Read Mmen 2 Tèsàlonikà 1 Bible Online

2 Tèsàlonikà 1 - Mmen bible

2 Tèsàlonikà 1

¹Ə̀ nyâʼà mi Pɔ̂l ghasè Silàs è Timotì ŋwàʼlè zɨ̀yn sê ghàyn. Ghɨ ə pomə ghɛ ə ghe nyi ə Tèsàlonikà ə nyi sə afɨa amɔ̀ʼ è Zhə̀fè pɨ̀a ghâsènì, è Pɛ̂pɛ Njisə̀s Klâys.

²Ə Zhə̀fè, ə Pɨ̀a yî Pɛ̂pɛ Njisə̀s Klâys fo ghàyn è fùʼkè è pɔ̂ynè.

³Ghàs kyi sə̂ fo àzɔ̀ŋnè sê Zhə̀fè shîŋə̀ tekɨ̂m kûmə̀ ghàyn ə ghɔnyìə. Ə̀ nyì ke nâʼà èghɛ echuŋzè kə ghàs nə̂ nyi kûmə̀ nə kyî epomə̂ zaynze sê Klâys ndəmə̂ ndûə kə èshike, kɔ̂ŋ zaynze sê ngɨŋ saynse e fɨnə ndəmə̂ ndûə kə èshike.

⁴Ə̀ za nyi eghɛ zɛ ə ghàs pìə wàmnə̀ kûmə̀ ghàyn sê ghɨ ə pomə mɔ̀ʼɔghe, ə ghɨə Fezhə̀ghè ə fètəyn, ghàs e tyalə. Ghàs nə̀ nyî kûmə̀ nə ghàs nyîə pfɨ̂nə̀ àngàŋtè endom vɛ ə ghàyn kolə təmghe ə ghàyn epomə̂, nâʼàpî kə ghɨghe tsə̂fsə̀ ghàyn, ghàyn e zɨə àpi.

⁵Kol ə təm zayn nə zɨ̂nə̀ nyiə tyə̂nə̀ ə ndayn nə Zhə̀fè nyîə saʼa ə̀ghɨ chichi, nyi se nə̀yn nə ghàyn ə kwəynə̂ sə̂ nyi elùʼ efɔ̂yn ə Fezhə̀ fɛ ə ghàyn fe tsôsvè kûmə̀ vəynve.

⁶Zhə̀fè tə fo ètsôs sê ghɨ ghɛ ə ghe tè fo ngəʼ sê ghàyn kûmə̀ nə fe nə̂ kə èghɛ zɛ ə ze nyi chichi

⁷Fe tə nə̂, ə ghàyn ghɛ ə ghàyn fe tsôsvè zôyn ə kyi zɨ̂tèkè, ə ghàs kyî kəpî. Zhə̀fè tə nə̂ èghɛ nə zɨ̂nə̀ ashìŋə̀ kɛ Pɛ̂pɛ Njisə̀s chwìtè ngɨŋə̂ vəyn, tso pə̂ ekwùtwəyn yî tsì sə vəyn sə atyaʼse.

⁸Ə̀ tə pə̂ nyi kə è tso pə̂ yî tsì sə vəyn nə sɛ, ə wûsmə pɛ̂, ə è fɨ̂aʼ è wus nə vɨnə̀ se fo ètsôs sê ghɨ ghɛ ə ghənə tè tə Zhə̀fè, nə̂ va ghɛ zɛ ə tom èchùŋ kûmə̀ Pɛ̂pɛ ə̀ ghâsènì Njisə̀s Klâys pìə.

⁹Zhə̀fè tə tsə̀fsə̀ ghənə ə è pofse ghənə è pofsê zɛ ə ze tə mîə va, ə ghənə va sə̂ nyi elùʼ vɛ ə Pɛ̂pɛ nyi ətəyn, ə tàʼa zà nə ghənə mom zɨ kàyntè àtyaʼ ə vəynke.

¹⁰Etuʼ vɛ ə è tə pə̂, ə è fi pomsêzè sê ghɨə vəynghe è kɔʼsêzè sê ghɨə poməghe əkɨ̂m. Nâʼà ghàyn tə nə̂ ə pɔŋ nyi əfètəyn ə̀ ghɨ̀ nə ghɨ̂yn kûmə̀ nə ghàyn ə pomə ghɛ ghɛ ə ghàs tè tsâ sê ghàyn.

¹¹Ə̀ za nyi eghɛ zɛ ə ghàs tsə̂mə̀ sê ghàyn shîŋə̀ tekɨ̂m nə Zhə̀fè ə ghasènìfe nəyn ə ghàyn ə ndamə èndam zɛ ə ze kwəynə mə za nyi zɛ ə fe tɔŋɔ ghàyn nə ghàyn ə ndamə. Ghàs tsə̂mə̀ nə fe fo tyaʼa ə ghàyn ə nə̂ ə̀ghɛ əchûŋ ghɛ ə ghàyn kɔ̂ŋɔ̀ sə̂ nə̂, ə fɨyn nəyn mɨ̂sè ə̀ghɛ ghɛ ə kyî epomə̂ zaynze ə Njisə̀s tyə̀nə̀ nə ghàyn ə nə̂.

¹²Ə ghàyn nə̀yn nyî, ə ghàyn ə fo èpomsê sê zə ə Pɛ̂pɛ ə̀ ghâsènì Njisə̀s, ə ghàyn è ngɨŋ saynse pɔŋ fi epomsê tɔynə̂ afùʼ ə Fezhə̀ fə ghasènìfe è Pɛ̂pɛ Njisə̀s Klâys.