Read Mmen 1 Njɔyn 1 Bible Online

1 Njɔyn 1 - Mmen bible

1 Njɔyn 1

¹Ghàs tsà sê ghàyn kûmə̀ tom zɛ ə è fo ndamze. Tom nə zɨ̂yn tè nyì ndò tsɔ̀fə kə mbi zhə̀te. Ghàs ə tè zɨ kə è tè wàmnə̀ sə ghàs ə ngɨŋ, ə fe kə nâʼà vəyn è shi ghasə ə fɨnə kûmə̀ kə nâʼà vəyn è gho ghasə sè wâmnə̀ zôyn kûmə̀ vəyn.

²Tom nə zɨ̂yn ə è fo ndam zɛ e tə mîə va nyî, tè tyəyn ngɨŋ ə vəyn, ghàsə fe sè tyəm kə setsɛ̀ èsaʼ sê Vəyn. Ghàs wàmnə̀ sê ghàyn kûmə̀ tom nə zɨ̂yn kə è tè nyì yî Pɨ̀a, ə nə̀ nə ghàs ə ke Vəyn.

³Ghàs tsà ə̀ghɛ ghɨ̀nə̀ sê ghàyn, ə ghɛ ə ghàs nyi mə ə fe ə fɨnə zɨə, kə ə ghâsènì tsɨynte faŋ ke sə afɨa àmɔ̀ʼ ə ghâsènì è Pɨ̀a yî Va Vəyn Njisə̀s Klâys.

⁴Ghàs nyàʼà ə̀ghɛ nə ghɨyn sê ghàyn nyî kə ghe nəyn, ə ghâsènì kyi saŋnê zɛ ə ze kwəynə.

⁵Tom zɨ̀nə ə ghàs ndàʼà sê ghàyn zôyn nyi mə ghàs zɨ sê Njisə̀s Klâys. È nyi nə: Zhə̀fè nyi epayn, kyi va ghɛze se nə̀yn è lɨma nâʼà səkɔs.

⁶Ə ghâsènì sè piə nə ghasènìə ghə̀ Zhə̀fè nyì sə afɨa àmɔ̀ʼ pîza fɨnə kwîə alɨm, ə ze ə tyə̂nə̀ nə ghâsènì wamə àkaŋ, nə̂ va ghɛ zɛ ə ze nyi səmɔʼ.

⁷Pîza, ə ghâsènì kwîə əfètə̂ èpayn kèpi eghɨ kə Zhə̀fè nyi əfètə̂ èpayn, ə ghâsènì ə tsɨ̂yntè nyi ke sə afɨa àmɔ̀ʼ, ə ndə̂m mə̂ Njisə̀sə̀m, ə Va Fèzhə̀ shuə zosê ghâsènì ə ghâsènì ə sepi sekɨ̂m.

⁸Ə ghâsènì piə nə ghâsènì kyi va fɨ̂atə̀ fə pife ə ghâsènì endam, ə ghâsènì ə lesə̂ kə sèngɨŋ sə ghasènìse, səmɔʼ e va ə ghâsènì ətəm.

⁹Ə ghâsènì kyi komə̂ ewìynze kûmə̀ sèpi sə ghasènìse, ə Zhə̀fè lɛse fo sepi sə təynse, ə È shu zose ghâsènì nâʼàpî ə ghe vɛ e va chichi ə ghâsènì endam ə Vəyn əshi. È nə̀ nə̂ nyiəmə kûmə̀ nə È pìə pi nə ghɛ, È və nə̀ kə zamə.

¹⁰Ə ghâsènì pìə nə ə pâʼà nə̀yn pi, ə ghâsènì ə njiə vəyn sə wùə àkaŋ, tom ə vəyn e kyi va luʼve ə ghâsènì endam.