Read Mmen Filìpây 2 Bible Online

Filìpây 2 - Mmen bible

Filìpây 2

¹Kə ghàyn nyì sə afɨa àmɔ̀ʼ è Klâys, nə ghàyn ə tɛ ə Sezuʼ, kɔ̂ŋ ə Vəynze e fo ghàyn è təm ə zɨtəghe. Ghàyn e nyi fɨake amɔ̀ʼ ghâyn ghə̀ Zuʼse Ŋwaʼase, ghàyn e kyi ə̀təm ə chûŋə̀, tyə̂nə̀ èkosê esəynze sê ngɨŋ saynse.

²Ghàyn e nə̂ ə̀ghɛ kè èkwâʼtèzè emɔ̀ʼ, kɔ̂ŋə̀ sèngɨŋ saynse, fɨaʼà sə eghɛ èmɔ̀ʼ, kyi ke èkwaʼtè èmɔ̀ʼ kə saŋnê zɨmze ə nyi mə zə lwiyn kwəyn.

³Kə ghàyn ə nə ghɛghe kwaʼtə̀ kə sèngɨŋ saynse. Kə ghàyn nə nəyn èghɛ se tyə̀yn eghaŋsê ewìynze, pîza ghàyn nji ngɨŋ saynse əchi ə ndəm nə ghɨ mɔ̀ʼɔ nyiə kɔʼnə̂ tsɛ̂ ghàyn.

⁴Kə wùə sê ghàyn ə naynə kə sê ghɛ zɛ ə ze kaʼa ə ze pəyn èchùŋ sê vəyn, pîza è ve pɨlə naynə̂ se ghɛ zɛ ə ze kaʼa ə ze pəyn èchùŋ se ghɨə mɔ̀ʼɔghe.

⁵Ghàyn e kyi tsɨnè ə̀ Klâys Njisə̀s.

⁶È tè nyì ke kə Zhə̀fè nyi, pîza ə tàʼa njìə kɔʼsê ə ngɨŋə̂ Vəyn se mɔ̀msè sə nyi èghɨ yî Zhə̀fè.

⁷È və tə pɨl nəyn ngɨŋə̂ Vəyn sə va nâʼà eghɛ zhîze, È və njìə eluʼ ə wûə èfɨ̀aʼave, Ə pîə kə nâʼà Vəyn kə wùə m̀sɔ̀ŋ.

⁸È və tə njì wiyn ə wûə m̀sɔ̀ŋve, ə tsosə̂ ngɨŋə̂ Vəyn əchi, ə pomə̂ se kwu. È və tə pomə pî se kwu, ekwu awâmnèzè.

⁹Zama, Zhə̀fè ə fo Vəyn è luʼve, ve ə nə̀ nə È və kɔʼɔ ndûə elùʼ engaŋtəve, ə fo Vəyn è zəze ze tsɛ̂ nâʼàpi èzə èkè.

¹⁰Zhə̀fè tè nəyn zɨnə mə kə nâʼàpî àshîŋə̀ àkè ə tɔŋte zə ə Njisə̀s nə zɨ̂yn, nâʼàpî àkè kɛ ke nyi, kɨ̀sə ke nyi ekwùtwəyn kɨ̀sə ke nyi ə chi kɨ̀sə ke nyi nâʼàpî etyə̂ àchi ə ngwûʼə̂ ə chi ngɨmnə̂ Njisə̀s,

¹¹ə nâʼàpî ndè pi ə ndayn nə Njisə̀s Klâys nyi Pɛ̂pɛ, È pîə nyi, pomsê ətəynze e ndûə sê Zhə̀fè, ə̀ nyi pɨ̀a.

¹²Ghɔnyì ghɨmghe kɔ̀ŋghè, ghàyn tè nyiə zɨə èghɛ zɛ ə m tè pìə kə m tè nyì ghâsènì. Pi zôyn kə m va ə ghàyn ə ngwùŋ, e nyîə ngəsə̂ tsɔ̂fə̀ nə ghàyn nəyn fɨ̂aʼ zɛ m tè pi nə ghàyn nəyn. Ghàyn e kyi èfâyn ə ghàyn ə fètəyn, tsosə̂ sèngɨŋ saynse əchi ə Və shi. Ghàyn momse nâʼà ètyaʼke se nə̀yn efɨaʼ zɛ ə Zhə̀fè kyiŋə nə ghàyn nəyn kə sɔza zɛ ə ghàyn nyi mə ə kyî ə nyi mə ze ə lwiyn kwəyn.

¹³Kûmə̀ nə ə̀ nyi Fezhə̀, ə Fe fɨaʼà ə ghàyn ə fètəyn, tsâmtə̀ ghàyn nə ghàyn ə kɔŋə̀ se nə̀yn, nyi se kaʼa nəyn fɨ̂aʼ zɛ ə ze tsɔ̂fə̀ sê Vəyn.

¹⁴Ghàyn e nə̂ nâʼàpî èghɛ èkè mə ghàyn shwinə̂ va, saʼnə̂ va.

¹⁵Kə wùə ə vayn kàʼa è pi nə ghàyn ə nə̀yn pofsê ghɛze, kɨ̀sə ghàyn kyi ndô ləʼke; kûmə̀ nə ghàyn nyi əghɔyn ə Fezhə̀ ə Ŋwaʼa ghɛ ghe ndamə ə mbi əfètəyn ə̀ghɨ̀ epi ghɛ ə ghe kɔ̂ŋə̀ sə̂ nə̂ ndûə kə pi shîŋə̀ tekɨ̂m. Ghàyn nyi ə ghənə əfètəyn ə mbi kə mlî mɛ m̀ panə.

¹⁶Ghàyn fɛte kyî tom èchùŋ nə zɨ̂yn ə è fo ndame nyî, kə shîŋə̀ kɛ ə Klâys tə kɛsə pə̂ ətəyn, m mə nyi kàʼa m ghaŋse wiynve nə m tè nyɨŋə chîəva nyɨŋ nə zɨ̂nə̀ mə sə ndò, è kɨsè nə fɨ̂aʼ zɨme tè vachi səndô.

¹⁷Pîza, ə zhwi pî mi zôyn, ə ndə̂m mɨ̂mè sɨsə kə efo sê Zhə̀fè, kèpî kə ndom vɛ ə ghàyn nyi mə ə kɔʼsê Zhə̀fè ətəyn səmɔʼ nyi efo sê Zhə̀fè. Təm ghɨmə nyîə saŋnə̂, m saŋnə̂ kəpî se ghàyn.

¹⁸Ghàyn e pɔŋɔ saŋnə̂ kəpi kə mi.

¹⁹Ə ze fə nyi kə Pɛ̂pɛ kyiŋə, m mə kwaʼtə̀ se tomə pə Timotì nə è pəyn môtè ghàyn, ə è kɛse pəyn tsayn èndom vɛ ə ghàyn nyì ətəyn se mi kə ze nəyn m mə saŋnə̂.

²⁰M kyi va wùə vîvè ə̀ tsɛ̂ kə va Timotì vɛ ə è lote kyi èkɔ̂ŋ è kwaʼtèzè sè ghàyn.

²¹Ghɨə mɔ̀ʼɔghe əkɨ̂m kwàʼtə̀ kə sê ngɨŋ sə ghənə̂sè, ə̀ nyi ə̀ghɛ kyi va ghɛ zhîze se nə̀yn èfɨaʼ ə Njisə̀s Klâyszè.

²²Ghàyn ngɨŋ saynse əkɨ̂m ke ndô kə Timotì va nyi mə è və chwìtè nə zhi nyîə fɨaʼà tsɔ̂fsə̀. È nə̀ èfɨaʼ ə ndaʼa nə tom èchùŋ kè kə vayn nə̂ fɨaʼà yî pɨ̀a.

²³M kwàʼtə̀ se tom ə vəyn sê ghàyn nâʼàpî ashìŋə̀ àkè kɛ m fe ndom vɛ ə ghɛghe nyi ətəyn fayn sê mi.

²⁴M samsə̂ se Pɛ̂pɛ nə mi è ngɨŋ zɨ̂mè nə̀ kwuʼtə̀ pə̂ fe ndò ghàyn.

²⁵Mə fe nə e tsɔ̂fə̀ kəpi nə m kɛse tiynsê ànyìə ghâsènì Èpàfàlonditùs sê ghàyn. Ghâsè vəyn fɨ̂aʼà əmɔʼ, fɨnə nô kəpî ə̀ghɨ ghɛ ə ghe tâsə̀ nə kə tom èchùŋ zham. Ə̀ nyi ndùətom vâynvè kə ghàyn tè tiynse nə è pəyn tsâmtè mi e fɨ̂aʼ nə zɨ̂yn.

²⁶È kɔ̂ŋɔ̀ nâʼà sə ŋaŋ se pə fe ghàyn, saŋnə̂ va nâʼà səkɔs kûmə̀ nə ghàyn se nyi mə ghàyn ə tə zɨ nə è tè zafə ndô.

²⁷È və tə zaf nâʼà sə ŋaŋ ə ndɛtə̂ kə nyiə se kwu; pîza, Zhə̀fè ə kosə èsəyn se vəyn ə kosə kəpi sê mi, ə̀ va za mə mə tə kyî kwəynsê kyə̀ynkè etùə kyîke.

²⁸Ə̀ za nyi eghɛ zɛ ə ze nə̂yn, m fɨnə luŋə nâʼà se kɛsə tiynsə̂ vəyn sê ghàyn kûmə̀ nə m ke nə ghàyn nyîə kɔ̂ŋɔ̀ se fe vəyn. Ə ghàyn fe vəyn ə saŋnə̂, ə mə fɨyn kyi va fɨmsê zhîze kûmə̀ ghàyn.

²⁹Ghàyn fi ke nâʼà vəyn è saŋnêzè kûmə̀ nə è nyi ànyì epomə̂ kè kə ghàyn nyi. Ghàyn e ngɨmnə̂ kəpî ə̀ghɨ kə vəyn.

³⁰Ghâsènì kyi sə̂ kɔʼsə̂ vəyn kûmə̀ nə è və tə fo ngɨŋ ə̀ vəyn èkɨ̂m se fɨ̂aʼ se Klâys ə ndɛtə̂ se kwu. È və tə nə̀yn ghɛghe mə è tè kyi va se nə̀yn, se tsàmtə mi se nə̀yn efɨaʼ zɛ ə ghàyn tè vayn kàʼa nəyn.