Read Mmen Etyə̂yn ə paynsêzè 15 Bible Online

Etyə̂yn ə paynsêzè 15 - Mmen bible

Etyə̂yn ə paynsêzè 15

¹Mə fɨnə fe chwìə è kayntə zhîzè awulə. Ə̀ tè nyi setsì èsɛ̀mbɛ, è tsôs tekwuəmnə te esɛ̀mbɛ, mə ghənə tè nyi se kwuŋsəse kûmə̀ nə tɔŋ ezaf ə Fezhə̀ vɛ ə fe tyə̂nə̀ tɔynə̂ ə ghənə ə mì.

²Mə ke fe afɨa kɛ ə ke tè kyàʼa kə anâynè mə ə fɨə èwusve ke nyɨŋ kə ènjwî ə fengwaŋve. Mə fɨnə fe ə̀ghɨ ghɛ ə nô zhi nyàm èpamə zɛ, è fɨaʼsè vəynke, è wùə vɛ ə zə vəynze tyəm sə akɔ̀yn. Ghənə tè tyəm etipìə ènjwì ə fengwaŋve kyi tènduŋ əgho mə ə̀ fo Fezhə̀ sê ghənə,

³zhəmə sènjàŋ sə Mosîsè, ə wùə èfɨaʼa ə̀ Fèzhə̀, è njàŋ sə Vâ Ndzèsè piə nə: “Pɛ̂pɛ Zhə̀fè, Pɛ̀ etwɔʼ ekɨ̂m. Ò nə̀ əghɛ ə ghaʼâ ə kayntəghe! Ò nyi fɔ̀yn se mbi èkɨ̂m. Ndom tɛte nyi chichi fɨyn nyi səmɔʼ!

⁴Ə̀ tə fânə̀ va nde ghô ə Pɛ̂, ə̀ tə faŋə ndè se pomsê ezə zɛ zə? Ə̀ nyi ke ghò, ghô nɨŋ ə ò nyi eŋwaʼze. Ghɨə mə fɨ ndaʼ tekɨ̂m tə pə̂ ngɨmnə̂ ghò, kûmə̀ nə o chwìtè sê nâʼàpî ndè nə ò saʼa ə̀ghɨ ə̀kɨ̂m chichi.”

⁵Epàm ə zɨnə mə, mə fe ndɛ ètsə̀mə ekwùtwəyn mə è za tyəm sə atu ə fepfɨ̀ kɛ ə ghɨ ə Isìlâyghè tè pɛ elùʼ ashishive se ndə̀m elwɔ̂ŋ ə Fezhə̀vè ətəyn èghɨm. Chondɛ ndɛ ètsə̀mə ə̀təynve tè nyi mə ə chwìə.

⁶Tsì sɛ èsɛ̀mbɛ ə se tè kyi tsôs tekwuəmnə tɛ èsɛ̀mbɛ ə fɨə pə̂ fumə ə ndɛ ètsə̀mə, mə se ə màʼ ndzɨse se fɨfə kə nyî, nyaynə̂, mə ə kol waflê pɨ̂aŋ ə sendzɨsve ə ghənə engwàŋtè mə ə fɛte è ngôl.

⁷Fɨa endaməke amɔ̀ʼ əfètə̂ èfɨa endamə vɛ è kwàʼ ə fo ekwaŋ èsɛ̀mbɛ mə ə fɛte è ngôl sê tsì sɛ èsɛ̀mbɛ mə lɨ̀mè ə lwiyn ətəyn. Lɨ̀ mə təynmè e tyə̂nə̀ nə Zhə̀ fɛ fe ndamə faŋə nə̀ pɔynsə̂ ə̀ghɨ ghɛ ə ghe tɛ ètuve nâʼà sə ŋaŋ.

⁸Ndɛ ètsə̀mə ə̀təyn tè nyi mə ndəʼfe ə lwiyn ətəyn mə fe tyə̂ynə̀ epomsê ə Fezhə̀zè, è tyaʼ ə vəynke, mə wùə tè vayn kaʼa è nji fumə ə ndɛ ètsə̀mə, ə̀ tsɛ̂ kə va mə tsôs tekwuəmnə tɛ èsɛ̀mbɛ ə tsì sɛ èsɛ̀mbɛ tè pəyn è təynte ə mì.