Read Mmen Ipilù 13 Bible Online

Ipilù 13 - Mmen bible

Ipilù 13

¹Ghàyn ndu ke èshike sə̂ kɔ̂ŋɔ̀ sèngɨŋ saynse kə ghɔ nyìə.

²Kə ghàyn tə lɛ̂sè sə̂ fiə ndzɨsə̂ ə̀ghɨ ə motə pə ə ghàyn ə sendɛ. Ghɨə mɔ̀ʼɔghe ə fi ndzɨse ghɨghe, ke va nə ghənə fiə sètsì.

³Ghàyn e kwâʼtə̀ ə̀ghɨ ghɛ ə ghe nyi ə ndɛ̂ chaʼ kəpiə ghâynghə̀ ghənə nyi fumə əmɔʼ. Ghàyn e kwâʼtə̀ kə pi əghɨ ghɛ ə ghe fe tsôsvè, kəpiə ghâynghə̀ ghənə fe ètsôs ətəynve əmɔʼ.

⁴Nâʼàpî ndè kyi sə̂ ngɨmnə̂ malə̂. Kə wùə tə za ndom ə̀ vəyn kɨ̀sə zhwiə vəyn ə è ndu nyɨ̂ŋə̀ yî wùə ə ndò. Ghàyn kendô nə Zhə̀fè tə saʼa nâʼàpî ndè vɛ ə è nə̀ ghɛ ə nyələghe è ghɛ ə nyi mə malə̂ fɨə əpɨəyn.

⁵Kə ghàyn pomə nə kɔ̂ŋ ekɛze ə nyi ə ghàyn endam, ghàyn e nyi èsaŋnêzè è fɨa kɛ ə ghàyn kyi kûmə̀ nə Zhə̀fè ə tsɨ̀nə̀ nə, “M tə zâ va ghàyn nâʼà səkɔs, va se tə kyiynê ə ghàyn.”

⁶Kûmə̀ nyî, ghâsènì kàʼa ə pfɨnə̀ àngàŋtè pìə nə: “Pɛ̂pɛ nyi tsàmtè zɨ̂m, m vayn kàʼa m fayn ghɛ zhîze. Wùə m̀sɔ̀ŋ kàʼa è ghayn ghɛ sê mìə?”

⁷Ghàyn e kwâʼtə̀ ètu vayn vɛ ə ve tè ndàʼa ghɛ ə Fezhə̀zè sê ghàyn sə shi. Ghàyn e kwâʼtə̀ tèndam tɛ ə ghənə tè ndamə è ndom vɛ ə ghənə tè kwuə ətəyn. Ghàyn səyne kyî epomə̂ zɛ ə ghənə tè kyi.

⁸Njisə̀s Klâys kwiynə̂ tsɛ̂ va, è nyì ke èghɨ kə è va nyi zhɔynghɛ, è ndàyn, nyi sə̂ nyi ke zamə nâʼà kə ghè tə ghayn.

⁹Kə ghàyn zâ nə ə lɛsə̂ ghàyn è kyì tə ezaʼlêtè tekɨ̂m mə te nyi sə nɨŋ sê tom èchùŋ. E tsɔ̂fə̀ nə ə nə̂ àfùʼ ə Fezhə̀kè nə təm ghaynghe ə tɛ, ə̀ va chi elwɔ̂ŋ vɛ ə ghàyn ndə̀mə̀ kûmə̀ èfɨa zhiəve kûmə̀ nə lwɔ̂ŋ nə vɨnə tsâmtə̀ va ghɨ ghɛ ə ghe ndə̀mə̀ vəynve nâʼà səkɔs.

¹⁰Ghâsènì nyiə kyi àlaŋ ə kɔʼsə nə eshyə̀kè, ghɨə èkɔʼsə nə èshyə̀ ghɛ ə fɨaʼà elùʼ ə ghɨə Njûs ve ngɨmnə teshyə̀vè kyi va tyaʼa se zhi efo zhîze ə ghâsènì etûə àlaŋ ə kɔʼsə nə teshyə̀kè.

¹¹Ghàyn ke nə wùə èkɔʼsə nə̂ eshyə̀ engaŋtə kwəynə njìə m̀ndəm mə nyàmə̀m se nji è mə̂ynmè Eluʼ vɛ ə ve ŋwaʼà kwəynə se fo nə Zhə̀fè lɛse fo sepi sə ghɨ̀sè, pîza ə njìə fɨə ndô è nyamsə ekwuə sə təynse elùʼ vɛ ə ghɨə ndamə, ə ndùə nyɔʼə̀.

¹²E za nyi kepî èghɨ kə Njisə̀s tè fe tsôsvè ə kwuə etipì ə tɔ̂ŋ èghaʼâ ə̀ Njèlusalɛ̀m, kə è shu zosê sèpi sə ghɨ̀sè è ndə̂m mə Və̂ynmè.

¹³Ə ghâsènì pɔŋ fɨ ndo elùʼ vɛ ə ghɨə ndamə, ə ndu kotê vəyn ə pɨaʼa kəpî èghomə̂ kə vəyn.

¹⁴Ghâsènì nyiə ke nə tɔ̂ŋ èghaʼâ zhîzè va fâ mbi ə è tə ndamə faŋə mə nyi zə ghâsènì. Ghâsènì pa naynə̂ ndûə ndò tɔ̂ŋ èghaʼâ nə zɛ ə è nyì se tə pə̀yn.

¹⁵Ə ghâsènì ə tsîtə̀ Fèzhə̀ shîŋə̀ tekɨ̂m kə efo ə ghasènìze tɔynə̂ ə Njisə̀s. Zɨnə mə nyi kə efo ə ghâsènì fo è kyə̀ ècho se tyə̀yn nə è nyi Pɛ̂pɛ.

¹⁶Kə wùə nə lɛ̂sè sə̂ nə̂ eghɛ echuŋzè sê wùə kɨ̀sə sə̂ chyàtə̀ àfɨa kɛ ə è kyi se fo wùə ə̀ mɔʼɔ. Ghɛ nə ghɨnə nyi sê Zhə̀fè kə efo, ghe nə̂ nə fe ə saŋnə̂.

¹⁷Ghàyn e zɨə se tu vaynve, kə ghàyn ə tɛ è tuke sê ghənə. Ghənə nyiə naynə̂ ghàyn kûmə̀ nə ghənə taŋə njo sê Zhə̀fè ə ghənə efɨ̀aʼ. Ə ghàyn zɨə sê ghənə, ə ghənə ə nə̂ èfɨ̂aʼ ətəyn è èsaŋnêzè, ə ghàyn sè tɛ è tuve, ə ghənə ə nə̂ èfɨaʼ ətəynze è təm ə tɨləghe, ə zɛ mə tàʼa tsàmtə ghàyn.

¹⁸Ghàyn e tsə̂mə̀ kə sê ghàs. Ghàs ke ndô nə təm ghasghe saʼa va ghàs, kûmə̀ nə ghàs kyiŋə kə sə̂ nə̂ eghɛ zɛ ə ze tsɔ̂fə̀ shîŋə̀ tekɨ̂m.

¹⁹M chyatə̂ è təm ghɨm ghəkɨ̂m nə ghàyn ə tsə̂mə̀ sê mi kə Zhə̀fè nəyn kə m kɛse zàŋsè pəyn fe ghàyn.

²⁰M tsə̂mə̀ nə Zhə̀ fɛ ə fe fo pɔ̂ynè sê ghɨghe, ə Fezhə̀ fɛ ə fe tè kɛse nji pəyn è Pɛ̂pɛ ə̀ ghâsènì Njisə̀s Klâys mə è nyi ngyəyn èghaʼâ ə̀ sèndzè sê kwuze tɔynə̂ mndəm mə m̀kàyn mɛ ə ndamə faŋə,

²¹m tsə̂mə̀ nə Zhə̀fè fo nâʼàpî àfɨa echûŋ àke kɛ ə ghàyn nə̀ njîə se nə̀yn eghɛ zɛ ə è kɔ̀ŋə̀ ətəyn, m tsə̀mə̀ nə tɔynə̂ ə Njisə̀s Klâys, è nə̀ nə̂ tɔynə̂ ə ghâsènì ghɛ zɛ ə ze tsɔ̂fə̀ sê vəyn. Ə pomsêzè ə nyi sê Njisə̀s Klâys sə teshìŋə̀ tèkɨ̂m. Ə ze ə nyi ke zamə.

²²M chyatə̂ ghàyn ə ghɔnyì ghɨmə nə ghàyn zɨte ghɛ zɛ ə m wâmnə̀ sê ghàyn se fo ghàyn è təm ə tɛghe. M pâʼà nyàʼ ghɛ se tsɨ̀ fa ŋwàʼlè zɨ̀yn ə m nyâʼ sê ghàyn.

²³Ghàyn e ke nə ə fɨse ànyìə ghâsènì Timotì ə ndɛ̂ chaʼ. Ə è zàŋsè pə̂yn, ə ghasè vəyn pəyn əmɔʼ se fe ghàyn.

²⁴Ghàyn tɔŋte tu vaynve, è ghɨə Fezhə̀ nâʼà ə̀kɨ̂m. Ghɨ e pomə ghɛ ə ghe ndamə endaʼ ə Italìzè ə tom tɔŋtêzè sê ghàyn.

²⁵M tsə̂mə̀ nə Zhə̀fè tyəyn fùʼ ə vəynke sê ghàyn əkɨ̂m.