Read Mmen Etyə̂yn ə paynsêzè 1 Bible Online

Etyə̂yn ə paynsêzè 1 - Mmen bible

Etyə̂yn ə paynsêzè 1

¹Ə̀ fâ ŋwàʼlè nyi əghɛ ghɛ ə Njisə̀s Klâys tè tyə̀yn paynsê se Njɔyn. Zhə̀fè tè fo əghɛ ə tyə̂nə̀ paynsə̂ nə ghɨnə̀ sê vəyn nə è tyəyn sê ghɨ ə fɨaʼa vəynghe kə ghənə nə ke ə̀ghɛ ghɛ ə ghe nyi se nə kwùʼə kyàyn. Ə̀ tè nyi kə è kyiŋə nə ə ke ə̀ghɛ nə ghɨ̂nə̀, è və tomə tsì ə̀ vəyn sê Njɔyn, ə̀ nyi kepî wùə è fɨ̀aʼa ə vəyn vîvè.

²Njɔyn ə tə tsàyn ghɛ ghɛ ə è tè fe nâʼà ə̀kɨ̂m, mə ghɛ zɛ ə è tè fe tè nyi ewâmnè ə Fezhə̀zè è kɨsè səmɔʼ zɛ ə Njisə̀s Klâys tè wàmnə̀ kûmə̀ zə̂ynzè.

³Pɔsêzè nyì sê wùə vɛ ə è tɔŋə ghɛ ghɛ ə nyi fa ŋwàʼlè. Pɔsêzè e nyi sê ghɨ ghɛ ə ghe zɨte tom zɛ ə è nyì fa ŋwàʼlè əghɛ ghɛ ə ghe tə kyânə ə ndə̀mə̀ èghɛ zɛ ə nyi mə ə nyàʼ famə ə ŋwàʼlè, kûmə̀ nə shîŋə̀kè ə paʼsê kə ghɛ nə ghɨnə mə əkɨ̂m kyayn.

⁴Ŋwàʼlè zɨ̀nə ndò sê mi Njɔyn mə è ndùə sê ndɛ sə Fezhə̀sè esɛ̀mbɛ sɛ ə se nyi ə Esiyà. Ə Zhə̀fè tyəyn fùʼ ə vəynke sê ghàyn ə è nəyn ə ghàyn ə ndamə è pɔ̂ynè. Ə̀ nyi fəynfe ə fe nyi, mə fe tè nyiə nyi, pa nyi se tə pə̀yn. Fùʼkè è pɔ̂ynè nə zɨnə ndò pəyn kepî sezuʼ sɛ esɛ̀mbɛ ə se tyəm ə vəyn ashi ə fekyə̀ fə tefɔ̀ynfè,

⁵è kɨsè sê Njisə̀s Klâys ə vɛ ə è tsà kə ghɛ zɛ ə è fe. Ə̀ nyi wùə ə shi vɛ ə tè zòmse ekwu, ə̀ nyi kepî vəyn vɛ ə è nyi fɔ̀yn se fɔ̂yn tə mbi tekɨ̂m. È kɔ̂ŋɔ̀ ghâsènì, mə tɔynə̂ ə vəyn ekwu, e və sɨsə̀ m̀ndəm mə Və̂ynmè se sɔzà ə ghâsènì ə ghâsènì ə sepi,

⁶ə nə̀ nə ghâsènì ə nyi ə̀ghɨ endaʼ èkɔʼsə nə eshyə̀ghè mə ghe fɨaʼà sê Zhə̀fè ə vəynfe mə za nyi pɨ̀a vəyn. Pomsêzè è tyaʼke nyi sê Njisə̀s Klâys sə teshìŋə̀ tèkɨ̂m. Ə zə nyi ke zamə.

⁷Ghàyn fe kə, è vɛ è pə̂ əfètəyn sembàʼ, nâʼàpî ndè e nyi se fe vəyn, paʼsə̂ è ghɨghe əkɨ̂m ghɛ ə ghe tè so vəyn èghɔŋ. Nâʼà ə̀ghɨ ə̀kɨ̂m ə chi tə nə̂ ə chìə kûmə̀ vəyn. E nyi ke nâʼà səmɔʼ! ə zə nyi ke zamə.

⁸Pɛ̂ Zhə̀fè pi nə, “M nyi zhə̀te fɨyn nyi kwùŋse. Ə̀ nyi fəynfe ə fe nyi, mə fe tè nyiə nyi, nyi se tə pə̀yn, ə pɛ̀ àtyaʼ akɨ̂m.”

⁹M nyi Njɔyn ànyì vâynvè, ə vɛ ə è fe kəpî tsôsvè kə ghàyn kûmə̀ nə ghâsènì ə pomə̂ sê Njisə̀s. Ghâsènì kolə ə̀təm əfètə̂ temɔ̀m kûmə̀ nə ghâsènì ə pomə̂ sê Njisə̀s. Ə tè tsə̀fse mi mə chum ndû mi elùʼ vɛ ə tsò nyi mə è zə kyìŋ ka, e tɔŋtə̂ nə Patmòs kûmə̀ nə m tè ndàʼa tom ə̀ Fèzhə̀ tsâ se ghɨə kûmə̀ Njisə̀s.

¹⁰Ə̀ tè nyi ə Pɛ̂pɛ ə fetuʼ, zuʼsə Fezhə̀sè ə njiə ə mì ewìyn mə zɨə kyə̀ ètɛ kə esɔŋ ə tɔŋ ə mì epàm,

¹¹ə pìə nə, “Nyàʼ ghɛ ghɨnə ə ò fe nyi ə tiynsə̂ ŋwàʼlè ə̀təyn sê ndɛ sə Fezhə̀sè esɛ̀mbɛ sɛ ə se nyi ə setɔ̂ŋ seghaʼâsè esɛ̀mbɛ mə za nyi Ɛfesùs, è Sɨ̀minà, è Pengamùm, è Tyàtilà, è Sandìs, è Fìlàndefìyà, è Làndisyà.”

¹²Mə pə̀ynsə̀ èwiyn se fe nə ə̀ wàmnə̀ ndè sê mi ə, ə fe èfɨa èsɛ̀mbɛ kə ə fɛte è ngôl sə̂ tɔmtə̂ sèlâm ətəyn.

¹³Fumə ə fètəyn èfɨa nə vɛ ə tè tomtə lâmsè ətəyn, fɨake tè tyəm kyaʼà kə kə wùə mə kə màʼ ndzɨse, se tso fɨə kə və ghòl, mə ke ə waflê pâŋ afɨake mə ə fɛte ə tə̂ ngôl.

¹⁴Nyuŋsə atu sə̂ vəynse tè fɨfə kə nyî pfɨ̀ə, shiə ə vəynghe e nyi kə andəm ewûske.

¹⁵Ghol ə vəynghe e nyaynə̂ kə nyî kə akas əchûŋ kyîke kə ə pûŋsè echi, kyə̀ vəyn e kô nyiə kə epɨ̂apɨa eghaʼâzè.

¹⁶È tè kyi mlî èsɛ̀mbɛ ə vəyn agho ekɔyn e twɔke, fɛ̂ etɔfe eghɔ̀ŋze ə fɨə ə vəyn cho mə ze təmə pɨ̂asvè èpɨ̀a, kyâʼ ə vəynze e nyaynə̂ kə kə ezhwi ashìŋə̀ kɛ chwì payn tɛ.

¹⁷Shɨ̂ŋə̀ kɛ ə m tè fe vəyn, ə pfɨ̀ə ə və shi nyi ke kə m kwu ndô, pîza è və ndə̀mə̀ àgho ekɔyn e twɔ ə vəynke ə mìə atu ə pìə sê mi nə, “Kə ò fayn, ə̀ nyi mi nyi zhə̀te fɨyn nyi kwùŋse,

¹⁸ə vɛ ə È Fo Ndamze, mə tə kwu, zôyn, fekə m nyîə ndamə nâʼà kə ghè tə ghayn. M nyi vɛ È ə è pì nə zhi tè kwu ə kɛsə̂ sè ndamə, nyi sə̂ nyi ke ndò sə teshìŋə̀ tekɨ̂m! Zôyn m kyi ndô tyaʼke se chɔʼ eluʼ vɛ ə ghɨə kwuəghe nyi ətəyn se nə̀yn nə ghənə kɛse pəyn endam.

¹⁹Nyiəmə, nyàʼ ghɛ ghɛ ə ò fe, əghɛ ə ghe nyi se kyàyn zôyn è ghɛ ə ghe nyi se tə wə̂ kyàyn ndò.

²⁰Ə̀ zɨnə nyi eghɛ endətə zɛ ə lì mɨ̀nə̀ èsɛ̀mbɛ ə ò fe ə mì agho nə̀zhiəke, è kɨsè fɨa vɛ èsɛ̀mbɛ ə tɔmtə lâmsè ətəyn mə ə fɛte ə tə̂ ngôl tsâ: Lì mɛ èsɛ̀mbɛ tyəm kə setsì esɛ̀mbɛ sê ndɛ sə Fezhə̀sè esɛ̀mbɛ, fɨa vɛ ə tɔmtə lâmsè ətəyn èsɛ̀mbɛ e tyəm sê ndɛ sə Fezhə̀sè esɛ̀mbɛ.”