Read Mmen 1 Timotì 4 Bible Online

1 Timotì 4 - Mmen bible

1 Timotì 4

¹Zuʼse Ŋwaʼase tyə̂nə̀ paynsə̂ nə, ə̀ tə nə̂ ə nyi ə mtuʼ me kwùŋsə̂m, ə ghɨ mɔ̀ʼɔ kwiynse ə tàʼa fɨnə pomə̂ ezaʼlê zɛ ə ze nyi səmɔʼ kûmə̀ Klâys Njisə̀s, ghənə tə pɨlə zɨə se zuʼsə akaŋse, ə ghənə ə nə̂ ə̀ghɛ ghɛ ə pamə̂ tə satàyntè fo.

²Kyì te zaʼlê nə tɨ̂yn nyi mə ə̀ zaʼlə̂ setyə̀ynsè se kaŋkaŋə nəse, ghənə e fɨnə zɨə va kə təm ə ghənə̂ghè saʼa ghənə, kèpi endom vɛ ə wusve kaʼa ə və nyɔʼə̀ wùə è zɨə va.

³Ghɨ nə ghɨ̂yn zaʼlə̂ ə̀ghɨ nə kə ghənə ə malə̂, fɨnə pìə nə ghənə pamə tèkyì te fɨazhiə tîte. Pîza mə Zhə̀fè fɛte efɨa ezhiə nə vɨ̂yn nə ghɨ ə pomə ghɛ ə nyi mə ə kê səmɔʼ ə zhiə mə ə fo zɔ̀ŋnèkè sê Zhə̀fè.

⁴Nâʼàpî ghè vɛ ə Zhə̀fè fɛte nyi achûŋ. Ghɨə kyi va sə̂ kwiynsə̂ nâʼà afɨa àmɔ̀ʼ, shîŋə̀ kɛ ghənə piə fiə ndò, ə tsə̂mə̀ ə fo àzɔ̀ŋnè sê Zhə̀fè.

⁵Tsə̂mzè è wâmnè ə Fezhə̀zè ə nə̀yn nə Fɨazhiə nə vɨ̂yn ə nyi èŋwaʼze.

⁶Ə ò zaʼlə ghɨə poməghe è ghɛ nə ghɨnə ə m pîə nyî, ə ò nyi ke nâʼà wùə è fɨ̀aʼa èchùŋ sê Klâys Njisə̀s, ə Zhə̀fè nə fe pɔŋ zaʼlê ghò tɔynə̂ ekyî epomə̂zè, è zaʼlê echûŋ zɛ ə ò nyi mə o ndə̀m zəynze.

⁷Kɛse epàm ə m̀ghâŋghàŋə̀ me mɨ mɛ m̀ kyi va ghɛ zhîze se nə̀yn è Zhə̀fè. Ò pɨlə zâŋsə̀ zaʼlə̂ ngɨŋ zɛ̂zè kə o nyi kàʼa ò nəyn ghɛ zɛ ə Zhə̀fè kyiŋə.

⁸Se zaʼlê ewiyn vɛve, e tsɔ̂fə̀ ndò endom vîve, pîza se kê eghɛ ə Fezhə̀zè tsɔ̀fə̀ kə ndom tekɨ̂m kûmə̀ nə zɨnə mə tsâmtə̀ ndò wùə ezhoghɛ è pa ndamə, è kɨsè ashìŋə̀ kɛ ə è nyi mə è və kwu.

⁹Ghɛ zɨ̀nə ə kwûʼ pî nyi eghɛ mə ə mbasə̂ pîə ndò zəynze əfètə̂ ə̀ghɨ̀ ə poməghe, ghàyn e ke nə ze ndɨŋ nyi səmɔʼ, e za nyi nə pîndè kàʼa è pomə zəynze mə è mə̀ʼnə̀ chîəva ndô.

¹⁰Kûmə̀ èpî nə zɨnə mə, ghàs nyîə fɨaʼà sə ŋaŋ se nə̀yn ə zɨnə mə kûmə̀ nə ghàs samsə̂ ndò ə Fezhə̀ fɛ ə fe ndamə səmɔʼ, nyi sɔ̀zà ə̀ghɨ̀ ə̀kɨ̂m, ə̀ paynse nyi ə̀ghɨ ghɛ ə nyi mə ə pomə̂ sê vəyn.

¹¹Zaʼle ghɛ nə ghɨ̂nə̀ ə nə̀ nə nâʼàpî ndè fɛte kê ghəynghe.

¹²Kə ò za nə wùə ə chîynə̀ ghò kûmə̀ nə ò nyi vâyn èpɔ. Ò kyi sə̂ nyi sê ghɨ ə poməghe kə chwìə e ndom vɛ ə ò wàmnə̀ ətəyn. Ò ndamə èndam echûŋzè, kɔ̂ŋɔ̀ ə̀ghɨ, tyə̂nə̀ nə o kyi ndô kyî epomə̂zè sê Klâys fɨyn nyi è zoze

¹³Ndə̀m shîŋə̀kè sə̂ tɔŋɔ fɨsə̂ èghɛ ə Fezhə̀zè sê ghɨghe è kyə̀ ètɛ, ndàʼà tom èchùŋ, fɨnə zaʼlə̂ ə̀ghɨ se zaʼâ kə m pəyn.

¹⁴Kə ò lɛse fo zɛ ə Zuʼse Ŋwaʼase tè fo sê ghò za kə fɨ̀aʼtèsè wàmnè ghɛ kûmə̀ ghò, nɔ̂yn ə sechəʼ sə ndɛ̂ Fèzhə̀sè ə ndə̀mə̀ əgho ə ghò tu.

¹⁵Njì shîŋə̀ kɛke se nə̀yn əghɛ ghɨ̀yn, ə ndə̀mə̀ ə̀təm ghɛghe əkɨ̂m ətəyn, kə nâʼàpî ndè fe nə ò nyi kàʼa ò ndaʼa ə ò fɨyn zaʼlê tom ə̀ Fèzhə̀.

¹⁶Ò tɔ̂ʼnə̀ è ngɨŋ zɛ̂zè endom vɛ ə ò nə̀ ghɛghe ətəyn, ò tɔ̂ʼnə̀ se nə̀yn nə ghɛ zɛ ə ò zaʼlə kûmə̀ Fèzhə̀ nyì səmɔʼ. Ə ò nə̂ nyiə mə, ə Zhə̀fè sɔza ghò, ə è fɨyn sɔza ə̀ghɨ ghɛ ə zɨtə ghɛ zɛ ə ò zaʼlə.