Read Mmen Ipilù 3 Bible Online

Ipilù 3 - Mmen bible

Ipilù 3

¹E za nyi nə ghàyn kyi se fɛtə̂ ndə̀mə ekwâʼtè zaynze sê Njisə̀s ə ghɔnyìə ghɨm ghe Ŋwaʼa ghɛ ə Zhə̀fè pɔŋ tɔŋɔ nə ghàyn ə nyi ə̀ghɨ vəynghe. Ə̀ nyi vəyn vɛ ə ghâsènì njì kə wùətom ə̀ ghâsènì è wùə èkɔʼsə nə èshyə̀ èngaŋtə kwəynə.

²È tè fɨ̀aʼa sê Zhə̀ fɛ ə fe tè chɔʼ vəyn è təm ə vəynghe əkɨ̂m kèpî kə Mosîs tè fɨ̀aʼa ə ndɛ ə̀ Fèzhə̀ è təmə vəynghe əkɨ̂m.

³Njisə̀s nyîə kwəynə kə ə kɔʼsə̂ vəyn tsɛ̂ kə ə tè kɔʼsə̂ Mosîs kûmə̀ nə è nyiə kɔʼnə̂ tsɛ̂ vəyn kèpî eghɨ kə pɛ̀ ndɛ kɔʼnə tsɛ̂ ndɛ zɛ ə è pɛ.

⁴Ghâsènì nyîə ke nə nâʼàpî ndɛ èkè nyi mə ə̀ pɛ wùə pîza, nâʼà èfɨa èkɨ̂m e nyi mə ə̀ fɛte Fèzhə̀.

⁵Mosîs tè fɨ̀aʼa è təm ə vəynghe əkɨ̂m kə wùə èfɨaʼa ə ndɛ ə̀ Fèzhə̀ èkɨ̂m, tyə̂nə̀ ə̀ghɛ ghɛ ə Zhə̀fè tə wâmnə̀ ashìŋə̀ ə pəke.

⁶Pîza, sê Klâys, è fɨ̂aʼà kə è təm ə vəynghe əkɨ̂m kə Va Fèzhə̀, nâʼàpî ghè ə pɨ̀a vəyn ə ndɛ nyi ke ə və gho. Ghâsènì nyi ndɛ ə̀ vəyn, ə ghâsènì kyi ndu kendò təm ə tɛghe è samsêzè, əfètə̂ èkwàʼtè elɨmtə zɛ ə ghâsènì kyi.

⁷E nyi nyiə mə kə Zuʼse Ŋwaʼase pî nə, “Ə ghàyn zɨ kyə̀ Fèzhə̀ ndàyn,

⁸kə ghàyn tɛ è tuke kə pɨ̀a ghaynghe tè tɛ etuʼ vɛ ghənə tè nyi e elùʼ ashishive. Ghənə tè tɛ è tuve ə kwiynsə̂ nə ghənə nə̂ va ghɛ zɛ ə Zhə̀fè pì. Ghənə tè kyiŋə se fe eghɛ zɛ ə Zhə̀fè nə̀ nə̂.

⁹Fumə elùʼ ashəshəve, ghənə ə kwiynsə̂ èghɛ zɛ ə m pî se fe eghɛ zɛ ə m nə̀ nə̂, pî kə ghənə tè fe ghɛ zɛ ə m tè nə̂yn əfètə̂ sèpìŋ mghɨm kyàʼ.

¹⁰Ə̀ za nyi eghɛ zɛ ə fe tè nyɔʼse tɔŋ sê ngwàʼ nə zɛ ə ke pì nə, ‹Ghənə ə tə tə se njìə mi kə wùə vɛ ə è chisə ghənə, ə tə se nə̀yn eghɛ zɛ ə m kyiŋə nə ghənə nəyn.›

¹¹Mə tə nyɔ̀ʼsè tɔŋve ə kàynə̀ nə, ‹Ghənə tə njiə va elùʼ vɛ ə m tè nyì se fo àzɨ̀tè sê ghənə ətəyn.›”

¹²Ghàyn tɔʼne ə ghɔ nyîə se fe nə kə wùə ə ghàyn ə fètəyn nə kyî ətəm əpiə è tàʼa pomə̂, ə è tə kɛsê epàm ə̂ Fèzhə̀ fɛ ə fe kyi ndamze.

¹³Ghàyn e pɨlə tsâmtə̀ sèngɨŋ saynse tuʼmè m̀kɨ̂m kè kə ghàs pa zɨə ‘Ndâyn’ è wâmnə̀ sê ghàs kè kə ə nyâʼ ə ŋwàʼlè ə̀ Fèzhə̀, kə ndɔ̀ʼɔ pi tə lɛsê wùə sê ghàyn, ə ghàyn ə tɛ e tuke.

¹⁴Ə ghâsènì tyəm ə ghâsènì epomə̂ se zaʼâ əkwùŋse, kèpî kə ghâsènì tè tyəm ə zhə̀te, ə ze ə tyə̂nə̀ nə ghâsènì tsɨ̀yntə̀ fɨaʼà ghasènìəghə̀ Klâys.

¹⁵E nyi ke kə ə nyâʼ ə Ŋwàʼlè ə̀ Fèzhə̀ nə: “Ə ghàyn zɨ kyə̀ Fèzhə̀ ndàyn, kə ghàyn tɛ è tuke kə pɨ̀a ghaynghe tè tɛ se mi kə ghənə tè nyi elùʼ ashəshəve.”

¹⁶Ghɨ ghɛ ə ghe tè zɨ kyə̀ Fèzhə̀ ə tɛ è tuke nyi kepî əghɨ ə̀kɨ̂m ghɛ ə Mosîs tè njì fɨ è ghənə ə Enjìp.

¹⁷Ghɨ ghɛ ə Zhə̀fè tè nyɔ̀ʼsə tɔŋve sê ghənə sə pìŋ m̀ghɨm kyàʼ, nyi əghɨ ghɛ ə ghənə tè nəyn pi ə pfɨ̀ə kwuə elùʼ ashəshəve.

¹⁸Ə̀ tè nyì kepî sê ghɨ nə ghɨ̂yn ə ghe tè tɛ è tuke nyî, ə Zhə̀fè tè kàynte nə, “Ghənə vayn tə nji elùʼ vɛ ə m tè nyi se tə fo àzɨ̀tè sê ghənə ətəyn.”

¹⁹Nyiəmə, zɨnə mə ə nə̀ nə ghənə vayn kàʼa nji fumə elùʼ kûmə̀ nə ghənə tè pomə̂ va sê Zhə̀fè.