Read Mmen 1 Njɔyn 4 Bible Online

1 Njɔyn 4 - Mmen bible

1 Njɔyn 4

¹Ghɔ nyì ghɨm ghe kɔ̂ŋə̀, kə ghàyn ə pomə se nâʼàpî ndè vɛ ə è pìə nə zhi nyîə kyi sè Zuʼ, pîza ghàyn mom ghənə se fe nə zuʼ sɛ ə ghənə kyi ndo pə̂yn tê se Zhə̀fè ə. Kûmə̀ nə fɨ̀aʼtè sə akaŋse tsɨəse nyi ndô ə mbi.

²Ghɛ zɛ ə ghàyn kaʼa ə ghàyn nəyn se ke nə wùə kyi tê Sèzuʼ sə Fezhə̀ nyi nə, nâʼàpî ndè vɛ ə è pì nə Njisə̀s Klâys te pə̀yn ə mbi ewìyn ə wûə m̀sɔ̀ŋve, ə nyi mə è nyîə kyi Sèzuʼ sə Fezhə̀ sè.

³Pîza ə̂ kwiynse pîndè nə Njisə̀s tè paʼà pə̀yn famə endom, ə nyi mə è kyi va zuʼ sə Fezhə̀sè. Ə zə nyi nə zuʼ sɛ ə è kyi ndô pə̂ se pàyn ə̀ Klâys. Ghàyn ə tə zɨ nə se tə pə̂, se se kâynè nyi ndò ə mbi zôyn.

⁴Pîza ghàyn nyi ə ghɔ Fezhə̀ghè ə ghɔyn ghɨmə mə ghàyn ə nò zhi fɨ̀aʼtè sə akaŋse, kûmə̀ nə zuʼ sɛ ə se nyi ə ghàyn ewìyn nyîə kyi àtyaʼ ke tsɨ̂ə tsɛ̂ kə ghɨ̀ kɛ ə ghənə nyi ə mbi.

⁵Fɨ̀aʼtè sə akaŋse nyi əghɨ ə mbighe, ghənə wâmnə̀ ə̀ghɛ kûmə̀ ə̀ghɛ mbiə, mbi e zɨtə̂ sê ghənə.

⁶Pîza, ghâsènì nyi əghɨ ə Fezhə̀ghè. Nâʼàpî ndè vɛ ə è ke Zhə̀fè zɨtə̂ ndò se ghâsènì, nâʼàpî ndè vɛ ə è ke va Zhə̀fè zɨtə̂ va se ghâsènì. Ə̀ vɨnə nyi endom vɛ ə ghâsènì kàʼa ke sə nɨŋ ə̀ fètə̂ Sèzuʼ sɛ ə se nyi səmɔʼ è sɛ ə̀ nyì sə akaŋse.

⁷Ghɔnyì ghɨmə, ə ghâsènì ə kɔŋə̀ sèngɨŋ sə ghasènìse, kûmə̀ nə kɔ̂ŋè ndò pə̂ se Zhə̀fè. Nâʼàpî ndè vɛ ə è kɔ̀ŋə̀ nyi va Fèzhə̀, ke Fèzhə̀.

⁸Nâʼàpî ndè vɛ ə è kɔ̀ŋɔ̀ va ghɨə mɔ̀ʼɔ ke va Zhə̀fè kûmə̀ nə nâʼàpî èghɛ èkè zɛ ə Zhə̀fè nə̀ tyə̀nə̀ èkɔ̂ŋ zɛ ə È kyi sê ghɨghe.

⁹Zhə̀fè tè tyə̀yn ekɔ̂ŋ ə vəyn sê ghâsènì kə Fe tom Va Vəyn èmɔ̀ʼ ə mbi, kə ghâsènì ə kyi èndam tɔynə̂ sê vâ vəyn nə vɨ̂yn.

¹⁰Ndom vɛ ə ghâsènì kàʼa kê kûmə̀ èkɔ̂ŋ nyi nə, Ə̀ vachi nə ghâsènì tè kɔ̀ŋə ndô Zhə̀fè, pîza nə è tè kɔ̀ŋə ndô ghâsènì ə tomə Va Vəyn nə è pəyn kwu ə ghâsènì ə tu kûmə̀ sèpi sə ghasènìse.

¹¹Ghɔnyì ghɨm ghe kɔ̀ŋə̀, kə ze nyi nə Zhə̀fè tè nyîə kɔ̀ŋə tsɛsə̀ ghâsènì, ə zə tyə̂nə̀ nə ghâsènì kyi sə̂ kɔ̂ŋə̀ sèngɨŋ sə ghasènìse.

¹²Wùə pâʼà tyəmə̂ fe Fèzhə̀, pîza mə ghâsènì kɔ̀ŋɔ̀ ngɨŋ sə ghasènìse, ə Zhə̀fè ə nyi sə afɨa àmɔ̀ʼ ghasènyìə ghə ghənə, kɔ̂ŋ ə Vəynze e nyi mə zə lwiyn ə ghâsènì endam.

¹³Ghâsènì nyiə ke nə ghâsènì ndamə sə afɨa àmɔ̀ʼ è Zhə̀fè, è kɨsè nə Zhə̀fè ndamə sə afɨa àmɔ̀ʼ è ghâsènì, kûmə̀ nə È və fo Zuʼ sə Vəynse sê ghâsènì.

¹⁴Ghâsènì ə fe, tsâ ndûə se ghɨə mɔ̀ʼɔ nə Pɨ̀a ə tə tom Va vəyn nə è və nyi sɔ̀zà ə̀ mbi.

¹⁵Nâʼàpî ndè vɛ ə è pì nə Njisə̀s nyi Va Fèzhə̀, è və nyi sə afɨa amɔ̀ʼ yî Zhə̀fè, Zhə̀fè e nyi sə afɨa amɔ̀ʼ yî vəyn.

¹⁶Nyiəmə, ghâsènì ke ndô, fɨnə pomə̂ nə Zhə̀fè nyîə kɔ̂ŋə̀ ghâsènì. Zhə̀fè nyi ekɔ̂ŋ, mə ghɨ ghɛ ə ghe ndamə ekɔ̀ŋ, ndamə sə afɨa àmɔ̀ʼ yî ghə̀ Zhə̀fè, Zhə̀fè endamə sə afɨa àmɔ̀ʼ yî ghə̀ ghənə.

¹⁷Kûmə̀ nə ghâsènì nyì sə afɨa àmɔ̀ʼ ghasènyìə ghə̀ Zhə̀fè, kɔ̀ŋ zɛ ə ghâsènì kyi ə ghâsènì ə təm ndəmə̂ ndûə ndò se lwiyn ə kwəyn. Nyiəmə, ghâsènì tə nə̂ ə fânə̀ va ə fetuʼ fə saʼfe pîza ghâsènì tə nə̂ ə kyi ə̀təm ə tɛ se tyəmə̂ ə Zhə̀fè əshi, kûmə̀ nə ghâsènì ndamə kə kə̂ Klâys fa mbi.

¹⁸Fâynzè va əfètə̂ èkɔ̀ŋ. Kɔ̂ŋ zɛ ə̀ nyi kàyntè èkɔ̀ŋ nyiə chûmə̀ fɨsə̂ èfâyn. Ghɨ ghɛ ə ghe fânə̀, fànə̀ kə kûmə̀ nə ə nə̀ pɔynsə̂ ghənə.

¹⁹Ghâsènì kɔ̀ŋə̀ sèngɨŋ sə ghasènìse[1] kûmə̀ nə Zhə̀fè ə tə kɔ̀ŋ ghâsènì sə shi.

²⁰Ə ghâsènì pìə nə ə nyiə kɔ̂ŋə̀ Fèzhə̀, pîza pâynə̀ ə̀ghɨ mɔ̀ʼɔghe, ə ghâsènì ə nyi ə̀ghɨ akaŋə. Kûmə̀ nə ghâsènì vayn kaʼa kɔŋ Zhə̀fè mə ə paʼà fe Fəynfe, mə ghâsènì kɔ̀ŋə̀ va ghɨ ghɛ ə ghâsènì fe.

²¹Lâŋ kɛ ə Klâys nyi mə È və fo sê ghâsènì nyi nə, Nâʼàpî ndè vɛ ə è kɔ̀ŋə̀ Zhə̀fè kyi sə kɔ̂ŋə̀ kəpî ə̀ghɨ mɔ̀ʼɔghe.