Read Mmen 2 Timotì 3 Bible Online

2 Timotì 3 - Mmen bible

2 Timotì 3

¹M kyiŋə nə ò ke nə, ghɛ tə nə̂ ə ghə tɛ mtuʼ me kwùŋsə̂m

²Ghɨ tə nə̂ ə muə, kɔ̂ŋɔ̀ èkɛ nâʼà àpi, pfɨnə̀ àngàŋtè, ghaŋsə̂ èwiyn, sôylə̀ ə̀ghɨ fɨnə tɛ ètuke sê pɨ̀a ə ghənə̂ghè è nyì ə ghənə̂ghè. Ghənə tə nə̂ ə fo va zɔ̀ŋnèkè sê wùə kûmə̀ nâʼà èghɛ e tətə̂ zhîze kə wùə nə̀yn sê ghənə, kyi va luʼve sê Zhə̀fè ə ghənə ətəm.

³Ghənə tə nə̂ ə kyi va təm ə chûŋghè, lɛ̂sə̀ fo va ghɨghe, pìə ə̀ghɛ piə kûmə̀ ə̀ghɨ, pîə ə̀ghɛ nyi ke epɨaʼtêzè se nò, ndamə kə kə senyam, ghənə tə nə̂ ə pânə̀ èghɛ echûŋzè.

⁴Ghənə tə nə̂ ə pəʼlə̂ ə̀ghɨ è wâmnè ə ghənə̂zè, shɨŋə nə̂ kə ə̀ghɛ ndɔ̀ʼɔ ə kwàʼte, nyi mə ə lwiyn è ghaŋsê ewìynze, kɔŋə̀ ə̀ghɛ ə mbi ghɨnə ghe tsɨ̀ə tsɛ̂ kə kɔ̂ŋə̀ Zhə̀fè.

⁵Ghənə tə nə̂ ə fusə̂ ə̀ghɨ ghɛ ə ghe kɔʼsə Zhə̀fè, pîza zɨə va sê Vəyn nâʼà səkɔs. Kə ò tə paʼsê sê kyì əghɨ̀ nə ghɨ̀yn.

⁶Ghɨ mɔ̀ʼɔ nyi ə ghənə əfètəyn, kwîə njiə əghɨghe ə sendɛ, lesə̂ ə̀zəyn ghɛ ə ghe nyi mə nə̀yn tsɛ̂sè ghɛ piə sè kyi va təmghe se tɛ faŋ eghɛ, sè nyi mə ə̀ kwaʼtè tə ghənə̂tè chisə̂ kə pi.

⁷Ə zəyn mə ghe mɔ̂msə̀ shîŋə̀ tekɨ̂m se laynə̂ pîza va se tə kê ə səmɔʼ.

⁸Ghɨ nə ghɨyn tàsə̀ èzaʼlê zɛ ə ze nyi səmɔʼ kèpî kə Njanìs yî Njampàs tè tàsə zaʼlê ə Mosîszè. Ghənə nyiə kyi tekwâʼtè tepite, fɨnə kwəynə̂ va eghɛ zhîze əfètəyn èkyî epomə̂zè.

⁹Pîza ghənə tə ndûə va sə aghaf kûmə̀ nə nâʼàpî ndè tə fe eluʼ vɛ ə ghənə ndû tâyn sə engòo. Ə̀ zɨnə nyi eghɛ zɛ ə ze tè kyàyn sê Njanìs yî Njampàs.

¹⁰Pîza, sê ghò ə Timotì, ò se nyi mə o chùmtè kɔʼ pəyn zaʼlê zɨmze è ndam zɨmze è ghɛ zɛ ə m tè kwàʼtə se tə nə̀yn endam. Ò ə naynê kɔʼ pəyn kyî epomə̂ zɨmze, è kol ətəm zɨmze, è kɔ̂ŋ zɨmze, è wəynsê ewìyn zɨmze.

¹¹O fe ndom vɛ ə tè tsə̂fsə̀ mi ətəyn, è zɨə ngəʼ zɨmze. Ò nyîə ke ə̀ghɛ ə̀kɨ̂m ghɛ ghe tè kyàyn sê mi ə Antyòk, è kɨsè ə Ìkonyùm, è Lisɨtɨ̀là. Tsə̂fsè ekwuənəze ə tə pə̀yn sê mi famə ətelùʼ. Pîza Pɛ̂pɛ ə tsàmtə̀ mi əfètə̂ təynte nâʼà tèkɨ̂m.

¹²Ə̀ kɔ̀ŋə̀ pîndè sə ndamə èndam ə Fezhə̀zè kaʼke amɔ̀ʼ yî Klâys Njisə̀s, ə kyi se tə tsə̂fsè ə vəyn.

¹³Ghɨ piə è ghɨ ghɛ ə ghe tyə̀nə̀ nə ghe nyi afɨa, pîza va, ə pofə ndùə kə èshike, kyîŋsə̀ ə̀ghɨ, ghɨə mɔ̀ʼɔghe e pɔŋɔ kyîŋsə̀ kəpî ghənə.

¹⁴Pîza se ghò, faŋke ə səmɔʼ zɛ ə tè zaʼle sê ghò, o pomə̂ zə̂ynzè sə ŋaŋ. Ò nyîə ke ə̀ghɨ ghɛ ə tè nyi setyə̀ynsè sɛse.

¹⁵Ò pɨ̂əytə̀ kəpi kə ò tè pa nyi wâ, mə o ə kàynè kê ghɛghe ə ŋwàʼlè ə̀ Fèzhə̀, mə ə̀ nyi əghɛ nə ghɨyn ə ghe kaʼa ə ghe fo ghô ètɔf eghaʼâ zɛ ə ze pə̂ è sɔzaze tɔynə̂ ekyî epomə̂zè ə Klâys Njisə̀s.

¹⁶Nâʼàpî èghɛ èkè zɛ ə nyaʼ ə Ŋwàʼlè ə̀ Fèzhə̀ nyi mə ə̀ fo Fezhə̀ nə ə nyaʼ, nə zaʼlê ə səmɔʼze ə fɨə ətəyn, e tsâ tètsas tə ghɨ̀tè ətəyn, chisə̂ ə̀ghɨ ətəyn, fo ètəftê endom vɛ əghɨ kyi sə̂ ndamə èndam echûŋzè ətəyn.

¹⁷Ghɛ nə ghɨnə nyi se nə̀yn nə wùə èfɨ̀aʼa ə̀ Fèzhə̀ ə kwəynə mɨ̂sə̀ sə̂ nə̂ nâʼà tèkyì tə tefɨ̀aʼ techûŋ tekɨ̂m.