Read Mmen Etyə̂yn ə paynsêzè 13 Bible Online

Etyə̂yn ə paynsêzè 13 - Mmen bible

Etyə̂yn ə paynsêzè 13

¹Mə ke fe nyàm èpamə è fɨə kɔʼɔ pə̂ enjwì ə fengwaŋve. È tè kyi sendɔŋ sèghɨm, è tuve esɛ̀mbɛ. Nâʼàpî ndɔŋ èkè tè nyiə kyi àfɔ ə te fɔ̀ynkè, nâʼàpî atu àkè e kyi èzə ze sôylə̀ Fèzhə̀.

²Nyàm èpamə nə zɛ ə m tè fe tè fusə̂ ndûə àpɛ, pîza kyi ə̀ghol ghe nyi kə ghə làŋəghe, è choze kə zə pìkəmze. Ndlangɔ̀yn ə̀təyn ə fo àtyaʼ ə vəynke sê nyàm èpamə ə̀təyn è kɨsè kyə̂ fə vəyn fə efɔ̀ynfè, è tyaʼə vəyn kə eghaʼâkè nə è zə saʼa ə̀ghɨ kə piə nyi zə̂ynzè ndlangɔ̀yn ə̀təyn.

³Tuə nyàm èpamə nə kɛ àmɔ̀ʼ tè kyàʼa kəpiə ə ndəmsê kəynke nâʼà sə ŋaŋ, pîza fiŋ ekwəmnə ətəynze e nyi mə ze ə zom. Mbi èkɨ̂m e nyi èkaynze ə chùmtə̀ nyàm èpamə ə̀təyn.

⁴Ghɨghe əkɨ̂m e ngɨmnə̂ ndlangɔ̀yn ə̀təyn kûmə̀ nə è tè nyi mə è zə fo tyaʼke sê nyàm èpamə ə̀təyn, ngɨmnə̂ kəpi nyàm èpamə ə̀təyn pîə nə̀, “Ə̀ nyi nâʼà ndè kə nyàm epamə zɨnə? Ə̀ kàʼa ə̀ no nde zə̂yn zə?”

⁵Ə zà nyàm èpamə ə̀təyn nə è zə wâmnə̀ kɔʼsə̂ èwiyn sôylə̀ Fèzhə̀. Ə zà kəpî zə̂ynzè nə è saʼ ghɨghe sə senjɔŋ m̀ghɨm kyàʼ njò sepɛ̀.

⁶È zə zhə̀tə̀ sə̂ sòlə̀ Fèzhə̀, è zɨə vəynze, è luʼ vɛ ə è ndamə ətəyn, è ghɨghe əkɨ̂m ghɛ ə ghe ndamə ekwùtwəyn.

⁷Ə tə zà kepî zə̂ynzè nə è no ghɨə eŋwaʼ ə Fezhə̀ghè ə è zhi ghənə. Ə fo zə̂ynzè ètyaʼke nə è zə saʼa nâʼà tètâŋ tèkɨ̂m, è ndaʼ tekɨ̂m, è kyì tə tewàmnè tekɨ̂m, è kyì tə tekyàʼ tekɨ̂m.

⁸Nâʼà ə̀ghɨ ə̀ kɨ̂m ə chi tə ngɨmnə̂ zə̂ynzè, ə̀ tsɛ̂ kə va ghɨ ghɛ ə tè nyi mə ə nyàʼ zɨə ghənə̂zè tsɔ̀fə kə pom mbi əfètə̂ ŋwàʼlè ə̀ghɨ ndaməghe mə ə̀ ghənə kyi Vâ Ndzè vɛ ə tè zhwi.

⁹“Ə̀ kyi pîndè tûŋneve, è və tɔ̀ʼɔ̀ zɨtə̂.

¹⁰Ə tè nyì se tə kyiə fà nâʼà pîndè, ə tə kyî fa kə ndò. Ə tè nyi se tə zhwi nâʼà pîndè efe eghɔŋ, ə tə zhwi ke ndò vəyn è fɛ̂ eghɔ̀ŋze. Zɨnə mə tyə̂nə̀ nə ghɨə Fezhə̀ghè kyi sə̂ kyi èkol ətəmze, è kyî epomə̂zè.”

¹¹Mə ke fe nyàm èpamə ə̀mɔ̀ʼɔ̂, è fɨə kɔʼɔ pə̂ ə chi. È tè kyi sendɔŋ sèpɛ̀ kə sendɔŋ sə vâ ndzèsè, pîza wâmnə̀ kə ndlangɔ̀yn.

¹²È ze saʼa ə̀ghɨ è tyaʼ èghaʼâ kɛ ə nyàm èpamə ə̀ shi zɛ tè kyi ə zə̂ynzè əshi, è zə ŋamnə̂ mbi è ghɨghe əkɨ̂m ghɛ ə tè ndamə ə mbi nə ə ngɨmnə̂ nyàmə̀ èpamə shi zɛ ə è tè kyi fiŋ zɛ ə ze tè nyi mə zə zom za.

¹³Nyàm èpamə nə zɨnə ə è tè nə̂ nə se ndu sepɛ̀ e nə̂ sechwìə sekayntəse, nə̂ pîə nə wusve ndo ekwùtwəyn ə ve tso pəyn ə chi, ə nâʼà pîndè fe.

¹⁴Tɔynə̂ ə sechwìə sekayntə sɛ ə tè za nə è zə nə̂ ə nyàm èpamə ə̀shi zɛ əshi, è zə lesə̂ ə̀ghɨ ə̀kɨ̂m ghɛ ə tè ndamə əchi. Nyàm èpamə ə̀təyn ə tsà se ghənə nə ghənə fɛte fɨ̂aʼsèkè sə̂ kɔʼsə̂ nyàm èpamə ə̀shi zɛ ətəyn ə tè ndəmse è fɛ̂ eghɔ̀ŋze pîza è pa ndamə zâ.

¹⁵Zhə̀fè ə zà nə nyàm èpamə ə̀mɔ̀ʼɔ̂ zɛ ə è tè nə̂ nə se ndu sepɛ̀ zhwise etùə afɨâʼsè ə nyàm èpamə ə̀ shike, kə fɨaʼsè ətəynke wâmnə̀ ə ke zhwi nâʼàpî ndè vɛ ə è tə nə è ngɨmnə̂ va fɨaʼsè ətəynke.

¹⁶È zə ŋamnə̂ kəpî ə̀ghɨ ə̀kɨ̂m, ə ghe tətə̂ghè è ghe ghaʼlə̂ghè, ghɨə kɛghe, è ghɨə afɨfghe, ghɨ ghɛ ə̀ va ekɔ̂s è ghɛ ghe nyi ekɔ̂s, nə ghənə fi chwìə ə ghənə agho ə nə̀zhiəke, ə̀ puzâ ə ghənə echo àtu.

¹⁷Wùə tè vayn kaʼa è zhɔyn kɨ̀sə se pəʼlê mə è kyi va chwìə zə̂yn, ə nyi èzə ə nyâm èpamə ə̀təynze, ə̀ puzâ ə nyi akɔ̂yn kɛ ə ke tyəm sə vəyn ezə.

¹⁸Zɨnə mə tyə̂nə̀ nə wùə kyi sə̂ kyi ètɔf engaŋtəze se zɨə kê akɔ̂yn ə nyâm èpamə nə kɨ̂yn. Nâʼàpî ndè vɛ è kyi tɔfze nyi taŋtə̂ kê eghɛ zɛ ə kɔ̂yn ə nyâm epamə nə kɨnə chwìtə̀ kûmə̀ nə kɔ̂yn ətəynke tyəm sə ezə ə wûəzè. Kɔ̂yn ətəynke e nyi 666.