Read Mmen Ɛfesùs 2 Bible Online

Ɛfesùs 2 - Mmen bible

Ɛfesùs 2

¹Ghàyn nyi nyî mə ghàyn tè nyi mə ghàyn ə kwute ə ghàyn ə sezuʼ kûmə̀ tètsas è ghɛ piə ghɛ ə ghàyn tè nə̂.

²Ghàyn tè ndamə kə ə sepi nə sɨ̂yn kə ghàyn tè pa chûmtə̀ ə̀ghɛ ə mbiə, zɨə sê fɔ̀yn vɛ ə è saʼa zuʼse pi sɛ ə se tàyntə̀ tsɛ̂ ekwùtwəyn, ə nyi sèzuʼ sɛ ə se chisə ghɨ ghɛ ə ghe zɨə va sê Zhə̀fè.

³Ghâsènì əkɨ̂m tè ndamə kə kə ghɨ ə pi nə ghɨ̂yn sə shi, nə̂ kə əghɛ pi ghɛ ə njà sewìynse ə ghasènìse kɔ̂ŋɔ̀, ə̀ fɔmə pî ghè, e nə̂ kə ndò. Ndamə senjà se wìyn nə sɨ̂yn tè tyə̀nə nə ghâsènì nyîə kwəynə̂ kə se tə kyî etsôs eghaʼâvè sê Zhə̀fè kə ghɨ mɔ̀ʼɔ.

⁴Pîza, Zhə̀fè nyîə kosə̂ èsəyn sê ghɨ nâʼà sə ŋaŋ fɨnə kɔ̂ŋɔ̀ ə̀ghɨ nâʼà sə ŋaŋ.

⁵Ə̀ za nyi eghɛ zɛ ə Fe tè zòmse Klâys nâʼàpî ashìŋə̀ àkè ə pɔŋɔ zômsə̀ ghâsènì. Ə̀ tè nyi zâ, mə ghâsènì ə kwutê ə sezuʼ kûmə̀ tètsas təghasènìte. Zhə̀fè ə sɔ̀zâ ghàyn kûmə̀ àfùʼ kɛ ə fe kyi.

⁶Zhə̀fè tè zòmse Klâys Njisə̀s paʼsə̂ kə è ghâsènì kaʼke amɔ̀ʼ ə ndə̂mə̀ Vəyn è ghâsènì əfekyə̀ fə tefɔ̀ynfè ekwùtwəyn kə è və saʼa, ghâsènì e pɔŋɔ saʼa ə Və atyaʼ.

⁷È tè nəyn nyi kə ə tə nə ə nyi pî etuʼ èkè, əghɨə fe nə tɔ̂ʼnè ekayntə ə vəynze kyi va liŋze, ə nyi zɛ ə è kɔ̀ŋɔ̀ ghâsènì ətəyn ə tyə̂nə̀ tɔynə̂ ə Klâys Njisə̀s.

⁸Zhə̀fè sɔ̀zâ ghàyn tɔynə̂ ekyî epomə̂ zaynze kûmə̀ àfùʼ kɛ ə Fe kyi. Ghàyn pâʼà fɨ̂aʼ fɨ̂aʼ kyîke sə ghàyn ə ngɨŋ kə Zhə̀fè ndaʼ è sɔza nə zɨ̂nə̀. Ə̀ nyi ke èfo ə Fezhə̀zè. E za tyə̀nə̀ nə wùə vayn kàʼa è pfɨyn fètwɔ̀ʼ nə zhi ə fɨ̂aʼ fɨake tsɔ̀fə kə ndaʼ è sɔza nə zɨ̂nə̀.

¹⁰Ghâsènì nyi efɨaʼ ə Fezhə̀ zə ghoze. Fe fɛtə̂ ghâsènì tɔynə̂ ə Klâys Njisə̀s nə ghâsènì nə ndamə èndam echûŋ zɛ ə è tè se nyi mə è və tè pɨaʼtê ndəm nə ghâsènì ə ndamə.

¹¹Ghàyn ghɨ ghɛ ə̀ vachi ə̀ghɨ ə Njûsghè, kə ghàyn lɛse ghɨ ghɛ ə ghe tè nyì sə shi. Ghàyn nyi əghɨ ghɛ ə̀ vachi ə̀ghɨ Njûsghè epîə, ghɨə Njûsə̀ tɔŋtə̂ ghàyn nə, “Ghɨ ghɛ ə tàʼa se ənam əghənə̂ghè,” tɔŋtə̂ sèngɨŋ sə ghənə̂sè nə, ghɨ ghɛ ə nyi mə ə se namə ghənə̂ghè. Ghənə tɔŋtə̂ nyi pîza namə nyi nyî, ə̀ se va Zhə̀fè, ə̀ se ə̀ghɨ è gho.

¹²Kə ghàyn lɛse nə ə tè nyi za, ghàyn e kyi va ghɛze se nə̀yn è Klâys, va anɔ̀yn ə ghɨə Isìlâykè, kyi va ghɛze ə tetsɨ̀nè tɛ ə Zhə̀fè tè fo sê ghənə. Ghàyn tè tsɨ̀nə̀ ndamə kə ndò ə mbi, kwâʼtə̀ va chùŋ zhîzè elùʼ, ke pî va Zhə̀fè.

¹³Ghàyn tè tyəm nâʼà sə aghaf, paʼsə̂ va sê Zhə̀fè, pîza zôyn e sè nyi mə ghàyn ə pə̀yn paʼsê tɔynə̂ ə Klâys Njisə̀s, kûmə̀ m̀ndəm mɛ ə è tè sɨs ə ghâsènì ətu tsɔ̀fə kə è kwu.

¹⁴Klâys ə zùŋtè ghâsènì, ghâsènì e fɨnə pofə va. È və nə̀yn nə ghɨ Njûsə̀ è ghɨ ghɛ ə̀ vachi ə̀ghɨ ə Njûsghè ə nyi ke sə eghɛ èmɔ̀ʼ. È və kəʼsê kɨ̀ŋtè kɛ ə ke tè chyâsə ghâsènì èwiyn ə vəynve.

¹⁵È və kim nâʼà lwɔ̂ŋ ə Njûsvè ekɨ̂m tɔynə̂ ə vəyn ekwu nə zɨ̂yn kə ghɨ ghasènìə fɨ ke sə wùə èmɔ̀ʼ tɔynə̂ ə vəyn, ə pɔ̂ynè ə nyi.

¹⁶Kwu ə vəyn nə zɛ awâmnè ə nə̀yn pofə ə ghasènìze ə mîə, è və kɛsə njìə ndùə è ghâsènì sê Zhə̀fè se afɨa àmɔ̀ʼ.

¹⁷E za tyə̀nə̀ nə Klâys tè pəyn ə tsâ tom ə pɔ̂ynè kè sê ghɨ ghəkɨ̂m. È tè tsàyn sê ghàyn ghɛ ə ghàyn tè paʼsə va sê Zhə̀fè, ə fɨnə tsâ kəpî sê ghàs ghɛ ə tè paʼsə.

¹⁸Ə̀ nyì ke kûmə̀ Klâys ə ghâsènì əkɨ̂m kyi Zuʼse mɔ̀ʼ mə ə kaʼa ə ndu ə Pɨ̀a əshi, kə əkɨ̂m.

¹⁹E za tyə̀nə̀ nə ghàyn ghɨ ghɛ ə̀ vachi ə̀ghɨ Njûsghè fɨyn va ə̀ghɨ e motə pə, ghàyn nyi əghɨ endaʼ èmɔ̀ʼɔ ghayn ghə̀ Zhə̀fè, fɨyn nyi ə̀ghɨ esas ə ndɛ Fezhə̀ghè.

²⁰Ghàyn nyi ndɛ mə ə ndɔm achiə ətəynke è zaʼlê zɛ ə ghɨətom ə Njisə̀sghè è fɨ̀aʼtèsè tè zaʼlə kûmə̀, èchi epòlə̀ ə ndɛ nə zɨ̂yn nyi ke nâʼà Klâys Njisə̀s è ngɨŋ ə̂ vəyn.

²¹Ə̀ nyi vəyn vɛ ə è kokyi ndɛ nə zɨ̂yn, è ze kɔʼɔ se fɨ sə ndɛ ètsə̀mə ə̀ Pɛ̂pɛ.

²²Ghàyn ghɨ mɔʼɔ za tsɨ̂ynte nyi əfètə̂ Klâys kə efɨa e pɛve, è və fɛte ghàyn nə ghàyn nə nyi eluʼ vɛ Zuʼsə Fezhə̀sè ndamə ətəyn.