Read Mmen 2 Tèsàlonikà 3 Bible Online

2 Tèsàlonikà 3 - Mmen bible

2 Tèsàlonikà 3

¹Se kwùŋsè ə ghɔnyìə ghasə, ghàs pìə nə ghàyn ə tsə̂mə̀ sê ghàs kə ghàs nə̀ nə tom èchùŋ ə̀ Pɛ̂pɛ ə zâŋsə̀ zhamə ndûə kə luʼ tekɨ̂m, kə ghɨghe ə fiə zə̂ynzè ekɔʼnezè kèpi kə ze tè nyi ə ghàyn ə fètəyn.

²Ghàyn tsəm kepî nə Zhə̀fè fɨse ghàs ə gho ghɨ ghɛ ə ghe ngɛse kyi ə̀təm ə pighe, kûmə̀ nə ə̀ vachi ə̀ghɨ ə̀kɨ̂m ə ghe pomə.

³Pîza nâʼàpî èghɛ èkè zɛ ə Pɛ̂pɛ pî nə è nə̀ nə̂, è nə̀ kə zamə, è nyi se nə fo ghàyn tyaʼa, ə è kɨŋte ghàyn nə kə Wùə ètəm ə Piə tə tàʼa nə̀yn nə ghàyn nəyn pi.

⁴Ghàs fànə̀ va kûmə̀ nə ghàs ke ndô nə Pɛ̂pɛ nyîə nə̂ nə ghàyn ə nə̂ ə̀ghɛ ghɛ ə ghàs tsà sê ghàyn, mə è nə̀ nə̂ nə ghàyn ə pa zɨə kə ndò ghàs.

⁵Ghàs tsə̂mə̀ nə Pɛ̂pɛ nəyn ə ghàyn fe ndom vɛ ə Zhə̀fè kɔ̀ŋə̀ ghàyn, è kɨsè ndom vɛ ə ghàyn kyi sə̂ kolə ə̀təm ətəyn, kè endom vɛ ə Klâys tè kol.

⁶Ghàs pìə èghɛ ə ghɔnyì mə ghàyn kyi se nə zəynze nə, ezə ə Pɛ̂pɛ ə ghâsènì Njisə̀s Klâys nə, ghàyn fɨl tsə̀m saynse sê ghɨə pomə ghɛ ghe ndamə ndam ezɔləze, ndə̂mə̀ va chwîtè zɛ ə ghàs chwìtə̀ ghənə.

⁷Nâʼà ghàyn sə ghàyn ə ngɨŋ ke ndô nə ghàyn kyi sə̂ fɨ̂aʼà kə ghàs tè fɨ̂aʼà. Ghàs tè zɔlə va etuʼ vɛ ghàs tè pa nyi ghâsènì.

⁸Ghàs tè paʼà zhi fɨa ə wûəkè ə faŋə se ndàʼ. Ghàs tè pɨlə fɨ̀aʼa nâʼà è tyaʼa, èchwì è kɨsè ètuʼve endom se kyî ekɛ kə ndɔ̀ʼɔ ghàs ə pfɨfə èkɛ se ghàyn se zhɔyn efɨa vɛ ə ghàs kyiŋə.

⁹Ə̀ tè nyì ke nâʼà eluʼ vasve se pì nə ghàyn ndaʼ ghàs efɨ̀aʼ zɛ ə ghàs fɨ̀aʼà, pîza ghàs ə nə̀ zɨnə mə kə ghàyn səyne ə pɔŋɔ fɨ̂aʼà kəpî kə ghàs.

¹⁰Ə̀ tè nyi nâʼà pî kə ghâsènì pa nyi əmɔʼ, ghàs e pîə se ghàyn nə, “Ə̂ tə nâʼàpî ndè nə zhi fɨaʼà va, kə wùə sê ghàyn fo fɨa nə è zhi.”

¹¹Ghàs pìə nyi kûmə̀ nə ghàs ə zɨ nə ghɨ mɔ̀ʼɔ nyi ə ghàyn ə fètəyn, ndamə tèndam tə ezɔləte, nə̂ va ghɛ zhîze se tsàmtə sengɨŋ sə ghənə̂sè, pîza pɨlə njiə tsɛ̂ kə ə ghɨghe əghɛ.

¹²Ghàs pìə sê ghɨ ghɨ̂yn, ghənə e kyi se zɨ eghɛ zɛ ə ghàs pìə, fɨnə fo fɨ̀as se ghənə ezə ə Pɛ̂pɛ Njisə̀s Klâys nə, ghənə kyi sə ndamə èndam zɛ ə ze nyi achûŋ, fɨaʼà kə ghənə nyi kàʼa ndaʼà èfɨa vɛ ə ghənə zhiə.

¹³Sê ghàyn ə ghɔ nyiə, kə ghàyn tə pɔ sə̂ nə̂ ə̀ghɛ ə chûŋghè.

¹⁴Ə wùə kwiynse nə zhi nə̂ va ghɛ zɛ ə ghàs nyàʼ sê ghàyn fâ ŋwàʼlè, ghàyn ə ndə̀mə̀ èshi ə vəyn ewìyn. Kə ghàyn ə nə kɨŋnə ghɛghe ghâyn ghə ghənə kə ghənə ə ghomə̂.

¹⁵Pîza kə ghàyn ə nə ghɛ sê ghənə nyiə kə ghàyn nə̂ sê pàyn zâynzè, ghàyn e pɨlə fo fɨ̀as sê ghənə kè nâʼà kə ghàyn fo sê ghɔnyì ghaynghe.

¹⁶M tsə̂mə̀ nə Pɛ̂pɛ è ngɨŋə̂ vəyn vɛ ə è fo pɔ̂ynè, nə è fo ghàyn pɔ̂ynè, ə è və fo ndûə kə ndò ghàyn pɔ̂ynè, kɨ̀sə ə̀ kyàyn pî ghè. Ə Pɛ̂pɛ ə nyi ghâynghə̀ ghənə əkɨ̂m.

¹⁷Ə̀ nyì ke nâʼà mi Pɔ̂l ə m nyâʼà sê ghàyn è gho kɨmke. Ə̀ vɨnə nyi endom vɛ ə m nyâʼà ŋwàʼlè sɨm sekɨ̂m kə nâʼàpî ndè ə ke nə ŋwàʼlè ə̀təyn ndo pə̂yn sê mi.

¹⁸Ə fùʼ ə Pɛ̂pɛ Njisə̀s Klayskè ə nyi se ghàyn əkɨ̂m.