Read Mmen 1 Timotì 3 Bible Online

1 Timotì 3 - Mmen bible

1 Timotì 3

¹Ghɛ nə zɨ̂nə̀ nyi ke nâʼà səmɔʼ kə ə pìə nə, ə̀ kyiŋə nâʼàpî ndè sə̂ nyi wùə è chisə̂ ə ndɛ̂ Fèzhə̀, ə è və ke nə è kyiŋə èfɨ̂aʼ ze kɔʼnə̂ tsɔ̂fə̀ kə nyî.

²Wùə è chisə ə ndɛ ə̀ Fèzhə̀ kyi sə̂ nyi wùə mə ə chîə ngaynə̂ va vəyn, è kyi sə̂ kyi ke wùzhɔyn emɔ̀ʼ, nə̂ va ghɛghe tsɨ̂ə tsɛ àndiŋ, nyi kàʼa è kyi ngɨŋə̂ vəyn, ngɨmnə̂ ngɨŋ ə vəyn, tɔ̂ʼnə̀ è ghɨ ə motə pə, fɨyn ke sə zaʼlə̂ nâʼà àchûŋ,

³ə̀ kyi sə̂ nyi wùə, mɨə tsɛ̂sə̀ va lɨ̀m, kɔŋə̀ va ngyə̀skè, pîza kolə ə̀təm, nə̂ va ghɛ sə zəʼtə̂ ndô ghɨ, zɔ̂ tsɛ̂sə̀ va, shiə vəynghe fɨə tsɛ̂sə̀ va ekɛ.

⁴Ə̀ kyi sə̂ nyi wùə fɛtə tɔ̂ʼnə̀ è ghɨə vəyn ghə ndɛghe. È kyi sə̂ nyi wùə ghɔ vəynghe ngɨmnə̂ vəyn, fɨnə zɨə se vəyn əghɛ ə̀kɨ̂m.

⁵Ə wùə nyiə se nyi ndɔʼɔ è ke se kyî əghɨ ə və apɨəyn, ə e və ke zàyn se kyiə ndɛ̂ Fèzhə̀ ə?

⁶Ə̀ kyi va sə̂ nyi wùə mə è kwùʼte pomə ndô, ə̀ va za ə è və ghaŋsə èwiyn, ə Zhə̀fè fo tsôsvè sê vəyn kè kə È tè fo sê ndə̂plè.

⁷Ə̀ kyi sə̂ nyi wùə, mə nâʼà ghɨə mɔʼɔ ghɛ ə ghe pa tsɨs ndɔʼɔ pomə naynə̂ vəyn, è ve kɔʼnə̂ kə ghɨə tə tàʼa ghomsə vəyn, ə è pfɨ ə ndə̂plè atam.

⁸Ghɛ nə ghɨynə m pîə nyî ndùə kəpî sê ghɨ ghɛ ə ghe fɨaʼà ə sendɛ sə Fezhə̀sè. Ghənə kyi sə̂ kyi èndam echûŋzè, wâmnə̀ səmɔʼ, mɨə tsɛ̂sə̀ va lɨ̀m, shi ghe fɨə va ekɛ.

⁹Ghənə kyi sə̂ tyəmə kə səmɔʼ zɛ ə tè tyə̀yn paynsê sê ghənə, ə̀ nyi səmɔʼ kûmə̀ èkyî epomə̂zè mə təm ə ghənə̂ghè saʼa va ghənə.

¹⁰Ə kyi se mɔ̀m endam ə ghənə̂zè poməze, mə ghənə tsɛ̂ mɔ̂m ətəynze, ə za ə ghənə ə fɨaʼà ə ndɛ ə̀ Fèzhə̀.

¹¹Zəyn ghɛ ə ghe fɨaʼà ə ndɛ Fèzhə̀ pɔŋ kyi sə̂ kyi èndam e chûŋzè, ndə̀mə̀ va kôghɔ̀ŋ, nə̂ va ghɛghe tsɨə tsɛ̂ àndiŋ, nə̂ nâʼà pîghè kè səmɔʼ.

¹²Nâʼàpî wùə è fɨaʼa èkè ə ndɛ̂ Fèzhə̀ kyi sə̂ kyi ke wùzhɔyn emɔ̀ʼ, fɨnə tɔ̂ʼnə̀ è ghɔ vəynghe è sas ə ndɛ vəynze nâʼà àchûŋ.

¹³Ghɨ fɨaʼaghe ə ndɛ ə̀ Fèzhə̀ ghɛ ə nə̂ fɨ̂aʼ ə ghənə̂zè achûŋ nyiə kyi èzə echûŋzè, fɨyn kyi ə̀təm ə tɛ sə̂ wâmnə̀ ə̀ghɛ kûmə̀ èkyì epomə̂ zɛ ə ghənə kyi sê Klâys Njisə̀s.

¹⁴M nyâʼà ŋwàʼlè zɨnə sê ghò, kyi ke nâʼà èkwâʼtè nə m nə̀ nyɨŋə pə̂ fe ndò ghò,

¹⁵mə ghɛ nə̂yn nə m laynte, ə ŋwàʼlè zɨ̀nə tsamte kə ghàyn ke ndom vɛ ə ghàyn kàʼa ə ghàyn ə ndamə ə ndɛ ə̀ Fèzhə̀, mə za nyi ndɛ ə̀ Fèzhə̀ fɛ ə fe ndamə, ə̀ nyi àtɔ̂ʼ, è chi ə ndɛ kɛ ə ke tɔ̂ʼɔ̀ səmɔʼ.

¹⁶Wùə vîvè vayn kwiynsê nə pomə ə ghasènìze nyîə kyi èghɛ e ndətəze, ze ghaʼa kə nyi: Klâys ə tə pə̀yn sə wûə m̀sɔ̀ŋ, Zuʼse Ŋwaʼase ə tyə̀nə̀ nə è nyi va Fèzhə̀, tsìsè ə fe vəyn, ə tə ndàʼà tom kûmə̀ vəyn ə tèndâʼà tèkɨ̂m, ghɨghe ə pomə se vəyn ə telùʼ tekɨ̂m ə mbi, Zhə̀fè ə njìə kɔʼsə̂ vəyn ekwùtwəyn.