Read Mmen Njə̂m 5 Bible Online

Njə̂m 5 - Mmen bible

Njə̂m 5

¹Ghàyn ghɨ ekɛghe, ghàyn zɨte! Ghàyn e pɨa chîə nâʼà sə ŋaŋ kûmə̀ nə ngəʼ èghaʼâ nyiə pə̂ sê ghàyn əshi.

²Fɨa vɨ̂yn ə ghàyn kyi nyi tə fîə. Shɔshɔʼve tə kwɨlə sèndzɨs saynse.

³Kɛ mâyn mɛ ə ghàyn fɛte ə ngôl è silvà tə chîa. Ghaʼ nə zɨnə tə tyəmə̂ kə tsɛ̀ èsaʼ se ghàyn ə fetuʼ fə saʼfe, kè kə fɨake chya ke ə pofə, è kə wusve pofsə fɨave, ə̀ nyì kepî zamə kə Zhə̀fè tə pɔynsə ghàyn. Ghàyn ə zomə̂ ndəm kɛ̂mè sə ndô mə shîŋə̀kè ə tɨmsê kə Zhə̀fè saʼ mbi.

⁴Ghɨghe ə tə fə̀ ə ghàyn ə mfùʼ, ghàyn ə tàʼa ndàʼ ə ghənə, ghənə ə chîə sê Zhə̀fè, chî ə ghənə̂zè ə ndùə fɨə ə Zhə̀fè atùŋne mə nyi Pɛ̂pɛ, pɛ̀ àtyaʼ akɨ̂m.

⁵Ghàyn ə ndam zaynze fa chi kè sə̂ zhiə àchûŋ è kɨsè sə nə̂ nâʼàpî èghɛ èkè zɛ ə wiyn vaynve kyiŋə. Ghàyn ə ghaʼlê kwəyn, sè nyi èpɨaʼtêzè sè tuʼ fɛ kə se ghàyn ətəyn.

⁶Ghàyn ə nə̀yn nə ghɨə saʼa pi nə ghɨ ghɛ ə nyi ndɔ̀ʼɔ nəyn ghɛ epize nyi mə ə nə̀yn pi, ə vɛ zhwi ghənə mə ghənə paʼà ŋaʼsê cho ə ghənə̂ghè se pì eghɛ.

⁷Ghàyn e wəynsə kə ndò wiynve ə ghɔnyì ghɨmə se zaʼâ kə Pɛ̂pɛ tə kɛse pə̂yn. Ghàyn fe kə wùə afûʼ fə̀ fûʼ ə vəynke ə zho, è ve wəynsə kə ndò wiynve se zaʼâ kə fɨazhiə vəyn ve chûŋvè ndəmə. È kyi se kol ətəm se lɨmtê kə pìŋ pfɨ, è kɨsè ghol etsɨə zɛ ə ze nə̂ tso tsɔ̀fə kə kwi.

⁸Ghàyn e wəynsə̂ kəpî, fɛtə̂ tɛ ə ghàyn epomə̂ kûmə̀ nə shîŋə̀kè ə paʼsê kə Pɛ̂pɛ kɛse pəyn.

⁹Kə ghàyn ə kwânə̀ sèngɨŋ saynse ə ghɔnyì ghɨmə kə Zhə̀fè tə tàʼa saʼ ghàyn. Zhə̀fè tyəm ke echò ndɛ nyi èpɨaʼtêzè se nji ə ndɛ.

¹⁰Ghɔnyì ghɨmə, ghàyn kwaʼte fɨ̀aʼtè sɛ ə se tè wàmne ə Pɛ̂pɛ ezə. Ghàyn nji ghənə kə ghɨ ə kaʼa səyne sê ghənə kə ghənə tè kol təmə zɨə ngəʼ mə ghənə wâmnə̀ va.

¹¹Ghàyn ke ndô nə ghàs njìə ə̀ghɨ ghɛ ə ghənə wəynsə wiynve nə Zhə̀fè ə pɔsê ghənə. Ghàyn ə tə zɨ kûmə̀ èwəynsê ewìyn ə Njopzè kə è tè wəynse, ghàyn ghɛ ə fe ghɛ zɛ ə Zhə̀fè tè nə̀yn sê vəyn ə kwùŋse, kûmə̀ nə Pɛ̂pɛ nyîə kosə̂ èsəyn, nə̂ chùŋ.

¹²Ghɔnyì ghɨmə, ghɛ eghaʼâzè ətəyn nyi nə, kə ghàyn tə kayn ezə ekwùtwəynze, kɨ̀sə achi, kɨsè nâʼàpî àfɨa kyîke. Ghɛ zɛ ə ghàyn kyi se pì kwùʼ nyi ke nə, “Èyn” ə̀ puzâ, “Ngaŋngaŋ” kə ə tə tàʼa pi nə o nə̀yn pofsê.

¹³Ə wùə sê ghàyn kyi tsôsvè è və tsə̀mə̀ ə Zhə̀fè tsamte vəyn, ə wùə sê ghàyn saŋnə, è ve zhəmə sènjàŋ, tsîtə̀ Fèzhə̀.

¹⁴Ə wùə sê ghàyn zafə, è və tɔŋɔ sèchəʼ sə ndɛ̂ Fèzhə̀sè ə se pə̀yn tsəm sê vəyn ə se kɨmne vəyn è ngwɨ̂l mə olìfmè ə Pɛ̂pɛ ezə.

¹⁵Ə ghənə piə ə tsə̂mə̀ ndò ə kyîə èkyî pomə̂zè nə Pɛ̂pɛ nə̀ tsuʼə wùə ə̀təyn, ə Pɛ̂pɛ tsuʼ vəyn ə e ndwise vəyn ekwì ezafəve, ə̀ nyi pî mə è tè nəyn pi, ə lɛse fo vəyn.

¹⁶Nyiəmə, ghàyn e tsâ sèpi saynse sê ngɨŋ saynse, tsə̂mə̀ sê ngɨŋ saynse kə Zhə̀fè ə tsuʼə ghàyn. Tsə̂m ə wûə ə̀ chichize nyîə kyi kàyntè àtyaʼ, nə̂ ghɛ ə kayntəghe e kyânə̀.

¹⁷Èlanjà tè nyi kepî wùə m̀sɔ̀ŋ kə ghâsènì, pîza ə tsə̀mə̀ faŋsə̂ nə kə gholze tso, ze ə tàʼa tso sə sepìŋ sèta è pɨaʼke.

¹⁸È və fɨnə tsə̀mə̀ nə gholze tso, ze ə tso ə nə̀ chike ə pɔynə̂, fɨazhiəve endəmə̂.

¹⁹Ghɔnyì ghɨmə, ə wùə sê ghàyn ndò zâ səmɔʼ, wùə ə̀ mɔʼɔ ə kɛsə̂ pə̂ è vəyn,

²⁰è və kê nə ə naʼapi ndè nə̀yn nə wùə èpi kɛse ə è və fɨnə zɨtə̂ səmɔʼ, ə è sɔse vəyn se kwuze ə è nəyn nə Zhə̀fè lɛse fo sèpi sə vəyn sɛ ə è nyi mə è və nə̀yn.