Read Mmen Etyə̂yn ə paynsêzè 14 Bible Online

Etyə̂yn ə paynsêzè 14 - Mmen bible

Etyə̂yn ə paynsêzè 14

¹Mə ke naynê ə fe Vâ Ndzè ə mì ə shi, è ze tyəm ə pfɨnə̀ Zayɔ̀n, e ghɨghe kam ewə̀ è mghɨm kyàʼ njòse kyàʼ mə ə nyàʼ zə ə vəynze, è zə Pɨ̀a vəynze ə ghənə echo àtu.

²Mə zɨə kyə̀ ekwùtwəyn, è kô kə mmo ə m̀ tso epɨ̂apɨa, è kɨsè kə eghol epɨatəze. Kyə̀ zɛ ə m tè zɨ tè nyi kə kyə̀ ə̀ghɨ̀ enduŋghe ezhoghɛ ə ghənə puʼə nduŋ ə ghənə̂vè.

³Ghənə ə zhəmə njàŋ èfe ashi fekyə̀ fə efɔ̀ynfè, è ashi efɨa endamə vɛ èkwàʼ, è ashi ə sechəʼke. Wùə vîvè tè vayn kaʼa è zaʼle njàŋ ə̀təyn ə̀ tsɛ̂ kə va ghɨ nə ghɨ̂yn kam ewə̀ è mghɨm kyàʼ njò sekyàʼ ghɛ ə Zhə̀fè tè nyi mə fe ə zhɔyn tu ə ghənə̂vè.

⁴Ə̀ ghɨnə nyi ə ndômnè ghɛ ə ghe tè ndəm ngɨŋ sə ghənə̂sè sə̂ nyɨ̂ŋə̀ va è zəynghe, ə faŋə kə zamə è zə ghənə̂zè. Ə̀ nyi ghənə ə tè chùmtə Va Ndzè nâʼàpî ghayn kə è tè nduə. Zhə̀fè ə tə zhɔyn fɨsê tu ə ghənə̂vè ə fètə̂ ə̀ghɨ̀ msɔ̀ŋghe ə chi, ə fo ghənə kə m̀tam mə shîəm sê Zhə̀fè è Vâ Ndzè.

⁵Ə pâʼà tyəmə̂ kê ghənə kə əghɨ ewamə nə akaŋghe, kyi va tsasze.

⁶Mə ke fe tsì ə̀mɔʼɔ̂ è wulə̀ tsɛ̂ nâʼà ekwùtwəyn, kyi tom è chùŋ zɛ ə è tə ndamə faŋə se ndàʼa sê ghɨ ghɛ ə ghe nyi ə chi; È tè nyi se ndàʼà sê ghɨ tendaʼ tekɨ̂m, è ghɨə tetàŋ ghəkɨ̂m, wàmnə̀ kə tèwâmnè tèkɨ̂m, kyi ke tèkyì tekyàʼ tekɨ̂m.

⁷È zə pìə è kyə̀ ètɛ nə, “Ghàyn e fànə̀ Fèzhə̀, tsìtə̀ fəynfe kûmə̀ nə shîŋə̀kè ə kwəyn kə fe saʼ ghɨghe əkɨ̂m. Ghàyn ngɨmne vəyn vɛ ə è tè pom kwutwəynve, è chike, è njwî ə fengwaŋve, è mose mə se fɨə ə setɔŋ sə mmòse.”

⁸Tsì ə̀mɔ̀ʼɔ̂ nə se ndu sepɛ̀ ə pìə nə, “È və pfɨ̀! Papilɔ̀yn èghaʼâ ə pfɨ̀. È və tə nə̀yn nə ghɨghe əkɨ̂m tə Zhə̀fè, kèpî èghɨ kə fɨa ekwiəke lə̂ŋtə̀ wùndômə̀ nə e mɨ lɨ̀ mə ètɛm, lɨ̀ mə təynmè ə nə̀ è nə̂ ə̀ghɛ ə nyələghe.”

⁹Tsì ə̀mɔ̀ʼɔ̂ nə se ndu seta ə chùmtə̀ ghənə, pîə è kyə̀ ètɛ nə, “Naʼapi ndè vɛ ə è ngɨmnə nyàm èpamə ə̀təyn, è fɨaʼsè ə vəynke, ə fiə chwìə ə̀ vəyn ə ghənə echo àtu, kɨ̀sə ghənə agho,

¹⁰ə Zhə̀fè tə nə ə Fe ə fɨsə̂ èndwɔ̂ sê ghənə, ə fe fo tsôsvè sê ghənə nâʼà sə ŋaŋ, kè kə mlɨ̂ mə ètɛ ndɔ̀ʼɔ sɔmnə ə Zhə̀fè ndə̀m ə wà ə fo nə ghənə mɨ. Zhə̀fè tə nyâplə̀ ghənə è wusve, è fɨa kyîke ke lɛ̂ pâŋə̀ fuə mə ə tɔŋtə̂ nə sɔlfɔ̀ ə tsì sə eŋwaʼase əshi, è kɨsè ə Vâ ndzè əshi.

¹¹Wus vɛ ə ve nyâplə̀ è ghənə tə ndɨmə̂ va nâʼà kə ghè tə ghayn. Zɨ̂tèzè tə nə̂ ə ze ə va èchwì pî ètuʼve sê ghɨ ghɛ ə ngɨmnə nyàm èpamə ə̀təyn è fɨaʼsè ə vəynke, è sê nâʼàpî ndè vɛ ə è tə fiə chwìə èzə ə vəynze.”

¹²Zɨnə mə tyə̂nə̀ nə ghɨə Fezhə̀ kyi sə̂ kyi ekol ətəmze, əghɨ ghɛ ə ndə̂mə̀ saʼ tə Fezhə̀tè, pomə sê Njisə̀s è təm ə ghənə̂ghè əkɨ̂m.

¹³Mə fɨnə zɨə kyə̀ kə è pə̀ ekwùtwəyn pìə nə, “Nyàʼ ghɛ zɨ̂nə̀ nyi nə, Se zhə̀tè zôyn nyi se ndù əshi, saŋnêzè nyì nâʼà pî se ndè vɛ ə è kwu mə è chùmtə̀ Pɛ̂pɛ è təm ə vəynghe əkɨ̂m!” Zuʼse Ŋwaʼase ə fɨnə pə̀ynsə̀ kə nə, “Ze nyi səmɔʼ. Ghənə nə̀ zɨ̂tə̀ ə ghənə ə tefɨ̀aʼ kûmə̀ nə Zhə̀fè nə̀ mâʼtə̀ ghənə ə ghənə efɨ̀aʼ.”

¹⁴Epàm ətəyn, mə naynə̂ ə fe àfɨa ke kyaʼà kə wùə m̀sɔ̀ŋ ə è tsɨs ə fètə̂ sèmbàʼ se fɨfə̂sè, mə è və sò fɔ efɔ̀ynkè ə və atu, mə ə fɛte è ngôl. È tè kyi fenyi fə awiynfe ə və gho, fe tɔfə kə nyî.

¹⁵Tsì ə̀mɔ̀ʼɔ̂ ə fɨə pə̂ ə ndɛ ètsə̀mə, ə tɔŋə̂ nâʼà è kyə̀ ètɛ vɛ ə è tè tsɨs etûə sèmbàʼ sɛ nə, “Njì nyi fə awiyn fɛfe ò kwìə efɨa ətəyn kûmə̀ nə shîŋə̀kè ə kwəyn, fɨa əchi və pi kwəyn se kwì.”

¹⁶Nyiəmə, è və vɨ̀ŋə̀ fènyi fə vəynfe, ə kwìə èfɨa vɛ ə ve tè nyi mə ve ə kweyn se kwì ə chi.

¹⁷Mə fɨnə fe kə tsì ə̀mɔ̀ʼɔ̂ fɨ pə̂yn ə ndɛ̂ ètsə̀mə ekwùtwəyn kyi kepî fènyi fə awiynfe, fe tɔfə kə nyî.

¹⁸Nyiəmə, tsì ə̀mɔ̀ʼɔ̂, ə fɨə pə̂ alaŋ efoke, ə̀ nyi zɛ ə è tè tɔ̀ʼnə èwusve, ə tɔŋə̂ è kyə̀ ètɛ vɛ ə è tè kyi nyifə awiyn fe etɔfəfe nə, “Njì nyi fɛfe tɔfəfe ə se sèsoʼ sə etwɔm vɛ ə tɔŋtə nə senglîp əfètə̂ àfùʼ mkàʼ mlɨ̀kè mə za nyi achi.

¹⁹Tsì ətəyn ə vɨŋə̀ tsosə̂ fènyi fə awiynfə ətəyn fe ə chi ə kɔ̀nə̀ ètwɔm afùʼ mkàʼ mlɨ̀kè ə ndə̀mə̀ tsosə̂ elùʼ eghaʼâ vɛ ə nyûʼə̀ fɨsə lɨ̀mè ətəyn. Luʼ nə vɨnə mə tyəm kə eluʼ vɛ ə Zhə̀fè pɔynsə ghɨ epighe ətəyn.

²⁰Ə tè fɨə pə̂ ə fètə̂ tɔ̂ŋ èghaʼâ tsɔ̀fə kə se ndù elùʼ vɛ ə tè nyùʼə lɨ̀mè ətəyn. Kə ə nyûʼ za, ndə̂mè ə fɨə fumə elùʼ mlɨ̀vè sə akwuŋ lɔŋə̂ zaʼâ tàm è pɨaʼke, kwuŋə ndûə fɨə sèmâyl ghɨze pɛ̀.”