Read Mmen 2 Kolìŋ 9 Bible Online

2 Kolìŋ 9 - Mmen bible

2 Kolìŋ 9

¹M ke nə m fə fɨyn kyi va se nyaʼ sê ghàyn kûmə̀ ètsâmtè zɛ ə ghàyn kyi se tom sê ghɨə Fezhə̀ ghè ə Njòndyâ,

²kûmə̀ nə m ke ndô nə ghàyn nyîə kɔ̂ŋə̀ se tsâmtè. M tè pfɨ̀nə̀ angàŋtè kûmə̀ ghàyn sê ghɨ Màsèndonyà pìə nə, “Ghàyn ghɨ Àkayà tè nyiə kɔ̂ŋə̀ se fo nâʼà ə pîŋ è tsɛ.” Ghənə ə tə zɨ kə ghàyn tè kɔ̀ŋə nâʼà sə ŋaŋ se fo, wiyn ə ghənəvè e sè tɨ̂mə̀ nâʼà sə ŋaŋ se pɔŋə fo.

³Zo nyi, m tomə ə̀ ghɔnyì ghɨ̂yn se ghàyn, kə ghənə fe nə ngàŋtè kaske pfɨnəke fa eghɛ tè vachi àkaŋ. Pîza ghənə kyi se pə fe mə ghàyn nyi èpɨaʼtêzè kè kə m tè tsàyn sê ghənə nə ghàyn nyi èpɨaʼtêzè.

⁴Ə ze fɨ nə ghâsè ghə̀ ghɨ Màsèndonyà pə̀ əmɔʼ, ghənə ə pə̀ ndɔ̀ʼɔ ghàyn pɨaʼte, ə ghàs ə ghomə̂ kûmə̀ ə̀ghɛ ghɛ ə ghàs tè pi kûmə̀ ghàyn, ə ghàyn ə pɔŋɔ ghomə nâʼà sə ŋaŋ.

⁵Ə̀ za nyi eghɛ zɛ m tè fe nə ze tsɔ̂fə̀ ndò nə m chyate ghɔnyì ghɨ̂ynə ə pəyn fe ghàyn tsɔ̀fə m sè pə̂, kə ghâyn ghə̀ ghənə tsɨynte pɨaʼtê tèfo tɛ ə ghàyn tè tsɨ̀ne se fo, kə ghàyn fo fo tə təynte ə ghàyn ekɔ̀ŋ.

⁶Ghàyn kyi sə̂ ke nə ə̀ zho pî ndè se tətê, ə è tə kwi kepî se tətê, ə zho pî ndè se tsɨ̀, ə è tə kwi kepî se tsɨ̀.

⁷Ə nâʼàpî ndè piə e fo ndò, è və fo kə àfɨa kɛ ə təm ə vəynghe tyə̂nə̀ nə è fo. Kə wùə nə piə è fo ndò, ə è və fo chîə èwiyn, kəpiə ə kamə ndò vəyn, kûmə̀ nə Zhə̀fè kɔ̂ŋɔ̀ wùə vɛ ə è fo è saŋnêzè.

⁸Zhə̀fè nyîə kyi àtyaʼ se pɔsə̂ ghàyn è fɨave ve tsɨ̀ə tsɛ̂ vɛ ə ghàyn kyiŋə, kə shîŋə̀ tekɨ̂m, ə ghàyn ə kyi èfɨa èkɨ̂m vɛ ə ghàyn kyiŋə, fɨyn kyi kwəynê sə̂ nə̂ ə̀ghɛ ə chûŋ ghətəyn,

⁹kè kə ə nyâʼ ə Ŋwàʼlè ə Fèzhə̀ nə, “Ghənə nyîə ngɛsə fo se ghɨ afɨfə, chùŋ ə ghənə̂ e ndamə faŋə.”

¹⁰Ə̀ fo Fèzhə̀ ngwàʼ sê ghɨ nə zho, ə̀ fo kəpi Vəyn payn ə kwaŋke nə ə zhi, nyi kepî se nə fo kwəynsə̂ ə ngwàʼ sê ghàyn kə ghàyn zho ə ghàyn ə nə̂ ndûə kə chùŋ eshike.

¹¹Zhə̀fè nə̀ pɔsə̂ ghàyn ə È fo kyì tə efɨate sê ghàyn tekɨ̂m, kə ghàyn ə tsâmtə̀ ə̀ghɨ ətəyn shîŋə̀ tekɨ̂m, è kɨsè nə shîŋə̀ kɛ ə ghɨə fi sê ghàs, ghənə e fo àzɔ̀ŋnè sê Zhə̀fè,

¹²kûmə̀ nə fo nə zɨ̂nə̀ ə ghàyn fo tsâmtə̀ kə va ghɨə Fezhə̀. E nə̂ nə ghənə ə fo kəpi àzɔ̀ŋnè sê Zhə̀fè, nâʼà sə ŋaŋ.

¹³Fɨ̂aʼ nə zɨ̂nə̀ ə ghàyn nə̂ nyî tyə̂nə̀ ə̀təm əchûŋ ghɛ ə ghàyn kyi sê ghɨ, fɨnə nə̂ nə ghɨə tsɨəghe ə fo epomsê se Zhə̀fè kûmə̀ nə ghàyn ə ndə̀m təm ghaynghe ə tom èchùŋ ə̀ Klâys zɛ ə ghàyn ndàʼà, è kɨsè nə ghàyn nyîə chyâtə̀ èfɨa, fo ghənə, fɨnə fo ə̀ghɨ əmɔ̀ʼɔghe.

¹⁴Ghɨ nə̀ fe nyi ə kɔ̂ŋɔ̀ ghàyn nâʼà sə ŋaŋ, tsə̂mə̀ sê ghàyn kûmə̀ èndom ekayntə vɛ ə Zhə̀fè nə̀yn nə ghàyn ə kɔ̂ŋə̀ se fo.

¹⁵Zɔ̀ŋnèkè ndùə sê Zhə̀fè kûmə̀ èfo èghaʼâ zɛ ə è fo mə wùə kepî va kə è nə̀ fo zɔ̀ŋnèkè!