Read Mmen Ngàleshyà 6 Bible Online

Ngàleshyà 6 - Mmen bible

Ngàleshyà 6

¹Ghɔnyì ghɨmə, ə wùə sê ghàyn nə̀yn nâʼàpî pi èkè, ghàyn ghəmɔ̀ʼɔ ghɛ ə Zuʼse ŋwaʼase chisə ghàyn, ghàyn mɔmsə̀ se tyə̀yn endom sê vəyn è pɔ̂ynè. Ə ghàyn piə tyə̀ynə̀, ghàyn e tɔ̂ʼnə̀ è ngɨŋ saynse ə̀ va za, ə nâʼà ghàyn kàʼa pɔŋ pfɨ̀.

²Ghàyn e tsâmtə̀ sèngɨŋ saynse. Ə̂ ghàyn nə̂ nyi, ə ghàyn ə lwiynsə̂ àlâŋ ə Klayskè.

³Ə̀ kwâʼtə̀ pîndè nə e nyi afɨa, pîza va kəynke, ə è və lesə̂ kə ngɨŋə̂ vəyn.

⁴Nâʼàpî ndè fɛte nayne èndam əvəyn zə ngɨŋ. Ə e tsɔ̂fə̀, ə è və tyalə ə eghɛ zɛ ə è nyi mə è və nə̀yn sə və ngɨŋ, mə è səynə̂ va ngɨŋə̂ vəyn yî wùə vîvè.

⁵M pîə zɨnə kûmə̀ nə nâʼàpî èghɛ èkè zɛ ə wùə nə̀, è zaʼsə̂ kə ə vəyn atu.

⁶Wùə vɛ ə zaʼlə vəyn èghɛ ə Fezhə̀zè kyi sə̂ chyâtə̀ fo tyə̀ynsè ə vəyn è fɨa echûŋ vɛ ə è kyi, nâʼà èkɨ̂m.

⁷Kə wùə nə̂ lesê ngɨŋ ə vəyn. Wùə vayn kaʼa è chɔŋte Zhə̀fè. Ə wùə zho nâʼàpî ghè, ə è tə kwi ke kəynke.

⁸Ə̂ wùə zho ke fɨa kɛ ə ke fɔmə ə və senjà sewìynse, ə è tə kwi ke èkwu, mə ə wùə zho fɨa kɛ ə Zuʼse kyiŋə, ə è tə kwi ke èndam zɛ ə ze tə mîə va.

⁹Kə ghâsènì nə pɔ se nə chùŋ, kûmə̀ nə ghâsènì tàʼa pɔ, ə shîŋə̀kè tə kwəyn, ə ghâsènì kwi, mə nyi emaʼtè ə ghasènìve.

¹⁰E za tyə̀nə̀ nə ə ghâsènì kyi ndomnə̀fè nâʼà pî ashìŋə̀ àkè se nə chùŋ, ghâsènì mɔmsə̀ se nə kə sê ghɨ ghəkɨ̂m, fɨnə nə̂ nâʼà setsɨ̀ sê ghɨ ghɛ ə ghâsènì ghə̀ ghənə kyi kyî epomə̂zè emɔ̀ʼ.

¹¹Ghàyn fe kə ə̀shi ə ŋwàʼlè ə ghaʼâ ghɛ m njî se nyàʼa ŋwàʼlè zɨ̀nə̀ ətəyn se ghàyn kè nâʼà è gho kɨmke ə.

¹²Ghɨ ghɛ ə ghe kitə ghàyn nə ghàyn se nam ghaynghe nyi ghɛ ə ghe kyiŋə sə̂ tyə̂nə̀ èwiyn əghɛ ə senjà sə ewìynse. Ghənə nə̂ kə zɨnə mə kûmə̀ nə ghənə fànə̀ nə ə nə̀ tsəfsè ghənə ezhoghɛ ə ghənə zaʼlə ghɨ kûmə̀ èkwu ə Klâyszè awâmnè.

¹³Nâʼàpî ə̀ghɨ ghɛ ə ghe se nam ə ghənə̂ghè ndə̀mə̀ pîə va lâŋkè pîza, kyiŋə kə nə ə se nam ghaynghe kə ghənə nə kwiə pfɨ̀ynə̀ fètwɔ̀ʼ, nə ghàyn ə pomə nə ə se nam ghaynghe.

¹⁴Pîza sê mi, m nə̀ wâmnə̀ ə ndayn kûmə̀ Pɛ̂pɛ ə̀ ghâsènì Njisə̀s Klâys vɛ ə è tè kwu awâmnè, kûmə̀ nə tɔynə̂ ə vəyn awâmnè, fɨa mbive nyi ke kə efɨa ekwutəve, m nyi ke kə afɨa ə kwuəke se fɨa ə mbive.

¹⁵Kɨ̀sə se nam ghaynghe, kɨ̀sə ə tàʼa se, zɨnə mə kyi va ghɛ zhîze se nə̀yn. Ghɛ etɛ nyi ke nə, Zhə̀fè nəyn, ə ò kɛse ə ô nyi wùə èfe.

¹⁶Ə Pɔ̂ynè ə Fèzhə̀ è kosê esəynze ə nyi sê ghɨ ghɛ ə chûmtə̀ zaʼlê zɨ̂nə̀, è kɨsè se ghɨ Fezhə̀ ghəkɨ̂m.

¹⁷Se mɨ̂sè, m pìə nə, kə wùə vîvè nə fɨyn fo ètsôs sê mi kûmə̀ nə ndwɔ vɨ̀nə ə mì ewìyn tyə̂nə̀ nə m nyi wùə èfɨaʼa ə̀ Njisə̀s.

¹⁸Ə fùʼə Pɛ̂pɛ ə ghasènìke Njisə̀s Klâys ə nyi sê ghàyn əkɨ̂m ə ghɔnyì ghɨmə. Ə zə nyi ke zamə.