Read Mmen Filìpây 1 Bible Online

Filìpây 1 - Mmen bible

Filìpây 1

¹Ə̀ nyi mi Pɔ̂l è Timotì əghɨ fɨaʼa Fezhə̀ sê Njisə̀s Klâys ghɛ ə nyâʼà pə̂ ŋwàʼlè zɨ̀nə se ghàyn. Ghàs nyàʼà sê ghàyn ghɛ ə ghàyn fo ngɨŋ saynse sê Zhə̀fè ə Filìpây nâʼà ə̀kɨ̂m sè nyi ghâynghə̀ Klâys Njisə̀s. Ghàs nyàʼà kəpî sê ghàyn tuve è ghɨ ghɛ ə tsâmtə̀ se chiyntê efɨaʼ ə Fezhə̀zè nə ze ndu əshi.

²Zhə̀fè, Pɨ̀a sê ghâsènì yî Pɛ̂pɛ Njisə̀s Klâys fo ghàyn fùʼkè è pɔ̂ynè.

³M fo àzɔ̀ŋnè sê Zhə̀ fɨmfe nâʼàpî ashìŋə̀ àkè m kwàʼtè ghàyn,

⁴m piə tsə̂mə̀ nə Zhə̀fè tsamte ghàyn nâʼà ə̀kɨ̂m pî ashìŋə̀ àkè, m tsə̂mə̀ è èsaŋnêzè.

⁵M fo àzɔ̀ŋnè nyi kûmə̀ kə ghàyn tsàmtè mi sə̂ tsâ tom èchùŋ zɨ̀yn kè se zhə̀tè etuʼ vɛ ə ghàyn tè zɨ tom nə zɨ̂yn se kɔʼɔ zaʼâ ndàyn.

⁶M ke ndô səmɔʼ nə ghàyn tə mɨ̂sə̀ ndò fɨ̂aʼ echûŋ nə zɨ̂yn ə Zhə̀fè zhə̀tè ə ghàyn əfètəyn nyî tsɔ̀fə Klâys se pə̀yn.

⁷M vayn kàʼa m faŋ sə̂ kwaʼtə̀ èndom vɛ m kwaʼtə̀ ətəyn kûmə̀ ghàyn kûmə̀ nə ghàyn nyi ə̀ kɔ̂ŋə̀ mi nâʼà sə ŋaŋ. Zhə̀fè ə tyə̀yn təm ə Vəynghe, ghe ghɛ ghe nə̂yn nə ghâsènì ə fɨaʼà sə afɨa àmɔ̀ʼ, kɨ̀sə m nyi ə chaʼ kɨ̀sə m tyəm tsɛ̀ èsaʼ kûmə̀ tom èchùŋ, zaʼlə əghɨ nə ə ke nə è nyi səmɔʼ.

⁸Zhə̀fè nyiə ke ndô nə m pîə səmɔʼ nə m nyîə kɔŋə̀ ghàyn àchûŋ è kɔ̂ŋ zɛ ə Klâys Njisə̀s tè tyə̀yn nâʼà è ngɨŋ ə vəyn.

⁹M tsə̂mə̀ nə Zhə̀fè nəyn kɔ̂ŋ zɛ ə ghàyn kyi sê ngɨŋ saynse è kɨsè sê Zhə̀fè, ə zə ndəmə̂ ndûə kə əshi. M tsə̂mə̀ kəpi nə ghàyn ə ke ə̀ghɛ ghɛ ə ghe nyi səmɔʼ kûmə̀ Fèzhə̀, è kɨsè nə ghàyn ə ke sənɨŋ ə tə̂ èghɛ zɛ ə̀ nyì ze chûŋzè è zɛ ə̀ nyì ze pize.

¹⁰M tsə̂mə̀ nyî kə ghàyn ə ke èghɛ zɛ ə ze tsɔ̂fə̀ kwənə nyi èzoze kyi va tsasze, kə ghàyn tə nəyn ə kiva ləʼke etuʼ vɛ ə Klâys pə̀yn.

¹¹Ə ze se nyi nyî ə Njisə̀s Klâys nəyn, ə ghàyn ə ndamə èndam ə chichize, kə ghɨ fe ə fo èpomsê sê Zhə̀fè, fɨnə tsîtə̀ fəynfe.

¹²Ghɔnyì ghɨmghe kɔ̀ŋghè, m kyiŋə nə ghàyn ə ke nə ghɛ ghɨnə̀ ə ghe kyânə̀ sê mi nyiə pɨlə tsâmtə̀ se nə̀yn nə tom èchùŋ ə̀ Fèzhə̀ nə ndûə èshike.

¹³Nâʼà sèsokə̀ʼ sɛ ə se tsɨ̀ŋnə̀ tɔʼ sèkɨ̂m, è ghɨ fa nâʼà ə̀kɨ̂m ke ndô nə m nyi ə ndɛ̂ ə̀ chaʼ kûmə̀ nə m fɨaʼà sê Klâys.

¹⁴Ndɛ chaʼ zɨ̂nə̀ ə m nyi ətəyn ə nə̀yn ghɨə pomə setsɨ̀ ghɛ ghe fɨyn fɛte fo təm ə ghənə̂ghè sê Pɛ̂pɛ kûmə̀ èghɛ zɛ ə ghənə fe kə è nə̀yn sê mi. Ghənə e sè ndaʼà tom ə̀ Fèzhə̀ zôyn è təm ə tɛ fɨnə fànə̀ va wùə.

¹⁵Ghɨ mɔ̀ʼɔ ndâʼà tom èchùŋ ə̀ Klâys kûmə̀ àghə̀ʼ, è kɨsè kûmə̀ nə ghənə kyiŋə se fe nə ə̀ tsɨ̀ə tsɛ̂ ndè ànyìə, kə ghənə fe nə fɨ̂aʼ zɨme nyiə fɛtə ndûə pîza, yîghe ndàʼà tom nə zɨ̂yn kè nâʼà è təm əchûŋə̀.

¹⁶Ghɨ nə ghɨ̀nə̀ ə ghe ndaʼà è təm əchûŋə̀, ə ndàʼà kûmə̀ kə ghənə kɔ̂ŋɔ̀ mi, ke nə ə fa mi ə ndɛ̂ chaʼ kûmə̀ nə m tè pìə nə tom èchùŋ ə̀ Fèzhə̀ nyì səmɔʼ.

¹⁷Ghɨ ghɨ̀nə ndàʼà tom èchùŋ, mə təm ə ghənə̂ghè zo va, nə̂ nyiə mə kûmə̀ nə ghənə kwaʼtə̀ kə se ngɨŋ sə ghənə̂sè. Ghənə nə̂ zamə se kwəynsê akyɨ̀ŋ kɨmke fa ndɛ ə̀chaʼ.

¹⁸Pîza tsôsvè va! kɨ̀sə wùə tsâ tom ə Klâys mə è kaŋkaŋa nə̂ ndò, kɨ̀sə è tsà səmɔʼ m saŋnə̂ kə ndò kûmə̀ nə tom èchùŋ ə̀ Klâys nyîə zhamə ndùə kə əshi.

¹⁹M saŋnə̂ kûmə̀ nə m ke ndô nə tsə̂m zaynze, è Zuʼsə Njisə̀s Klaysè nə̀ nə̂ mi nə m kyi sɔzaze.

²⁰Ghɛ e ghaʼà zɛ ə ze nyi ə mì ətəm zôyn, è zɛ m kyiŋə se nə̀yn nyì ke nə kə m tə nəyn èghɛ ə mì efɨ̀aʼ se Zhə̀fè mə ze kaʼa ə ze pəyn èghomə̂zè. Pîza m pɨlə kyiŋə nə nâʼàpî ashìŋə̀ àkè kɛ m nə̂ fɨaʼa təynze, se zhə̀tə ndù zôyn, nə mə nə̂ zeynze fanə̀ va ghɛ zhîze se fo èkɔʼsê sê zə Klâyszè. Ə̀ zɨnə nyi eghɛ zɛ m kyiŋə se nə̀yn, kɨ̀sə m tɛ ndô kɨ̀sə m kwu ndô.

²¹Se mi se ndam ə̀ nyì se fɨ̂aʼ se Klâys, se kwu, ə̀ pɨl nyi se zhiə kwulə̂.

²²Ze ə ke kwəyn nə m faŋ sə̂ ndamə fa achaʼ ewìynke, ə m kyi ndom se tɔ̀ʼɔ̀ nə̀yn efɨ̂aʼ echûŋzè. M ke pîva nə ə̀ tsɔ̀fə̀ zɨ̂yn sê Mìə, ekwu, mə sə̂ ndamə.

²³M zhiynə kə ndò əfètəyn ə̀ghɛ nə ghɨ̂yn, kyiŋə nâʼà sə ŋaŋ se za achi kɨ̀yn se ndù sə̂ nyi ghasè Klâys, ə nyi èghɛ zɛ ə ze tsɔ̂fə̀ kwənə,

²⁴pîza fe nə ə̀ nyì nâʼà èghɛ chûŋ nə m faŋ ə mə ndamə kè kûmə̀ kə ghàyn.

²⁵M ke kol ndò ghɛ zɨ̀yn, ə za nyi eghɛ zɛ ə ze nə̂yn nə pəyn m mə nyi è ghàyn əkɨ̂m kə m tsamte ə ghàyn ndəmə̂, saŋnə̂ ə ghàyn ekyî epomə̂zè.

²⁶M nə̂ nyiə kə m piə m kɛsə pə̂ sê ghàyn, ə ghàyn ə tɔ̀ʼɔ̀ tyalə kûmə̀ èghɛ zɛ ə Klâys Njisə̀s nə̀yn se ghàyn tɔynə̂ mi.

²⁷Ghɛ echûŋzè nyì ke nə, ghàyn ə ndamə kə tom èchùŋ ə̀ Klâys kyiŋə kə m pəyn pî ndò se fe ghàyn, kɨ̀sə m faŋ pî se pə̀yn, m mə ke ndò nə ghàyn pa tɛ kə ndò tyəm sə afɨa àmɔ̀ʼ, tsɨ̂yntə̀ fɨ̂aʼà nâʼà è tyaʼa è kwâʼtèzè emɔ̀ʼ sə̂ ndə̂mə̂ ekyî epomə̂ zɛ ə tom èchùŋ zaʼlə.

²⁸Kə ghàyn nə fayn ə̀ghɨ ghɛ ə ghe nô nə kə ghàyn nəyn fɨ̂aʼ zaynze achûŋ. Ghàyn kyi təm ə tɛghe. Ə ghàyn nə̀yn nyi, ə ghàyn tyəyn sê ghənə nə Zhə̀fè nə pofsə̂ ghənə ə Fe sɔza ghàyn. Ə̀ nyi Fezhə̀ ə Fe nə̂ nə zɨnə mə kyayn.

²⁹M pîə nyî kûmə̀ nə Zhə̀fè ə tyə̀yn təm əchûŋə̀ sê ghàyn ə nə̀ nə ghàyn pomə Klâys ə fɨyn fe ètsôs kûmə̀ vəyn.

³⁰Ghàyn paʼsê sê mi kə ghâsènì tsɨynte no àngyə̀s ətəynke. Ə̀ kɨnə mə pa nyi àngyə̀s kɛ ə ghàyn tè fe mə m nô ndò sə shi, ə̀ kɨnə mə nyi kəynke ə ghâsènì pa tsɨ̂yntə̀ nô zôyn.