Read Mmen Filìpây 4 Bible Online

Filìpây 4 - Mmen bible

Filìpây 4

¹M pìə sê ghàyn ə ghɔnyìə ghɨmə ghe kɔ̀ŋə̀ nə, ghàyn e tɛ ə ghàyn epomə̂ sê Pɛ̂pɛ. M nyîə kɔ̂ŋə̀ ghàyn, lotə̂ kɔ̂ŋə̀ kə nâʼà se fe ghàyn kûmə̀ nə ghàyn nyi esaŋnê zɨmze, è mâʼtè zɛ m kyi ə mì efɨ̀aʼ.

²Èyondìa è Sìntîs, m chyatə̂ nə ghàyn ə nyi sə eghɛ èmɔ̀ʼ mə ə zɔ̂ va kə ghɔnyì ghe ə Pɛ̂pɛ.

³M wamnə̀ kəpî sè ghò soyn vɨm vɛ ə ghasè vəyn fɨaʼà əmɔʼ, m kyiŋə nə ò tsamte zəyn ghɨ̀nə ə ghənə ə nyi sə eghɛ èmɔ̀ʼ mə ə zɔ̂ va. Zəyn nə ghɨnə mə əpɛ̀, è Klimə̀yn, è ghɨ fɨ̀aʼa ə mɔ̀ʼɔghe tè nyi ə mì etipì. Ghasè ghənə ə fɨ̂aʼ nâʼà sə atyaʼ se ndàʼa ə tom èchùŋ. Zə ə ghənə̂ghè əkɨ̂m nyi ə ŋwàʼlè èndam.

⁴Ghàyn e saŋnə̂ shiŋə̀ tekɨ̂m kûmə̀ nə ghàyn nyi əghɨ ə Pɛ̂pɛghe. M pa piə kwəynsə̂ kə ndò nə ghàyn ə saŋnə̂.

⁵Ghàyn chwite ə ghàyn endam nə ghàyn kyi va fɨmsêzè ghâyn ghə̀ ghɨ ghəkɨ̂m. Pɛ̂pɛ ə tɨmsê se pə̀yn.

⁶Kə ghàyn fɨyn kayn mbi kûmə̀ èghɛ. Ghàyn e pɨlə tsə̂mə̀ kə ndò, ndɔnə nâʼàpî ghè sê Zhə̀fè kə ghàyn kyiŋə. Ə ghàyn tsə̀mə̀, ghàyn e fo àzɔ̀ŋnè sê Vəyn.

⁷Ə ghàyn nə̂ nyi, ə Zhə̀fè nəyn ə ghàyn ə nyi è pɔ̂ynè, ə pɔ̂ynè zɛ è ngaŋtə tsɛ̂ ndom vɛ ə wùə m̀sɔ̀ŋ kàʼa è kwaʼte ətəyn. Pɔ̂ynè tə tsâmtə̀ ghàyn nə ghàyn ə kyi va fɨmsêzè kûmə̀ nə ghàyn nyi əghɨ ə Njisə̀s Klâysghè.

⁸Ghɛ ekwuŋsəze ə ghɔnyì ghɨmə nyi nə, ghàyn e kwaʼtə̀ ə̀ghɛ ghɨnə shîŋə̀ tekɨ̂m. Ghàyn e kwaʼtə̀ nâʼàpî èghɛ èkè zɛ ə ze nyi səmɔʼ, nâʼàpî eghɛ èkè zɛ ə̀ nyi eghɛ echuŋzè, nâʼàpî èghɛ èkè zɛ ə ze nyi chichi, nâʼàpi èghɛ èkè zɛ ə ze kyi va ləʼke, nâʼàpi èghɛ zɛ ə ghɨə kyi sə̂ kɔ̂ŋə̀, è nâʼàpî èghɛ èkè zɛ ə ghàyn fe nə ze tsɔ̂fə̀ ndò se ghàyn. Ghàyn e kwaʼtə̀ ə̀ghɛ ghɛ ə ghe ngəsə̂ tsɔ̂fə̀, ghɨghe e pîə nə ghe nyiə tsɔ̂fə̀. Ə̀ nyi ə kyì əghɛ ghɨnə̀ ə ghàyn kyi sə̂ ndə̂mə̀ ə ghàyn ə fètə̂ ə̀təm nâʼà shîŋə̀ tekɨ̂m.

⁹Ghàyn e nə̂ ə̀ghɛ ghɛ ə ghàyn tè laynə sê mi, fɨnə nə̂ ghɛ ə ghàyn tè zɨə kə m pîə è kɨsè ghɛ ə ghàyn tè fe kə m nə̂. Ə ghàyn nə̂ nyi, ə Zhə̀ fɛ ə fe fo pɔ̂ynè, ə Fə nyi ghâyn ghənə.

¹⁰Kə m nyi ə Pɛ̂pɛ apàs, e nə̂ mi m saŋnə̂ nâʼà sə ŋaŋ. Kûmə̀ nə ghàyn ə tyə̀yn nə ghàyn nyiə tɔ̂ʼnə̀ se mi. M ke ndò nə ghàyn nyiə kyi èkwaʼtè sə tɔ̂ʼnə̀ è shîŋə̀ tèkɨ̂m, pîza ghàyn paʼà kyi zhəm ə təynke se nə̀yn zamə.

¹¹M pìə va ghɛ nə zɨnə zôyn kə m laʼà àfɨa kûmə̀ nə mə zaʼle sə̂ ndamə, mə ə m nyiə kɔŋə̀ fèfɨ̂atə̀ fə afɨa fɛ m kyi.

¹²M ke ndô kə wùə nə è nyi ezhoghɛ è kyi va fɨa kɛ ə è làʼà, fɨyn ke kə wùə nyi ezhoghɛ è kyi fɨave kɨ̂m vɛ ə è kyiŋə. Mə kɛtê fiə nâʼàpî èghɛ èkè zɛ ə ze pə̂yn se mi. Mə kɛtê sə kyi èfɨazhiə etsɨəve se zhi, ə kɛtə̂ kəpî sə kyi va kyîke se zhi. Mə kɛtê se kyiə tsɨə tsɛ pì kə m kyiŋə, ə kɛtə̂ kəpî sə nyi za mə m kyi va fɨa kɛ m kyiŋə.

¹³M kaʼa m tsɛ tɔynê nâʼàpî mtsəfle m̀kè tɔynə̂ atyaʼ kɛ ə Klâys fo sê mi.

¹⁴Pîza, e tè nyiə tsɔ̂fə̀ kə ghàyn tè tsàmte mi ə mì əfètəyn ètsòs.

¹⁵Ghàyn ghɨ ə Filìpâyghè, ghàyn nyiə fɛte ke nə shîŋə̀ kɛ m tè zhə̀te se ndàʼa tom èchùŋ mə m ndo pə̂yn ə Masèndonyà, ə̀ tè nyi ghàyn ghɨə Fezhə̀ ə shighe se tsàmtə mi. Ə̀ nyeʼe nyi ke ghàyn kə tè tsàmte mi.

¹⁶Ə̀ tè nyi pî kə m nyi ə Tèsàlonikà, ghàyn etiynsə̂ ètsâmtè sê mi ə teshìŋə̀ teshìŋə̀.

¹⁷M pîə va nyi kûmə̀ nə m kyiŋə nə ghàyn tom mâʼte vîve sê mi. M pɨlə kyiŋə se fe kə Zhə̀fè pɔsə ghàyn fɨnə pɔsə̂ kwəynsə̂.

¹⁸M pîə sê ghàyn zôyn nə mə kotê nâʼà fɨave ekɨ̂m vɛ ə ghàyn tè tom, ə kyiə kwəynsə̂ pi və mɔ̀ʼɔve. Èpàfàlonditùs ə tə pə̀yn nâʼà pî è ghè vɛ ə ghàyn tè fo nə è pəyn fo sê mi. Fɨa nə vɨ̂yn nyi kə emaʼte, è foze kə fo sê Zhə̀fè, ve lɨ̂mtə̀ fɔmə kə nyî, mə Fə fi, ve tsɔ̀fə sê vəyn.

¹⁹Zhə̀ fɨmfe nə̀ fo nâʼàpî àkè kɛ ə ghàyn kyiŋə, ə vəyn ə fètə̂ èghaʼ etsɨə zɛ ə È kyi tɔynə̂ ə Njisə̀s Klâys.

²⁰Ə pomsêzè ə nyi se Zhə̀fè ə ghasènìfe, pɨ̀a ghâsènì sə teshìŋə̀ tèkɨ̂m, ə zə nyi ke zamə.

²¹Ghàyn tɔŋte ghɨ ə Fezhə̀ ghɛ ə ghe pomə sê Klâys Njisə̀s fɛ nâʼà ə̀kɨ̂m. Ghɔnyì ə ghâsènì ghɛ ə ghasè ghənə nyi fâyn əmɔʼ pi nə m tɔŋte sê ghàyn.

²²Ghɨə pomə əmɔ̀ʼɔ ghɛ ə ghe nyi fâyn pi nə m pɔŋ tɔŋte sê ghàyn nâʼà àchûŋ, è sas ə ndɛ Kaysàzè.

²³Ə fùʼ ə Pɛ̂pɛ ke Njisə̀s Klâys ə nyi sê ghàyn əkɨ̂m.