Read Mmen 1 Pità 4 Bible Online

1 Pità 4 - Mmen bible

1 Pità 4

¹Kə ghâsènì kàyne ke nə Njisə̀s Klâys ə tə fe ngəʼ achaʼ ewìynke, ghàyn pɔŋ tɛsê àtyaʼ è èkyì ekwâʼtè zɛ ə è tè kyi, kûmə̀ nə nâʼàpî ndè vɛ ə è fe ngəʼ ə vəyn ə njà èwìyn fɨnə nə̂ va pi.

²Famə endom, ə ghàyn tə tàʼa ndamə mɨ̀sè endam zaynze fâ əchi endom vɛ ə njà sewìynse kyiŋə, ə ghàyn ə pɨlə ndamə kè kə̂ Zhə̀fè kyiŋə.

³Ghàyn se nyi mə ghàyn ə pofsê shîŋə̀ tsɨəke sə mɨ, ndamə kə ghɨ ghɛ ə̀ vachi ə̀ghɨ Njûsghè. Ghàyn tè ndamə tendamte nyələte, shi ghaynghe e tsɨlə, ghàyn mɨə m̀lɨ̂ m̀ me ko ghàyn ə ndùə elùʼ azhi, ghàyn e nə̂ kə kə sepu, səynə̂ èwiyn èlɨ̀ mə èmɨəm, è ngɨmnê èfɨaʼsèzè ə tendom teghoməte lâŋ ə Fezhə̀kè e pomə̂ va.

⁴Zôyn, ghɨ ghɛ ə ghe ke va Zhə̀fè nyi è kaynze nə ghàyn fɨyn va əmɔʼ sə ndamə kə senyam sə mbvɨyn sɛ ə vayn kàʼa chise. Zɨnə mə ə nə̀yn, ghənə ghɛ ə kɛse sè sôylə̀ ghàyn.

⁵Pîza, tuʼve tə pə̂ kə Zhə̀fè saʼ ghɨghe ə̀kɨ̂m, ghe twɔghe è ghe kwutəghe. Ghənə tə tsâ echo ghənə̂zè sê Zhə̀fè, ə fɛ ə fe nyi èpɨaʼtêzè se saʼ əghɨ ghɛ ə ghe nyi etwɔ, è ghɛ ə ghe nyi mə ghə kwu.

⁶Ə̀ za nyi eghɛ zɛ ə tè pɔŋ tsayn tom èchùŋ nâʼàpî se ghɨ kwutəghe, pî kə ghɨ ə pighe nyi mə ə saʼ ghənə, ə pìə nə ghənə ə pfɨ̀ saʼ, pîza zuʼsə Fezhə̀sè tə nə̂ ə ghənə kyi ndamze mə ze tə mîə va.

⁷Ghɛghe əkɨ̂m fa mbi zo paʼsə̀ pə̀ se mì, zamə ghàyn e fɛtə̂ kyîə sèngɨŋ saynse, nyi èpfɨ̂tə̀zè kə ghàyn kàʼa tsə̂mə̀.

⁸Nâʼà èghɛ etɛ zɛ ə ze nyi nyi nə ghàyn e ndɨŋə kɔ̂ŋɔ̀ sèngɨŋ saynse kûmə̀ nə kɔ̂ŋzè nyîə kɨəytə̂ sèpi se tsɨ̂ə kə nyî.

⁹Ghàyn e fɛtə fiə ə̀ ghɔnyì ghaynghe ə ghàyn ə sendɛ, fiə kə nâʼà è təmze emɔ̀ʼ, shwinə̂ va.

¹⁰Zhə̀fè ə pɔse ghàyn ə fo tefo ə tekyì ə tekyì. E za tyə̀nə̀ nə nâʼàpî ndè kyi sə̂ njiə èfo ə vəyn zɛ ə Zhə̀fè fo nə̂ chùŋ sê ghɨə mɔ̀ʼɔ ghə ətəyn kə ghɨ fɨaʼa əchûŋ ə Fezhə̀ghè.

¹¹Ə wùə ndàʼà ghɛ ə Fezhə̀zè, è ve ndàʼà kə nâʼà èghɛ zɛ ə ze ndò pə̂yn sê Zhə̀fè. Ə wùə nyi wufɨ̀aʼa, è ve fɨ̂aʼà è tyaʼ kɛ ə Zhə̀fè fo sê vəyn. Ghàyn e nə̂ kə nyi kə ghɨghe ə tsîtə̀ Fèzhə̀ tɔynə̂ ə Njisə̀s Klâys vɛ ə è kyi pomsêzè è tyaʼke sə teshìŋə̀ tèkɨ̂m. Ə zə nyi ke zamə.

¹²Soyn sɨmse atyaʼse, kə ghàyn ə nyi è kayn kə mɔ̂m ekwəmnəze pə̂ sê ghàyn, kəpiə ə̀ nyi eghɛ efe zhîzè ə ze pə̂ se ghàyn.

¹³Ghàyn e pɨlə saŋnə̂ nə ghàyn pɔŋɔ fe ngəʼ kèpi kə Klâys kə è tə pî è kɛsə̂ pə̂ endom ekayntə vîve, ə ghàyn ə saŋnə̂ nâʼà sə ŋaŋ.

¹⁴Ə ghɨ sôylə̀ ghàyn kûmə̀ nə ghàyn nyi sechùmtè sə Klaysè, ghàyn e saŋnə kə ndò kûmə̀ nə zɨ̂nə mə tyə̂nə̀ nə Zuʼsə Fezhə̀ sɛ ə se kyi tyaʼke nyîə nyi è ghàyn.

¹⁵Kə wùə sê ghàyn tə nəyn è və fe ngəʼ mə è zhwi wùə, kɨ̀sə è chɔŋ ndô, kɨ̀sə è nəyn ekyì eghɛ epi zhîze, kɨ̀sə è ndzɨse echô vəyn ə wùə eghɛ.

¹⁶Pîza, ə wùə sê ghàyn fe ngəʼ kûmə̀ nə è chùmtə Klâys, kə è ghomə, ə è və pɨlə kɔʼsə̂ Fèzhə̀ kûmə̀ nə è pomə̂ ə ezə ə Klâyszè.

¹⁷E nyi nyiə kûmə̀ nə shîŋə̀kè ə kwəyn kə Zhə̀fè saʼ mbi, È ve nyi se zhə̀tə̀ è ghɨ vəynghe. Mə ə fe zhə̀tè se saʼ ə ghâsènì sə shi, ə ze tə pəyn ə ze ə nyi zàyn sê ghɨ ghɛ ə ghe tàʼa pomə̂ ə tom èchùŋ zɛ ə è ndò sê Zhə̀fè ə?

¹⁸Kə nyi mə ə nyàʼ ə ŋwàʼlè ə̀ Fèzhə̀ nə: “Ə ze tɛ sê ghɨ echûŋə se sɔ fɨ, e tə nəyn ə ze ə nyi nâʼà zayn sê ghɨ ghɛ ghe ke va Zhə̀fè nə̂ pi ə?”

¹⁹E za nyi nə ghɨ ghɛ ə ghe fê ngəʼ, mə ə̀ nyi ekɔ̂ŋ ə Fezhə̀zè nə ghənə fe ngəʼ, kyi se fo kə sèngɨŋ sə ghənə̂sè nâʼà sèkɨ̂m se Zhə̀ fɛ ə fe pom ghənə, ə ghənə faŋ ə nə̂ kə chùŋ.