Read Mmen Etyə̂yn ə paynsêzè 11 Bible Online

Etyə̂yn ə paynsêzè 11 - Mmen bible

Etyə̂yn ə paynsêzè 11

¹Epàm ətəyn, ə fo mbàŋ se mi, è kyâʼà kə mbàŋ zɛ ə fɨ̂aʼsə̀ fɨave ətəyn sê mi ə pìə nə, “Ndwi ə nduə fɨ̂aʼsə̀ ndɛ̂ ètsə̀mə èghaʼâ ə̀ Fèzhə̀, è kɨsè laŋ efoke, ə taŋə kəpî əghɨ ghɛ ə ghe ngɨmnə Zhə̀fè fumə ə fètə̂ ndɛ ètsə̀mə èghaʼâ.

²Ə ò ndù, kə ò fɨaʼse zhɔyn apɨəyn ə ndɛ ètsə̀mə èghaʼâ Fèzhə̀ kûmə̀ nə ə se nyi mə ə fo sê ghɨ etumə. Ghənə tə tsə̂lə̀ pofsə̂ tɔ̂ŋ èghaʼâ Èŋwaʼa sə senjɔŋ m̀ghɨm kyàʼ njò sepɛ̀.

³M nə̀ tomə sètsɛ̀ èsaʼ sɨmse, ə nyi ə̀ghɨ ə̀pɛ̀ mə ə màʼ ndzɨse kwuse, ə kwi ndàʼà tom ə̀ Fèzhə̀ sə mtuʼ kam è ghɨze pɛ̀ è m̀ghɨm tufə.”

⁴Tsɛ̀ sə esaʼ nə sɨ̂nə̀ nyi m̀kâʼ mə olìfmè m̀pɛ̀, è fɨa vɛ ə lâmsè tyəm ətəyn è pɨ̀a, ve tyəm ə Pɛ̂pɛ ə shi vɛ ə è saʼa chike.

⁵Ə wùə mɔ̀msè se ndəmsə̂ ə ghənə, ə wuse fɨ ə ghənə echo ə ve pofse wùə nə vɛ. Ə̀ nyi nyiəmə kə tə zhwiə nâʼàpî ndè vɛ ə è kyiŋə se zhwiə ghənə.

⁶Ghənə nyiə kyi àtyaʼ se kokyî eghol nə kə ze tso, kə ze tə tàʼa tso ashìŋə̀ kɛ ə ghənə kwîə ndâʼà tom ə̀ Fèzhə̀. Ghənə e kyi kepî àtyaʼ se nə̀yn nə tɔŋ sə mmòse kɛse sə mndəm, fɨyn kyi kepî àtyaʼ se nə̀yn nə nâʼàpî èkyì etsòs ekwəmnə èkè kyayn ə chi nâʼàpî ashìŋə̀ àkè kə ghənə kyiŋə.

⁷Ashìŋə̀ kɛ əghənə ndàʼà mɨ̂sè tom ə̀təyn, ə nyàm è pamə zɛ ə è fɨ fɛ epə ə ze lɔŋɔ tso ndùə kə ndô za, ə è no zhi ghənə.

⁸Ə pfɨyntə ghənə̂tè faŋ ke endom e twɔve ə tɔ̀ŋ èghaʼâ zɛ ə tè paynte Pɛ̂pɛ ə̀ ghənə ətəyn awâmnè. Ghɨə mɔ̀ʼɔ pîə nə tɔ̂ŋ èghaʼâ nə zɨnə mə njiə eluʼ ə Sondòmvè, kɨ̀sə Enjìp.

⁹Ghɨ tə fɨə kə ndaʼà tekɨ̂m, è tâŋ tekɨ̂m, wàmnə̀ kə tèwâmnè tèkɨ̂m, fɨnə kyaʼà kə èkyì ə tèkyaʼ tekɨ̂m, ə pəyn ə naynə tèpfɨyn tə ghənə̂tè sə mtuʼ mta è pɨaʼa, ə kwiynse nə kə wùə nə pfɨ̂mə̀ ghənə.

¹⁰Ghɨ ghɛ ə ghe ndamə ə chi tə nə̂ ə saŋnə̂ fɨnə zhiəsə̂ èwiyn ə ghənə̂vè, fo èfɨa se ghɔnyì ghe kûmə̀ nə fɨ̀aʼtè sɨ̂nə̀ sèpɛ̀ ə se kwu tè nyîə fo ètsôs ə chi sê ghɨghe.

¹¹Pîza, epàm ə mtuʼ mta è pɨaʼa, Zhə̀fè ə nə̀ zuʼ sɛ ə se fo ndamze ə nji ə ghənə ewìyn ə nə̀ ghənə ndwìə tyəmə̂, fâynzè ə ko ə̀ghɨ ə̀kɨ̂m ghɛ ə tè fe ghənə.

¹²Fɨ̀aʼtè seghaʼâ nə sɨ̂nə̀ sepɛ̀ ə se kɛse zòmə̀ ə zɨə kyə̀ e tɛ zhîzè kə è fɨ ekwùtwəyn ə pìə nə, “Ghàyn kɔʼ pəyn fayn!” Ghənə ə kɔʼɔ ekwùtwəyn əfètə̂ sèmbàʼ, paynsə̂ ghənə̂sè e tyəm naynə.

¹³Chike ə nə̂ʼə̀ nâʼà sə ŋaŋ ə tɔ̂ŋ èghaʼâ, kè ashìŋə̀ nə kɛ ə pofsə̂ àpâs ə sendɛke amɔ̀ʼ fumə ə tɔ̂ŋ èghaʼâ ezhoghɛ ə chyâtè səynse shîŋə̀ teghɨm, ə zhwitə̂ ə̀ghɨ kamse esɛ̀mbɛ̂. Fâynzè ə ko ə̀ghɨ ghɛ ə ghe faŋ fu nâʼà sə ŋaŋ, ghənə ə nyaʼâ sə̂ pomsə, tsîtə̀ Fèzhə̀ fɛ ə fe nyi ekwùtwəyn.

¹⁴Fekə, tsôs ekwəmnə vɛ ə ve nə̂ nə te ndu tepɛ̀ ə tsɛ̀, pîza tsôs ekwəmnə vɛ ə ve nə̂ nə te ndu teta e nyi se nə kwùʼə pə kə zôyn.

¹⁵Zôyn tsì ə̀mɔ̀ʼɔ̂ zɛ ə è nə̀ nə se ndu esɛ̀mbɛ ə tɔŋ sɔŋ ə vəynze. Mə zɨə sèkyə setɛse ekwùtwəyn se pìə nə, “Pɛ̂pɛ ə̀ ghâsènì yî vɛ ə è Chɔʼ Ndə̂m nyiə kyi àtyaʼ sə̂ saʼa mbi zôyn, nyi sə̂ saʼa kə ndò nâʼà kə ghè tə ghayn.”

¹⁶Chəʼ sɛ m̀ghɨm pɛ̀ njòse kyàʼ ə se tè tsɨs ə ghənə mkyə̀ mə tefɔ̀yn ə Zhə̀fè shi ə tɨmə ə̀ngwuʼ ə pfɨsə̂ tèkyaʼ tə ghənə̂tè ə chi ngɨmnə̂ fəynfe,

¹⁷pìə nə: “Pɛ̂pɛ Zhə̀fè, Pɛ̀ ètwɔʼ ekɨ̂m, vɛ ə ò nyì zôyn, mə ò tè nyiə nyi! Ghàs fo àzɔ̀ŋnè sê ghò kûmə̀ nə o fi tyaʼ kɛke ghaʼâkè, ə zhə̀tə̀ sə̂ saʼa mbi.

¹⁸Ghɨə Nglêkghè nyîə zafsə̂ ètɔŋ nâʼà sə ŋaŋ kûmə̀ nə shîŋə̀ kɛke ezafsə nə etɔŋke ə kwəyn, ashîŋə̀ kə saʼ ghɨ kwughe. Shîŋə̀kè ə kwəyn kə ò maʼte ghɨə ə fɨaʼa ghɛghe mə za nyi sèfɨ̀aʼtè sɛse, è ghɨ ghɛ ghe ə̀kɨ̂m ə ghe ngɨmnə zə zɛze, ə ghe ghaʼlə̂, è ghe tətə̂ghè. Shîŋə̀kè ə kwəyn kə ə pofse ghɨ ghɛ ə ghe pofsə mbi.”

¹⁹Epàm ətəyn, chondɛ ə ndɛ Fezhə̀ etsəməve ekwùtwəyn ə chwìə, mə fe Àtayntayn Mkàynkè ə fètəyn. Ghole tè nyiə mɨ̂anə̀, kûmə̀, pɨaytə̂, chike e nə̂ʼə̀, chichîme tso nâʼà setsɨ̀ fumə elùʼ.