Read Mmen 1 Pità 3 Bible Online

1 Pità 3 - Mmen bible

1 Pità 3

¹Zənə ghàyn pɔŋ tsosê sèngɨŋ saynse əchi sə̂ zɨə sê ndom ghaynghe. Ə ghàyn nə̀ nyi, ə ndam techûŋ taynte kaʼa ə te nəyn ə ndom ghayn ghɛ ə ghe tàʼa nyìəmə pomə, kwiyne təm ə ghənə̂, ə pomə sê Zhə̀fè ndɔ̀ʼɔ ghàyn fɨyn pi pî èghɛ sê ghənə,

²kûmə̀ nə ghənə nə̀ fe kə ndam taynte tsɔ̂fə̀ fɨnə zo.

³Ə kyi va sə̂ fe nə ghàyn tsɔ̀fə̀ ndò kûmə̀ èlaf ewìynze echûŋ zaynze. Tsɔ̂f zaynze kyi va sə̂ nyi kûmə̀ àtu kə ghàyn tɔ̀ʼ fɛte, va kûmə̀ sèchaʼ kə ghàyn chìŋtə̀ mə ə fɛte è ngôl, va kûmə̀ sèndzɨs sechûŋsè kə ghàyn màʼ.

⁴Tsɔ̂f ətəynze pɨl kyi sə̂ nyi ə ghàyn ə tendam. Kyì etsɔ̀f nə zɨ̂nə̀ mə mə ze mɨsə̂ va nyi se wùə vɛ ə è kyi zuʼse pɔynəse, zɨnə mə nyîə kɔʼnə̂ ə Zhə̀fè əshi nâʼà sə ŋaŋ.

⁵Ə̀ vɨnə nyi endom vɛ ə zənə etuʼ ə shiə ghɛ ə ghe tè kɔʼse Zhə̀fè, kyi èkwaʼtè elɨmtəze sê Zhə̀fè tè lafə ətəyn. Ghənə tè nyîə tsosə̂ sèngɨŋ sə ghənə̂sè əchi zɨə sê ndom ə ghənə̂ghè.

⁶Sèla tè ndamə kə èndam nə zɨ̂yn, zɨə ndom ə̀ vəyn Aplàghâm fɨnə tɔŋtə̂ vəyn nə pɛ̀ àpɨəyn ə̀ vəyn. Ə ghàyn nə̀yn ghɛ zɛ ə̀ nyi eghɛ echûŋzè ə tàʼa zà nə ghɛ zhîze faynse ghàyn, ə ghàyn ə nyi ə̀ghɔ Sèla səmɔʼ.

⁷Ndômnèghè, ghàyn è pɔŋə ndamə è zhwi ghaynghe ke nə ghənə tɛ va kə ghàyn. E za nyi nə, ghàyn kyi sə̂ tɔ̂ʼnə̀ è ghənə kûmə̀ nə Zhə̀fè tə tsɨ̂yntə̀ fo èndam zɛ ə ze tə mîə va kè sê ghàyn ə̀kɨ̂m. Ghàyn e ndamə nyiəmə kə ghàyn ə piə ə tsə̂mə̀ ndò, ghɛze e tâsə̀ va tsə̂m zaynze.

⁸Se kwùŋsè, ghàyn e tsɨ̂yntè kyi ke èkwâʼtè èmɔ̀ʼ, kosə̂ èsəyn, kɔ̂ŋɔ̀ sèngɨŋ saynse, kyi ə̀təm əchûŋə̀ fɨyn kyi va ghaŋsê ewìynze.

⁹Ə̂ wùə nə̀yn pi sê ghò, kə ò nəyn pə̀ynsè, ə sòylə̀ ghò, kə ò soyle pə̀ynse. Ò kyi ke sə̂ pɨlə tsə̂mə̀ nə Zhə̀fè pɔse kyì ə wùə nə vɨ̂yn kûmə̀ nə ə̀ nyi epɔsê nə zɨ̂nə̀ ə fe tè tsɨ̂nè se fo sê ghò etuʼ vɛ ə fe tè chɔʼ ghô.

¹⁰E nyi nyî kûmə̀ nə ə nyàʼ ə Ŋwàʼlè ə̀ Fèzhə̀ nə: “Ə wùə kɔ̂ŋɔ̀ sə̂ ndamə àchûŋ, fe kə ghɛ əchûŋghè kyànə̀ sê vəyn shîŋə̀ tekɨ̂m, kə è və wâmnə̀ wâmnè epize, kə è və wâmnə̀ wâmnè akaŋze.

¹¹Wùə nə vɨ̂nə kyi se màʼà ewâmnè epize, è kɨsè se zamàʼà ewam akaŋze sə̂ nə̂ chùŋ. È kyi se kyiŋə tendom tèkɨ̂m se kyiə pɔ̂ynè,

¹²kûmə̀ nə Pɛ̂pɛ nyi mə fe ə ndə̀m shize sê ghɨ ghɛ ə ghe ndamə chichi, è kɨsè sə̂ zɨtə̂ ètsə̂m ə ghənə̂zè, pîza ə pə̀ynsə̀ tsɨ̀m sê ghɨ ə ghɛ epiə.”

¹³Ə ghàyn mɔ̀msə̀ nâʼà è tyaʼa sə̂ nə̂ ə̀ghɛ əchûŋghè, ə wùə ə vayn kaʼa è nəyn ghɛ epize sê ghàyn.

¹⁴Pîza ə ghàyn fe ngəʼ kûmə̀ nə ghàyn nə̀ ə̀ghɛ chichi, ə Zhə̀fè pɔse ghàyn. Ə nyàʼ ə Ŋwàʼlè ə̀ Fèzhə̀ nə, “Kə ghàyn ə fânə̀ ə̀ghɨ ghɛ ə ghe nə̂ ghɛghe se nə̀yn nə ghàyn ə fânə̀ èghɛ zɛ ə ghənə kaʼa nəyn sê ghàyn. Kə ndɨmke ə tsɛ̂ ghàyn.”

¹⁵Ghàyn e pɨlə ngɨmnə̂ Klâys kə Pɛ̂pɛ ə ghàyn ətəm. Ghàyn e tsɨs shîŋə̀ tekɨ̂m, pfɨ̂tə̀ se fɨ̀ysə nâʼàpî ndè ezhoghɛ è pfɨf ghɛze kûmə̀ èkwaʼtè elɨmtə zɛ ə ghàyn kyi ə ghàyn ətəm. Ghàyn e nə̂ nyi è pɔynə̂, è kɨsè ngɨmnêzè.

¹⁶Ə ghàyn piə nə̂ nyi, ghàyn e nə̂ è təm əzo, kə nâʼàpî ghə ndè ghɛ ə ghənə wâmnə̀ wâmnè te pite kûmə̀ èndam èchùŋ zayn zɛ ə ghàyn kyi kə ghɨ ghɛ ə ghe chùmtə̀ Klâys, nə ghomə̂ ə ghɛ ghɛ ə ghənə pîə.

¹⁷E pɨlə tsɔ̂fə̀ sə̂ fe ngəʼ kûmə̀ ə̀ghɛ chûŋə̀ kə wùə nə̂, ezhoghɛ ə̀ nyi eghɛ zɛ ə Zhə̀fè kyiŋə̀, tsɛ̂ sə̂ fe kûmə̀ ə̀ghɛ piə.

¹⁸M pîə nyî kûmə̀ nə Klâys tè kwu ke shîŋə̀ze emɔ̀ʼ ətû ə̀ghɨ̀ ə pighe. È tè nyi wùə ə̀ chichi, ə kwuə kə è kàʼa è nji pəyn è ghâsènì sê Zhə̀fè. Ə̀ tè zhwi vəyn pîza Zuʼsə Fezhə̀sè ə nə̀ è və zòmə̀.

¹⁹Zuʼsə Fezhə̀sè ə tsàmtə̀ kəpî vəyn kə è ndu ndâʼà tom ə Fèzhə̀ se zuʼ sɛ ə se nyi ə ndɛ ə̀chaʼ,

²⁰mə za nyi sezuʼ sə əghɨ̀ sɛ ə ghe tè zɨə va Zhə̀fè nâʼà sə mɨ kə Zhə̀fè tè lɨmtə è wəynsê ewìynze kə Nuwà tè pɛ ngwùʼ èghaʼâ. Ə̀ tè kwùʼ nyi ke ə̀shi əghɨ̀ghè nyì kə ghe tè nji ə ngwùʼ; ghənə tè nyi ə famə kə Zhə̀fè tè sɔ̀zâ tɔynə̂ mmò.

²¹Mô nə mɨ̂yn tyəm kə mmo mɛ ə ghàyn fiə ndâyn, m̀ sɔzâ kəpî ghàyn; fiə mmò nə zɨ̂yn vachi se shuə tsɨ̀sè eliŋ ewìynze pîza ə̀ nyi etsɨ̂nè zɛ ə ghâsènì tsɨ̀nè sê Zhə̀fè mə təm ə ghasènìghe saʼa va ghâsènì. Fi mmò nə zɨ̂yn sɔ̀zâ ghàyn tɔynə̂ ezômə̀ ə Njisə̀s Klâyszè.

²²È və zòmə̀ ə kɛsə kɔʼɔ ekwùtwəyn, sè tsɨs zôyn ə Zhə̀fè ekɔyntwɔve, saʼa sètsì sèkɨ̂m, fɨnə saʼa sèzuʼ sèkɨ̂m sɛ ə se kyi twɔʼve.