ ə ghənə tè tsɛ̀ tɔynê ətəyn, pîza pa kyi ke ndò saŋnê eghaʼazè se fo nâʼà sə ŋaŋ se tɔ̀ʼ efɨ̂aʼ ə Fezhə̀zè pî kə ghənə tè nyi əghɨ afɨfə.

³M tsâ èghɛ sê ghàyn, mə mə tə fe. Ghənə tè pâʼà fo ke fɨa kɛ ə ghənə tè kàʼa fo, ghənə tə fo tsɛ zamə. Ghənə tè fo ke nâʼà sə ghənə ekɔ̀ŋ,

⁴fo zâ chyatə̂ ghàs nə ghàs fo zhəmke, ə ghənə fo ə pɔŋ tsâmtè ə̀ghɨə Fezhə̀ ghɛ ə ghe ndamə ə Njòndyâ.

⁵Ghənə tə nə̀yn tsɛ nâʼà kə ghàs tè kwàʼtə. Ghənə tè piə fo ndò mə ghənə fo ngɨŋ sə ghənə̂sè sê Pɛ̂pɛ sə shi, ə fo kəpî sèngɨŋ sə ghənə̂sè sê ghàs endom vɛ ə Zhə̀fè kyiŋə.

⁶Ə̀ za nyi eghɛ zɛ ə ghàs tè chyate Taytùs vɛ ə è tè zhə̀te fɨ̂aʼ kɨ̀nə̀ nə è ndu èshike èfɨaʼ ətəynke, nə è tsamte ghàyn ə è mɨse fɨ̂aʼ afùʼ nə zɨnə mə ə è tè zhə̀te.

⁷Ghàyn nyîə nə̂ àchûŋ ə tendom tèkɨ̂m, mə ghàyn ə fɛte pomə̂, fɛtə̂ wâmnə̀, fɨyn kyi ètɔf nâʼà sə ŋaŋ, kɔ̂ŋə̀ sə̂ tsâmtə̀ ə̀ghɨ nâʼà sə ŋaŋ, fɨnə ndəmə̂ ekɔ̀ŋ zɛ ə ghàs kyi sê ghàyn. Ghàyn fɛtê kyi àfùʼ ə fo nə kɨnə mə.

⁸M pìə va nyiə nə m fo sə alàŋ, pîza m tyə̂nə̀ kə se ghàyn ndom vɛ ə ghɨ mɔ̀ʼɔ kyiŋə se tsàmtè nâʼà sə ŋaŋ, kə m fe nə kɔ̂ŋ zaynze nyi səmɔʼ mə nyi akaŋ ə.

⁹Ghàyn kendô fùʼ kɛ ə Pɛ̂pɛ ə̀ ghâsènì Njisə̀s Klâys tè tyə̀yn sê ghâsènì. È tè nyi wùə èkɛ, ə kɛsə fɨfə kûmə̀ ghàyn, kə fɨfə Vəynke nəyn, kə ghàyn ə nyi ə̀ghɨ kɛghe ə Zhə̀fè shi.

¹⁰M kyiŋə se pì eghɛ zɛ m kwaʼtə̀ se ghàyn kûmə̀ èghɛ nə zɨ̂yn. E tsɔ̂fə̀ nə ghàyn mɨse ghɛ zɛ ə ghàyn tè zhə̀te ə pîŋ ètsɛ zôyn. Ghàyn tè va ke ə̀ghɨ əshi se fo, ghàyn tè nyì kepî ə̀ghɨ shiə sə̂ kɔ̂ŋə̀ se fo.

¹¹Zôyn, ghàyn mɨse fɨ̂aʼ ətəynke, kə kɔ̂ŋ zaynze se nə̀yn efɨaʼ ətəynze ə nyi kepî èghɨ kə atyaʼ kaynke se mɨ̀sè efɨaʼ ətəynze, mə ghàyn nə̀ nə̂ èfɨaʼ ətəynze kè èfɨa kɛ ə ghàyn kàʼa ə ghàyn kyi.

¹²Kûmə̀ nə ə ghàyn piə fo afɨa saŋnə̂ se fo kɛ ə ghàyn kyi, ə Zhə̀fè fi fo ətəynze kûmə̀ nə ə̀ nyi afɨa kɛ ə ò kyi, mə è kyiŋə va nə ò fo kɛ ə o kyi va.

¹³M kyiŋə va nə ghɨə mɔ̀ʼɔghe ə nə̂ kə fèfɨ̂atə̀ fə afɨ̀aʼfè mə ghàyn ə pɨ̀aʼà fɨ̂aʼ etsɨəke ə ghàyn ətu. M pɨlə kyiŋə kə nə ghɛ ghə nyi èghɨ nâʼàpî sê ndè.

¹⁴Ghàyn nyîə kyi se tsɨ̀ zôyn, m kyiŋə nə ghàyn fo sê ghɨə mɔ̀ʼɔ ghɛ ə ghe kyi va, kə ghənə tə piə kyiə ndò ə pɔŋ tɔʼ ghàyn ashìŋə̀ kɛ ə ghàyn laʼà. Ə ze nyi nyî, ə ghɛghe ə nyi ke èghɨ sê ghàyn ə̀kɨ̂m,

¹⁵kè eghɨ kə nyi mə nyàʼ ə Ŋwàʼlè Fèzhə̀ nə, “Ə̀ tè nyi kə ə tè ndùə kumtə̂ efɨazhiəve, ghɨ ghɛ ə ghe tè kumtə se tsɨ̀ tè kyi tsɛ̂sè va, ghɛ ə ghe tè kumtə se tətə̂, tè kyi tsɛ̂sè va se tətê.”

¹⁶Zɔ̀ŋnèkè ndùə sê Zhə̀fè kə fe nə̀yn Taytùs nə è və kyi èkɔ̂ŋ ətəyn se tsàmtè ə ghàyn kèpi endom vɛ ə ghàs kyi.

¹⁷È və tə pomə̂ se pə fe ghàyn kə ghàs pì. Ə tè piə pîə ndò, mə è sè kɔ̂ŋɔ̀ se pə̀yn sə və ngɨŋ.

¹⁸Ghàs ə tom kepî ànyì ə̀ mɔ̀ʼɔ yî vəyn, ə nyi wùə ghɨ ghe kɔ̂ŋɔ̀ vəyn ə sendɛ sə Fezhə̀sè sekɨ̂m kûmə̀ nə è nyîə ke se fɛtə̂ ndàʼa tom èchùŋ.

¹⁹Se kwəynse, è nyi mə ə̀ chɔʼ sendɛ sə Fezhə̀sè vəyn nə ghasè ghənə nə kwiə nə̂ èfɨ̂aʼ echûŋ nə zɨ̂yn, endom sə̂ pomsə̂ Pɛ̂pɛ, è kɨsè se tyə̀yn nə ghàs nyîə kɔ̂ŋɔ̀ nâʼà sə̂ ŋaŋ se tsâmtè.

²⁰Ghàs kyîə ètsâmtè nə zɨ̂yn ètɔfe kə ndɔ̀ʼɔ ghɨghə ghâmə̀ ghàs nə ə kyî pofsê.

²¹Ghàs kyiŋə kə sə̂ nə̂ èghɛ zɛ ə ze nyi chichi. Ghàs nə̀ kə va ə Zhə̀fè əshi, ghàs nə̀ kəpi ndò əghɨ mɔ̀ʼɔghe əshi.

²²Ghàs tomə pə̂ ànyì vâsvè yighə̀ ghənə. Ghàs ə fe sə teshîŋə̀ tetsɨəte nə è nyîə kɔ̂ŋɔ̀ se tsàmtè nə fɨaʼa Fezhə̀zè ə ndûə əshi. Zôyn kə è ke nə ghàyn nyi əghɨ nə̂ èghɛ zɛ ə ghàyn tsɨ̀ynè, kɔ̂ŋ ə vəyn sə̂ tsâmtə̀ èfɨaʼ nə zɨnə̀ ndùə kə eshike.

²³Sê Taytùs, ə̀ nyi wùə vɛ ə ghasè vəyn fɨaʼà əmɔʼ se tsàmtè ə ghàyn. Sê ghɔnyì əmɔ̀ʼɔ ghɛ ə ndûə yighə̀ vəyn, ghənə nyi ə ghɨ ghɛ ə chɔʼte ə sendɛ sə Fezhə̀sè. Ghənə nyîə pə̂ èpomsêzè sê Klâys.

²⁴Ghàyn tyəyn kɔ̂ŋ zaynze sê ghənə kə ndɛsə Fezhə̀ sekɨ̂m fe paynsê ə ke nə ghàs pfɨ̀nə̀ va ngàŋtèkè kûmə̀ ghàyn sə ndô.