Read Mmen Etyə̂yn ə paynsêzè 12 Bible Online

Etyə̂yn ə paynsêzè 12 - Mmen bible

Etyə̂yn ə paynsêzè 12

¹Chwìə èkayntə zhizè ə fɨə awulə, ə̀ nyi wùzhɔyn mə è və màʼ zhwize sə sendzɨs, njɔŋ e nyi ə vəyn etyə̂ ə̀ghòl, fɔ əte fɔ̀ynkè e nyi ə vəyn atu kyi m̀lî m̀ghɨm njò sepɛ̀.

²E tè nyi endwə̂, mə vayn se zafə vəyn se pîə, è ve chîə kûmə̀ nə vayn tè nyîə zafə vəyn.

³Chwìə e kayntə zhîzè ə fɨnə fɨə awulə, ə̀ nyi nyàm èghaʼâ zhîzè e tɔŋtə̂ nə ndlangɔ̀yn, pâŋə̀, kyi ètu èsɛ̀mbɛ, è ndɔŋ seghɨm, è fɔ tefɔ̀ynvè fumə etu.

⁴Kwiyn ə zə̂ynzè ə zə̂sə̀ àpâs mlìkè amɔ̀ʼ ə chi ezhoghɛ ə chyâtè lì mə təynmè pɨ̂as vetwɔ. Ndə̂plè zɛ ə tyəmə ə wùzhɔyn vɛ əshi ə è tè kyiŋə se piə za sè pfɨ̂tə̀ se kwɨlə va ə̀təyn, ashìŋə̀ kɛ è piə.

⁵Wùzhɔyn ə̀təyn ə piə vayn endômə̀, è ve nyi se tə saʼa te ndaʼ tèkɨ̂m, se no zhiə sèpàyn sə vəynse mə è kyi va kosê esəynze. Pîza ə tsofə va ə̀təyn ə kɔʼɔ è vəyn sê Zhə̀fè, elùʼ vɛ ə kyə̂ fə vəyn fə efɔ̀ynfè nyi.

⁶Wùzhɔyn ə̀təyn ə tə ndûə elùʼ ashəshəve, ə nyi eluʼ kə Zhə̀fè tè fɛte ndəm sê vəyn kə ə tə tɔ̂ʼnə̀ è vəyn fu sə mtuʼ kam è ghɨte pɛ̀ è m̀ghɨm tufə.

⁷Epàm ətəyn, ghɔŋze ə ndwìə ekwùtwəyn, Maykèl yî tsì sə vəynse e nô ndə̂plè ə̀təyn, ndə̂plè ə̀təyn e tsì sə zə̂ynsè e pɔŋɔ nò ghənə,

⁸pîza Maykèl yî tsì sə vəynse ə nò zhiə ndə̂plè ətəyn, ghənə e fɨyn kyi va luʼve ekwùtwəyn.

⁹Ə màʼà fɨsə̂ nyàm èghaʼâ zɛ ə tè tɔŋtə nə ndlangɔ̀yn ə chi. Ə̀ tè nyi mbam ètuʼ əshi zɛ ə tè tɔŋtə nə ndə̂plè, fɨnə tɔŋtə̂ kəpî Satàyn. Ə̀ tè nyi zə̂yn zɛ ə è tè lɛsə ghɨ mbiə əkɨ̂m. Ə màʼa tsosə̂ zə̂ynzè ə chi yî tsì sə zə̂ynsè kè sekɨ̂m.

¹⁰Epàm ətəyn, mə zɨə kyə̀ è zə fɨə pə̂ ekwùtwəyn pìə nə, “Zhə̀fè ghasènìfe ə sɔ̀zâ ghɨə vəynghe, zôyn è fɨaʼà è tyaʼ ə vəynke se saʼ kə fɔ̀yn, zôyn wùə vɛ è nyi mə è və chɔʼ ndəm nə̀ tyə̂nə̀ nə è nyîə kyi àtyaʼ se saʼ əghɨ ə̀kɨ̂m. Kûmə̀ nə ə màʼa tsose fa chi wùə vɛ ə è tè tyəm ə Zhə̀fè ghasènìfe əshi, ghâmə̀ ə̀ghɔnyì ə ghasènìghe shîŋə̀ tekɨ̂m.

¹¹Ghɔnyì ə ghâsènì nə ghɨ̀nə̀ ə nò ə zhiə vəyn tɔynə̂ m̀ndəm mə Va Ndzèm, tɔynə̂ ə səmɔʼ zɛ ə ghənə tè tsâ, è kɨsè nə ghənə tè nyîə nyi èpɨaʼtêzè se kwu ezhoghɛ ə kwuze pə̂yn.

¹²Nyiəmə, nâʼà ghàyn əkɨ̂m ghɛ ə ghàyn ndamə ekwùtwəyn, ghàyn e saŋnə̂! Pîza, e nyîə kwûəmnə̀ sê ghàyn ghɛ ə ghàyn ndamə ə chi è ghàyn ghɛ ə ghàyn ndamə ə enjwì ə fengwaŋve kûmə̀ nə ndə̂plè ə tso pəyn sê ghàyn, tɔŋ əvəyn ve zafə nâʼà sə ŋaŋ kûmə̀ nə è ke ndô nə shîŋə̀ ə vəynke kɛsə̂ tsɨ̂ə va.”

¹³Ə pə̀ kə nyàm zɛ ə tɔŋtə nə ndlangɔ̀yn za fe nə ə màʼà tsosê zə̂ynzè əchi, è ze sè nyɨŋə ə wùzhɔyn vɛ epàm ə è tè piə vâyn endômə̀ vɛ.

¹⁴Pîza ə fo tèghɛ̂ tə ambùʼə̀ ə ghaʼâkè sê vəyn kə è tə nyàm nə zɛ ə tè tɔŋtə nə ndlangɔ̀yn, ə è wulə ndu elùʼ vɛ ə tè pɨaʼte ndəm sê vəyn elùʼ ashəshəve, elùʼ vɛ kə ə tɔʼne è vəyn ətəyn sə sepìŋ sèta è pɨaʼa

¹⁵Nyàm nə zɛ ə tè tɔŋtə nə ndlangɔ̀yn ə tsiə m̀mo ə wùzhɔyn vɛ epàm, m̀ nyi kə tsò èghaʼâ, mə m̀ tè nyì se nə̀yn nə luʼ ətəynve lwiyn kə m̀ pɨaʼa ndo è vəyn.

¹⁶Pîza chike ə tsàmtə̀ wùzhɔyn ə̀təyn, ə kàʼa ndomə̀ àpùʼ ə fɨə ətəyn, tsò nə zɛ ə nyàm èghaʼâ zɛ ə tɔŋtə nə ndlangɔ̀yn fə tsɨ, ə nji tso ətəyn.

¹⁷Ndlangɔ̀yn ə̀təyn ə nyɔʼsə̀ ètɔŋ sê wùzhɔyn ə̀təyn nâʼà sə ŋaŋ ə ndò ndùə ndwîsə̀ èghɔŋ sê tɔŋ ə ndɛ ə wùzhɔyn ətəyn vɛ ə ghənə tè faŋ, ə nyi ə̀ghɨ̀ ghɛ ə ghe tè ndə̀mə lwɔ̂ŋ ə Fezhə̀vè, fɨnə fɛtə kyiə səmɔʼ zɛ ə Njisə̀s tè tyə̀n paynsê.

¹⁸Ndlangɔ̀yn ə̀təyn ə tyəmə kə etipîə ènjwì ə fengwaŋve.