Read Mmen 1 Njɔyn 2 Bible Online

1 Njɔyn 2 - Mmen bible

1 Njɔyn 2

¹M nyâʼà əghɛ ghɨ̀yn sê ghàyn ə ghɔyn ghɨmə kə ghàyn ə fɨnə nə̂ va ghɛ ə piə. Pîza, ə nə̂ pîndè ghɛ epi, ə è və ke nə ghâsènì nyiə kyi wùə chichi, ə̀ nyi Njisə̀s Klâys, È ve chyatə̂ Pɨ̀a ə ghâsènì elùʼ.

²Ə̀ nyi vəyn vɛ ə tè fo sə efo kûmə̀ sèpi sɛ ə ghâsènì tè nəyn, È və kwuə se zhɔyn atu ə ghasènìke, ə̀ va ke ə ghâsènì ə tu, pîza sê ghɨghe ə kɨ̂m ə mbi.

³Ə ghâsènì ndə̀mə̀ lwɔ̂ŋ ə Fezhə̀vè, ə zə nyi səmɔʼ nə ghâsènì nyîə ke Fəynfe.

⁴“Ə wùə pìə nə e ke ndô Zhə̀fè”, pîza ndə̂mə̀ va lwɔ̂ŋ ə Vəynve, ə è və nyi wùə àkaŋ, səmɔʼ e va ə vəyn ətəm.

⁵Pîza mə ə ndə̀mə̀ pîndè ghɛ zɛ ə fe piə, ə kɔ̂ŋ zɛ ə è kyi sê Zhə̀fè ə nyi mə zə lwiyn kwəyn. Ə̀ za nyi endom vɛ ə ghâsènì ke ətəyn nə ə nyi sə afɨa amɔ̀ʼ ghasènìə ghə̀ Zhə̀fè.

⁶Ə̂ pìə pîndè nə zhi nyi sə “Afɨa àmɔ̀ʼ” yî Zhə̀fè, ə è və kyi sə̂ kwîə ə Njisə̀s Klâys ə tendom.

⁷M nyâʼà va lâŋa feke sê ghàyn ə soyn ghɨmə. M nyâʼà alâŋə mɨke, mə ghàyn tè nyîə kyi ə zhə̀te. Lâŋ ə mɨ nə kɨnə̀ nyi tom zɛ ə ghàyn nyi mə ə zɨ

⁸Pîza lâŋ nə kɨ̂yn ə m nyâʼà sê ghàyn ndam nyi ke àfe, mə səmɔʼ zɛ ə è nyì famə ətə̂ àlâŋ nyi mə fe tɔynə̂ Klâys endam, è kɨsè ətə̂ zaynze. Zɨnə mə nyi kûmə̀ nə lɨmke ə ndò ndu, payn ə səmɔʼ zɛ ze kâynè zhə̂tè se payn.

⁹Ə̀ pìə pîndè nə e ndamə epayn, pîza pa pânə̀ ànyìə vəyn, ə ze ə tyə̂nə̀ nə è pa ndamə kə alɨm.

¹⁰Pîza mə ə kɔ̂ŋɔ̀ pîndè ànyìə vəyn, ə ze ə tyə̂nə̀ nə è ndamə epayn, ghɛ zhîze va ə vəyn endam se nə̀yn nə wùə pfɨ əfètə̂ pi.

¹¹Wùə vɛ ə è panə̀ ànyìə vəyn ndamə alɨm, kwîə tsɛ̂ əfètə̂ alɨm, mə ke ə nə̀yn vəyn è ve fe va nə e ndùə ghayn zə.

¹²M nyâʼà ə̀ghɛ nə ghɨ̂yn sê ghàyn ə ghɔyn ghɨmə kûmə̀ nə Zhə̀fè ə lɛ̀sè fo pi saynse kûmə̀ èzə ə Njisə̀s Klâyszè.

¹³M nyâʼà ə̀ghɛ nə ghɨyn sê ghàyn ə pɨ̀aghe kûmə̀ nə ghàyn nyi mə ghàyn ə kê Vəyn vɛ ə è tè nyi ə zhə̀te. M nyâʼà əghɛ nə ghɨyn sê ghàyn ə ngwàʼ ə wùə kûmə̀ nə ghàyn se nyi mə ghàyn ə tɛ tsɛ wùə èpi.

¹⁴M nyâʼà əghɛ nə ghɨyn sê ghàyn ə ghɔyn ghɨmə kûmə̀ nə ghàyn nyi mə ə kê Pɨ̀a. M nyâʼà se ghàyn ə pɨ̀aghe kûmə̀ nə ghayn nyi mə ə kê Vəyn vɛ ə è tè nyi ə zhə̀te. M nyâʼà əghɛ nə ghɨyn sê ghàyn ə ngwàʼ ə wùə kûmə̀ nə ghàyn nyîə tɛ, ghɛ ə Fezhə̀zè e nyi ə ghàyn ətəm, mə ghàyn ə tɛ tsɛ wùə èpi.

¹⁵Kə ghàyn ə kɔ̀ŋɔ̀ mbi zɨ̀yn è fɨa vɛ ə ve nyi ətəyn. Ə̀ kɔ̂ŋɔ̀ pîndè mbi zɨ̀yn, ə ze ə tyə̂ynə̀ nə è kɔ̂ŋɔ̀ va Pɨ̀a,

¹⁶kûmə̀ nə nâʼàpî akè kɛ ke nyi afɨa ə mbike nyi afɨa kɛ ə wiynə ghasènìve kɔ̂ŋə̀, ə̀ nyi ə̀ghɛ ghɛ ə shiə kɔ̂ŋɔ̀ se fe, è ghɛ ghəkɨ̂m ə mbi ghɛ ə ghe nə̂ nə ghɨghe ə ghaŋsə̂ èwiyn. Ə̀ ghɨnə mə vachi ə̀ghɛ ghɛ ə ghe ndô pə̂ sê pɨ̀a, pîza mə ghe pɨl ndô pə̂yn ə mbi.

¹⁷Mbi tsɛ̂ ndò, paʼsə̂ è fɨa vɛ ə ghɨə nyɨŋə epàm ətəyn, pîza wùə vɛ ə è nə̂ kə kə̂ Zhə̀fè kyiŋə, tə nə̂ ə è və nyi yî Zhə̀fè shîŋə̀ tekɨ̂m.

¹⁸Ghɔyn ghɨm ghe kɔ̀ŋə̀, ə̀ zo nyi ə mtuʼ mə èkwùŋsə̂m. Ghàyn ə zɨ nə pàyn sə Klaysè tə pə̂, ghənə setsɨ̀ nyì zôyn mə ə pə̀yn. Zɨnə mə tyə̂nə̀ sê ghâsènì nə tuʼ me kwùŋsə̂ mə pə̀yn.

¹⁹Ghɨ ghɨ̀nə tè fɨ ə ghâsènì ə sendɛ sə Fezhə̀sè, pîza mə ghənə tè va afɨa àmɔ̀ʼ ghasènyìə ghə̀ ghənə. Ə̂ tè nyi kə ghənə ə nyi ə̀ghɨ ə ghasènìghe, mə ghənə ə tə faŋ ghasènyìə ghə̀ ghənə. Ə̀ tè nyì kə ghənə ndô, zɨnə mə ə tyə̀nə̀ ə ndayn nə ghənə əkɨ̂m tè va ghasè nyìə ghə̀ ghənə.

²⁰Pîza, vɛ ə Zhə̀fè kɨmne ndə̂m, è və fo Zuʼse Ŋwaʼase sê ghàyn, se ə pə̂ nâʼà sê ghàyn ə̀kɨ̂m nə ghàyn ə ke eghɛ zɛ ə ze nyi səmɔʼ.

²¹M nyâʼà va ghɛ ghɨynə̀ sê ghàyn kûmə̀ nə ghàyn ke va ghɛ zɛ ə ze nyi səmɔʼ, pîza m pɨlə nyâʼà kûmə̀ nə ghàyn nyi ə̀ ke ghəynghe, ke kepî nə kaŋke vayn kàʼa ə ke fɨ pəyn ə tə̂ səmɔʼ.

²²Wùə àkaŋ nyi nde? Ə̀ nyi wùə vɛ ə è pì nə Njisə̀s vachi vɛ ə Zhə̀fè chɔʼ ndə̂m. Nâʼàpî ndè vɛ ə è kwiynse Pɨ̀a è Vayn, nyi pàyn sê vɛ ə Zhə̀fè nyi mə fə kɨmnê ndəm.

²³Ə̂ kwiynse pîndè Vayn, ə nyi mə è və kwiynsê kepî Pɨ̀a. Pîza ə̂ pomə pîndè Vayn, ə nyi mə è və pomə kepî Pɨ̀a.

²⁴Ghàyn kyi se faŋə kə ezaʼlê zɛ ə tè zaʼle ghàyn ətəyn ə zhə̀te. Ə ghàyn nə̀yn nyiəmə, ə ghàyn faŋ sə afɨa àmɔ̀ʼ ghâyn ghə̀ Vayn, è Pɨ̀a.

²⁵Famə afɨa àmɔ̀ʼ, ə ghâsènì kyi ndam zɛ ə ze tə mîə va mə za nyi vɛ ə Zhə̀fè kɨmne ndə̂m tè tsɨ̀ne se ghâsènì.

²⁶M nyâʼà ə̀ghɛ ghɨ̀nə se ghàyn kûmə̀ ə̀ghɨ ghɛ ə ghe mɔ̂msə̀ se lesə̂ ghàyn.

²⁷Pîza, ghàyn nyi mə ə kyî Zuʼse Ŋwaʼase, se ndamə ə ghàyn ə fètəyn, kûmə̀ zɨnə mə, ghàyn fɨnə kyiŋə va nə wùə zaʼle ghàyn èghɛ zɛ ə ze nyi səmɔʼ. Kûmə̀ nə Zuʼse zaʼlə̂ ghàyn è nâʼàpî ghè vɛ ə ghàyn nyì se kê, mə ghɛ zɛ ə Zuʼse zaʼlə nyi səmɔʼ, ə̀ vachi àkaŋ. Zamə, ghàyn faŋ ke sə afɨa àmɔ̀ʼ ghâyn ghə̀ Klâys kə ə Zuʼse zaʼlə.

²⁸Ghɔnyì ghɨmə zɨnə mə tyə̂nə̀ nə, ghàyn kyi se faŋə kə sə afɨa àmɔ̀ʼ ghâyn ghə̀ Klâys kə shîŋə̀ kɛ ə È tə pə̂, ə ghàyn ə kyi ə̀təm ə tɛ, se tyə̂m ə və shi mə ə ghomə̂ va.

²⁹Ə ghàyn ke nə vɛ ə Zhə̀fè kɨmne ndə̂m nyi chichi ə Zhə̀fè əshi, ə ghàyn ə ke kepî nə nâʼàpî ndè vɛ ə è nə̂ ghɛ zɛ ə ze nyi chichi, nyi kepî va Fèzhə̀.