Read Mmen 3 Njɔyn 1 Bible Online

3 Njɔyn 1 - Mmen bible

3 Njɔyn 1

¹Ə nyâʼ mi chəʼ ə ndɛ̂ Fèzhə̀, sê soyn vɨ̂m Ngayùs vɛ m kɔ̂ŋɔ̀ səmɔʼ.

²M tsə̂mə̀ nə nâʼàpî èghɛ èkè ə ndùə kə achûŋ sê ghò ə soyn vɨ̂m vê èkɔ̀ŋ, fɨnə tsə̂mə̀ nə ò ə nyi ke nâʼà ewiyn e twɔve kèpi endom vɛ ə ò nyi ətəyn ə sezuʼ.

³Ghɔnyì yîghe tè pə̀yn tsâyn sê mi nə ò nə̀ kə nâʼà èghɛ zɛ ə ze nyi səmɔʼ, tyəm ke eghɛ zɛ ə ze nyi səmɔʼ, m saŋnə̂ nâʼà sə ŋaŋ.

⁴Ghɛ zhîze va ə ze kaʼa ze nəyn, ə m fɨyn tɔʼ saŋne tsɛ̂ kə m zɨ nə ghɔyn ghɨmə tyəm ke eghɛ zɛ ə ze nyi səmɔʼ.

⁵Ò fɛtə̂ nə̂ kə èfɨaʼ zɛze sê ghɔ nɛ̂ ghè ə soyn vɨ̂m ve kɔ̀ŋ nâʼàpî ezhoghɛ ghənə nyi əghɨ mə ò ke va ghənə.

⁶Ghənə tsàyn kɔ̂ŋ zɛ ò kyi sê ndɛ̂ ə̀ Fèzhə̀ zɛ ə è nyì fâyn. Nə̀yn nə kwîə ə ghənə̂zè ə nyi achûŋ endom vɛ ə Zhə̀fè kyiŋə.

⁷O nə̂ nyi, kûmə̀ nə ghənə ə tə fɨ kwîə nə̂ ndûə èfɨ̀aʼ ə Klâyszè, nə̂ za, pomə̂ va tsàmtè mə ze ndò sê ghɨ ndɔ̀ʼɔ ghe pomə.

⁸E za tyə̀nə̀ nə ghâsènì ghɨ ə pomə kyi sə̂ tsâmtə̀ tèkì tə ghɨ nə tɨnə nâʼà àchûŋ kə ghâsènì ghə̀ ghənə ə fɨaʼà se ndaʼà tom zɛ ə è nyì səmɔʼ.

⁹M tè nyàʼ ŋwàʼlè sê ndɛ ə̀ Fèzhə̀ zâynzè, pîza Ndûətifìs vɛ è kyiŋə sə nyi àtu əghɨ̀ ə poməke ə tə nə zhi zɨtə̂ va ghɛ zɛ ə m pîə ətəyn.

¹⁰M tə pə̀ nâʼàpî ashìŋə̀ àkè ə m tsàyn sê nɔ̂yn əghɨ̀ ə poməke ghɛghə kɨ̀m ghɛ ə è nə̀ mə ghe nyi etipì. M tə tsâ ə̀ghɛ ə kwəmnə ghɛ ə è pì kûmə̀ ghâsènì è kaŋ kɛ ə è wam. È tè nə̂yn zâ ze ə tàʼa mìə kə zamə. È tə sə̂ fiə ə̀ ghɔ nyiə fɨnə tâmtə̀ əghɨ ghɛ ə kyiŋə sə̂ fiə, chûmə̀ fɨsə ghənə ə anɔ̀yn ə ghɨ ə poməke.

¹¹Kə ò tə səyne èghɛ epi ə soyn vɨm ve èkɔ̂ŋ, ò pɨlə səynə kə ze chûŋzè. Nâʼàpî ndè vɛ ə è nə̂ ghɛ e chuŋè nyi vayn sê Zhə̀fè. Vɛ ə è nə̂ ghɛ ə pighe ke va Zhə̀fè.

¹²Ə̀ pə̀ pîndè wàmnə̀ kə achûŋ kûmə̀ Ndèmitiyùs. È nə̀ ə̀ghɛ ghɛ ə ghe nyi səmɔʼ, zɨnə mə echwîtə̀ nə è nyi wùə èchùŋ. Pî ghàs wàmnə̀ kə àchûŋ kûmə̀ vəyn. Ò nyi ə ke nə ghɛ zɛ ə ghàs pìə kûmə̀ vəyn nyi səmɔʼ.

¹³M nyîə kyi ə̀ghɛ ghe tsɨ̂ə kə nyi se pì se ghò, pîza kɔ̂ŋɔ̀ va se nyàʼ ndò ghɛ nə ghɨ̂yn.

¹⁴M kwàʼtə̀ se pə fe ghô kè fa mtuʼlə̂. M pə̂, kə ghasè ghò fe shwi m̀shwi, ə kâte kɔʼ ndu ə̀ghɛ ətəynghe.

¹⁵Ə pɔ̂ynè ə̀ Fèzhə̀ ə nyi sê ghò. Soynsə ghâsènì sɛ ə se nyi fâyn tomə ètɔŋtê se ghò. Tɔŋte sɛ ə se nyi fɛ sê mi.