Read Mmen Kòlosè 2 Bible Online

Kòlosè 2 - Mmen bible

Kòlosè 2

¹Ghàyn za m tsayn se ghàyn ndom vɛ m nyi mə mə fɨ̂aʼ ətəyn sə ŋaŋ sê ghàyn è ghɨə Làndisyà è kə m fɨ̂aʼ nâʼà etyaʼke sê ghɨ ghɛ ə nyi ndɔ̀ʼɔ tyəm fe mi.

²M nə̂ nyiə mə se fo ghənə è təmghe, kə kɔ̂ŋ zɛ ə ze nyi ə ghàyn ə fètəyn, ə ze nəyn ə ghàyn ə nyi kə wùə èmɔ̀ʼ. M kyiŋə nə ghâynghə̀ ghənə əkɨ̂m ndəm təm ghaynghe əkɨ̂m, kə ghɨ ghɛ ə ghe ke ghɛ ə Fezhə̀ghè mə ghɨə tè paʼà kê. Ghɛ nə zɛ mə nyi Klâys è ngɨŋə̂ vəyn.

³Ə̀ nyi Klâys ə è kàʼa è nəyn ə ghàyn fɛte kê ə̀ghɛ ə Fezhə̀ghè. Ghɛ nə ghɛ mə nyîə ngəs kyi m̀kɔʼnè.

⁴M tsâ se ghàyn nyî kə wùə ə va se lesê ə ghàyn è wâmnè efɔməze, ə ghàyn ə kwaʼtə̀ nə ghɛ zɛ ə è tsà sê ghàyn nyì achûŋ.

⁵Pî kə m va ə ghàyn ə fètəyn ə njà èwìyn, m pa nyi ke ndô ghâsènì ə sezuʼ. Pi kə m va ghâsènì, m saŋnə̂ ndò kûmə̀ nə kyî epomə̂ zaynze sê Klâys nyiə tɛ.

⁶Kə ghàyn nyi mə ghàyn ə tə pomə̂ Klâys Njisə̀s kə Pɛ̂pɛ vâyn, ghàyn e pa nə̂ kə ə̀ghɛ kə è kyiŋə.

⁷Pomə̂ zɛ ə ghàyn pomə ghɛ zɛ ə tyə̀ynsè sɨ̂nə̀ zaʼle ghàyn nyì səmɔʼ. Ghàyn e fo àzɔ̀ŋnè se Zhə̀fè shîŋə̀ tèkɨ̂m əghɛ ə̀kɨ̂m.

⁸Ghàyn e tɔ̂ʼnə̀ se fe nə kə wùə tə lesə̂ ghàyn se zaʼlə ghàyn è ghɛ ə akaŋghe. Ghɛ zɛ ə ghənə zaʼlə ghàyn ətəyn nyi ezaʼlê mə ze ndo pə̂yn sê pɨ̀a ə pɨa ə ghənə̂ghè, mə ze chûmtə̀ èlwɔ̂ŋ ə ghɛ mbighe. Zaʼlê nə zɛ nyi zɛ ə ze ndô pə̂ se ghɨ msɔ̀ŋghe, ə̀ vachi se Klâys.

⁹Kə ghàyn pomə nə tyə̀ynsè sə akaŋ nə sɛ mə lese ghàyn kûmə̀ nə tyaʼke è tsɨ̂nè ə̀ Fèzhə̀zè nyì ndô əfètəyn èwìyn ə wûə m̀sɔ̀ŋ ə Klaysvè.

¹⁰Nyiəmə, ghàyn ə kyî ndam efɨ̂plèzè kûmə̀ nə ghâyn ghə̀ Klâys nyi əmɔʼ, ə nyi vəyn vɛ ə twɔʼve ekɨ̂m, è tuə tendaʼàvè ekɨ̂m nyi ə vəyn etyə̀.

¹¹Kə ghàyn nyì sə afɨa àmɔ̀ʼ ghâyn ghə̀ Klâys, Klâys ə se nam ghaynghe. Se ə nam nə zɨ̂nə̀ vachi zɛ ə ghɨ msɔ̀ŋghe se wùə. Ə̀ nyi Klâys ə è se nam ghaynghe ə Sezuʼ. È və njì tsɨsè tsɨnè zâyn zə èpi.

¹²Kə tè fo mômè se ghàyn, e tè nyi kəpiə ghàyn ə kwu, ə pfɨ̀mə̀ ghàyn, Zhə̀fè ə zômsə̀ ghàyn è Klâys. Zɨnə tè kyàyn se ghàyn kûmə̀ nə, ghàyn ə tə pomə̂ nə tyaʼa Fezhə̀ kɛ ə ke tè zòmse Klâys tə zômsə̀ kəpi ndò ghàyn.

¹³Ə̀ tè nyì sə shi, ghàyn e nyi kəpiə ghàyn kwu ndô kûmə̀ èlwɔ̂ŋ ə Fezhə̀ vɛ ə ghàyn tè kyim. Ə̀ tè nyì fumə ashìŋə̀ ndɔ̀ʼɔ Klâys nyiəm nji tsɨsè tsɨnè èpi ə ghàyn ewìyn. Pîza Zhə̀fè ə fo ghàyn èndam efeze zôyn kə è zòmsè ghâsènì, ghasènìghə̀ Klâys. È və lɛ̀sè fo pi sə ghâsènì sekɨ̂m.

¹⁴È nyi kəpiə è və zə̀s tsɨsè pi sə ghâsènì sekɨ̂m elùʼ vɛ ə è tè nyaʼ. E tyə̂nə̀ nə pi ə̀təyn fɨyn va. Zhə̀fè ə payntê pi ə̀təyn awâmnè, kè kə è paynte Klâys awâmnè, è ve kwu.

¹⁵Zhə̀fè ə tə tɛ tsɛ twɔʼve, è kɨsè tu ə te ndaʼàvè ə mbi. Kwu ə vəynze awâmnè ə tə nə̀yn nâʼàpî ndè ə fe nə tyaʼa vəynke ə tɛ tsɛ twɔʼve ekɨ̂m.

¹⁶Nyiəmə, kə ghàyn pomə nə ghɨ tsayn sê ghàyn nə ghàyn ə nə̀yn tsas kûmə̀ nə ghàyn zhi afɨa kyîke kɨ̀sə se mɨ mlɨ̂ mîmè, pi kûmə̀ nə ghàyn səʼ epɨyn zhîze, pi nə ghàyn səʼ epɨyn zɛ ə səʼə echo njɔŋ, pi èpɨyn etuʼ endaʼze.

¹⁷Nâʼà èlwɔ̂ŋ ətəynve ekɨ̂m nyì ke enyɨ̂ŋsè vɛ ə ve tyə̂nə̀ ghɛ ə chûŋ ghɛ ə Zhə̀fè tè kyi se tom, ə̀ nyi Klâys ə è lwiynse ghɛ ətəynghe.

¹⁸Kə ghàyn za nə wùə ə pîə sê ghàyn nə ghàyn kyi sə̂ njiə sèngɨŋ saynse əchi. Kə ghàyn za kepî nə wùə tsayn se ghàyn nə ghàyn kyi sə̂ ngɨmnə̂ sètsì kə è ngɨmnə. Ə ghàyn nə̀yn zamə ə njise mâʼtè vayn vɛ ə Zhə̀fè pì nə è nə̀ fo sê ghàyn. Nâʼàpî ndè vɛ ə è zaʼlə zamə, è pìə nə zhi fe ətelaynəlayn. Kyì ə wûə nə vɛ mə ghaŋsə̂ èwiyn səndô, è ghɛ ə pi ghɛ ə ghe fɨə ə vəyn ətəm, mə è kyi va ghɛ zhîze se pì.

¹⁹Kyì ə wûə nə vɛ fɨnə pomə va se Klâys mə ə̀ nyi Klâys vɛ ə È nyi atu se ghɨ ghɛ ə pomə. Kè kə wiynve kɨm nyi etyə̀ àtyaʼ atuke, ə̀ nyì kepî zamə kə ghɨghe əkɨ̂m ghɛ ə pomə Klâys nyi ə vəyn etyə̂ àtyaʼ kə ghənə ə nyi kə wùə èmɔ̀ʼ. Kè kə ghaŋmè kokyiə zûŋtè ə wùə ewìyn kə è və nyi wùə èmɔ̀ʼ, ə̀ nyì kepî zamə kə Klâys tsɨ̀yntə̀ ghɨ ghɛ ə ghe pomə sê vəyn, kə ghe ə nyi wùə èmɔ̀ʼ ə vəyn tyə̀.

²⁰E nyi zôyn kəpi ghàyn ə kwu paʼse ghâynghə̀ Klâys. Nyiəmə lwɔ̂ŋ ə mbive fɨyn kyi va tyaʼke ə ghàyn ətu. Ə̀ nəyn ghe nə ghàyn ə pa chûmtə̀ èlwɔ̂ŋ nə vɛ mə kəpiə mbi fɨyn kyi ndò tyaʼke ə ghàyn ətuə?

²¹Tyə̀ynsè sə alàŋ nə sɛ mə pîə nə, “Kə ghàyn nəyn zɨ̂yn, kə ghàyn mɔm zɨ èfɨazhiə vîə, kə ghàyn kom fɨa kyîə.”

²²Lwɔ̂ŋ nə vɨ̀nə èkɨ̂m wàmnə̀ kûmə̀ kə èfɨa, ve nyi se pə̀yn sə efɨa sə ndô shîŋə̀ kɛ ə nyi mə ə nə̀yn fɨ̂aʼzè ətəyn. Lwɔ̂ŋ nə vɛ mə è zaʼlêtè nyi əghɛ mə ə̀ fɛte əghɨ è ghoghe.

²³Lwɔ̂ŋ nə vɨnə mə tyə̂nə̀ kəpi nə ve nyiə kyi ètɔf eghaʼâzè nyiə nyi əfètə̂ ə̀təyn kûmə̀ nə ve zaʼlə̂ ə̀ghɨ nə, ghɨghe è ngɨŋə̂ ghənə kyi sə̂ kyi ə̀təm sə nə̂ ə̀ghɛ ə tɛghe, se tyə̀yn nə ghənə nyîə ndɨŋə chûmtə̀ Fèzhə̀. Lwɔ̂ŋ ətəynve zaʼlə̂ ə̀ghɨ nə ə ghənə njî ngɨŋ sə ghənə̂sè əchi, ə ghənə ndəm ngɨŋ sə ghənə̂sè əfètə̂ ngəʼ ètsɨ̀ə. Pîza əghɨghe tè chùmtə pîə èlwɔ̂ŋ ətəynve kə ghe, lwɔ̂ŋ ətəynve tè va se tsàmtə ghənə se nə̀yn nə kə ghənə ə kyi èkwaʼtè epize.