Read Mmen Ipilù 10 Bible Online

Ipilù 10 - Mmen bible

Ipilù 10

¹Lâŋ ə Mosîskè tè nyi ke anyɨ̂ŋsè eghɛ èchùŋ zɛ ə ze tè nyi se tə pə̀yn. Ə̀ tè nyi ke ànyɨ̂ŋsè afɨa echûŋ kɛ ə ke tè kyi se pə̀yn, ə̀ ndɨŋ vachi àfɨa ətəynke. Kûmə̀ nə ə̀ kɨnə mə tè nyì ke ànyɨ̂ŋsè, ghɨ tè fo zɔmtə̂ tèfo sê Zhə̀fè kè ə pîŋ ə pîŋ, fo nə tɨnə mə tè vayn kàʼa te nəyn nə ghənə ghɛ ə kyiŋə sə̂ kɔʼsə̂ Fèzhə̀ ə kwəynə̂ mɨ̂sə̀.

²Ə̂ tè nyi nə fo nə tɨnə ə nyi kàʼa ə te nəyn nə ghɨ ghɛ ə ghənə ngɨmnə Zhə̀fè ə kwəynə̂ mɨ̂sə̀, mə ghənə ə tə tsɨsə̂ fɨnə fo va, nyiəmə ə ghənə ə fɨnə kwàʼtə̀ va nə ghənə ə nə̀yn pi.

³Pîza ghənə tè fo tefo tə təynte pìŋ sekɨ̂m, te nə̂ kə nə ghənə ə kwâʼtə̀ sèpi sə ghənə̂sè.

⁴E nyi nyî kûmə̀ nə ndə̂m mə sèmbɔŋə̂m è ndə̂m mə sèpfɨm vayn kàʼa m kəʼsê pisə wûəsè.

⁵Ə̀ za nyi eghɛ zɛ ə tè nyi kə Klâys pə̂ ə mbi, è və pìə sê Zhə̀fè nə: “Ò kyiŋə va nə ghɨghe ə se sènyam sê ghò, kyiŋə va nə ə fo tèfo sê ghò, pîza o fo mi è wiynve.

⁶Ə̀ vachi sènyam sefɨ̂plè sɛ ə nyɔ̀ʼɔ sê ghò etùə àlaŋ efoke ə se nə̂ nə o saŋnə̂ kɨ̀sə tefo tɛ ə fo se ndɔyn elɛsè efoze ə te nə̂ Ò saŋnə̂.

⁷Ə̀ za nyi eghɛ zɛ ə m tè pi sê ghò nə, ‘M vɨnə fayn ə Zhə̀ fɨmfe se nə̀yn eghɛ zɛ ə ò kyiŋə ke eghɨ kə tè nyâʼ kûmə̀ mi ə ŋwàʼlè àlâŋ.’”

⁸Kə Klâys tè pì sə shi nə, “Zhə̀fè kyiŋə va nə ə fo tèfo sê vəyn, kyiŋə va nə ə fo tèmâʼte, kyiŋə va nə ə nyɔʼɔ̀ sènyam etûə àlâŋ efoke sê vəyn è kɨsè sə fo tèfo se ndɔyn elɛsè efoze.” È tè pì zɨnə mə naʼapi kə tè fo fo nə tɨnə mə, endom vɛ ə lâŋkè tè kyiŋə.

⁹È və wàmnə̀ nyi ə fɨnə kùmtə pìə nə, “M vɨ̀nə fayn ə Zhə̀ fɨmfe se nə̀yn eghɛ zɛ ə ò kyiŋə.” È və wàmnə̀ nyi se tyə̀yn nə Zhə̀fè ə kwiynsê fo ə shize, ə ndə̀mə̀ ze komtəze ə zəynze elùʼ.

¹⁰Kûmə̀ nə Njisə̀s Klâys ə tə nə̀yn ghɛ zɛ ə Zhə̀fè tè kyiŋə nə è nəyn, ze ə nə̀yn nə ghâsènì ə zo ə ghɛ ə pighe, tɔynə̂ efo zɛ ə è tè fo wiyn ə vəynve kè shîŋə̀ze mɔ̀ʼ.

¹¹Naʼapi wùə èkɔʼsə nə̂ èshyə̀ èkè nyiə nə̂ èfɨa ə vəynze tuʼmè m̀kɨ̂m, fo kə èkyì efoze emɔ̀ʼ sə te shîŋə̀ te tsɨəte pîza mə fo nə tɨnə mə vayn kaʼa te shu tsɨsè pi.

¹²Pîza Klâys tè fo ngɨŋə̂ vəyn sə efo shîŋə̀ze emɔ̀ʼ ə njìə tsɨsə̀ sèpi sə ghɨ̀sè sə teshìŋə̀ tèkɨ̂m, zamə è və tsɨsə apàs ekɔyn e twɔ ə Fezhə̀kè.

¹³Se zhə̀tè etuʼ nə vɛ è tsɨs, pfɨ̂tə̀ nə Zhə̀fè nəyn, ə paynsə̂ vəynse ə nyi èfɨa ə vəynve tɔmtə nə ə ghòlve.

¹⁴È tè fo ngɨŋ ə vəyn shîŋə̀ze emɔ̀ʼ se efo ze ə nə̀ nə ghɨ ghɛ ə Zhə̀fè nə̀yn nə ə nyi ə̀ghɨ yîghe ə kwəynə̂ mɨ̂sə̀ sə teshìŋə̀ tèkɨ̂m.

¹⁵Zuʼse Ŋwaʼase pɔŋɔ tyə̂nə̀ paynsə̂ kə nâʼà sê ghâsènì nə ghɛ nə zɨ̂nə̀ nyi ke nâʼà səmɔʼ. Ə̀ zɨnə nyi eghɛ əshi zɛ ə è pì nə,

¹⁶Pɛ̂pɛə ghâsènì pi nə, “Ə̀ mɨ̂nə̀ nyi mkâyn mɛ ə m tə zhiə ghasè ghənə mtuʼ me kɔʼɔ pə̂m: M tə ndəmə̀ àlâŋ kɨmke ə ghənə ətəm ə m nəyn ə ghənə ə kwaʼtə̀ vəynve shîŋə̀ tekɨ̂m.”

¹⁷È və piə kwəynsə̂ nə, “M tə fɨnə kwaʼtə̀ va pi sə ghənə̂sè è ghɛ əpiə ghɛ ə ghənə nə̂yn.”

¹⁸Ə Zhə̀fè lɛ̂sè fo wùə nyi, è fɨyn kyi va se fo efo nə lɛse fo sèpi sə vəynse.

¹⁹Ghâsènì ke ndô zôyn səmɔʼ ə ghɔnyìə ghɨmə nə ə tə njiə Eluʼ Eŋwaʼ Engaŋtə Kwəynəve kûmə̀ m̀ndəm mə Njisə̀sə̀m.

²⁰È və chwìə èndom efeve sê ghâsènì mə za nyi endom vɛ ə ve kyi ndamze tɔynə̂ apàŋ ə sendzɨske; mə za nyi ewiyn ə vəynve.

²¹Ghâsènì kyi wùə èkɔʼsə nə èshyə̀ èghaʼâ, è naynə̂ nâʼàpî ghè ə ndɛ̂ Fèzhə̀.

²²Kə ze nyi nyî, ə ghâsènì pəyn paʼsê ə Zhə̀fè ə ngwùŋ è təm ə səmɔʼghe, èkyî epomə̂ ə səmɔʼze, è təmghe mə ə shù zosê ə tə̂ ghɛ ghɛ ə ghe saʼa ghâsènì, è wîyn mə ghasènîəm mə ə shù ə mmò mə̂ èzomè.

²³Ə ghâsènì fɛte kyî mə ə nə̂ʼlə̀ va eghɛ zɛ ə ghâsènì kwàʼtə̀ lɨmtə, fɨnə wâmnə̀ kûmə̀ zəynze, kûmə̀ nə ghɛ zɛ ə Zhə̀fè tsɨ̀nè, è nə̀ nə̂ kə kə è pì.

²⁴Ə ghâsènì ə tsâmtə̀ sèngɨŋ sə ghasènìse se tyə̀n ekɔ̂ŋ, nə̂ chùŋ.

²⁵Kə ghâsènì ə nyi kə ə ghɔnyì ə mɔ̀ʼɔghe ə ghənə kɛsə pə̂ va elùʼ atsɨ̀ynte. Ə ghâsènì ə pɨlə fo ə̀təm ə tɛghe sengɨŋ sə ghasènìse, fo zɔmtə̂ ndûə kə ndò kə ghâsènì fe nə tuʼ fɛ ə Pɛ̂pɛ kɛsə pə̂ ətəyn paʼsə̂ pə̂ ndò.

²⁶Ə ghâsènì ke ghɛ zɛ ə ze nyi səmɔʼ pîza ə fɨnə faŋə sè nə̂ kə pi, ke ke nâʼà nə ə̀ nyì pi, ə fo zhîze ə fɨyn va ə ze kaʼa ze nji tsɨsè sèpi sə ghasènìse.

²⁷Pîza ə wùə ndamə nyî, ə è və kyi ke sə̂ fanə̀ kûmə̀ è saʼ zɛ ə e pə̂, è kɨsè wus etɛ vɛ ə ve tə pofsê pàyn sə Fezhə̀sè!

²⁸Ə wùə tə nə è zɨə va Lâŋ ə Mosîskè, ə piə saʼa vəyn tsɛ̀ èsaʼ ə fɨə, ə nyi ə̀ghɨ ə̀pɛ̀ kɨ̀sə ə ta se tyə̀yn nə è və nə̀yn pofsê ghɛze, ə zhwi ke ndò vəyn ndɔ̀ʼɔ fɨyn kosê èsəyn.

²⁹Ə ze tè nyi zamə, ə ze tə pə̂ ə zə nyi nâʼà zàyn sê ghɨ ghɛ ə ghe nyaŋə màʼà Va Fèzhə̀ ə? Ze tə pə̂ ə ze ə nyi nâʼà zàyn sê wùə nə vɨ̂yn ə è tàʼa njiə mndəm mɛ ə Zhə̀fè zhi kâynmè ətəyn mə m̀ shùə tsɨsə̀ pi sə ghənə̂sè sə eghɛ ə? E za tə pə̂ ə ze ə nyi nâʼà zàyn sê wùə nə vɨ̂yn ə è sòylə̀ Zuʼsə ə Fezhə̀sè, ə nyi səynse ə se tyə̂nə̀ təm əchûŋ ə Fèzhə̀ghè ə? Lote kwàʼte tso kə pɔynsê zɛ ə ghənə kyi sə̂ kyi tə pə̂ ə ze ə tsɨ̂ə tâ.

³⁰Ghâsènì nyîə ke vəyn vɛ ə è tè pi nə, “Ə̀ nyi mi se ndàʼa fɨ̀ysè ə pi, m tə ndaʼà fɨysə̀.” È və pìə kəpî nə, “Pɛ̂pɛ tə saʼa ə̀ghɨ ə vəynghe.”

³¹E nyîə kwə̂mə̀ nâʼà sə ŋaŋ nə wùə pfɨə nji ə Zhə̀ fɛ ə fe ndamə əgho.

³²Ghàyn kɛse kwàʼtè m̀tuʼ me pàmə̂ kə ghàyn tè pomə Zhə̀fè sə shi ətəyn, ghàyn ə tə zɨ tsôs te tsɨəte pîza wəynsə̂ kə ndò.

³³Shîŋə̀ tîte tè nyi, e sôylə̀ ghàyn, fɨnə fo ètsôs sê ghàyn kè ə ghɨghə shi, shîŋə̀ tə mɔ̀ʼɔte e pə̂, ghàyn e nyi èpɨaʼtêzè se tɔ̀ʼ əghɨ ghɛ ə tè fɨmsə̂ ghənə endom nə vɨnə mə.

³⁴Ghàyn e kosə èsəyn sê ghɨ ghɛ ə kote fâ. E kyitə̂ fitə̂ èfɨa vaynve, pîza ghàyn e kolə kə ndò təmə kyi va fɨmsêzè, kûmə̀ nə ghàyn tè ke ndô nə ghàyn nyiə nyi èfɨa ve tsɔ̂fə̀ tsɛ̂, nyi se ndamə faŋ.

³⁵Nyiəmə, ghàyn e nyi ke endom vɛ ə ghàyn tè nyì chi sə shi, kə ghàyn fayn ghɛ zhîze kûmə̀ nə təm ə tɛ ghaynghe nə̀ pə̂ ghàyn èmaʼte eghaʼâzè.

³⁶Ghàyn e wəynsə̂ kə ndò kə ghàyn nəyn ghɛ zɛ ə Zhə̀fè kyiŋə nə ghàyn nəyn, endom nə vɨnə mə ə ghàyn kyi fɨa kɛ ə è tè tsɨ̀ne nə è tə fo sê ghàyn.

³⁷E nyi ke kə ə nyâʼ ə Ŋwàʼlè ə Fèzhə̀ nə: “Ə̀ faŋ kê fèndîŋə̀ nyî kə wùə vɛ ə è kyi se pə̀yn, pəyn. È nə̀ môtə̀ va.

³⁸Ghɨ ghɨm ghɛ ə ghe ndamə chichi tə faŋa ə ghənə ə ndamə kûmə̀ èpomə ə ghənə̂zè sê mi. Pîza mə ə wùə sê ghənə kɛsê ə mi epàm m mə saŋnə̂ va ghasè ghənə.”

³⁹Ə piə pə̂ ndò, ghâsènì va kə əghɨ ghɛ ə ghe tə kɛse epàm, ə njìsə̀. Ghâsènì pɨl nyi ə̀ghɨ ghɛ ə kyi kyî epomə̂zè sê vəyn, nyi mə ə sɔ̀fɨ.