Read Mmen 2 Timotì 4 Bible Online

2 Timotì 4 - Mmen bible

2 Timotì 4

¹Ə Zhə̀fè əshi è Klâys Njisə̀s vɛ ə ghənə tə saʼa ghɨ ghɛ ə ghe ndamə è ghɛ ə ghe nyi mə ghə kwu, è kɨsè nə Klâys pə̀ sə̂ nyi fɔ̀yn sê mbi èkɨ̂m, m pîə se ghò è tyaʼa nə,

²ò ndâʼà tom èchùŋ, ò ndâʼà kə ndò kɨ̀sə ghɨ kɔ̀ŋɔ̀ ndò se zɨtê, kɨ̀sə ə kɔ̂ŋɔ̀ va, ò fɛtə̂ nə̂ kə ghɨ zɨ kê, tyə̂nə̀ paynsə̂ ə̀ghɛ ghɛ əghɨ nə̂ pofsə, ò fo ə̀təm kè kə ò zaʼlə è ewəynsêzè.

³Shîŋə̀kè tə pə̂ mə ghɨ kɔ̂ŋə̀ va se zɨtê sê zaʼlê ə səmɔʼze, pîza chûmtə̀ èghɛ zɛ ə ghənə kɔ̂ŋə̀, ə ghənə ə kyiŋə ndûə setyə̀ynsè è ngɨŋ sə ghənə̂sè, sɛ ə se tsâ ghɛ ghɛ ə tôŋnê ə ghənə̂vè kɔ̀ŋə̀ se zɨ.

⁴Ghənə tə kə̂mnə̀ epàmə̂ səmɔʼ, ə pɨl fo etôŋne ə ghənə̂vè sə zɨtə̂ m̀ghâŋghàŋə̀ mə èmɨmè.

⁵Pîza, ò kyi sə̂ chisə̂ ngɨŋ zɛ̂zè nâʼàpî ətə èghɛ èkè, kolə ə̀təm ezə ngəʼze, nə̀yn fɨaʼə wûə vɛ è ndàʼà tom èchùŋ, ə nə̀ èfɨaʼ zɛze ekɨ̂m kə wùə èfɨ̀aʼa ə̀ Fèzhə̀.

⁶Sê mi, shîŋə̀kè ə kwəyn kə ə fo mi sə efo, ə̀ zo nyi ashîŋə̀ se mi kə m za ndam zɨ̀nə̀.

⁷Mə fɨ̂aʼ ke nâʼà àchûŋ. Mə fɨ̂aʼ tayn shîŋə̀ kɛ ə kyiŋə, mə fɛtê ndəm kyî epomə̂zè.

⁸M lɨmtə kə èmâʼte ə endam ə chichi zɨmze zôyn. Pɛ̂pɛ ə̀ ghâsènì vɛ ə è saʼa ghɨ səmɔʼ tə fo èmâʼtè nə zɨ̂yn sê mi fumə fetuʼ. È tə fo kə va sê mi, È tə fo kəpî sê ghɨ ghɛ ə ghe tè lɨmtə pə ə Vəynze èkɔ̂ŋzè.

⁹Mɔmse nâʼà è tyaʼa se zàŋse ə pə fe mi.

¹⁰Kûmə̀ nə Ndemàs nyîə kɔ̂ŋə̀ èfɨa ə mbi ə̀ zôynvè, ə tə za mi, ə ndùə ə Tèsàlonikà. Kɨ̀lisèns ə ndù ə Ngàleshyà, Taytùs ve ndù ə Ndàlàmatyà.

¹¹Ə̀ faŋ kê Lûk fayn ghasè vəyn. Ə ò piə ò pə̀ ndò ò pə̀ ghayn Mâk kə è və tsâmtə̀ mi ə mì efɨ̀aʼ.

¹²Mə tom Tìkikùs ə Ɛfesùs.

¹³Ə ò piə ò pə̀ ndò, ò pə̀ è pfɨ̂ fɨm fɛ ə m tè ndò za sê Kapùs ə Tɨ̀luwàs zâ. Pə kəpî è ŋwàʼlè sɨm sɛ ə ngɛ ndô za, paynpayn sɛ ə fɛte è pfɨ̀ə nyàm za.

¹⁴Àlɛ̀ksandà vɛ ə è tsɨə ndâmkè za, ə tə mɔ̀m ghɛze sê mi, ze kwûəmə̀ kə nyî. Pɛ̂pɛ nə fo ngəʼ sê vəyn kûmə̀ èghɛ nə zɨ̂yn.

¹⁵Ò ghə̂mnə̀ ghâyn vəyn, kûmə̀ nə è tè wàmnə̀ əghɛ nâʼà sə atyaʼ ghe tsɔ̂fə̀ va kûmə̀ tom ə̀ ghâsènì.

¹⁶Ə̀ tè nyi kə m tyəm elùʼ ə saʼ se wàmnè se tyə̀yn nə m paʼà nə̀yn pofsê, ghɨghe əkɨ̂m ə tə zâ mi. Tsə̂m zɨmze nyi nə Zhə̀fè wəyn mâʼà èghɛ nə zɨnə ə ghənə tè nəyn nyi.

¹⁷Pɛ̂pɛ ə tè faŋ ghasè vəyn ə tɔ̀ʼɔ̀ mi kə m kyi tyaʼa se tsàyn ə mɨ̀sè ətom èchùŋ sê ghɨ ghɛ ə̀ tè vachi ə̀ghɨ ə Njûsghè əkɨ̂m, ə fɨnə fɨsə̂ mi ə̂ kwuze echo.

¹⁸Pɛ̂pɛ nə̀ tsâmtə̀ mi kə ghɛ epi zhîze tàʼa kyàyn sê mi, ə è fɨyn nji kwi ke è mi achûŋ kə ghɛ epi zhîze tàʼa kyàyn se mi, m ndu nji ə vəyn elùʼ efɔ̀yn ə vəynve ekwùtwəyn. Ə ghâsènì ə pomsə̂ vəyn sə teshìŋə̀ tèkɨ̂m. Ə ze ə nyi ke zamə.

¹⁹Tɔŋte Pliskà è Àkwilà è ghɨ esas ə ndɛ ə Ònèsifolùsghè sê mi.

²⁰Èlasɨtùs ə tə faŋ ə endaʼ Kolìŋzè. Mə zà Tilofimùs ə endaʼ ə Miletùszè kûmə̀ nə è tè zafə ndô.

²¹Mɔ̀mse nâʼà è tyaʼa ə pə̀ tsɔ̀fə kə shîŋə̀ kɛ ə fofke nyi tsɛ̂sè ətəyn pəyn. Yùpulùs, è Pundèns, è Laynùs, è Klondyà nâʼà è ghɨ poməghe əkɨ̂m pi nə m tɔŋte sê ghò.

²²Ə Pɛ̂pɛ ə nyi ghâyn ghənə. Ə fùʼ ə Fezhə̀kè ə nyi ghâyn ghə̀ ghənə.