Read Mmen Ngàleshyà 2 Bible Online

Ngàleshyà 2 - Mmen bible

Ngàleshyà 2

¹Ə̀ tè nyi epàm ə sèpìŋ njòse kyàʼ, mə fɨnə kɔʼɔ ə Njèlusalɛ̀m ghâsè Pànapàs. Mə tə njì kepî Taytùs.

²M tè kɔʼ fu kûmə̀ nə Zhə̀fè tè tyə̀yn paynsê sê mi nə m kyi se kɔʼ. Ə̀ tè nyi kə m nyi fu, mə nyaʼtə̂ wâmnə̀ kə epàm ghasè ghɨ ghɛ ə ghe tè nyi tuve, ə tsâ tom è chûŋ zɛ ə m tè tsâ sê ghɨ ghɛ ə ə̀ va əghɨ ə Njûsghè. M tè nə̂ zamə kə fɨ̂aʼ zɛ ə m nə̂ zôyn è zɛ ə m tè nə̂ tàʼa njìsè səndô.

³Taytùs tè nyi kepî ghasè vəyn pîza ə tàʼa kàyn nə ə kyi se se ənam ə vəynghe pî kə̂ è tè nyi wùə Nglêk.

⁴Ghɛ ese nə nam nə zɨnə mə tè fɨ mə ə̀ ndwìse əghɨ ə pomə akaŋ yîghe fu, kə ə pə̀yn nji ə ghàs əfètəyn se fe kə ghàs va ekɔ̂s ə Klâys Njisə̀s, se nə̀yn nə ghàs ə nyi èkɔ̂s.

⁵Ghàs tè pâʼà pomə̂ ghɛ ghənə nə zɛ nâʼà səkɔs kûmə̀ nə ghàs tè kyiŋə nə səmɔʼ zɛ ə è nyi ə tom èchùŋ faŋ sê ghàyn.

⁶Ghɨ ghɛ ə tè njìə sə etu fumə tè paʼà fɨyn kyi ghɛze se kwəynsê etùə èghɛ zɛ m zaʼlə. Kə ghənə tè nyì pî ètu kɨ̀sə ghənə tè va, ze mə tyə̂nə̀ va ghɛ zhîze sê mi kûmə̀ nə Zhə̀fè kɔ̀ŋə̀ va wùə ə̀ mɔʼɔ, panə̀ vîvè.

⁷Ghənə tè pɨl fe nə Zhə̀fè ə fo fɨaʼè se mi nə m ndaʼa tom èchùŋ sê ghɨ ghɛ ə tè va əghɨ ə Njûsə̀, kèpi eghɨ kə fe tè fo sê Pità nə è ndaʼa sê ghɨ Njûsə̀.

⁸Tyaʼa Fezhə̀ kɛ ə ke tè fɨ̀aʼa ə Pità se nə̀yn nə è və nyi wùətom sê ghɨ Njûsə̀ nyì kepî kəynke ə ke fɨaʼà ə mi se nə̀yn nə mə nyi wùətom sê ghɨ ghɛ ə̀ va ə ghɨ ə Njûsə̀.

⁹Shîŋə̀ kɛ ə Njə̂m, pità è Njɔyn, ghɨ ghɛ ə tè fe sə etu, kə ghənə tè fe kê nə Zhə̀fè ə fo fɨaʼə m̀kɔʼnè kɨnə se mi, ghənə ə tɔŋtə̂ mi ghasè Pànapàs se tyə̀yn nə ghasè ghə̀ ghənə fɨaʼà sə eghɛ èmɔ̀ʼ. Ghâsè ghənə ə ke ndə̂m nə, ghàs nə ndàʼà tom èchùŋ sê ghɨ ghɛ ə̀ vachi ə̀ghɨ ə Njûsghè, ghənə e ndàʼà sê ghɨ Njûsə̀.

¹⁰Ghɛ zɛ ə ghənə tè pi nə ghàs ə nə̂ tè nyi nə ghàs ə kwaʼtə̀ ə̀ghɨ afɨfə ə ghàs ə fètəyn, ə̀ nyi èghɛ zɛ ə m kɔ̂ŋɔ̀ nâʼà sə ŋaŋ sə̂ nə̂.

¹¹Ə̀ tè nyi kə Pità pə̀yn ə Antyòk, mə tsà se vəyn ə ghɨghe əshi nə è və nə̀yn pofsê kûmə̀ nə ze tè nyîə panə ə ndayn nə è və nə̀yn pofsê.

¹²Tsɔ̀fə kə ghɨ mɔ̀ʼɔ ndo sê Njə̂m ə pəyn fu, Pità tè nyîə zhiə yî ghə̀ ghɨ ghɛ ə tè vachi ə̀ghɨ ə Njûsghè. Pîza ə pə̀ kə ghɨ ə təynghe pə̂yn, Pità ə zhə̀tə̀ sè kɔ̂ytə̀ ndùə kə epàm ə ghaŋə ə̀ghɛ ə tàʼa fɨnə zhi yîghə̀ ghɨ ghɛ ə̀ tè vachi ə̀ghɨ ə Njûsghè kûmə̀ nə è tè fànə əghɨ nə ghɨ̂yn ə tè pìə nə, ə kyi sə̂ se ənam əghɨ̀ ghɛ ə̀ tè vachi ə̀ghɨ Njûsghè, nyi mə pomə̂.

¹³Ghɨ Njûs ə mɔ̀ʼɔghe e pɔŋɔ kaŋkaŋə̂ nə̂ ndùə kəpi ə̀ghɛ kə vəyn. Ghɛ ə ghənə ghe kaŋkaŋə nə nə ghɨnə ə kyìŋsə̀ kəpî Pànapàs.

¹⁴Ə pə̀ kə m fe nə ghənə nə̂ ə̀ghɛ, ghe va chichi kə səmɔʼ zɛ ə tom èchùŋ zaʼlə, mə wàmnə̀ sê Pità kə ghɨghe əshi ə̀kɨ̂m ə pìə nə, “Ò kwì zayn sə̂ nyi wùə Njû, ndamə kə wùə vɛ ə vachi wùə ə Njûs ə. Ò kàʼa o kâynə̀ zàyn nə ghɨ ghɛ ə̀ vachi ə̀ghɨ ə Njûsə̀ nə ghənə ə ndamə kə ghɨə Njûsghə?”

¹⁵“Ghâsènì èngɨŋ sə ghasènìse nyi əghɨ Njûsə̀ kè nâʼà epîə, vachi ə̀ghɨ ghɛ ə va əghɨ ə Njûsə̀ mə nyi əghɨ ə pighe,

¹⁶pîza ghàs ke ndô nə ə ndə̂mə̀ va nə wùə nyi chichi ə Zhə̀fè əshi kûmə̀ nə è ndə̀mə̀ Àlâŋ. Wùə nyi chichi ə Zhə̀fè əshi ke ashìŋə̀ kɛ è kyi kyî epomə̂zè sê Njisə̀s Klâys. Ghâsènì e sè nyi mə ə pɔŋ kyî kyì epomə̂zè sê Klâys Njisə̀s kə ghâsènì ə nyi chichi ə Zhə̀fè əshi tɔynə̂ ə ghâsènì epomə̂ sê Klâys, ə vachi tɔynə̂ e ndə̀m alàŋzè. Kûmə̀ nə wùə vayn kaʼa è və nyi chichi ə Zhə̀fè əshi mə è ndə̀mə àlâŋ ətəynke.

¹⁷Pîza ə̀ ghâsènì mɔ̀msə̀ sə̂ nyi chichi ə Zhə̀fè shi mə ghâsènì nyì sə eghɛ èmɔ̀ʼ ghasènyìə ghə̀ Klâys, fɨnə nə̂ pi kèpi kə əghɨ ghɛ ə ghe vachi ə̀ghɨ Njûsghè, ə zə tyə̂nə̀ nə Klâys tɔ̀ʼɔ̀ pi mə? E va za nâʼà səkɔs!

¹⁸Ə m nyiə kɛse pomə ghɛ ghɛ m tè kwiynse, ə zə tyə̂nə̀ nə m nyi wùə èkəmə nə̂ àlâŋ.

¹⁹Ə̀ nyi alâŋ kə ke tè zhwi mi, ə nə̀ mi nə kə mə fɨyn nyi ə kəynke etyə̂ àtyaʼ, ndam zɨmze nyi zôyn sə kɔʼsə̂ Fèzhə̀. Ə payntê mi awâmnè è Klâys,

²⁰kə mə fɨnə ndamə va, pîza ə̀ nyi Klâys kə è ndamə ə mì ə fètəyn. Ndam zɛ ə m ndamə zôyn nyi kûmə̀ èkyî èpomə zɛ ə m kyi sê Va Fèzhə̀ vɛ ə è tè kɔ̂ŋ mi ə fo ngɨŋ ə vəyn ə kwu kûmə̀ mi.

²¹M vayn kàʼa m kwiynse fùʼ ə Fezhə̀kè. Pîza ə wùə nyi chichi yî Zhə̀fè kûmə̀ kə nə è ndə̀mə̀ Àlâŋ, ə nyi nə Klâys tè kwu ke səndô.”